རྩོམ་པ་པོ། གཡག་རྒོད་པོ།
མགོ་ལོག་ལྕགས་མོས་རྒྱ་ཡིག་ནས་བསྒྱུར།
ཨེ་པོ་ལགས་ནི་ལྷ་སའི་ཆུ་ཤུར་རྫོང་གི་ལོ་ན་རྒན་པའི་ཞིང་པ་ཞིག་ཡིན། ཡར་ལུང་གཙང་བོའི་འགྲམ་རྒྱུད་ནས་དཀའ་སྡུག་གི་མི་ཚེ་ཧྲིལ་པོ་ཞིང་ལས་ཀྱི་འཚོ་བའི་ནང་དུ་བསྐྱལ་མཁན་ཞིག་ཡིན། ཁོང་ལ་བབ་ཆགས་པོ་དང་གཟི་བརྗིད་ལྡན་པའི་རྨི་ལམ་ཞིག་ཡོད། དཀའ་སྡུག་ཅི་ཙམ་ཡོད་ནའང་རང་གི་ཤ་ལས་མཆེད་པའི་བུ་ཕྲུག་གསུམ་པོ་སློབ་གྲྭར་བཏང་ནས་ལྕགས་ཕོར་ཐོབ་པའི་རྒྱལ་ཁབ་ཀྱི་ལས་བྱེད་པ་ཞིག་ཆགས་རྒྱུ་ཡིན།
བགྲེས་པོ་ཨེ་པོ་ལགས་ཀྱི་སྔོན་ཆད་ཀྱི་ཕུགས་འདུན་ཡོངས་སུ་ལེགས་འགྲུབ་བྱུང་བ་དང་བུ་ཆེ་བ་ནག་ཆུ་གཞུང་གི་ལས་བྱེད་པ་ཆགས། བུ་ཆུང་བ་ནི་སློབ་ཆེན་མཐར་ཕྱིན་རྒྱུས་མངའ་རིས་མཚོ་ཆེན་རྫོང་གི་སློབ་ཆུང་གི་དགེ་རྒན་ཞིག་ཏུ་གྱུར། བགྲེས་པོ་ཨེ་པོ་ལགས་ཀྱི་འདོད་པ་ཁེངས་ཤོས་དང་སེམས་ཁྲལ་ཆེ་ཤོས་ནི་བུ་གཉིས་པ་ཡེ་ཤེས་བསྟན་འཛིན་ཡིན། ཁོང་གིས་པེ་ཅིན་དགེ་འོས་སློབ་ཆེན་ནས་སློབ་མཐར་ཕྱིན་རྗེས་ཆུ་ཤུར་རྫོང་དུ་དགེ་རྒན་གྱི་ཕྱག་ལས་གནང་།
ཡེ་ཤེས་བསྟན་འཛིན་ལ་མགོ་བོ་ཆེན་པོ་མེད་ནའང་རིག་པ་རྒོད་པོ་ཡོད། ཡུལ་ཚོ་དང་རྫོང་ནས་སློབ་ཆུང་གི་སྦྱང་བརྩོན་དང་གྲུབ་འབྲས་མི་དམན་པ་ཐོབ། ཡུལ་ཚོའི་སློབ་ཆུང་ནས་རྫོང་ལ་མ་སོང་སྔོན་དུ་ལོ་རིམ་ལྔ་པ་ཐེངས་གཉིས་འདོན་དགོས་བྱུང་། དེ་ནི་སློབ་སྦྱོང་གི་རྒྱུགས་འབྲས་དམན་པའི་རྐྱེན་མིན་པར་འཛིན་རིམ་དྲུག་པའི་སློབ་ཕྲུག་གི་གྲངས་ཀ་འབོར་ཆེན་ཆགས་སྟབས་བསྐྱར་དུ་འཛིན་རིམ་ལྔ་བའི་ནང་དུ་ལོ་གཅིག་འདུག་དགོས་བྱུང་། ལོ་གཅིག་གི་རྗེས་སུ་ཡེ་ཤེས་བསྟན་འཛིན་ལགས་ཅང་སོའུ་ཁྲང་ཀྲིག་བོད་ལྗོངས་སློབ་འབྲིང་དུ་འདེམས་ཐོན་བྱུང་བ་དང་རྒྱ་ནག་ཏུ་ཕེབས། རྒྱ་ཡིག་གི་ཆུ་ཚད་སྐྱོ་བོ་ཡིན་ཙང་ལོ་གཅིག་ལ་གྲྭ་སྒྲིག་འཛིན་གྲྭའི་ནང་དུ་འདུག་དགོས་བྱུང་། དེ་ལྟར་ལོ་དགུའི་འགན་བབས་སློབ་གསོའི་སློབ་སྦྱོང་ཡོངས་སུ་མཇུག་སྒྲིལ།
རྒྱལ་ཁབ་ཀྱིས་བོད་ཀྱི་སློབ་ཕྲུག་ཚོ་ལ་དམིགས་བསལ་གྱི་སློབ་ཡོན་དང། སྡོད་གནས་ཟས་གོས་སོགས་རིན་མེད་ཀྱི་སྲིད་ཇུས་ལག་བསྟར་བྱས་སྟབས་ཡེ་ཤེས་བསྟན་འཛིན་ལགས་ཀྱིས་རྒྱ་ནག་ཁྲང་ཀྲུག་ནས་ལོ་བདུན་ལ་སློབ་སྦྱོང་བྱས། སློབ་འབྲིང་འགྲིམས་བཞིན་པའི་སྐབས་ཤིག་ལ་ཕ་ཨེ་པོ་ལགས་ཀྱིས་རང་ཁྱིམ་གྱི་གཡག་ཅིག་བཙོང་ནས་བུ་ལ་གནམ་གྲུའི་འཛིན་བྱང་ཉོས་པ་དང་། ཁོང་གི་ཨམ་ཕྲག་