བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༤་་་༢༥ ལོའི་དགོས་དངུལ་བཀའ་འཁྲོལ་ཐོབ་པའི་ཕྱོགས་བསྡོམས་ཧིན་སྒོར་ ༣,༣༣༡,༠༢༢,༢༣༤ རེད་འདུག
དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་ ༡༡ པའམ་མཐའ་མར་ཚོགས་གཞོན་སྒྲོལ་མ་ཚེ་རིང་མཆོག་གིས་རྩིས་ལོ་ ༢༠༢༣་་་༢༤ དང་ ༢༠༢༤ ་་་ ༢༥ ཡི་གཏོང་ལེན་ཁྲིམས་ཡིག་སྒྲོག་སྦྱངས་གནང་བར་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་གོ་བོ་ཕན་བདེ་ལགས་ཀྱི་རྒྱབ་སྐྱོར་འོག བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༤་་་༢༥ ལོའི་ལས་ཁུངས་མ་ལག་དང་བཅས་པའི་དགོས་དངུལ་སྔོན་རྩིས་བཀའ་འཁྲོལ་ཐོབ་པ། རྩིས་ལོའི་ནང་སྔོན་རྩིས་མ་དངུལ་ནས་རྒྱུན་གྲོན་དང་དམིགས་བསལ་འགྲོ་འཆར་སྒོར་ ༡,༠༢༡,༠༥༧,༣༠༧ དང་། རྩིས་ལོའི་ནང་ཟུར་བཀོལ་རྩིས་ཁོངས་ནས་འགྲོ་འཆར་སྒོར་ ༢,༣༠༩,༩༦༤,༩༢༧ བཅས་ཁྱོན་བསྡོམས་སྒོར་ ༣,༣༣༡,༠༢༢,༢༣༤ ཆགས་ཀྱི་འདུག་ལ། ཕྱོགས་བསྡོམས་མ་དངུལ་ནང་མ་ཚུད་པའི་བཀའ་འཁྲོལ་ཐོབ་པ་རྩིས་ལོའི་ནང་སྦེང་ལོར་ལྷོ་སྤྱི་ལས་ཁུངས་དང་ས་འཐུས་མེད་པའི་ས་གནས་ཁག་བདུན་གྱི་སྔོན་རྩིས་འགྲོ་འཆར་སྒོར་ ༤༨,༢༧༠,༢༥༡ དང་། རྩིས་ལོའི་ནང་འཕྲོད་བསྟེན་ཁྱབ་ཁོངས་མངོན་དགའ་སློབ་གྲྭ་དང་། སྨན་ཁང་ཁག་ ༣ བཅས་ནས་སྔོན་རྩིས་འགྲོ་འཆར་སྒོར་ ༩,༧༡༥,༥༣༠ བཅས་ཁྱོན་བསྡོམས་སྒོར་ ༥༧.༩༨༥,༧༨༡ བྱེད་ཀྱི་འདུག
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་བསྡོམས་གསུང་བཤད་གནང་སྐབས། དེ་རིང་གི་ལས་རིམ་བྱུང་བའི་ནང་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་ཅིག་འཁུར་ཡོད་རེད། ལ་དྭགས་བླ་མ་བློ་བཟང་ལ་སྐུ་གཤེགས་ནས་ཁོང་གི་རྗེས་དྲན་གྱི་མྱ་ངན་གུས་འདུད་ཅིག་འཁུར་རེད། ང་ཚོའི་གྲོས་ཆོད་ནང་གསལ་བ་གཞིར་བཟུང་རེད། བོད་པ་བཙན་བྱོལ་དུ་དང་པོ་འབྱོར་བ་ནས་བཟུང་ཁོང་གི་ངོས