འཛམ་གླིང་གི་ངོ་མཚར་བའི་བརྩེ་དུང་གི་གཏམ་རྒྱུད་ངོ་མ་ཞིག

ཁ་སི་ཝུས་བརྩམས།

 མགོ་ལོག་དཔལ་ལྡན་གྱིས་བསྒྱུར།

བརྩེ་དུང་རྣལ་མ་ཞིག་གིས་དཀའ་སྡུག་ལས་རྣམ་པར་རྒྱལ་ཐུབ། དེ་ནི་ཡུ་རོབ་ཀྱི་རྒྱལ་ཁབ་ཁོ་རོ་ཤི་ཡའི་ནང་བྱུང་བའི་ཁ་ཁར་ལུས་པའི་མཚོ་བྱ་དཀར་པོ་ཕོ་མོ་གཉིས་ཀྱི་ངོ་མཚར་བའི་བརྩེ་དུང་གི་གཏམ་རྒྱུད་ཅིག་ཡིན་ལ། གཏམ་རྒྱུད་འདི་ལ་དུས་རབས་ཉེར་གཅིག་པའི་ལྷད་མེད་བརྩེ་དུང་གི་གཏམ་རྒྱུད་རླབས་ཆེ་ཤོས་ཞེས་ཟེར་མཁན་ཡང་འདུག  ལོ་ལྟར་ཀེ་པི་ཊོན་(Klepetan) ཟེར་བའི་མཚོ་བྱ་དཀར་པོ་ཕོ་ཞིག་གིས་ལེ་བར་ ༡༤༠༠༠ ལྷག་གི་བར་ཐག་ཡོད་པའི་ལྷོ་སྣེ་ནས་བྱང་ལ་འཕུར་བསྐྱོད་ཀྱིས་རང་གི་ཚེ་གྲོགས་སུ་གྱུར་བའི་དགའ་མ་མ་ལི་ན་(Malena) དང་ལྷན་འཛོམས་བྱེད་ཀྱི་ཡོད།

ཧ་ཅང་ངོ་མཚར་བའི་ལོ་འཁོར་གཅིག་གི་བརྩེ་དུང་གི་འགྲུལ་བཞུད་དེ་ལོ་ངོ་བཅུ་དྲུག་རིང་ལ་ཡུ་རོབ་རྒྱལ་ཁབ་ཁོ་རོ་ཤི་ཡའི་བྷོ་རི་ཌི་ཀི་སི་ཨ་རོ་སི་(Brodski Varoš) ཞེས་པའི་གཞིས་གྲོང་ཆུང་ཆུང་དེར་བྱུང་ཡོད་ཅིང་། དྲ་ལམ་སོགས་སུ་མཚོ་བྱ་གཉིས་ཀྱི་བརྩེ་དུང་གི་གཏམ་རྒྱུད་དེ་ཁྱབ་སྤེལ་ཆེན་པོ་ཕྱིན་ཡོད་པས། ལོ་ལྟར་ཡུལ་སྐོར་བ་སྟོང་ཕྲག་མང་པོ་གཞིས་གྲོང་ཆུང་ཆུང་དེར་འདུས་པ་མ་ཟད། མི་གྲངས་ས་ཡ་མང་པོས་ཐད་གཏོང་བྱེད་བཞིན་ཀེ་པི་ཊོན་ཕྱིར་ལོག་ནས་མ་ལི་ན་དང་ལྷན་འཛོམས་ཡོང་རྒྱུར་ངང་སྒུག་བྱེད་ཀྱི་ཡོད།

ཕྱི་ལོ ༡༩༩༣ ལོར་མཚོ་བྱ་དཀར་པོ་ཞིག་གི་གཤོག་སྒྲོར་རྡེའུ་ཕོག་རྗེས། མོས་འཕུར་སྐྱོད་མ་ཐུབ་པར་ལམ་ཟུར་དུ་ལུས་ཡོད་པའི་སྐབས་དེར། རྒད་པོ་ཞིག་གིས་མོ་བསྐྱབས་ནས་རང་ཁྱིམ་དུ་འཁྲིད་རྗེས་ཡིད་འོང་གི་གཏམ་རྒྱུད་འདི་བྱུང་བ་རེད། རྒད་པོ་སི་ཇེ་པིན་ཝོ་ཆི་(Stjepan Vokic) ཡིས་མཚོ་བྱ་ཡི་གཤོག་སྒྲོ་ཆག་བཅངས་ནས་གསོ་སྐྱོང་བྱས་ཀྱང་ཆག་བཅངས་མ་ཐུབ་པར་བརྟེན། མཚོ་བྱ་དེ་བདག་ཉར་བྱས་ནས་མ་ལི་ན་ཞེས་བཏགས།

