རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་ཅིག་མཉམ་འབྲེལ་གྱིས་ཧྥ་རན་སིའི་སྲིད་འཛིན་མེག་ཁོ་རོན་མཆོག་གིས་ཞི་ཅིན་ཕིང་ལ་བོད་ནང་གི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་སྐོར་གླེང་སློང་གནང་དགོས་པའི་འབོད་སྐུལ་ཞུས་འདུག
ཧྥ་རན་སི་དང་རྒྱ་ནག་བར་ཚོང་འབྲེལ་བཙུགས་ཏེ་མི་ལོ་ ༧༠ འཁོར་གྱི་ཡོད་པ་དང་བསྟུན། སང་ཉིན་ཕྱི་ཚེས་ ༥ དང་ ༦ ཉིན་རྒྱ་ནག་གི་མགོ་འཁྲིད་ཞི་ཅིན་ཕིང་ཧྥ་རན་སིའི་ནང་ཕྱིན་ཏེ། ཡུལ་དེའི་སྲིད་འཛིན་མེག་ཁོ་རོན་མཆོག་ལ་མཇལ་འཕྲད་ཞུ་འཆར་ཡོད་སྟབས། རྒྱལ་སྤྱིའི་འགྲོ་བ་མིའི་ཐོབ་ཐང་མཉམ་འབྲེལ་མཐུན་ཚོགས་( the International Federation for Human Rights)དང་། རྒྱལ་སྤྱིའི་བོད་དོན་ལས་འགུལ་ཁང་། ཧྥ་རན་སིའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཚོགས་པ་(the French Ligue des droits de l’Homme)སོགས་མཉམ་འབྲེལ་ཐོག ཡུལ་དེའི་སྲིད་འཛིན་མེག་ཁོ་རོན་མཆོག་ནས་འགྲོ་བ་མིའི་ཐོབ་ཐང་གི་གནད་དོན་དཀྱིལ་སྙིང་དུ་བཟུང་བའི་ཐོག་ནས་བོད་དང་ཡུ་གུར་སོགས་ཀྱི་གནད་དོན་གླེང་སློང་དགོས་པའི་འབོད་སྐུལ་ཞུས་འདུག
དེ་ཡང་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་མཐུན་ཚོགས་ཀྱི་སྲིད་ཇུས་སྐོར་གྱི་འགན་འཛིན་ཝིན་སེན་མི་ཊིན (Vincent Metten) ལགས་ཀྱིས། སྲིད་འཛིན་གཉིས་ཀྱི་མཇལ་འཕྲད་སྐབས་ཡུ་ཁེ་རིན་གྱི་གནད་དོན་དང་དཀྱིལ་ཤར་ཡུལ་གྲུའི་དམག་འཁྲུག་སོགས་རྒྱལ་སྤྱིའི་ཐོག་གི་དཀའ་རྙོག་མང་པོ་ཞིག་གླེང་སློང་དགོས་ཀྱི་ཡོད་པ་གསལ་པོ་ཡིན་ཡང་། རྒྱལ་ཁབ་དང་དེ་བཞིན་ཧོང་ཀོང་། ཤར་ཊུར་ཀི་སི་ཐན། བོད་སོགས་ཀྱི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་གླེང་སློང་གནང་དགོས་ལ། བོད་ནང་འདས་པའི་མི་ལོ་ ༦༠ ལྷག་རིང་བྱུང་དང་འབྱུང་བཞིན་པའི་དཀའ་རྙོག་གིས་ས་གནས་ས་ཐོག་དང་རྒྱལ་སྤྱིའི་བདེ་འཇགས་ལའང་ཉེན་ཁ་བཟོ་ཡི་ཡོད་སྐོར་བརྗོད་འདུག