ནང་དུ་རྒྱ་སྒོར་ཉིས་སྟོང་བླུགས། ཕྱིར་སློབ་གྲྭར་འབྱོར་རྗེས་དོན་དག་ཅི་ཞིག་གི་ཆེད་དུ་ཡིན་མིན་མ་ཤེས་ཀྱང་སློབ་གྲྭ་ལ་རྒྱ་སྒོར་གཅིག་སྟོང་ལྔ་བརྒྱ་སྤྲད་དགོས་བྱུང་སྟབས་རྒྱ་སྒོར་ལྔ་བརྒྱ་མ་གཏོགས་ལྷག་མ་སོང་། སློབ་འབྲིང་སྐབས་ཀྱི་ལོ་དེ་དག་གི་རིང་ལ་ཡེ་ཤེས་བསྟན་འཛིན་ལགས་ཀྱིས་ཟ་ཚོད་འཐུང་ཚོད་བཟུང་ནས་དངུལ་གྲོན་ཆུང་བྱས་པ་དང་། ཕ་མ་ལ་དངུལ་སློང་བའི་དུས་སྐབས་ཧ་ཅང་དཀོན་པོ་ཡིན། ལོ་བཞིའི་རིང་གི་སློབ་འབྲིང་གི་འཚོ་བའི་ཁྲོད་དུ་རྒྱ་སྒོར་ཉིས་སྟོང་ཙམ་ལས་འགྲོ་གྲོན་བཏང་མེད།
ཡེ་ཤེས་བསྟན་འཛིན་ལགས་སློབ་ཆུང་སྐབས་སུ་གྲོང་ཚོ་གཅིག་པའི་བུ་མོ་ཞིག་སྣང་བར་འགྲོ་མྱོང་འདུག ཁོ་རང་རྒྱ་ནང་གི་སློབ་གྲྭར་དེར་འབྱོར་བའི་ཉིན་དང་པོ་ལ་སློབ་གྲྭ་དེ་གའི་སློབ་མ་དང་དགེ་རྒན་ཚང་མ་བང་རིམ་བསྒྲིགས་ནས་གསར་ཞུགས་སློབ་ཕྲུག་ཚོ་ལ་བསུ་མ་བྱེད་སྐབས། ཁོ་རང་སྣང་བ་འགྲོ་སའི་བུ་མོ་དེས་སློབ་གྲྭ་དེར་སློབ་སྦྱོང་བྱེད་བཞིན་ཡོད་སྟབས་སློབ་ཕྲུག་རྙིང་པ་ཚོའི་གྲལ་ནང་དུ་ལངས་འདུག་པས་ཡེ་ཤེས་བསྟན་འཛིན་ཀྱི་སེམས་ལ་དགའ་ཚོར་སྐྱེས། རྗེས་སུ་བུ་མོ་དེས་ཁོ་ལ་གོན་པ་འཁྲུད་རོགས་དང་ནང་སྦྱོང་བྱེད་རོགས་བྱས་མཐར་འབྲེལ་བ་ཐག་ཉེ་རུ་ཆགས། དེར་ཡོད་སློབ་གྲོགས་ཚོས་བུ་མོ་དེ་ལ་མིང་འདོགས་ལུག་ཟེར་བ་དང་རྗེས་སུ་ལུག་ཅེས་པའི་མིང་འདོགས་དེ་ཡེ་ཤེས་བསྟན་འཛིན་ལ་ཐོགས། སློབ་ཆེན་སྐབས་སུ་ཡེ་ཤེས་བསྟན་འཛིན་གྱིས་རང་གི་དྲ་མིང་ལ་ལུག་ཚང་ཞེས་བཏགས།
ཡེ་ཤེས་བསྟན་འཛིན་རིམ་གྱིས་ནར་སོན་པ་དང་སློབ་འབྲིང་གི་སྐབས་སུ་ཡང་སྙེ་མོ་རྫོང་ནས་ཡིན་པའི་སློབ་གྲོགས་བུ་མོ་ཞིག་སྣང་བར་སོང་། བརྩེ་འཕྲིན་འབྲི་འདོད་ཀྱི་འདུན་པ་ཆེན་པོ་བྱུང་ནའང་ཇི་ལྟར་འབྲི་དགོས་མ་ཤེས་པར་རེ་ཞིག་ལྷག ཁོང་གི་མལ་ཁང་གཅིག་པའི་གྲོགས་པོ་ཞིག་གིས་གདེང་ཚོད་ཆེན་པོའི་ཐོག་ང་ནི་བརྩེ་འཕྲིན་འབྲི་མཁན་རྩེ་ཕུད་ཅིག་ཡིན། ངས་ཁྱེད་ལ་རོགས་པ་བྱེད་ཆོག་ཅེས་བཤད་པ་དང་ཡེ་ཤེས་བསྟན་འཛིན་ལགས་ཀྱི་མིང་ཐོག་ནས་བརྩེ་འཕྲིན་ཞིག་བྲིས། ཡེ་ཤེས་བསྟན་འཛིན་ལགས་ཀྱིས་བརྩེ་འཕྲིན་དེ་འཁྱེར་ནས་ཐེ་ཚོམ་མེད་པར་འཛིན་གྲོགས་བུ་མོ་སྙིང་རྗེ་མོ་དེ་ལ་སྤྲད། འཛིན་གྲོགས་བུ་མོ་དེས་བརྩེ་འཕྲིན་ཁ་ཙམ་ཡང་མ་ཕྱེ་བར་འཛིན་གྲྭའི་བོད་ཡིག་དགེ་རྒན་ལ་རྩིས་སྤྲོད་བྱས། ཕྱི་ཉིན་དགེ་རྒན་གྱིས་ཡེ་ཤེས་བསྟན་འཛིན་སྐད་བཏང་ནས་བཀའ་བཀྱོན་ནན་མོ་བཏང།