རྒད་པོས་སྟོན་དུས་སུ་རང་གི་ཁང་པའི་ཐོག་ཏུ་མ་ལི་ན་ལ་སྡོད་གནས་ཤིག་བཟོས་པ་མ་ཟད། ཁོང་ཉིན་ལྟར་མཚོ་ཁར་ཉ་འཛིན་དུ་ཕྱིན་ནས་མ་ལི་ནར་ཉ་སྟེར་གྱི་ཡོད་ཅིང་། དུས་ཚིགས་ཀྱི་འགྲོས་དང་བསྟུན་ནས་དགུན་ཟླ་བཞད་དུས། ཁོས་མ་ལི་ན་རང་ཁྱིམ་དུ་བསུས་ནས་གྲང་རླུང་གི་མནར་གཅོད་མྱོང་མ་བཅུག་པར་མཚོ་བྱ་དེའི་ཆེད་མང་པོ་ཞིག་བློས་གཏོང་བྱས་ཏེ། ཕྱི་ལོ་ ༢༠༠༡ བར་མི་ལོ་བརྒྱད་རིང་ཁོང་གཉིས་ཀྱིས་ཞི་བདེ་བག་ཕེབས་ཀྱི་འཚོ་བ་རོལ།

ཉིན་ཞིག་རྒད་པོས་མཚོ་བྱ་ཕོ་ཞིག་གིས་ཁང་རྩེག་ཏུ་སྐོར་གཡེང་བྱས་མཚམས། མ་ལི་ནས་ཁོར་བརྩེ་འདང་གི་མིག་ཟུང་ཕྱོགས་ནས་སྤྲོ་སྣང་གི་ཚོར་བས་བཟི་བ་མཐོང་མཚམས། རྒད་པོས་མ་ལི་ནས་མཚོ་བྱ་དེར་ཡིད་སེམས་ཤོར་ཡོད་པ་ཤེས་ནས། ཁོས་བརྙན་ཐུང་ཞིག་ཏུ “བྱ་ཕོ་དེ་འདིར་ཐོན་དུས་རང་གི་བུ་ཆུང་ཞིག་ཕྱིར་ལོག་པ་དང་ཅི་ནས་མཚུངས་”ཞེས་བརྗོད་འདུག་ལ། རྒད་པོས་རང་གི་བུ་མོ་བཞིན་བདག་གཅེས་བྱས་པའི་མ་ལི་ནའི་བརྩེ་རོགས་ལ་ཀེ་པི་ཊོན་ (Klepetan) ཞེས་བཏགས། དུས་དེ་ནས་བཟུང་མཚོ་བྱ་གཉིས་ཀྱིས་བརྩེ་དུང་གི་མིག་ཟུང་ཕྱོགས་རེས་བྱེད་ཞོར་ལྷན་ཅིག་ཏུ་འཚོ་བ་རོལ་མགོ་བརྩམས་པས། ཀེ་པི་ཊོན་གྱིས་མཚོ་ཁ་ནས་ཉ་བཟུང་ནས་མ་ལི་ནར་སྟེར་ནས་བརྩེ་འདང་གིས་བསྐྱངས་པས། ཕྱིས་སུ་ཁོང་གཉིས་ལ་ཕྲུ་གུ་ཁ་ཤས་བཙས།

