བོད་རྔ་བ་རྫོང་རྨེའུ་རུ་མ་སློབ་ཆུང་གི་བོད་ཡིག་དགེ་རྒན་དོན་ཡོད་ཅེས་པ་ཞིག་གིས་སློབ་ཕྲུག་ཚོར་རྒྱལ་ཁབ་ཀྱི་གཏན་འབེབ་སློབ་གསོའི་ཁ་ཕྱོགས་ལྟར་སློབ་གསོ་གཏོང་གི་མེད་པའི་ཉེས་མིང་འོག་དགེ་རྒན་གྱི་ལས་གནས་ནས་གནས་དབྱུང་བཏང་འདུག
དེ་རིང་བཙན་བྱོལ་ནང་དུ་ཡོད་པའི་རྨེའུ་རུ་མ་ནས་ཡིན་པའི་འབྲེལ་ཡོད་བོད་མི་ཞིག་གིས་འདི་ག་བོད་ཀྱི་དུས་བབ་གསར་འགོད་པར། ཉེ་སྔོན་ཕྱི་ཟླ་ ༣ ནང་དུ་བོད་རྔ་བ་རྫོང་རྨེའུ་རུ་མ་སློབ་ཆུང་གི་བོད་ཡིག་དགེ་རྒན་དོན་ཡོད་ལགས་ཀྱིས་སློབ་གསོ་གཏོང་སྟངས་འགྲིག་གི་མི་འདུག་ཅེས་གནས་དབྱུང་བཏང་ཡོད་འདུག དེ་སྔོན་ཐེངས་ཁ་ཤས་ལ་འབྲེལ་ཡོད་ལས་ཁུངས་ནས་དོན་ཡོད་ལགས་སྐད་བཏང་སྟེ་རྒྱལ་ཁབ་ཀྱི་གཏན་འབེབ་སློབ་གསོའི་ཁ་ཕྱོགས་ལྟར་སློབ་ཕྲུག་ཚོར་སློབ་གསོ་གཏོང་དགོས་སྐོར་བཀའ་བཏང་མྱོང་ཡོད་སྐོར་བརྗོད་བྱུང་།
དགེ་རྒན་དོན་ཡོད་ལགས་གནས་དབྱུང་བཏང་རྗེས། སློབ་ཕྲུག་དང་ཁྱིམ་བདག་རྣམས་ཀྱིས་ཕངས་སེམས་ཆེན་པོས་པར་དང་བརྙན་ཐུང་སོགས་སྒེར་གྱི་དྲ་ལམ་དུ་སྤེལ་འདུག་ལ། མི་ལོ་ ༡༥ ལྷག་གི་རིང་སློབ་མ་ཚོའི་ཆེད་དུ་ཁ་མིན་དོན་གྱིས་བློ་དཀར་བའི་བོད་ཡིག་དགེ་རྒན་ཞིག་སློབ་གླིང་དང་གྱེས་དགོས་བྱུང་བར་སེམས་གཏིང་ནས་ཕངས་སེམས་སྐྱེས་ཀྱང་ཐབས་ཤེས་གཞན་གང་ཡང་མེད་པ་སོགས་བརྗོད་འདུག འདི་གར་འབྱོར་བའི་བརྙན་ཐུང་ཞིག་གི་ནང་དུ་དགེ་རྒན་ཁོང་འགྲོ་ཁར་སློབ་ཕྲུག་མང་པོ་རྒྱུག་ཕྱིན་ནས་ཁོང་ལ་གཡས་གཡོན་མདུན་རྒྱབ་མེད་པར་གང་ས་ནས་འཐམས་པ་སོགས་དགེ་སློབ་བར་གྱི་ལྷད་མེད་བརྩེ་བས་དམ་དུ་བསྒྲིལ་འདུག་པ་གསལ་ལེར་མཐོང་ཐུབ་ཀྱི་འདུག་ལ། འབྲེལ་ཡོད་ནས་དགེ་རྒན་ཁོང་སློབ་གྲྭ་དང་གྱེས་སྐབས་སློབ་ཕྲུག་མང་པོ་ངུས་པ་སོགས་ཁྱིམ་བདག་དང་བཅས་པར་ཡིད་སྐྱོ་བ་དང་ཕངས་སེམས་ཆེན་པོ་བྱུང་ཡོད་སྐོར་བརྗོད་བྱུང་།
དགེ་རྒན་དོན་ཡོད་ལགས་ནི་རྨེའུ་རུ་མ་རུ་ཆེན་བཞི་པ་ནས་ཡིན་འདུག་ལ། ཁོང་གིས་དུས་རྒྱུན་བོད་སྐད་ཡིག་དང་བོད་ཀྱི་ལོ་རྒྱུས་སོགས་སློབ་འཁྲིད་གནང་ཡོད་པར་བརྟེན། ས་གནས་སྲིད་གཞུང་གི་མགོ་འཁྲིད་ཚོས་ཁོང་ཡང་ནས་ཡང་དུ་སྐད་བཏང་སྟེ་ཉེན་བརྡ་བཏང་མཐར་ལས་གནས་ནས་གནས་དབྱུང་བཏང་ཡོད་འདུག
རྩོམ་སྒྲིག་པ། པདྨ་མཚོ།
