བོད་རིགས་སྒྱུ་རྩལ་བ་བདེ་ཆེན་ཤག་ཟེར་བས། རྒྱ་གཞུང་གིས་བོད་ནང་གི་བོད་ཕྲུག་ས་ཡ་གཅིག་ལྷག་ལ་ཚད་ལྡན་གྱི་སློབ་སྦྱོང་སྤྲད་དེ་དམིགས་བསལ་གོ་སྐབས་སྤྲོད་བཞིན་ཡོད་ཚུལ་བརྗོད་ནས་རྒྱ་གཞུང་ལ་ཐུགས་རྗེ་ཆེ་ཞུས་འདུག
ཉེ་ལམ་སྤྱི་ཚོགས་སུ་བོད་རིགས་སྒྱུ་རྩལ་བ་བདེ་ཆེན་ཤག་ཟེར་བ་ཞིག་གིས། སུད་སུ་ཇི་ནི་ཝ་ཡི་ལྷན་ཚོགས་ཤིག་གི་ཐོག བོད་ནང་རྒྱ་ནག་གཞུང་གིས་གཉེར་མུས་ཡིན་པའི་བཅའ་སྡོད་སློབ་གྲྭའི་དགེ་མཚན་ཟེར་བ་དང་། དེས་ཕན་འབྲས་འཐོན་གྱི་ཡོད་རབས་བཤད་ཡོད་པར། ཁ་སང་བོད་མི་མང་སྤྱི་འཐུས་ལྷན་ཚོགས་སུ་གླེང་སློང་བྱས་ཡོད་སྟབས། ཁ་སང་དགོང་མོར་མོས་གསལ་བཤད་ཀྱི་བརྙན་ཐུང་ཞིག་སྤེལ་ནས། རྒྱ་ནག་གཞུང་དང་འབྲེལ་བ་མེད་པའི་ཁར་སོ་ཉུལ་བ་གཏན་ནས་མིན་སྐོར་བཤད་འདུག
ཁ་སང་ཕྱི་ཚེས་ ༢༡ གི་དགོང་མོར་བདེ་ཆེན་ཤག་གིས་གསལ་བཤད་བརྙན་ཐུང་ཞིག་སྤེལ་བའི་ནང་། ཁོང་མོས་བོད་ཕྱི་ནང་གཉིས་ཀྱི་བོད་མི་བར་ལ་གླུ་དབྱངས་བརྒྱུད་ནས་འབྲེལ་ལམ་འཛུགས་ཐབས་བྱེད་ཀྱི་ཡོད་ཅིང་། ཉེ་ལམ་རྒྱ་ནག་གཞུང་གིས་འགྲོ་གྲོན་བཏང་ནས་བོད་ཕྲུག་རྣམས་ལ་ཤེས་ཡོན་སྤྲོད་པའི་གོ་སྐབས་ཤིག་ཐོབ་ཡོད་སྟབས། དེའི་ཐད་བཙན་བྱོལ་བོད་མི་རྣམས་ཀྱིས་དགག་པ་བྱ་རྒྱུ་མེད་པའི་ཁར། བཅའ་སྡོད་སློབ་གྲྭ་ཁག་ཏུ་བོད་ཀྱི་སྐད་ཡིག་ཡག་པོ་སློབ་ཀྱིན་ཡོད་པ་མ་ཟད། བོད་ནང་གི་བོད་ཕྲུག་ས་ཡ་གཅིག་དང་ཕྱེད་ཀ་ལྷག་ལ་སློབ་སྦྱོང་ཡག་པོ་སྤྲོད་ཀྱིན་འདུག་པས། དེར་དགག་པ་བྱ་རྒྱུ་མེད་སྐོར་བཤད་འདུག་ཀྱང་། ཁོང་མོ་རྒྱ་ནག་གཞུང་དང་འབྲེལ་བ་མེད་པའི་ཁར་སོ་ཉུལ་བ་གཏན་ནས་མིན་སྐོར། བོད་མི་ཚོས་བོད་ཕྱི་ནང་གཉིས་ཀྱི་ན་གཞོན་ཚོར་བསམ་བློ་བཏང་ནས་ལས་དོན་གཉེར་དགོས་པའི་རེ་སྐུལ་ཡང་བྱས་འདུག
ཟླ་འདིའི་ཕྱི་ཚེས ༡༨ ཀྱི་དགོང་མོར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྐོར་གྱི་ལྷན་ཚོགས་ཤིག་གི་སྟེང་བདེ་ཆེན་ཤག་ཟེར་བ་ཞིག་གིས་སྐར་མ་བཅུ་དང་སྐར་ཆ་༥༧ (https://www.youtube.com/watch?v=5PtqUdQVN18) རིང་བོད་ནང་གི་བཅའ་སྡོད་སློབ་གྲྭ་སོགས་ཀྱི་སྐོར་ལ། འདས་ལོར་ལྷ་སའི་གཞུང་ཟེར་བ་ཞིག་གིས་བོད་ནང་དུ་རིག་གཞུང་འཁྲབ་སྟོན་བྱེད་དགོས་པའི་མགྲོན་ཤོག་ཅིག་འབྱོར་བྱུང་ལ། ང་རང་ལོ་གསུམ་ཙམ་ནས་སུད་སིར་འཚར་ལོངས་བྱུང་ཡང་། མི་ལོ ༦༤ ཡི་རྗེས་ལྷ་སར་བསྐྱོད་རྒྱུའི་གོ་སྐབས་བྱུང་བར་དགའ་ཚོར་ཆེན་པོ་བྱུང་ལ། བོད་ནང་གི་ས་གནས་གང་ས་གང་དུ་བོད་སྐད་འཆད་ཀྱིན་པ་ཆེས་ཐོག་མ་གོ་བྱུང་བས། རང་ཁྱིམ་དུ་ལོག་པའི་ཚོར་སྣང་བྱུང་། ཅེས། རྒྱ་ནག་གཞུང་གིས་ཁོ་མོ་ལྷ་སར་སྐད་བཏང་ནས་རིག་གཞུང་འཁྲབ་སྟོན་བྱེད་དུ་བཅུག་པར་དགའ་ཚོར་ཆེན་པོ་བྱུང་ཡོད་སྐོར་བཤད་འདུག
ཡང་མོས། འདས་པའི་ལོ་ཤས་རིང་རྒྱ་ནག་གཞུང་གིས་བོད་ནང་གི་བོད་ཕྲུག་ཡ་ས་གཅིག་ཙམ་ལ་ཚད་ལྡན་གྱི་སློབ་སྦྱོང་སྤྲད་ཡོད་པས། ངས་བོད་ནང་གི་གཞོན་སྐྱེས་ཚོའི་ཚབ་བྱས་ནས་ཁོང་ཚོར་དམིགས་བསལ་གྱི་གོ་སྐབས་སྤྲད་པར་ཐུགས་རྗེ་ཆེ་ཞུ་རྒྱུ་ཡིན་ལ། རྒྱ་ནག་གཞུང་གིས་ ༢༠༡༩ བར་བོད་རང་སྐྱོང་ལྗོངས་ཀྱི་བོད་མི་ས་ཡ་གཅིག་དང་ཕྱེད་ཀ་ལྷག་དབུལ་གྲོལ་ཟེར་བ་བྱས་པར་བསྔགས་བརྗོད་འོས་པ་ཞིག་རེད། ཁམས་པའི་བརྙན་འཕྲིན་(Khamba TV) བརྒྱུད་བོད་ནང་གི་བཅའ་སྡོད་སློབ་གྲྭའི་སྐོར་ལ་རྒྱུས་ལོན་བྱུང་བ་བརྒྱུད། བོད་ནང་གི་བཅའ་སྡོད་སློབ་གྲྭ་ཁག་ཏུ་བོད་ཡིག་སློབ་ཁྲིད་དང་། བོད་ཕྲུག་ཚོས་བོད་ཡིག་འབྲི་ཀློག་ཐུབ་ཀྱི་འདུག ཅེས་དང་། བཙན་བྱོལ་ནང་ཡོད་པའི་བོད་མི་ཚོས་བོད་ཀྱི་སྐད་ཡིག་བདག་ཉར་ཚད་ལྡན་ཞིག་བྱེད་ཐུབ་ཀྱི་མེད་པས། བོད་ནང་གི་གཞོན་སྐྱེས་ཚོས་བདག་ཉར་བྱས་ནས་མི་རབས་རྗེས་མར་བརྩི་སྤྲོད་བྱེད་དགོས་སྐོར་དང་། རྒྱ་ནག་གཞུང་གིས་བོད་ནང་སྤེལ་མུས་ཡིན་པའི་བཅའ་སྡོད་སློབ་གྲྭའི་ལས་གཞི་དེ་ལམ་ལྷོང་དང་དོན་འཁྱོངས་ཡོང་བའི་རེ་སྨོན་བྱེད་ཀྱི་ཡོད་ལུགས་བཤད་འདུག
དེ་བཞིན་རྒྱ་གར་ནང་གི་བོད་དོན་དང་བླངས་ཞུ་གཏུག་ཚན་པས་ངོ་རྒོལ་གྱི་བསྒྲགས་གཏམ་ཞིག་སྤེལ་བའི་ནང་། བདེ་ཆེན་ཤག་གིས་བོད་ཀྱི་ཚབ་ཏུ་ཤི་ཙང་ཟེར་བ་དང་རྒྱ་ནག་གཞུང་གིས་བོད་ཕྲུག་ས་ཡ་མང་བཙན་གྱིས་བཅའ་སྡོད་སློབ་གྲྭ་ཁག་མངག་གཏོང་བྱེད་ཀྱིན་ཡོད་པར་འཁྱོག་བརྗོད་བྱས་པར་ངོ་རྒོལ་བྱེད་ཀྱི་ཡོད། ང་ཚོར་མོའི་དོན་དང་ལྡན་པའི་གསལ་བཤད་དགོས་ལ། ལྷག་པར་མོའི་བོད་ནང་གི་བཅའ་སྡོད་སློབ་གྲྭའི་ལྟ་ཚུལ་དང་འབྲེལ་བའི་ཐད་ལ་གསལ་བཤད་ནན་མོ་དགོས། ཞེས་གསལ་འདུག
