བོད་མི་གྲངས་ ༥༩༠༨ ལྷག་ཉག་ཆུའི་མེ་སྐྱོན་ཁྲོད་ནས་གནས་སྤོ་བྱས་འདུག

བོད་ཉག་ཆུ་རྫོང་དུ་མེ་སྐྱོན་ཤུགས་ཆེ་རུ་ཕྱིན་རྐྱེན་ས་གནས་གསུམ་གྱི་ཁྱིམ་ཚང་ ༡༣༦༠ དང་མི་གྲངས་ ༥༩༠༨ ལྷག་གནས་སྤོ་བྱས་འདུག

བོད་དཀར་མཛེས་ཁུལ་ཉག་ཆུ་རྫོང་མགར་ར་གྲོང་རྡལ་གྲུ་བསུ་སྟོད་པ་གྲོང་ཚོའི་ནགས་ཚལ་མེ་སྐྱོན་ཤུགས་ཆེ་རུ་ཕྱིན་རྐྱེན། ད་ལྟའི་ཆར་མགར་ར་གྲོང་རྡལ་གྱི་ཁྱིམ་ཚང་ ༧༤༢ དང་མི་གྲངས་ ༢༦༥༥ ། ཆུ་ཁ་གྲོང་རྡལ་གྱི་ཁྱིམ་ཚང་ ༤༣༥ དང་མི་གྲངས་ ༡༨༧༣ ། མཁར་རིང་པོ་ཡུལ་ཚོའི་ཁྱིམ་ཚང་ ༡༨༣ དང་མི་གྲངས་ ༡༣༨༠ བཅས་ཁྱོན་ཁྱིམ་ཚང་ ༡༣༦༠ དང་མི་གྲངས་ ༥༩༠༨ ལྷག་གནས་སྤོ་བྱས་ཡོད་པ་མ་ཟད།  དར་མདོ་གྲོང་ཁྱེར་ར་རྔ་ཁ་གྲོང་རྡལ་ནས་ལི་ཐང་རྫོང་བར་གྱི་འགྲིམ་འགྲུལ་ལམ་ཁ་བཀག་སྡོམ་བྱས་ཡོད་འདུག

ཟླ་འདིའི་ཕྱི་ཚེས་ ༡༥ ཉིན་གྱི་ཕྱི་དྲོའི་ཆུ་ཚོད་ ༥ པ་ཙམ་ལ་བོད་དཀར་མཛེས་ཁུལ་ཉག་ཆུ་རྫོང་མགར་ར་གྲོང་རྡལ་གྲུ་བསུ་སྟོད་པ་གྲོང་ཚོར་ནགས་ཚལ་མེ་སྐྱོན་ཤོར་ཡོད་ཅིང་། ཕྱི་ཚེས་ ༡༦ ནས་མེ་སྐྱོན་གྱི་འབར་ཤུགས་ཆེ་རུ་ཕྱིན་ཡོད་པ་དང་། ཕྱི་ཚེས་ ༡༧ ཉིན་ཉག་ཆུ་རྫོང་གི་ལྷོ་ནུབ་དང་། བྱང་ཤར། ནུབ་བྱང་བཅས་ས་གནས་གསུམ་གྱི་ཕྱོགས་སུ་མེ་ཤུགས་མཆེད་བཞིན་ཡོད་པས། ས་གནས་གྲོང་ཚོ་མང་པོར་གནོད་སྐྱོན་ཐེབས་ཏེ་ས་གནས་གཞན་དུ་གནས་སྤོ་བྱེད་བཞིན་ཡོད་འདུག