མཐོ་འབྲིང་སྐབས་སུ་ནག་ཆུའི་བུ་མོ་ཞིག་ལ་སེམས་པ་ཤོར་འདུག རྒྱལ་སྟོན་དུས་ཆེན་སྐབས་སུ་དར་རྩེ་མདོའི་མཛའ་གཞས་འཁྲབ་མཁན་གྱི་བུ་མོ་དེས་སློབ་གྲྭ་ཡོངས་ལ་སྐད་གྲགས་ཆེན་པོ་བཞག ཡེ་ཤེས་བསྟན་འཛིན་ལགས་ཀྱིས་སེམས་པ་མོ་ལ་ཤོར་ནས་དགའ་དུང་གི་ཚོར་བས་བཟི། རྗེས་སུ་བློ་ཁོག་ཆེན་པོའི་ཐོག་མོ་ལ་བརྩེ་འཕྲིན་ཐེངས་གསུམ་ལ་བསྐུར་ཡང་བུ་མོ་དེས་ངས་སློབ་སྦྱོང་དང་འཚོ་བ་ལ་བར་ཆད་མ་བྱེད་རོགས་ཞེས་སྐད་ཆ་ཤར་གཅིག་གིས་ཁོའི་རེ་འདུན་དང་བརྩེ་དུང་ཡོད་ཚད་ཀྱི་སྒོ་མོ་བརྒྱབ། ཡེ་ཤེས་བསྟན་འཛིན་ལགས་ཀྱི་བརྩེ་དུང་གི་རྨི་ལམ་བརླག་ནའང་སློབ་ཆེན་འགྲིམ་པའི་རྨི་ལམ་མངོན་འགྱུར་དུ་སོང་། སྔོན་ཆད་ཁོ་རང་རྒྱ་ནག་ཏུ་སློབ་སྦྱོང་བྱེད་སྐབས་ཕ་ཡུལ་གྱི་སློབ་གྲྭ་དང་ནང་མི་དྲན་བཞིན་ཡོད། བོད་ལྗོངས་ས་ཁུལ་གྱི་སློབ་གྲྭ་ཁག་དང་རྒྱ་ནག་ནང་ཁུལ་གྱི་སློབ་གྲྭ་ཁག་གི་སྤུས་ཚད་དང་བསྡུར་ན་བོད་ལྗོངས་ས་ཁུལ་གྱི་སློབ་གསོ་དང་ཆ་རྐྱེན་སོགས་རྒྱ་ནག་ནང་ཁུལ་གྱི་སློབ་གསོ་དང་ཆ་རྐྱེན་ལས་ཞན་སྟབས་ཁོ་རང་མ་འོངས་པར་ཕ་ཡུལ་གྱི་སློབ་གསོའི་ལས་དོན་བྱེད་མཁན་ཞིག་ཏུ་ཆགས་པའི་རེ་བ་བརྒྱབ། དེར་བརྟེན་སློབ་གསོའི་ལས་དོན་ནི་ཁོ་རང་དགའ་ཤོས་དང་རེ་བཞག་ཆེ་ཤོས་ཡིན། ཕྱི་ལོ་ ༢༠༠༦ ལོར་རྒྱུགས་འབྲས་ཐོབ་སྐར་ ༤༩༩ ལོན་པ་དང་། ཀྲུང་གོའི་ཚད་མཐོའི་སློབ་གསོ་ལྡན་པའི་པེ་ཅིན་དགེ་འོས་སློབ་གྲྭར་སློབ་ཞུགས་བྱས། རྒྱ་ནག་གི་ཁྲང་ཀྲུ་ས་ཁུལ་དུ་ཐོབ་སྐར་ ༤༩༩ ནི་འབྲིང་རིམ་གྱི་གྲས་སུ་སླེབས་ཡོད་ཀྱང་། བོད་ལྗོངས་ས་ཁུལ་དུ་རྩེ་གྲས་སུ་སླེབས་ཡོད། ཁོ་རང་མ་འོངས་པར་སློབ་གསོའི་ལས་དོན་བྱེད་མཁན་ཞིག་ཏུ་ཆགས་ཐུབ་པའི་སེམས་ཚོར་ཆེན་པོ་བྱུང་།
ཡེ་ཤེས་བསྟན་འཛིན་ལགས་སློབ་འབྲིང་ནས་བཟུང་རྒྱ་ནང་དུ་སློབ་སྦྱོང་བྱས་རྐྱེན་བོད་ལྗོངས་ས་ཁུལ་དུ་ཡོད་པ་ནང་བཞིན་བོད་ཡིག་དང་བོད་ཀྱི་རིག་གཞུང་ལ་སློབ་སྦྱོང་བྱེད་པའི་གོ་སྐབས་བྱུང་མེད། ཡིན་ནའང་རྒྱ་ནང་དུ་སློབ་སྦྱོང་བྱེད་སྐབས་ཆུ་ཚོད་དམ་འཛིན་བྱས་ནས་བོད་ཀྱི་སྐད་ཡིག་དང་རིག་གཞུང་ལ་སྦྱང་བརྩོན་ལྷོད་མེད་བྱས། ཁོང་གིས་རྒྱུན་དུ་སློབ་གསོའི་ལས་དོན་བྱེད་རྒྱུ་དམིགས་ཡུལ་བཟུང་བ་དང་ལྷག་པར་བོད་རྒྱ་གཉིས་ཀྱི་སྐད་ཡིག་གི་ཐོག་ནས་སློབ་གསོའི་ལས་དོན་བྱེད་རྒྱུ་ཡིད་ལ་ནན་མོ་བཟུང་།
