ཞི་ཅིན་ཕིན་ཧྥ་རན་སིར་ཡོང་གྲབས་ཡོད་པ་དང་བསྟུན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཧྥ་རན་སིའི་སྲིད་འཛིན་མཱག་རོན་གཉིས་མཇལ་འཕྲད་གནང་།
ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཧྥ་རན་སིའི་སྲིད་འཛིན་མཱ་ཁུ་རོན་གཉིས་ཧྥ་རན་སིའི་སྲིད་འཛིན་ཕོ་བྲང་ (Palais de l’Élysée) ནང་མཇལ་འཕྲད་གནང་ཞིང་། སྐབས་དེར་སྲིད་སྐྱོང་མཆོག་གིས་ཧྥ་རན་སིའི་སྲིད་འཛིན་མཆོག་ལ་༧གོང་ས་མཆོག་གིས་མཚན་རྟགས་བསྐྱོན་པའི་སྐུ་པར་ཞིག་འཚམས་རྟགས་སུ་གནང་ཡོད་འདུག་ལ། སྲིད་སྐྱོང་དང་ཧྥ་རན་སིའི་སྲིད་འཛིན་གྱི་མཇལ་འཕྲད་འདི་ནི་ལོ་རྒྱུས་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཧྥ་རན་སིའི་སྲིད་འཛིན་ལས་ཐོག་གཉིས་དངོས་སུ་མཇལ་འཕྲད་གནང་བ་ཐོག་མ་དེ་ཆགས་ཡོད་འདུག
དབུ་འཁྲིད་གཉིས་ཀྱི་མཇལ་འཕྲད་སྐབས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཕུལ་བའི་སྐུ་པར་དེ་ནི། ཕྱི་ལོ་ ༢༠༡༦ ཟླ་ ༩ ཚེས་ ༡༢ ཉིན་ཧྥ་རན་སིའི་རྒྱལ་ས་པ་རེ་སིར་༧གོང་ས་མཆོག་དང་སྐུ་ཞབས་མཱག་རོན་གཉིས་དངོས་སུ་མཇལ་འཕྲད་གནང་བ་ཞིག་ཡིན་ལ། སྐབས་དེར་སྐུ་ཞབས་མཱག་རོན་ལགས་ཧྥ་རན་སིའི་སྲིད་འཛིན་གྱི་འོས་མིར་བཞེངས་བཞིན་ཡོད་པ་རེད།
ཐེངས་འདིའི་མཇལ་འཕྲད་ནི་ཟླ་འདིའི་ཕྱི་ཚེས་ ༥ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་ཧྥ་རན་སིར་ཡོང་གཏན་ཁེལ་བའི་སྔོན་ཏག་ཏག་ཏུ་བྱུང་ཡོད་སྟབས། འདིས་རྒྱ་ནག་གཞུང་ལ་བརྡ་ལན་ཆེན་པོ་ཞིག་བསྟན་ཡོད་པ་རེད།
ད་ལན་གྱི་མཇལ་འཕྲད་འདི་ནི་སྤྱིར་སྲིད་སྐྱོང་མཆོག་ད་ལྟའི་ཆར་ཡུ་རོབ་རྒྱལ་ཁབ་ཁག་ཏུ་གཞུང་འབྲེལ་འཚམས་གཟིགས་སུ་ཕེབས་བཞིན་པ་དང་སྟབས་བསྟུན། ཧྥ་རན་སིའི་གྲོས་ཚོགས་གོང་མའི་འཐུས་མི་ཟུར་པ་སྐུ་ཞབས་ (Andre Gattolin) ལགས་སུ་ཆེ་བསྟོད་ཀྱི་གཟེངས་རྟགས་ཤིག་ཕུལ་བའི་མཛད་སྒོའི་སྟེང་བྱུང་ཡོད་པ་དང་། ཁོང་ནི་བོད་ཀྱི་གྲོགས་པོ་དང་ཡུན་རིང་བོད་དོན་རྒྱབ་སྐྱོར་གནང་མཁན་གྱི་ཧྥ་རན་སིའི་གནད་ཡོད་མི་སྣ་མང་པོའི་གྲས་ཀྱི་གཅིག་ཡིན་པ་རེད།
ཕྱི་ཟླ་ ༤ ཚེས་ ༢༩ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཡུ་རོབ་རྒྱལ་ཁབ་སུད་སིར་གཞུང་འབྲེལ་འཚམས་གཟིགས་སུ་ཕེབས་སྐབས། སུད་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་མ་ཡ་ག་རབ་(Maya Graf)མཆོག་དང་། གྲོས་ཚོགས་འཐུས་མི་བྷར་བ་ར་གྷི་སི་(Barbara Gysi)མཆོག གྲོས་ཚོགས་འཐུས་མི་ཕེ་བྷིན་མོ་ལི་ན་(Fabian Molina)མཆོག གྲོས་ཚོགས་འཐུས་མི་ནིག་གྷུ་གར་(Nik Gugger) མཆོག་སོགས་ཀྱིས་སྲིད་སྐྱོང་མཆོག་སུད་སིའི་གྲོས་ཚོགས་སུ་ཕེབས་བསུ་དང་སྣེ་ལེན་ཞུས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