མཚོ་བྱ་ཀེ་པི་ཊོན་གྱིས་ཉིན་ལྟར་ཁང་རྩེག་གི་ཐོག་ཏུ་འགྲེང་ནས་རང་གི་མཚོ་བྱ་མ་བུ་རྣམས་ལ་འགེབས་སྲུང་དང་ལྟ་སྲུང་བྱེད་པ་མ་ཟད། མཚམས་རེར་མཚོ་ཁར་ཕྱིན་ནས་ཁོང་ཚོར་ཉ་སྟེར་གྱི་ཡོད་པས། རྒད་པོ་སི་ཇེ་པིན་ཝོ་ཆི་ཁོའི་ནང་མི་འཕེལ་རྒྱས་བྱུང་ནས་སྤྲོ་སྣང་ལྡན་པའི་འཚོ་བ་ཞིག་རོལ་ཡོད་ཀྱང་། དུས་ཚོད་རིམ་གྱིས་འདས་ནས་སྟོན་མཇུག་ཏུ་སླེབས་སྐབས། བྱིའུ་ཕྲུག་རྣམས་གཉོམ་ལག་རྒྱས་ནས་རང་རང་གི་གཤོག་རྩལ་ངོམ་ནས་རེ་སྙེག་གི་སླད་དུ་འཕུར་སྐྱོད་བྱས་མཐར། མ་ལི་ན་དང་ཀེ་པི་ཊོན་གཉིས་ཤུལ་དུ་ལུས། དགུན་ཁ་དལ་གྱིས་བཞད་ནས་གྲང་རླུང་ཇེ་བཙན་དུ་གྱུར་བས་མཚོ་བྱ་རྣམས་རིམ་གྱིས་ལྷོ་སྣེ་རུ་བགྲོད་མགོ་བརྩམས་ཀྱང་། ཀེ་པི་ཊོན་དགུན་གྱི་གྲང་རེག་ཆེས་བཙན་ཤོས་བར་དུ་བསྡད་མཐར་མི་འདོད་བཞིན་དུ་འཕུར་སྐྱོད་བགྱིས་ཏེ། མ་ལི་ན་གཅིག་པུ་དགུན་གྱི་གྲང་རླུང་ཁྲོད་དུ་བསྡད་དེ་སེམས་ངལ་གྱིས་མནར་བས། རྒད་པོའི་བརྙན་ཐུང་ཞིག་གི་ནང་། “ང་རང་མོའི་ཆེད་དུ་སེམས་པ་ཧ་ཅང་སྡུག་གི་འདུག་སྟེ། མོས་ཁ་ཟས་མི་ཟ་བ་དང་། ཐབས་སྡུག་གི་གནས་སྟངས་མང་དག་ཅིག་སྦས་སྐུང་བྱེད་ཀྱི་འདུག “ ཅེས་བརྗོད་འདུག རྒད་པོས་མོ་སེམས་ངལ་ལས་གྲོལ་སླད་རང་ཁྱིམ་དུ་བསུས་ནས། མཚམས་རེར་སྐོར་གཡེང་དང་ལྷན་གཅིག་ཏུ་ཉ་སོགས་འཛིན་དུ་བསྐྱོད་པ་མ་ཟད། ཁོས་མཚོ་བྱའི་རིགས་ཀྱི་དངོས་བྱུང་གློག་བརྙན་བསྟན་ནས་མོའི་ཁེར་རྐྱང་གི་ངལ་དུབ་སེལ་ཐབས་བྱས་པས། ཁོའི་བརྩེ་འདང་གི་མཐུ་འོག་ནས་མོ་རང་ཇེ་སྐྱིད་དུ་སོང་།

བསིལ་རླུང་དལ་གྱིས་ལྡང་བའི་དཔྱིད་ཀྱི་ཞོགས་པ་ཞིག་ལ་རྒད་པོས་རང་གི་ཁང་ཐོག་ཏུ་སྒྲ་ཞིག་ཐོས་པ་དང་སྒོའི་ཕྱིར་བུད་སྐབས། ཁོས་ཀེ་པི་ཊོན་ཕྱིར་ལ་ལོག་ཡོད་པ་ཤེས། མཚོ་བྱས་དུས་བཞིའི་འགྲོས་དང་བསྟུན་ནས་ས་གནས་གཞན་དང་གཞན་དུ་འཕུར་སྐྱོད་བྱེད་ཐུབ་པ་ནི་མཚོ་བྱ་རྣམས་ཀྱི་ཁྱད་འཕགས་ཀྱི་ཁྱད་ཆོས་ཤིག་དང་། ཀེ་པི་ཊོན་དགུན་ཁར་ལྷོ་སྣེ་རུ་འཕུར་སྐྱོད་བྱེད་ཀྱི་ཡོད་ཀྱང་ཁོས་ནམ་ཡང་མ་ལི་ན་སྐྱུར་མྱོང་མེད་ལ།  ཀེ་པི་ཊོན་ནི་ཁུལ་དེའི་ལྷོ་སྣེ་ལ་བགྲོད་མཁན་གྱི་མཚོ་བྱ་མཐའ་མ་དེ་ཡིན་ཡང་ཕྱིར་ལོག་མཁན་ཐོག་མ་དེ་ཡིན་པས། དེ་ནི་ཁོས་མ་ལི་ནར་ལྷད་མེད་ཀྱི་བརྩེ་འདང་རྣལ་མ་ཞིག་བཅངས་ཡོད་པ་གདོན་མི་ཟ།