་ནས་ནུས་པ་གང་ཡོད་ཀྱིས་བོད་མི་དང་། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་བཞེས། དེ་བཞིན་ང་ཚོའི་རྩ་དོན་འཐབ་རྩོད་ཀྱི་ཐོག་ལ་རོགས་འདེགས་རྒྱུན་མི་ཆད་པ་གནང་གི་ཡོད་པ་རེད། དེར་བརྟེན་དེ་རིང་ང་ཚོ་མྱ་ངན་གུས་འདུད་ཀྱི་གྲོས་ཆོད་ཞུ་རྒྱུ་དེ་ཡག་པོ་བྱུང་སོང་། ཁོང་གི་ནང་མི་དང་འབྲེལ་ཡོད་ལ་དྭགས་མི་མང་ཚང་མ་ལ་བསྐྱར་དུ་གདུང་སེམས་མཉམ་སྐྱེད་ཞུ་རྒྱུ་ཡིན།
ལས་ཉིན་མང་ཆེ་བ་དེ་རྩིས་ལོ་ ༢༠༢༤་་་་༢༠༢༥ ལོའི་བོད་མིའི་སྒྲིག་འཛུགས་ཀྱི་ལོ་འཁོར་སྔོན་རྩིས་ཆགས་པ་རེད། ལོ་འཁོར་སྔོན་རྩིས་ནང་གཙོ་བོ་དཔལ་འབྱོར་ལས་ཁུངས་ཀྱི་ཐོག་ནས་ཁྱབ་ཁོངས་ལྷན་ཁང་གི་རྩིས་ལོ་ ༢༠༢༤་་་༢༠༢༥ ལོའི་སྔོན་རྩིས་འཛིན་སྐྱོང་བཀའ་ཤག་ལ་ཕུལ་བ་དང་། བཀའ་ཤག་གིས་ནང་ཁུལ་དུ་ཕྱོགས་ཡོངས་ནས་ཞིབ་འཇུག་དང་། རྒྱབ་གཉེར་གནང་། དེ་རིང་ང་ཚོའི་གྲོས་ཚོགས་ལ་དངོས་སུ་ཚོད་དཔག་འཆར་རྩིས་ཚོགས་ཆུང་བཙུགས་ནས། ནང་སྲིད་ལས་ཁུངས་ཀྱི་ཟུར་བཀོལ་དང་འཕྲོད་བསྟེན་ཁྱབ་ཁོངས་ཀྱི་སྡེ་ཚན་གཅིག་ལ་ཆག་ཡང་མ་གཏོགས། དེ་མ་ཡིན་པའི་བཀའ་ཤག་གིས་ཐོག་མའི་རྒྱབ་གཉེར་གནང་བ་དེར་གྲོས་ཚོགས་ཀྱི་ཐོག་ནས་ཧིན་སྒོར་ས་ཡ་ ༣༣༣༡ ལྷག་གཏན་འབེབས་ཞུ་ཐུབ་པ་བྱུང་ཡོད། ང་ཚོས་གཏན་འབེབས་ཞུ་ཐུབ་པ་ཙམ་གྱི་འགྲིག་གི་མེད། ལས་འཆར་གཞི་ནས་མགོ་འཛུགས་དགོས་ཀྱི་ཡོད་པ་དང་། དེ་བཞིན་བཀའ་བློན་རྣམ་པའི་ཐོག་ནས་ལས་འཆར་གྱི་འཆར་གཞི་དང་། སྲིད་ཇུས་སོགས་ཀྱི་འཆར་གཞི་འདིང་གི་ཡོད། གཙོ་བོ་ཕྱག་ལས་གནང་མཁན་སྲི་ཞུའི་ལས་བྱེད་རྣམ་པ་ཆགས་ཀྱི་ཡོད། དེ་བཞིན་ཚང་མས་ཧུར་ཐག་ཕྱག་ལས་གནང་གི་རེད་ལ། དཔལ་འབྱོར་གྱི་འགྲོ་གྲོན་གཏོང་དགོས་ངེས་རིགས་དང་སྲི་ཚགས་ཀྱི་རྣམ་པའི་ཐོག་ནས་དོན་ཕན་ལྡན་པ་དང་། ལས་གཞི་གང་ཞིག་ཡིན་རུང་དོན་ལ་དམིགས་པ་ཞིག་ཡོང་ཐུབ་ཐབས་སུ་འབད་བརྩོན་ཞུ་དགོས་པ་དེ་གལ་ཆེན་པོ་རེད།