རྒྱ་གཞུང་གི་གསར་ལམ་ཁག་ཏུ། ཐེངས་འདིའི་མེ་སྐྱོན་ཆེད་མེ་གསོད་མཁན་མི་གྲངས་ ༡༢༠༠ ལྷག་དང་།  ཐད་འཕུར་གནམ་གྲུ་ ༥ ཡིས་ཡུལ་དངོས་སུ་ལས་དོན་སྒྲུབ་བཞིན་ཡོད་སྐོར་དང་། སི་ཁྲོན་ནགས་ཚལ་མེ་ཟོན་སྤྱི་ཁྱབ་རུ་ཁག་གིས་མི་ ༨༣༡ དང་ཐད་འཕུར་གནམ་གྲུ་ ༣  ཛ་དྲག་གི་རོགས་སྐྱོར་བྱེད་བཞིན་ཡོད་སྐོར།  དེ་བཞིན་ཡུན་ནན་ནགས་ཚལ་མེ་ཟོན་སྤྱི་ཁྱབ་རུ་ཁག་གིས་མི་གྲངས་ ༧༥༠ དང་རླངས་འཁོར་ ༡༤༧ རོགས་རམ་བྱེད་བཞིན་ཡོད་ལུགས་ལས། ཐེངས་འདིའི་མེ་སྐྱོན་ཁྲོད་དུ་ས་གནས་མི་མང་དང་ཁང་པ་སོགས་གནོད་སྐྱོན་ཐེབས་པའི་གནས་ཚུལ་ཅི་ཡང་བསྒྲགས་མི་འདུག

འདས་ལོའི་ཕྱི་ཟླ་ ༥ ཚེས་ ༣༠ ཉིན་དཀར་མཛེས་ཁུལ་ཉག་ཆུ་རྫོང་མར་རུ་མཚོ་གྲོང་རྡལ་ཐང་འཇོར་གྲོང་ཚོའི་ཉེ་འདབས་ཀྱི་ནགས་ཚལ་ལ་མེ་སྐྱོན་ཚབས་ཆེན་བྱུང་ཡོད་ཀྱང་། མང་ཚོགས་གནས་སྤོར་དང་མི་མང་ལ་ཤི་རྨས་སོགས་ཀྱི་དོན་རྐྱེན་བྱུང་མེད་སྐོར་རྒྱ་ནག་གིས་བསྒྲགས་ཡོད་ཅིང་།

ཕྱི་ལོ་ ༢༠༡༧ ལོར་བོད་ཉག་ཆུ་ཁ་རྫོང་གི་རྒྱ་ཁྱོན་སྤྱི་ལེ་ ༡༠༠ ཙམ་ལ་མེ་སྐྱོན་ཤོར་ཡང་རྒྱ་ནག་གིས་རོགས་སྐྱོར་བྱས་མེད་པ་མ་ཟད། ཕྱི་ལོ་ ༢༠༡༢ ལོར་དཀར་མཛེས་ཁུལ་ལི་ཐང་རྫོང་གི་མོ་ལྷ་གྲོང་ཚོ་དང་ཉག་ཆུ་རྫོང་གི་དེས་ཚང་གྲོང་ཚོ་གཉིས་བར་གཟའ་འཁོར་གཅིག་ལྷག་རིང་མེ་སྐྱོན་ཤོར་སྐབས་ཀྱང་མེ་གསོད་རུ་ཁག་སོགས་ཀྱི་རོགས་སྐྱོར་བྱས་མེད་ཁར། དེ་ནི་རྒྱ་ནག་གཞུང་གིས་ཆེད་དུ་མེ་བརྒྱབ་པ་ཡིན་པར་ས་གནས་མི་མང་ལ་དོགས་གཞིའང་བྱུང་ཡོད་པ་རེད། དེ་བཞིན་ཕྱི་ལོ་ ༢༠༡༢ ལོར་སྨར་ཁམས་རྫོང་གི་ནགས་ཚལ་ཆེ་ཤོས་ལ་མེ་སྐྱོན་ཤོར་ནས་ཟླ་གཅིག་མ་ཟིན་ཙམ་འགོར་ཡང་རྒྱ་ནག་གཞུང་གིས་སྣང་མེད་དུ་བཞག་སྟབས། ས་གནས་མི་མང་གིས་ཉིན་མཚན་དབྱེ་མེད་ཀྱིས་ཉིན་གྲངས་ཉི་ཤུ་ལྷག་རིང་མེ་གསོད་ཐབས་ཀྱི་ལས་ཀ་བྱེད་དགོས་བྱུང་ཡོད་པ་རེད།

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།