པེ་ཅིན་དུ་སློབ་སྦྱོང་བྱེད་སྐབས་ཕ་མས་སྒོ་ཕྱུགས་བཙོང་བ་དང་ངལ་རྩོལ་ལས་བསགས་པའི་རྒྱ་སྒོར་ཁྲི་གཅིག་ཡེ་ཤེས་བསྟན་འཛིན་ལ་བསྐུར་བ་དེ་ནི་ཞིང་པ་ཕ་རྒན་ཞིག་ལ་མཚོན་ན་ནུས་ཤུགས་ཡོད་ཚད་དང་རྒྱུ་འབྱོར་ཆེ་ཤོས་ཡིན། ཡེ་ཤེས་བསྟན་འཛིན་ལགས་ནི་ཆུ་ཤུར་སྡེ་བའི་ནང་གི་ནུབ་ཕྱོགས་སློབ་ཡོན་ཐོབ་མཁན་གྱི་སློབ་མ་གཅིག་པུ་ཡིན། ལོ་རེར་རྒྱ་སྒོར་ལྔ་སྟོང་སློབ་ཡོན་སྤྲད་པ་དང་། ལོ་གཅིག་གི་སློབ་ཡོན་རིན་མེད་བྱས་པ་མ་ཟད་ལོ་གསུམ་གྱི་སློབ་ཡོན་བུ་ལོན་བཞག དེ་ལྟར་དམིགས་བསལ་གྱི་གོ་སྐབས་ཐོབ་ནའང་ཡེ་ཤེས་བསྟན་འཛིན་ལགས་ནི་པེ་ཅིན་དགེ་འོས་སློབ་ཆེན་ནང་གི་ལག་པ་དམ་ཤོས་ཀྱི་སློབ་མ་ཞིག་ཡིན། རྒྱལ་ས་པེ་ཅིན་དུ་འགྲོ་ས་འདུག་ས་མང་ནའང་ཡེ་ཤེས་བསྟན་འཛིན་ལགས་ལ་དེ་འདྲའི་རྒྱས་སྤྲོས་བྱེད་པའི་མཐུན་རྐྱེན་མེད། ཁོང་རྒྱུན་དུ་སློབ་གྲྭའི་དཔེ་མཛོད་ཁང་དང་རྩིས་འཕྲུལ་ཁང་དུ་ཡོད། བོད་ཀྱི་སློབ་ཕྲུག་ཁག་གི་ནང་ནས་ཡེ་ཤེས་བསྟན་འཛིན་ལགས་ནི་དྲ་གནས་བེད་སྤྱོད་གཏོང་མཁན་སྔ་ཤོས་ཡིན་པ་དང་། དྲ་ཐོག་ཟིན་བྲིས་དང་པོད་འཕྲིན་སྔོན་མ་ནས་བེད་སྤྱོད་གཏོང་མཁན་གྱི་གྲས་སུ་ཡོད། སློབ་ཡོན་དང་འཚོ་བའི་ཁ་སྣོན་ཆེད་ཁོང་གིས་མཐོ་སློབ་ནང་དུ་བོད་ཡིག་དཔེ་ཁྲོམ་དང་བོད་ཡིག་ཐེབ་གཞུང་སོགས་ཉོ་ཚོང་བྱས་ནས་རྒྱ་སྒོར་སྟོང་ཕྲག་ཁ་ཤས་བསགས་མྱོང་ཡོད།
ཁོང་རྒྱ་ནང་དུ་སྡོད་ཡུན་རིང་བས་བོད་ཡུལ་གྱི་ནང་མི་གཙོས་བོད་ཀྱི་རིག་གཞུང་དང་སྐད་ཡིག་སོགས་ལྷག་ཏུ་དྲན། འཚོ་བའི་ཧེ་བག་གི་ཁྲོད་དུ་དྲན་གདུང་བཞག་པ་དང་རེ་ལྟོས་རྨི་ལམ་གྱི་ཁྲོད་ནས་འབད་བརྩོན་བྱས། ཡེ་ཤེས་བསྟན་འཛིན་ལགས་རྒྱུན་དུ་ཀྲུང་དབྱང་མི་རིགས་སློབ་ཆེན་གྱི་སློབ་ཁྲིད་ལ་ཞུགས་པ་དང་མི་རིགས་སློབ་ཆེན་གྱི་ཞིབ་འཇུག་སློབ་མ་ཚོ་དང་མཉམ་དུ་བོད་ཀྱི་རིག་གཞུང་སྲུང་སྐྱོབ་སྐོར་ནས་བགྲོ་གླེང་མང་པོ་བྱས་མྱོང་ཡོད། ཡེ་ཤེས་བསྟན་འཛིན་ལགས་རྒྱུན་དུ་དཔེ་མཛོད་ཁང་དུ་འགྲོ་བཞིན་ཡོད་པ་དང་པེ་ཅིན་དགེ་འོས་སློབ་ཆེན་གྱི་དཔེ་མཛོད་ཁང་ནི་ཀྲུང་གོའི་མཐོ་སློབ་ཁག་གི་ཨང་རིམ་དང་པོའི་གྲས་སུ་སླེབས་ཡོད་ཀྱང་བོད་ཀྱི་དཔེ་དེབ་ཁྲི་སྟོང་མང་པོའི་ཁྲོད་ཀྱི་དཔེ་དེབ་གཅིག་ཀྱང་ཁོང་གིས་མཇལ་མི་འདུག ཁོང་གིས་མཐོ་སློབ་ལ་བོད་ཀྱི་དཔེ་དེབ་གལ་ཆེན་མཁོ་སྒྲུབ་དགོས་པའི་བསམ་འཆར་བཏོན་པ་དང་སློབ་གྲྭས་ངོས་ནས་རྒྱབ་སྐྱོར་བྱས་ཡོད་མོད། མཐོ་སློབ་ཏུ་བོད་ཀྱི་རིག་གཞུང་སྐོར་གྱི་ཆེད་མཁས་མེད་སྟབས་ཡེ་ཤེས་བསྟན་འཛིན་ལགས་ལ་བོད་ཀྱི་དཔེ་དེབ་སྐོར་གྱི་དཀར་ཆག་མཁོ་སྤྲོད་བྱེད་དུ་བཅུག