རྒྱ་ནག་ཉིན་རེའི་གསར་ཁང་(China Daily) གི་ཡུ་རོབ་ཁུལ་གྱི་འགན་འཛིན་ཁྲིན་ཝེ་ཧྥ་(Chen Weihua) ཟེར་བ་ཞིག་གིས་ཨེག་སི་(X) སྤྱི་ཚོགས་དྲ་ལམ་དུ། བོད་རིགས་སྒྱུ་རྩལ་བ་བདེ་ཆེན་ཤག་ཟེར་བ་ཞིག་གིས་སུད་སི་ཇེ་ནི་ཝ་རུ་ཚོགས་པའི་ལྷན་ཚོགས་ཤིག་གི་ཐོག རྒྱ་ནག་གཞུང་གིས་བོད་ནང་སྤེལ་མུས་ཡིན་པའི་བཅའ་སྡོད་སློབ་གྲྭའི་ལས་གཞི་དེ་ལམ་ལྷོང་དང་དོན་འཁྱོངས་ཡོང་བའི་རེ་སྨོན་དང་། དེ་སྔོན་མོ་རང་བོད་ཀྱི་རྒྱལ་ས་ལྷ་སར་རིག་གཞུང་འཁྲབ་སྟོན་དུ་སྐྱོད་སྐབས། ཚང་མས་ས་གནས་གང་སར་བོད་སྐད་བཤད་ཀྱི་ཡོད་པས་དགའ་ཚོར་བྱུང་ཡོད་ལུགས་བཤད་ཡོད་སྐོར་དྲིལ་བསྒྲགས་བྱས་འདུག
འདས་པའི་ལོ་ཤས་གོང་ནས་རྒྱ་ནག་གཞུང་གིས་བོད་པའི་སློབ་ཕྲུག་བརྒྱ་ཆ་བདུན་ཅུ་ལྷག་དང་། བོད་པའི་སློབ་མ་བཞིའི་ནང་གི་སློབ་མ་གསུམ་བཙན་གྱིས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་བཅུག་ནས། ད་སྔ་བར་ལོ་ ༦ ནས་ ༡༨ བར་ཡིན་པའི་བོད་པའི་སློབ་མ་ཁྱོན་འབུམ་ ༨ ནས་ ༩ བར་དབང་སྒྱུར་ལམ་ལུགས་ཀྱི་བཅའ་སྡོད་སློབ་གྲྭའི་ནང་གཏན་སྡོད་བྱེད་མུས་ཡིན་པ་དང་། བྱིས་པ་ལོ་བཞི་དང་ལྔ་ཅན་ཡང་སློབ་གྲྭ་དེ་དག་གི་ནང་བཙན་གྱིས་འཇུག་གི་ཡོད་པ་རེད།
འདས་པའི་ལོ་ཤས་རིང་རྒྱ་ནག་གཞུང་གིས་བོད་ནང་གི་ས་ཁུལ་མང་དག་ཅིག་ཏུ་བཅའ་སྡོད་སློབ་གྲྭ་བཙུགས་ནས་བོད་ཕྲུག་རྣམས་བཙན་གྱིས་མངག་གཏོང་བྱས་པར། རྒྱལ་སྤྱི་ཁྱོན་ཡོངས་ནས་གནོན་ཤུགས་དང་གླེང་སློང་ཤུགས་ཆེན་བྱས་སྟབས། འདས་ལོར་རྒྱ་ནག་གོ་ལའི་དུས་བབ་ཀྱིས་བོད་ནང་གི་བཅའ་སྡོད་སློབ་གྲྭ་ཁག་གི་སྐོར་ལ་ཡིག་བརྙན་གཉིས་ཀྱི་ཐོག་ནས་གནས་ཚུལ་སྤེལ་ནས་དཀར་འདོན་བྱེད་ཐབས་དང་། འབུམ་རམས་པ་རྒན་རྒྱལ་ལོ་མཆོག་ཚུད་པའི་ཚོགས་པ་མང་དག་ཅིག་གིས་བོད་ནང་གི་བཅའ་སྡོད་སློབ་གྲྭའི་སྐོར་ལ་འཁྱོག་བརྗོད་བྱེད་ཀྱི་ཡོད་ལུགས་ཀྱི་དྲིལ་བསྒྲགས་ཤུགས་ཆེན་བྱས་ཡོད།
གསར་འགོད་པ། དོན་གྲུབ་བཀྲ་ཤིས།