ཧྥ་རན་སིའི་(French NGO ligue des droits de I Homme) ཚོགས་པའི་ཚོགས་གཙོ་པེ་ཊི་རིཀ་ (Patrick Baudouin) ལགས་ཀྱིས། འགྲོ་བ་མིའི་ཐོབ་ཐང་དེ་ཧྥ་རན་སིའི་ཕྱི་འབྲེལ་སྲིད་ཇུས་ཀྱི་དཀྱིལ་སྙིང་དུ་འཛིན་པར་ཧྥ་རན་སི་དང་རྒྱ་ནག་དབར་གྱི་འབྲེལ་བ་བསྐྱར་བཅོས་བྱ་རྒྱུ་གལ་ཆེན་པོ་རེད། ཡོངས་གྲགས་དང་ཡོངས་གྲགས་མ་ཡིན་པའི་ཐོག་ནས་རྒྱ་ནག་ནང་དང་ཧྥ་རན་སིའི་ནང་རྒྱལ་མཚམས་ལས་བརྒལ་བའི་དྲག་གནོན་བྱས་ཏེ། རྒྱ་རིགས་འགྲོ་བ་མིའི་ཐོབ་ཐང་གི་ལས་འགུལ་བ་དང་སྲུང་སྐྱོབ་པ། ཧོང་ཀོང་བ། དེ་བཞིན་ཡུ་གུར་བ་དང་བོད་མི་བཅས་ལ་གནོན་ཤུགས་སྤྲོད་བཞིན་པའི་གནད་དོན་དེའི་ཐད་སྲིད་འཛིན་མེག་ཁོ་རོན་མཆོག་ནས་ངེས་པར་དུ་སྐྱོན་བརྗོད་དྲག་པོ་བྱེད་དགོས། ཞེས་བརྗོད་འདུག
རྒྱལ་སྤྱིའི་བོད་དོན་ལས་འགུལ་ལས་འགུལ་ཁང་གིས། ཕྱི་ལོ་ ༢༠༢༤ ལོའི་ཨ་རིའི་རང་དབང་ཁང་པའི་སྙན་ཐོའི་ནང་དུ་བོད་ནང་གི་ཆབ་སྲིད་རང་དབང་གི་གནས་བབ་དེ་བརྒྱ་ཆ་བཞི་བཅུ་ནས་གོར་ཐིག་མན་གྱི་གཉིས་ལ་ཟགས་ཡོད་པ་དང་། མི་མང་གི་རང་དབང་བརྒྱ་ཆ་ ༦༠ ནས་གཉིས་ཙམ་དུ་མར་ཟགས་ཏེ་བོད་ནང་གི་རང་དབང་གནས་སྟངས་བརྒྱ་ཆ་ ༡༠༠ ནས་ཀླད་ཀོར་དུ་གྱུར་བ་དེ་ནི་འདས་པའི་ལོ་ ༨ ནང་གི་ཆེས་སྡུག་ཤོས་ཀྱི་གནས་སྟངས་ཆགས་ཡོད་སྐོར་དང་། དེ་བཞིན་ཨ་རིའི་རྒྱལ་ཡོངས་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱ་ནག་སྐོར་གྱི་དུས་བཀག་བསྐྱར་ཞིབ་ཐེངས་བཞི་པའི་ཐོག རྒྱ་ནག་གཞུང་གིས་བོད་ཀྱི་བྱིས་པ་ས་ཡ་གཅིག་ལྷག་གཏན་འཇགས་སློབ་གྲྭར་བཅུག་སྟེ་བོད་ཀྱི་རིག་གཞུང་དང་ངོ་བོ་རྩ་མེད་དུ་གཏོང་ཐབས་བྱེད་བཞིན་པའི་གནད་དོན་ཐེར་འདོན་བྱས་ཡོད་པ་སོགས་ལུང་འདྲེན་བྱས་འདུག
ཐེངས་འདིའི་མཇལ་འཕྲད་སྐབས་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་དང་། དཀྱིལ་ཤར་ཨེ་ཤ་ཡའི་དམག་འཁྲུག ཚོང་དོན་གྱི་དཀའ་ངལ། ཚན་རིག་དང་། རིག་གཞུང་། རྩེད་རིགས་མཉམ་ལས་སོགས་ཚུད་པའི་ཕྱོགས་གཉིས་ཀྱི་མཉམ་ལས་ཐོག་གྲོས་མོལ་བྱ་རྒྱུ་ཡིན་འདུག་ལ། སྔ་ལོའི་ཕྱི་ཟླ་ ༤ པའི་ནང་ཧྥ་རན་སི་དང་རྒྱ་ནག་བར་འབྲེལ་ལམ་བཙུགས་ཏེ་མི་ལོ་ ༦༠ འཁོར་བའི་དུས་དྲན་སྲུང་གཙི་ཆེད་ཧྥ་རན་སིའི་སྲིད་འཛིན་མཆོག་རྒྱ་ནག་ཏུ་ཕེབས་ཡོད་པ་རེད།
ཚེ་རིང་རྣམ་རྒྱལ་གྱིས་བསྒྱུར།
རྩོམ་སྒྲིག་པ། པདྨ་མཚོ།