ཁོང་གིས་མི་རིགས་དཔེ་སྐྲུན་ཁང་ལ་འབྲེལ་བ་བྱས་ནས་བོད་ཀྱི་རིག་གཞུང་སྐོར་གྱི་དཔེ་དེབ་བརྒྱ་ཕྲག་མཁོ་སྤྲོད་ཐུབ་པ་བྱས། ཁོང་གིས་སྣེ་ཁྲིད་ནས་མཐོ་སློབ་ཏུ་གངས་ལྗོངས་སྐོར་བྲོ་ལྷན་ཚོགས་གསར་འཛུགས་བྱས་པ་དང་མཐོ་སློབ་ཀྱིས་རྒྱབ་སྐྱོར་འོག་བོད་ཀྱི་རིག་གཞུང་དུས་སྟོན་ཞིག་གོ་སྒྲིག་ཞུས། ཕྱི་ལོ་ ༢༠༡༠ ལོར་ཡུལ་ཤུལ་དུ་ས་ཡོམ་གྱིས་གནོད་སྐྱོན་ཐེབས་སྐབས་ཁོང་གིས་དྲ་ལམ་བརྒྱུད་ནས་ས་ཕྱོགས་གང་སར་འབྲེལ་བ་བྱས་ཏེ་རོགས་སྐྱོར་ཞལ་འདེབས་བསྡུ་རུབ་ཀྱི་ལས་འགུལ་སྤེལ། པེ་ཅིན་ནས་རྒྱ་སྒོར་ཁྲི་ ༣༠ ལྷག་བསྡུ་རུབ་བྱས་རྗེས་ཁོང་གི་གྲོགས་པོ་དབང་རྒྱལ་དང་རྡོ་རྗེ་སོགས་ཀྱིས་ཟི་ལིང་ནས་མཁོ་ཆས་ཉོས་ཏེ་ས་གནས་ས་ཐོག་ཏུ་རོགས་རམ་བྱེད་དུ་སོང།
ཡེ་ཤེས་བསྟན་འཛིན་མཐོ་སློབ་ཏུ་འཛུལ་རྗེས་སྔོན་ཆད་སློབ་ཆུང་དང་སློབ་འབྲིང་སྐབས་ཕམ་ཟིན་པའི་བརྩེ་དུང་གི་གཏམ་བརྒྱུད་ཡིད་ལ་འཁོར་ནས་སློབ་ཆེན་ནས་དགའ་རོགས་མི་འཚོལ་རྒྱུ་དང་། གལ་ཏེ་འཚོལ་དགོས་ན་དཔལ་འབྱོར་གྱི་རྨང་གཞི་དགོས་རྐྱེན་མཐོ་སློབ་ཀྱི་ལོ་ངོ་བཞིའི་རིང་དགའ་རོགས་མ་སྒྲིག་པར་གཅིག་པུ་བསྡད། སློབ་མཐར་ཕྱིན་ལ་ཉེ་བའི་སྐབས་སུ་དྲ་ཐོག་ནས་ལྷ་སའི་བུ་མོ་ཞིག་ལ་འཕྲད་པ་དང་རིམ་བཞིན་ཕན་ཚུན་ངོ་ཤེས། ཁྱོས་མ་ཟས་ན་ངས་མི་འཐུང་གི་བརྩེ་དུང་གི་གཏམ་རྒྱུད་ཅིག་གི་དབུ་འཁྱུད་བྲིས། སློབ་མཐར་ཕྱིན་རྗེས་ཁོ་མོ་མེ་འཁོར་བབས་ཚུགས་སུ་བསྐྱལ་ནས་ཞལ་ལ་འོ་ཞིག་བྱས། དེ་ལྟར་ཡིད་དུ་འོང་བའི་སློབ་ཆེན་གྱི་མི་ཚེ་མཇུག་སྒྲིལ་བ་དང་མཐའ་མཇུག་གི་འོ་དེ་དུས་རབས་ཀྱི་བརྗེད་བྱང་དུ་བཞག
ཡེ་ཤེས་བསྟན་འཛིན་ལགས་པེ་ཅིན་དགེ་འོས་སློབ་ཆེན་ནས་སློབ་མཐར་ཕྱིན་རྗེས་སྲིད་གཞུང་གི་ལས་གནས་ལ་ཞུགས་འདོད་མེད་པས་ཕྱིེར་ཕ་ཡུལ་ཆུ་ཤུར་རྗོང་དུ་སོང་ནས་སློབ་འབྲིང་གི་ལས་དོན་གཉེར། ཁོང་གི་ཟླ་གླ་ནང་ནས་ཕ་མའི་དྲིན་ལན་ཆེད་དུ་ཟླ་བ་རེར་རྒྱ་སྒོར་གཅིག་སྟོང་ཉིས་སྟོང་ཙམ་ཕ་མ་ལ་བསྐུར། དངུལ་ལྷག་མ་རྣམས་གསོག་འཇོག་བྱས་ནས་སྔོན་ཆད་མཐོ་སློབ་འགྲིམས་སྐབས་ཀྱི་སློབ་ཡོན་བུ་ལོན་བླངས་བ་ཕྱིར་སློག་བྱས། རིམ་བཞིན་འཚོ་བའི་རྒྱུན་གྲོན་ཐད་དངུལ་གྱི་དཀའ་ངལ་འཕྲད་པས་དྲ་ལམ་བརྒྱུད་བོད་རྒྱ་ཡིག་སྒྱུར་གྱི་ལས་ཀ་གཉེར་བ་དང། ལག་ཐོགས་ཁ་པར་ནང་གི་བོད་ཡིག་མཉེན་ཆས་སོགས་བོད་བསྒྱུར་གྱི་ཕྱག་ལས་གནང། ཁོང་གིས་དགེ་རྒན་གྱི་ཡིག་རྒྱུགས་སྤྲོད་སྐབས་ཆབ་སྲིད་སྐོར་གྱི་ཡིག་རྒྱུགས་སྤྲད་པ་དང་ཆུ་ཤུར་རྗོང་སློབ་འབྲིང་དུ་འབྱོར་སྐབས་སློབ་གསོ་སྡེ་ཁག་ནས་སློབ་ཁྲིད་ཅི་ཞིག་བྱེད་རྩིས་ཐད་བཀའ་འདྲི་ཞུས། ཁོང་གིས་རབ་ཡིན་ན་ངས་བོད་ཡིག་སློབ་ཁྲིད་བྱེད་རྒྱུ་ཡིན་གཞན་པ་སློབ་ཁྲིད་བྱེད་དགོས་ཀྱང་དཀའ་ཁག་མེད་ཅེས་ལན་བཏབ། དེ་ལྟར་ཁོང་ནི་བོད་ཡིག་འཛིན་གྲྭའི་དགེ་རྒན་དང་བོད་ཡིག་སློབ་ཁྲིད་བྱེད་པའི་གོ་སྐབས་ཐོབ། ཁོང་གི་བསམ་པར་རང་གི་བོད་ཡིག་གི་ཆུ་ཚད་ངེས་ཅན་མིན་པས་རང་ཉིད་ཡར་རྒྱས་གཏོང་བར་འབད་བརྩོན་ལྷོད་མེད་བྱས། མིང་ལ་ལུག་ཚང་ཞེས་པའི་རྒྱ་ཡིག་གི་དྲ་ཚིགས་ཤིག་གསར་བཟོ་བྱས། རྗེས་སུ་སྐད་འཕྲིན་ནང་དུ་མིང་ལ་ལུག་ཚང་དཔལ་ཡོན་ཟེར་བའི་བོད་ཡིག་གི་འཕྲིན་སྟེགས་ཤིག་བཟོས། དེ་ནི་བོད་ལྗོངས་ས་ཁུལ་དུ་ཆེས་སྔ་ཤོས་ཀྱི་བོད་ཀྱི་རིག་གཞུང་ཁྱབ་སྤེལ་བྱེད་སའི་བོད་ཡིག་གི་འཕྲིན་སྟེགས་ཤིག་ཡིན། དོན་ངོ་མར་ལྷ་སའི་ནང་ཁུལ་དུ་ལུག་ཚང་ཟེར་བ་ནི་ཁོ་རང་གི་དངོས་མིང་ལས་སྐད་གྲགས་ཆེ་འདུག
སྔོན་མ་ནས་ཡེ་ཤེས་བསྟན་འཛིན་ལགས་ཀྱི་གྲོགས་པོ་བློ་བཟང་གིས་ཚོང་ལས་ཀྱི་ལས་དོན་གཉེར་ནས་ལྷ་སར་བོད་ཀྱི་སློབ་ཆེན་སློབ་མའི་རྩིས་འཕྲུལ་སྡེ་ཁག་ཅེས་པའི་ཚོང་ཁང་བཙུགས་ཡོད། ལྷ་ས་ནས་གྲོགས་པོ་མཉམ་དུ་ཚོང་ལས་ཙག་ཙིག་བྱེད་ཆེད་ཡེ་ཤེས་བསྟན་འཛིན་རྒྱུན་དུ་སྤྱི་སྤྱོད་རླངས་འཁོར་ནང་དུ་བསྡད་ནས་ཆུ་ཤུར་རྫོང་ནས་སྤྱི་ལེ་དྲུག་ཅུ་ཙམ་བརྒལ་ནས་ལྷ་སར་འགྲོ་བཞིན་ཡོད། ཉིན་ཞིག་ཡེ་ཤེས་བསྟན་འཛིན་གྱི་གྲོགས་པོས་ངོ་སྦྱོར་བྱས་པ་ལྟར་ཉི་ཧོང་ནས་ཡིན་པའི་བོད་ལྗོངས་སློབ་གྲྭ་ཆེན་མོའི་སློབ་ཕྲུག་ཅིག་བོད་ཡིག་གི་ཡིག་གཟུགས་རྩིས་འཕྲུལ་ནང་དུ་ནང་འཇུག་བྱེད་པར་སླེབས། ཕན་ཚུན་ལ་ཁ་པར་ཨང་གྲངས་སྤྲད་པ་དང་རྗེས་སུ་ཡེ་ཤེས་བསྟན་འཛིན་ལགས་ནི་ཁོ་མོའི་བོད་ཡིག་གི་ཟབ་སྦྱོང་དགེ་རྒན་དུ་གྱུར།
ཉི་ཧོང་བུ་མོའི་བློ་ཡུལ་ལས་འདས་པ་ཞིག་ལ་ཁོ་གཉིས་ངོ་ཤེས་ནས་ཉིན་གཉིས་པར་ཡེ་ཤེས་བསྟན་འཛིན་གྱིས་བོད་ཡིག་གི་ཐོག་ནས་ངས་ཁྱེད་རང་སྣང་བར་འགྲོ་སོང་ཞེས་བྲིས་ནས་བསྐུར། རྗེས་སུ་ཁོ་མོས་བཤད་ན་དེ་ནི་མི་ལ་གུས་ཞབས་མེད་པའི་བྱེད་སྟངས་ཤིག་རེད་ཟེར། དེ་ལྟར་རྒྱུན་དུ་ཁོ་གཉིས་ཀྱིས་བོད་ཡིག་གི་ལམ་ནས་ཕན་ཚུན་གླེང་མོལ་བྱས་པས་བོད་ཡིག་ཡར་རྒྱས་ཧ་ཅང་ཆེན་པོ་སོང་བ་དང་། ཁོ་གཉིས་ཀྱི་གློག་འཕྲིན་ནང་དུ་ཡོད་པའི་ཡིག་བསྐུར་དག་གི་གྲངས་འབོར་ནི་དཔེ་དེབ་ཆེན་པོ་ཞིག་གི་ཚད་ལོན་ཡོད་ཚོད་འདུག