ད་ལྟའི་ཨ་མྱེས་རྨ་ཆེན་གྱི་གངས་རིའི་ཞུ་ཚད་ལ་བལྟས་ན་མ་འོངས་ལོ་བཅུ་ཕྲག་ཁ་ཤས་ལ་མ་གཏོགས་གངས་ལྷག་རྒྱུ་མིན་ནའང་རྒྱ་ནག་གཞུང་གིས་མུ་མཐུད་གཏེར་ཁ་སྔོག་འདོན་གྱི་ལས་གཞི་སྤེལ་མུས་ཡིན་འདུག
ཉེ་ལམ་མཚོ་སྔོན་ཞིང་ཆེན་འབྲོག་ས་རང་བྱུང་སྲུང་སྐྱོབ་ལྟེ་གནས་ཁང་ཞེས་པ་ཞིག་གིས་འདས་པའི་ལོ་ ༧ ཙམ་རིང་ཚན་རིག་དང་མཐུན་པའི་ཞིབ་འཇུག་བྱས་པ་བརྒྱུད་ཨ་མྱེས་རྨ་ཆེན་གྱི་འགྱུར་ལྡོག་ཅེས་པའི་བརྙན་ཐུང་ཞིག་སྤེལ་ཏེ། ལོ་རེར་གནས་ཆེན་ཨ་མྱེས་རྨ་ཆེན་གྱི་གངས་སྨི་ ༡༧ ཡས་མས་ཞུ་ཡི་ཡོད་པས་མ་འོངས་ལོ་བཅུ་ཕྲག་ཁ་ཤས་རྗེས་གངས་རི་དེ་མེད་པར་འགྱུར་སྲིད་པའི་བློ་འཚབ་བྱེད་ཀྱི་འདུག་ཀྱང་། ཉུང་མཐར་འདས་པའི་མི་ལོ་ ༣༠ ལྷག་རིང་གཏེར་ཁ་སྔོག་འདོན་བྱས་པ་མུ་མཐུད་ནས་ཤུགས་ཆེ་རུ་བཏང་འདུག
ཉེ་ལམ་མཚོ་སྔོན་ཞིང་ཆེན་གྱི་འབྲོག་ས་རང་བྱུང་སྲུང་སྐྱོབ་ལྟེ་གནས་ཁང་ཞེས་པ་ཞིག་གིས་གངས་རྒན་ཨ་མྱེས་རྨ་ཆེན་ཉེན་ཁའི་གནས་སུ་ལྷུང་བཞིན་པའི་ཨ་མྱེས་རྨ་ཆེན་གྱི་འགྱུར་ལྡོག་ཅེས་པའི་བརྙན་ཐུང་ཞིག་སྤེལ་བ་འདི་གའི་གསར་འགོད་པར་ལག་སོན་བྱུང་བའི་ནང་། ཨ་མྱེས་རྨ་ཆེན་གྱི་འདབས་ནས་སྐྱེས་པའི་འབྲོག་པ་ཞིག་གིས། ངའི་མི་ཚེའི་ནང་ཐོག་དང་པོ་ཨ་མྱེས་རྨ་ཆེན་ལ་གངས་སྐོར་ལ་འགྲོ་དུས་ཕྱི་ལོ་ ༡༩༨༦ རེད། སྐབས་དེའི་ཨ་མྱེས་རྨ་ཆེན་གྱི་གངས་དང་། ཁོར་ཡུག་གི་གནས་སྟངས་དེ་ད་ལྟ་དང་བསྡུར་ན་འགྱུར་བ་ཧ་ཅང་ཆེན་པོ་བྱུང་འདུག སྐབས་དེའི་ཨ་མྱེས་རྨ་ཆེན་གྱི་གངས་རི་ཡོད་ས་དང་། ད་ལྟའི་གངས་རི་ཡོད་ས་གཉིས་བར་ཚད་ན། རིང་ཤོས་ལ་གངས་རི་སྨི་ ༡༢༠༠ ལྷག་བཞུས་ཡོད་པ་དང་། ཐུང་ཤོས་ལ་གངས་རི་སྨི་ ༢༤༠ ལྷག་ཙམ་ཞིག་བཞུས་འདུག ཅེས་དང་། ཕྱི་ལོ་ ༢༠༡༧ ནས་ ༢༠༢༣ བར་ལོ་རེར་ཨ་མྱེས་རྨ་ཆེན་གྱི་གངས་རི་སྨི་ ༡༧ ཞུ་ཡི་འདུག ཅེས་བརྗོད་འདུག