ཀེ་པི་ཊོན་ཕྱིར་ལོག་རྒྱུ་ནི་ཧ་ཅང་དཀའ་ཚེགས་ཅན་ཞིག་ཡིན་ཏེ། ལྷོ་ཨ་ཧྥི་རི་ཁ་ནས་ཁོ་རོ་ཤི་བར་སྤྱི་ལེ་ ༡༤༠༠༠ ལྷག་འཕུར་སྐྱོད་བྱས་ནས་ཊ་སི་མེན་མཚོ་(Tasman Sea) ཡི་མཱ་རི་ཡ་མཚོ་གླིང་(Maria Island) དང་། ཨི་ཇིབ་ཀྱི་སི་ཡ་ནའི་(Sinai) དང་། ཨི་རག་གི་བྱང་ཐང་ཆེན་པོ་སོགས་བརྒལ་དགོས་པས། མཚོ་བྱ་གཉིས་ཀྱི་བརྩེ་དུང་གི་གཏམ་རྒྱུད་དེ་དྲ་ལམ་དུ་སྐད་གྲགས་ཆེན་པོ་ཆགས་ནས་འཛམ་གླིང་གི་མི་མང་པོ་ཞིག་གིས་ལོ་ལྟར་ཁོང་གཉིས་དངོས་སུ་ལྷན་འཛོམས་བྱུང་བ་ལྟ་ཡོད། རྒད་པོ་སི་ཇེ་པིན་ཝོ་ཆི་ཡིས། བྱ་རིགས་ཀྱི་ཆེས་ཉེན་ཚབས་ཆེ་ཤོས་ཀྱི་འགྲུལ་བཞུད་ནི་སྤྱི་ལེ ༢༠༠ ལྷག་གི་དཀྱིལ་ཤར་རྒྱལ་ཁབ་ལི་བྷ་ནོན་(Lebanon) གྱི་འཕུར་ལམ་དེ་ཡིན་ཞིང་། དེར་འགན་འཁྲིའི་འདུ་ཤེས་མེད་པའི་རྔོན་པ་དག་གིས་བྱ་རིགས་ས་ཡ་༢།༦ ལྷག་གི་འཕུར་ལམ་བཅད་ནས་ལྐོག་གསོད་བྱས་པ་ཡིན། ཞེས་བརྗོད་འདུག

ལོ་ཞིག་གི་དཔྱིད་ཀར་ཀེ་པི་ཊོན་ཕྱིར་ལོག་བྱས་མེད་པས་རྒད་པོས་དངངས་འཚབས་ཆེན་པོས་ལི་བྷ་ནོན་གྱི་སྲིད་བློན་མེ་ཡེ་ཁིལ་ཨོ་ནན་(Michel Aoun) ཟེར་བ་ཞིག་ལ་འཕྲིན་ཡིག་ཅིག་བསྐུར་བའི་ནང་། ང་ཚོའི་རྒྱལ་ཁབ་ཏུ་མཚོ་བྱ་ཚོས་ལོ་ལྟར་ཡུལ་ལ་བྱིའུ་ཕྲུག་འཇོག་གི་ཡོད་སྟབས། མཚོ་བྱ་ཚོས་ཚེ་སྲོག་གསར་བ་ཞིག་རྒྱུན་སྐྱོང་བྱེད་བཞིན་ཡོད་པའི་ཡིད་ཆེས་བརྟན་པོ་བྱེད་ཀྱི་ཡོད་པས། མཚོ་བྱ་དེ་གཉིས་ལ་ངའི་སྲོག་ལྟར་གཅེས། ཁྱེད་རང་གིས་བརྩེ་དུང་གི་གཏམ་རྒྱུད་འདི་དག་ལ་ཡིད་ཆེས་མེད་ངེས་ཀྱང་། དཔྱིད་དུས་སུ་ཁོ་རི་ཤི་ཡར་ཐད་གཏོང་བརྒྱུད་མི་གྲངས་ས་ཡ་མང་པོས་ཀེ་པི་ཊོན་ཕྱིར་ལོག་བྱེད་པར་རེ་སྒུག་དང་། ལྷན་འཛོམས་དེ་བརྒྱུད་མི་མང་པོ་ཞིག་ལ་ལྷད་མེད་ཀྱི་དགའ་སྤྲོ་སྦྱིན་གྱི་ཡོད་པའི་དངོས་ཡོད་དེར་ཡིད་ཆེས་གནང་དགོས། ཞེས་བྲིས་ཡོད་པས། ལི་བྷ་ནོན་གྱི་སྲིད་བློན་མེ་ཡེ་ཁིལ་ཨོ་ནན་གྱིས་རྔོན་པ་ཚོས་ལྷོ་སྣེ་ནས་བྱང་དུ་བགྲོད་མཁན་གྱི་བྱེའུ་རིགས་གསོད་མི་ཆོག་པའི་བཀའ་ཁྱབ་བཏང་ཡོད་པ་མ་ཟད། ཁོས་མི་དང་ནགས་ཚལ། དེ་བཞིན་བྱ་རིགས་དང་མིའི་བར་ཁེ་ཕན་སྲུང་སྐྱོབ་ཀྱི་སླད་ཞི་བདེའི་གྲོས་ཆོད་ཅིག་ངེས་པར་དུ་འཇོག་དགོས་ཏེ། ང་ཚོས་དེ་དག་ལས་བརྒལ་བའི་ལས་ཀ་མང་པོ་ཞིག་བྱེད་ཀྱི་ཡོད། ཅེས་བརྗོད་འདུག