རིམ་བཞིན་བོད་ཡིག་གི་ཆུ་ཚད་ཡར་རྒྱས་སོང་བ་དང་ཉི་ཧོང་བུ་མོའི་སེམས་པ་འགུག་ཐབས་མྱུར་དུ་སོང་། ཁོ་མོས་ངའི་ཐོངས་མཆན་དུས་ཚོད་རྫོགས་ལ་ཉེ་བས་ཕྱིར་བསྣུད་བྱས་རྗེས་ལན་སྤྲད་ཆོག་ཅེས་བཤད། རྗེས་སུ་ཁོ་མོའི་ཐོངས་མཆན་ཕྱིར་བསྣུད་བྱེད་ཐུབ་པ་དང་ཡེ་ཤེས་བསྟན་འཛིན་ལགས་དང་དགའ་རོགས་སྒྲིག་རྒྱུ་ཁས་ལེན་བྱས། ལས་དབང་གིས་བཀོད་པ་བཞིན་ཉི་ཧོང་བུ་མོ་ཆུ་ཤུར་རྫོང་ལ་མནའ་མར་སོང་བ་དང་བུ་ཆུང་ཤ་ཚ་མོ་གཉིས་སྐྱེས་ནས་ལུག་ཚང་ཁྱིམ་ཚང་བདེ་སྐྱིད་ངང་འཚོ་གནས་ལ་རོལ། ཡིན་ནའང་ལུག་ཚང་གི་ལས་དོན་ཐད་ལ་ཅི་འདྲ་ཆགས་ཡོད།
ལྷ་སའི་ནང་མིང་ལ་སུང་མེན་ཟེར་བའི་རྒྱ་རིགས་སྐད་གྲགས་ཆེན་པོ་ཞིག་ཡོད་པ་དང་གནའ་བོའི་རིག་གཞུང་དང་འབྲེལ་བའི་ཚོང་ལས་བྱེད་བཞིན་ཡོད། ཁོང་གིས་སྲོལ་རྒྱུན་རིག་གཞུང་སློབ་གསོའི་ཞོལ་འདོད་དཔལ་སྒྱུ་རྩལ་ལྟེ་གནས་ཁང་ཞིག་ཕྱེས་ཡོད། ཞོལ་འདོད་དཔལ་ནི་༧གོང་ས་རྒྱལ་དབང་ལྔ་བ་ཆེན་མོའི་སྐབས་སུ་པོ་ཏྰ་ལའི་ནང་དུ་བཙུགས་པའི་སྲོལ་རྒྱུན་ལག་རྩལ་རིག་གནས་ཤིག་ཡིན། སྔོན་ཆད་ཡིད་དུ་འོང་བའི་རྩ་ཆེན་ཐང་ག་དང་། སྐུ་འདྲ། ཐགས་རིས། སློབ་ཆས་སོགས་མང་པོ་བཟོས་ནའང་ད་ལྟ་མཇལ་རྒྱུ་དཀོན། སུང་མེན་གྱིས་བོད་ཁུལ་དུ་མི་ལོ་ཉི་ཤུ་ལྷག་གི་རིང་ལ་ཕྱག་ལས་གནང་བ་དང་བོད་ཀྱི་རིག་གནས་སྒྱུ་རྩལ་ལ་རྒྱུས་མངའ་ཆེན་པོ་ཡོད་པ་མ་ཟད། ཞོལ་འདོད་དཔལ་ལག་ཤེས་སྒྱུ་རྩལ་སློབ་གླིང་བཙུགས་ནས་ལོ་ལྔ་འགོར་བཞིན་ཡོད། ད་ལྟ་སློབ་ཕྲུག་བརྒྱད་ཅུ་ཡས་མས་ཤིག་ཡོད་པ་དང་སློབ་སྦྱོང་དང་འཚོ་བ་ཡོངས་རྫོགས་སློབ་གྲྭས་འགན་ལེན་བྱས་ཡོད། སུང་མེན་ལགས་ཀྱི་ཚོང་ཁང་གིས་བསགས་པའི་དངུལ་གྱིས་སློབ་ཕྲུག་དང་དགེ་རྒན་ཚང་མ་ལ་སྤྲོ་སྐྱིད་ལྡན་པའི་ཁོར་ཡུག་ཅིག་བསྐྲུན་ཡོད། སུང་མེན་ལགས་ཀྱི་དཀའ་ཁག་ཡོད་ཚད་གདོང་ལེན་བྱས་ནས་སློབ་ཕྲུག་ཚོ་ལ་མཐུན་རྐྱེན་གང་ལེགས་སྦྱར་ནས་སྲོལ་རྒྱུན་ལག་ཤེས་རྒྱུན་འཛིན་མཁན་ཞིག་སྐྱེད་སྲིང་བྱ་རྒྱུ་དེ་རེད། ཐོག་མའི་དམིགས་ཡུལ་སེམས་ལ་བཟུང་ནས་སློབ་ཕྲུག་ཚོའི་འཚོ་བའི་དཀའ་ཁག་སེལ་རྒྱུ་དང་ཆེད་དམིགས་ཐོག་ས་ཆ་གང་སར་སོང་ནས་བོད་ཀྱི་སྲོལ་རྒྱུན་རིག་གནས་ལ་གོ་བ་ཟབ་མོ་ཡོད་མཁན་རྣམ་དཔྱོད་ལྡན་པའི་སློབ་ཕྲུག་འཚོལ་བསྡུ་བྱས། ལུག་ཚང་ལགས་ནི་ཁོང་གིས་ཐོག་མར་བཙལ་བའི་བོད་མི་དེ་ཡིན་པ་དང་ཁོང་ལ་ཞོལ་འདོད་དཔལ་ལག་ཤེས་སྒྱུ་རྩལ་སྐོར་གྱི་འདས་པ་དང་མ་འོངས་སོགས་སེམས་ཚོར་ཆེན་པོའི་ཐོག་ནས་གླེང་མོལ་བྱས།