ད་རེས་གྲོས་ཚོགས་ཀྱི་ལས་ཉིན་མང་ཆེ་བ་སྔོན་རྩིས་ཀྱི་ཐོག་ལ་བཏང་བ་རེད། དེ་བཞིན་ང་ཚོས་ཁྲིམས་འཛིན་ལས་དོན། བཙན་བྱོལ་བོད་མིའི་བཅའ་ཁྲིམས་ཚུད་པའི་སྒྲིག་གཞི་ཁག་བདུན་ཙམ་ལ་བསྐྱར་བཅོས་བྱེད་ཐུབ་ཡོད། དེ་རིང་ཕྱོགས་ཡོངས་ཀྱི་ཚོགས་གཙོའི་བསམ་བློའི་ནང་ལ། བཀུར་འོས་སྤྱི་འཐུས་རྣམ་པའི་སྒྲིག་གཞི་ནང་ལྟར་བརྗོད་པ་དང་པོ་དང། བརྗོད་པ་གཉིས་པ་ཕེབས་ཕྱོགས་སོགས་ཀྱི་ཐོག་ཡར་རྒྱས་ཀྱི་རྣམ་པ་ཡག་པོ་བྱུང་སོང་བསམ་གྱི་འདུག་ལ། མ་འོངས་པ་ཡིན་ནའང་ཕེབས་ཐུབ་དགོས་པ་དེ་གལ་ཆེན་པོ་རེད་འདུག ང་ཚོ་གཏན་འབེབས་བྱུང་ཐུབ་པའི་ནང་ནས་བར་སྐབས་ཤིག་ནས་བཙན་བྱོལ་བོད་མིའི་སྒྲིག་འཛུགས་ལ་འཕྲད་པའི་དཀའ་ངལ་མང་ཆེ་བ་ཞིག་སེལ་ཐུབ་པ་ཞིག་བྱུང་ཡོད། དེར་བརྟེན། ད་རེས་ང་ཚོ་གྲོས་ཚོགས་ཀྱི་བྱས་རྗེས་སམ་ལས་གཞི་གལ་ཆེན་པོ་ཞིག་ཆགས་ཡོད། དེ་ཡང་གཙོ་བོ་གཅིག་དེ་ཁྲིམས་སྒྲིག་བསྐྱར་བཅོས་ཚོགས་ཆུང་གི་ཚོགས་གཙོ་དང་དྲུང་ཆེ། ཚོགས་མི་རྣམ་པས་སྐུ་ལས་མང་པོ་བསྐྱོན་པ་རེད། ཚོགས་ཆུང་གི་སྙན་ཐོ་དང་འཆར་ཟིན་འབྱོར་བ། དེའི་ཐོག་ལ་བཀུར་འོས་སྤྱི་འཐུས་རྣམ་པ་དང་འཛིན་སྐྱོང་བཀའ་ཤག་གིས་བཟོ་བཅོས་ཁྲིམས་སྒྲིག་འཁུར་བ་རེད། ཕྱོགས་ཡོངས་ཀྱི་ཐོག་ནས་ཡག་པོ་བྱུང་སོང་། དེར་བརྟེན་འབྲེལ་ཡོད་རྣམ་པ་ཚང་མར་ཚོགས་གཙོའི་ངོས་ནས་ཐུགས་རྗེ་ཆེ་ཞུ་རྒྱུ་ཡིན། ལས་རིམ་གཅིག་དེ་བོད་མིའི་སྒྲིག་འཛུགས་ཀྱི་འདས་ལོའི་ཉི་ཤུའི་དཔལ་འབྱོར་གྱི་གནས་བབ་སྙན་ཐོ་ཞིག་བཀའ་ཤག་གིས་བསྣམས་ཕེབས་པ་རེད། དེས་བཀུར་འོས་སྤྱི་འཐུས་རྣམས་ལ་ཐུགས་ཕན་གསོས་པའི་དགོངས་ཚུལ་མང་པོ་གསུངས་སོང་། དེར་བརྟེན། མ་འོངས་པར་དཔལ་འབྱོར་གནས་བབ་ཀྱི་ཐོག་ལ་ཐུགས་སྣང་དང་མཁྱེན་རྟོགས་ཐུབ་པའི་གནས་བབ་ཅིག་ཆགས་ཀྱི་ཡོད་པས་ཡག་པོ་བྱུང་སོང་ཞུ་རྒྱུ་ཡིན། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་དང་བསྟན་འཛིན་ཕུར་བུ། རྩོམ་སྒྲིག་པ་སྐལ་བཟང་སྦྱིན་པ།