འདས་པའི་མི་ལོ་ ༡༦ ལྷག་རིང་ཀེ་པི་ཊོན་དཔྱིད་དུས་སུ་ཕྱིར་ལོག་ནས་རང་གི་དགའ་མ་མ་ལི་ན་དང་ལྷན་འཛོམས་བྱས་ཏེ་སྔར་བཞིན་དགའ་སྐྱིད་ཀྱི་དཔལ་ལ་རོལ་ནས་མཚོ་བྱ་དུ་མ་ཞིག་བཙས། ཡིན་ཡང་། ལོ་རེའི་དགུན་ཁ་སླེབས་སྐབས་ཀེ་པི་ཊོན་སླར་ཡང་ས་གནས་གཞན་དུ་འགྲོ་དགོས་པས། མ་ལི་ནར་སྐྱོ་སྣང་གིས་ཁེངས་ནའང་མོས་གནམ་གཤིས་ཇེ་དྲོ་རུ་འགྲོ་བ་དང་བསྟུན། ཁང་ཐོག་ཏུ་བུད་ནས་གོམ་ཁ་མདུན་དུ་ཀློད་ཙམ། རྒྱབ་ཏུ་ཕྱོགས་ཙམ་རེ་བྱས་ནས་རེ་སྒུག་བྱས་ཞིང་། ཁོས་ཀྱང་ནམ་ཡང་མོ་བློ་ཕམ་གྱི་གནས་སུ་གྱར་མ་བཅུག ཀེ་པི་ཊོན་ནི་ཁུལ་དེ་ནས་ས་གནས་གཞན་དུ་བགྲོད་མཁན་ཆེས་མཐའ་མ་དང་ཡུལ་ལ་ལོག་མཁན་ཆེས་ཐོག་མ་དེའང་ཡིན།

མཆན། ཡིད་སྐྱོ་བ་ཞིག་ལ། ངོ་མཚར་བའི་གཏམ་རྒྱུད་འདི་ཕྱི་ལོ་ ༢༠༢༡ ལོར་གློ་བུར་དུ་མཇུག་བསྡུས་འདུག ལོ་དེའི་ཕྱི་ཟླ་ ༦ པའི་ནང་མཚོ་བྱ་དཀར་མོ་མ་ལི་ན་ཁང་ཐོག་གི་གནས་ཚང་ནས་མར་ཟག་སྟེ།  བྱམས་ལྡན་གྱི་བགྲེས་པོ་སི་ཇེ་པིན་ཝོ་ཆི་ལགས་ཀྱིས་མོར་ཉིན་བཅུ་ཡས་མས་རིང་བདག་སྐྱོང་གང་ལེགས་བྱས་ཏེ་རང་ཁྱིམ་དུ་ཉར་རྗེས་མ་ལི་ན་ཤི་བས། བགྲེས་སོང་ཁོང་གིས། ད་ནི་ང་དང་ཀེ་པི་ཊོན་གཉིས་མ་གཏོགས་ལྷག་མེད། ངས་མ་ལི་ནའི་རོ་དེ་ས་ཆ་དམིགས་བསལ་བ་ཞིག་ཏུ་འཁྱེར་ནས་མེར་བསྲེགས་པ་ཡིན། ཞེས་བརྗོད་འདུག་ལ། མི་ལོ་ ༢༩ ལྷག་རིང་གཅེས་སྐྱོང་བྱས་པའི་རང་གི་བུ་མོ་ལྟ་བུའི་མ་ལི་ན་གཏན་དུ་གྱེས་ཡོད་པས། དུས་རབས་ཤིག་གི་ལྷད་མེད་བརྩེ་དུང་གི་དཔང་པོ་ལྟ་བུར་གྱུར་བའི་གཏམ་རྒྱུད་འདི་ཡང་གཏམ་རྒྱུད་ཁོ་ན་ཞིག་ཏུ་གྱུར།

རྩོམ་ཡིག་གི་དྲ་ཐག A true love story: 16 years long distance across 14,000 kilometers