ཁོང་གིས། ཨ་མྱེས་རྨ་ཆེན་དེ་རྨ་ཆུའི་མགོ་ཁུངས་ཀྱི་ཆེས་ཆེ་བའི་གངས་རི་ཡིན་པས། དེའི་མཐའ་སྐོར་ལ་ཆུ་མགོ་ཡང་གྲངས་ལས་འདས་པ་ཞིག་ཡོད། ཨ་མྱེས་རྨ་ཆེན་གྱི་གངས་ཇེ་ཉུང་དུ་འགྲོ་བ་དང་བསྟུན་དེའི་ཆུ་མགོ་དག་ཀྱང་ཇེ་ཉུང་དུ་འགྲོ་ཡི་འདུག དེ་བཞིན་ཨ་མྱེས་རྨ་ཆེན་གྱི་འདབས་རོལ་ན་ཤིང་ཕྲན་མང་པོ་སྐྱེ་ཡི་འདུག་ལ། སྔོན་ཆད་དང་བསྡུར་ན་ཤིང་དེ་དག་གི་སྐྱེས་ཚད་ཀྱང་མགྱོགས་པོ་འདུག་པས། དེ་ནི་ཨ་མྱེས་རྨ་ཆེན་གྱི་དྲོད་ཚད་ཇེ་མཐོར་འགྲོ་ཡི་ཡོད་པའི་རྟགས་ཤིག་རེད། དེ་བཞིན་གངས་རི་དེར་གསའ་སོགས་རི་སྐྱེས་སྲོག་ཆགས་མང་དག་ཅིག་འདུག་པས། དེ་དག་ལ་གནོད་འཚེ་ཚབས་ཆེན་ཐེབས་ཉེན་འདུག ཅེས་གངས་རིའི་འདབས་ཀྱི་འབྲོག་པ་རྣམས་ཀྱི་འཚོ་གནས་ལའང་འགྱུར་ལྡོག་ཆེན་པོ་འགྲོ་བཞིན་ཡོད་སྐོར་སོགས་བརྗོད་འདུག
ཨ་མྱེས་རྨ་ཆེན་ནི་བོད་མགོ་ལོག་རྨ་ཆེན་རྫོང་ཁོངས་སུ་ཡོད་ཅིང་། བོད་ཀྱི་གནས་ཆེན་གངས་རི་བཞི་ཡི་ཡ་གྱལ་ཞིག་ཡིན་སྟབས། ལོ་ལྟར་དགུན་དུས་སུ་གནས་མཇལ་བ་མང་པོ་བསླེབ་ཀྱི་ཡོད་པ་རེད། ཡིན་ནའང་། ཕྱི་ལོ་ ༡༩༩༣ ལོ་ཙམ་ནས་བཟུང་རྒྱ་ནག་གཞུང་གིས་ཨ་མྱེས་རྨ་ཆེན་གྱི་རི་རྒྱུད་དུ་གཏེར་ཁ་སྔོག་འདོན་གྱི་ལས་གཞི་མགོ་བཙུགས་ཡོད་པ་དང་། ཕྱི་ལོ་ ༡༩༩༧ ལོར་མཚོ་སྔོན་ཝེ་སི་ཐི་ཟངས་གཏེར་ཚོང་གཉེར་ཁང་(青海威斯特铜业有限责任公司) ཞེས་པར་རྩིས་སྤྲོད་བྱས། ཟངས་གཏེར་ཚོང་གཉེར་ཁང་དེས་གཏེར་ཁ་སྔོག་འདོན་སྔར་ལས་ཤུགས་ཆེ་རུ་བཏང་སྟེ་འདས་པའི་ལོ་ངོ་ཉེར་བདུན་ལྷག་གི་རིང་ཟངས་གཙོ་བོར་གྱུར་བའི་གཏེར་རིགས་སྔོག་འདོན་ཤུགས་ཆེན་བྱས་ཏེ། གནས་རིར་སྐྱོན་ཆག་དང་འབག་བཙོག་ཤུགས་ཆེན་བཟོ་ཡོད་པ་མ་ཟད། བཟོ་གྲྭའི་བཙོག་ཆུ་རྣམས་དགུ་ཆུའི་ནང་དུ་ཐད་ཀར་གཏོང་གི་ཡོད་སྟབས། དགུ་ཆུའི་འགྲམ་གྱི་འབྲོག་མང་གིས་དགུ་ཆུ་འཐུང་མི་ནུས་པར་གྱུར་བ་དང་། སེམས་ཅན་གྱིས་ཆུ་བཏུང་སྟེ་འཆི་སྐྱོན་ཆེན་པོ་བྱུང་བ་སོགས་ཀྱི་གནོད་སྐྱོན་ཚབས་ཆེན་བྱུང་བར་བརྟེན། མང་ཚོགས་ཀྱིས་ཐེངས་མང་པོར་ས་གནས་སྲིད་གཞུང་ལ་གཏེར་ལས་མཚམས་འཇོག་དགོས་པའི་རེ་སྐུལ་གནང་ཡོད་ཀྱང་ཕན་ཐོགས་གང་ཡང་མ་བྱུང་བར་བརྟེན། ཕྱི་ལོ་ ༢༠༡༧ ཟླ་ ༨ ཚེས་ ༢༡ ཉིན་ས་གནས་མང་ཚོགས་ཀྱིས་རྒྱ་ནག་དབུས་གཞུང་གི་འབྲེལ་ཡོད་ལས་ཁུངས་ལ་གཏེར་ལས་དེ་མཚམས་འཇོག་དགོས་པའི་ཞུ་གཏུག་ཡི་གེ་ཐད་ཀར་བཏང་ཡོད་ཀྱང་དོན་འབྲས་སོན་མི་འདུག
དེ་རིང་ཕྱི་ལོ་ ༢༠༢༤ ཟླ་ ༠༤ ཚེས་ ༠༩ ཉིན་འདི་ག་བོད་ཀྱི་དུས་བབ་གསར་ཁང་གིས་ས་གནས་སུ་རྒྱུས་ལོན་བྱེད་སྐབས། ཝེ་སི་ཐི་ཟངས་གཏེར་ཚོང་གཉེར་ཁང་དེས་མུ་མཐུད་ཨ་མྱེས་རྨ་ཆེན་གྱི་གངས་རྒྱུད་དུ་གཏེར་ཁ་སྔོག་འདོན་ཤུགས་ཆེན་བྱེད་བཞིན་འདུག་ལ། ས་གནས་འབྲོག་པ་ཞིག་གིས། གཏེར་ལས་དེ་བརྒྱད་ཅུ་གྱ་གྲངས་དང་དགུ་བཅུའི་མགོ་སྟོད་ཙམ་ནས་ལས་མགོ་བཙུགས་ཡོད་པ་དང་། ད་ལྟའི་ཆར་གཏེར་ཁུངས་ཀྱི་འགྲམ་དུ་གཏེར་ལས་བཟོ་གྲྭ་དང་ལས་མིའི་གྲོང་ཚོ་ལྟ་བུ་ཞིག་ཀྱང་ཆགས་ཟིན་ཡོད་སྐོར་བརྗོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