ལུག་ཚང་ལགས་ཀྱིས་ཆུ་ཤུར་སློབ་འབྲིང་གི་སློབ་གསོའི་ལས་དོན་བཞག་ནས་སྐུ་ཞབས་སུང་མེན་ལགས་དང་ལྷན་དུ་ཞོལ་འདོད་དཔལ་ལག་ཤེས་སྒྱུ་རྩལ་ཐད་ནས་ལས་དོན་གཉེར་རྒྱུ་སེམས་ཐག་བཅད། འོན་ཀྱང་ཁོ་ལ་དཀའ་ངལ་ཞིག་ཡོད་པ་ནི་ཁོང་གི་ཕ་ཨེ་པོ་ལ་ཅི་ལྟར་ཞུ་རྒྱུ་དེ་ཡིན། ཕ་རྒན་ཨེ་པོ་ལགས་ལ་མཚོན་ན་དཀའ་ཁག་བརྗོད་ཀྱིས་མི་ལང་གདོང་དུ་བླངས་ནས་རང་གི་གཅེས་ཕྲུག་གསུམ་པོ་སློབ་གྲྭར་བསྐྱལ་བ་དང་ལྕགས་ཕོར་གཞུང་གི་ལས་གནས་ཐོབ་པ་ནི་ཁོང་གི་མི་ཚེའི་རྨི་ལམ་ཡིན། ད་ལྟ་ལུག་ཚང་གིས་གཞུང་གི་ལྕགས་ཕོར་བཞག་ནས་རྒྱུས་མངའ་ཅི་ཡང་མེད་པའི་འཚོ་གནས་ཤིག་བདམས་པ་ནི་ཕ་ཨེ་པོ་མི་འཐད་པ་ཐག་ཆོད་ཡིན། ཨ་ཕས་བུ་ཡེ་ཤེས་བསྟན་འཛིན་གྱི་ཐག་ཆོད་དེ་ཤེས་རྗེས་གདོང་ལ་སེམས་ཁུར་གྱི་རྣམ་པ་ཤུགས་ཆེན་ཐོན་པ་དང་ཉིན་གང་བོར་དབུགས་རིང་འབྱིན། ཨ་ཕ་ཁྱོད་ཀྱིས་རང་གི་བུ་ཡེ་ཤེས་བསྟན་འཛིན་ལ་ཡིད་ཆེས་བྱོས་དང་། ང་སྔར་བཞིན་ཞིང་པ་དཀྱུས་མ་ཞིག་ཏུ་ཆགས་ནའང་ཞིང་པ་བཟང་བོ་ཞིག་བྱེད་རྒྱུ་ཡིན་ཞེས་ལན་བཏབ།
སྐུ་ཞབས་ལུག་ཚང་ངེད་གཉིས་ལོ་མང་པོའི་སྔོན་ནས་ཕན་ཚུན་ངོ་ཤེས་ཡོད་པ་དང་པོད་འཕྲིན་ནས་ཕན་ཚུན་དོ་ཁུར་བྱས་ཡོད། ན་ནིང་གཞི་ནས་ཐོག་མར་ངོ་ཐུག་པ་ཡིན། ངས་ཁོ་ལ་ང་ཁྱོད་ཀྱི་ཕ་རྒན་གྱི་ན་ཚོད་དང་གཅིག་པ་ཡིན་པས་ཁྱེད་རང་ལུག་ཚང་ཞེས་འབོད་ན་དོགས་མི་བདེ་བ་འདུག་ཅེས་བཤད། ཁོང་གད་མོ་ཤོར་ཞོར་དུ་དགེ་རྒན་ལགས་ཁྱེད་ཀྱིས་ངའི་དངོས་མིང་ནས་འབོད་ན་ཆོག་ཅེས་ལན་བཏབ། སྐབས་དེར་ཁོང་གིས་གཞུང་གི་ལས་གནས་བཞག་ཚར་ཡོད་པ་དང་ལྷ་སར་གནས་སྤོར་ནས་ཞོལ་འདོད་དཔལ་ལག་ཤེས་སློབ་གྲྭར་ཞུགས་འདུག དེ་ལྟར་ངེད་གཉིས་འདུ་འཛོམས་འདྲ་མིན་གྱི་ཐོག་ནས་རྒྱུན་དུ་ཐུག་འཕྲད་བྱེད་བཞིན་ཡོད། ལུག་ཚང་ལགས་ཀྱིས་གསུང་དོན་ལ་ངས་རང་གི་ནུས་ཤུགས་དང་། མི་རིགས་ཀྱི་སྟོབས་ཤུགས། སྤྱི་ཚོགས་ཀྱི་རྒྱབ་སྐྱོར་ལ་བརྟེན་ནས་མི་རིགས་ཀྱི་ཁྱད་ཆོས་ལྡན་པའི་སློབ་གླིང་ཞིག་འཛུགས་སྐྲུན་བྱ་རྒྱུ་དང་། བོད་ཀྱི་སྲོལ་རྒྱུན་རིག་གནས་དར་སྤེལ་བྱ་རྒྱུ་ཡིན་ཟེར། ངའི་བསམ་པར་དེ་ནི་དོན་དངོས་དང་ལྡན་པའི་ལུག་ཚང་དཔལ་ཡོན་ཟེར་བ་དེ་རེད་བསམ་སོང་།
