སངས་རྒྱས་སྐྱབས་ལགས་ཡུ་རོབ་ཁུལ་གྱི་རྒྱ་རིགས་འབྲེལ་མཐུད་པར་བསྐོ་གཞག་གནང་།

བོད་ཀྱི་ཉམས་ཞིབ་པ་དང་རྩོམ་པ་པོ་སངས་རྒྱས་སྐྱབས་ལགས་ཡུ་རོབ་ཁུལ་གྱི་རྒྱ་རིགས་འབྲེལ་མཐུད་པར་བསྐོ་གཞག་གནང་སྟེ་ཕྱི་ཟླ་ ༤ ཚེས་ ༡ ཉིན་ནས་དངོས་སུ་ལས་འཁུར་ཞུས་ཡོད་འདུག

འདི་གའི་གསར་འགོད་པས་སངས་རྒྱས་སྐྱབས་ལགས་སུ་འབྲེལ་བ་ཞུ་ཐབས་བྱས་པ་ཡིན་ཏེ་མཐུད་ཐུབ་མ་སོང་ལ། ཕྱི་ལོ་ ༢༠༢༡ ཟླ་ ༡ ཚེས་ ༡ ཉིན་སངས་རྒྱས་སྐྱབས་ལགས་ཀྱི་རྩོམ་ཡིག་གཅེས་བསྡུས་དུར་ཁྲོད་ཅེས་པའི་དེབ་ལ་ཨོ་གླིང་དུ་རྟེན་གཞི་བྱས་ཡོད་པའི་རྒྱ་བོད་དམངས་ཁྲོད་བསམ་བློ་བརྗེ་རེས་འཕེལ་རྒྱས་ཚོགས་པས་རྒྱ་བོད་དམངས་ཁྲོད་བསམ་བློ་བརྗེ་རེས་གཟེངས་རྟགས་ཐེངས་དགུ་པ་ཕུལ་མྱོང་འདུག

སངས་རྒྱས་སྐྱབས་ལགས་ནི་ཕྱི་ལོ་ ༡༩༩༨ ལོར་ནུབ་བྱང་མི་རིགས་སློབ་གྲྭ་ཆེན་མོ་ནས་སློབ་མཐར་ཕྱིན་པ་དང་། ཕྱི་ལོ་ ༡༩༩༩ ལོར་རྒྱ་གར་དུ་བཙན་བྱོལ་དུ་འབྱོར་ཞིང་། ཕྱི་ལོ་ ༢༠༠༠ ནས་ ༢༠༡༤ ལོ་བར་དུ་བོད་མིའི་སྒྲིག་འཛུགས་ཕྱི་དྲིལ་རྒྱ་ཡིག་སྡེ་ཚན་དུ་ཡིག་བསྒྱུར་བ་དང་གསར་འགོད་པ། སྤྱི་ཁྱབ་རྩོམ་སྒྲིག་པ་དང་ཕྱི་དྲིལ་རྒྱ་ཡིག་ཚན་པའི་མགྲིན་ཚབ་པ་སོགས་ཀྱི་ཕྱག་ལས་གནང་། ཁོང་གིས་ཚགས་པར་དང་དྲ་རྒྱ་འདྲ་མིན་ཐོག་བོད་དོན་དང་འབྲེལ་བའི་རྩོམ་ཡིག་བརྒྱ་ལྷག་འགྲེམས་སྤེལ་དང་། ཕྱི་ལོ་ ༢༠༡༥ ལོ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་རྒན་པ་དང་ཡིག་བསྒྱུར་བ། རྩོམ་སྒྲིག་པ་བཅས་ཀྱི་འགན་འཁུར་གྱི་ཡོད་པ་རེད། ཕྱི་ལོ ༢༠༡༦ ལོར་ཁོང་གི་རྩོམ་ཡིག་གཅེས་བསྡུས་དུར་ཁྲོད་ཅེས་པ་དེབ་གཟུགས་སུ་དཔར་བསྐྲུན་གནང་། ཁོང་གིས་རྒྱལ་ཁབ་འདྲ་མིན་ནང་བོད་དོན་མཁས་པའི་བགྲོ་གླེང་ནང་མཉམ་ཞུགས་དང་གོ་སྒྲིག་ཞུས་ཡོད་པ་དང་། ད་ལྟ་སི་པན་རྒྱལ་ཁབ་ནང་རང་དབང་གི་རྩོམ་འབྲིའི་ལས་ལ་འབད་བཞིན་ཡོད་འདུག

གསར་འགོད་པ། སྐལ་བཟང་སྦྱིན་པ།