བྱེས་ཀྱི་གདན་ས་ཆེན་པོ་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་གིས་འབོད་སྐུལ་དོན་ཚན་གསུམ་དང་འབྲེལ་༧པཎ་ཆེན་རིན་པོ་ཆེ་མཆོག་གང་མགྱོགས་ཀློད་གྲོལ་དགོས་པའི་རེ་སྐུལ་ཞུས་འདུག
ཁ་སང་ཕྱི་ཚེས་ ༧ ཉིན་ཤར་ཨེ་ཤ་ཡ་དང་ཉི་ཧོང་གི་སྐུ་ཚབ་དོན་ཁང་གིས་ཉི་ཧོང་གྲོས་ཚོགས་འོག་མའི་རྒྱལ་སྤྱིའི་ཚོགས་ཁང་དུ་བོད་ནང་གི་འགྲོ་བ་མིའི་ཐོབ་ཐང་དང་ཆོས་ལུགས་རྩིས་མེད་རྡོག་རོལ་གཏོང་བའི་ཡོད་པའི་སྐོར་སོགས་གོ་རྟོགས་སྤེལ་བའི་ཟབ་སྦྱོང་ཞིག་འཚོགས་ཡོད་ཅིང་། ཟབ་སྦྱོང་དེའི་ཁྲོད་ཉི་ཧོང་གྲོས་ཚོགས་འཐུས་མི་དང་། གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག ཤར་ཨེ་ཤ་ཡ་དང་ཉི་ཧོང་གི་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་གཙོས། བོད་དོན་རྒྱབ་སྐྱོར་བ་དང་གསར་འགོད་པ་སོགས་མཉམ་ཞུགས་གནང་ཡོད་འདུག
སྐབས་དེར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས། བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་སྐོར་དང་། རྒྱ་ནག་དམར་ཤོག་སྲིད་གཞུང་གིས་བཅའ་སྡོད་སློབ་གྲྭའི་སྲིད་ཇུས་ལག་བསྟར་འོག་བོད་ཀྱི་ཆོས་དང་རིག་གཞུང་། བོད་མིའི་ངོ་བོ་སོགས་རྩ་མེད་གཏོང་ཐབས་བྱེད་བཞིན་པའོ་གནད་དོན། དེ་བཞིན་བོད་བརྒྱུད་ནང་བསྟན་དང་། རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་གནང་ཕྱོགས་ཐད་ཐེ་ཇུས་བྱེད་བཞིན་ཡོད་སྐོར་སོགས་བརྗོད་ཡོད་འདུག
དེ་བཞིན་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་གིས། བོད་ནང་གི་ཛ་དྲག་གནས་སྟངས་ངོ་སྤྲོད་དང་། བོད་མི་རྣམས་ལ་དྲག་གནོན་ཚབས་ཆེན་བྱེད་མུས་ཡིན་པའི་ཁར། བོད་ནང་དུ་མི་ཆོས་ལས་འདས་པའི་བཀག་སྡོམ་བྱས་པའི་རྐྱེན་གྱིས་བོད་མིའི་རང་དབང་མུ་མཐུད་དུ་ཇེ་སྡུག་ཏུ་འགྲོ་བཞིན་ཡོད་པ་རེད་ལ། པཎ་ཆེན་སྐུ་ཕྲེང་བཅུ་གཅིག་པ་འཕྲལ་དུ་ཀློད་གྲོལ་གཏོང་དགོས་པ་དང་། བོད་ནང་གི་བོད་མི་རྣམས་ལ་དཀའ་ངལ་ཚབས་ཆེན་འཕྲད་བཞིན་པའི་སྐོར་གོ་རྟོགས་སྤེལ་རྒྱུའི་འབོད་སྐུལ་ཞུ་ཡི་ཡོད། ཅེས་དང་། ཉི་ཧོང་གི་གྲོས་ཚོགས་འཐུས་མི་རྣམས་ཀྱིས་གང་མགྱོགས་རྒྱ་ནག་གཞུང་ལ་གནོན་ཤུགས་སྤྲད་དེ། ༧པཎ་ཆེན་སྐུ་ཕྲེང་བཅུ་གཅིག་པ་མཆོག་འཕྲལ་དུ་ཀློད་གྲོལ་གཏོང་དགོས་པ་དང་། ཁོང་ཉིད་གང་དུ་ཡོད་མེད་འགྲེལ་བརྗོད་བྱ་དགོས་པ། རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་གནང་ཕྱོགས་ལ་ཐེ་ཇུས་དང་། བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་སྐོར་སོགས་ལ་སྐྱོན་བརྗོད་ཀྱིས་གྲོས་ཆོད་ཅིག་གཏན་འབེབས་གནང་རྒྱུ། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་གཉིས་ཕན་དབུ་མའི་ལམ་གྱི་ཐོག་ནས་བོད་རྒྱ་ཞི་མོལ་དང་། བོད་ནང་ཞི་བདེ་ཡོང་ཐབས་ཀྱི་ཐུགས་དགོངས་ལ་རྒྱབ་སྐྱོར་གནང་རྒྱུ་སོགས་ཀྱི་འབོད་སྐུལ་ཞུས་འདུག
དེ་བཞིན་ཟབ་སྦྱོང་དེའི་ཚོགས་ཞུགས་པ་ཁྲིམས་བཟོ་བ་ཧྥུ་རུ་ཡ་ (Furuya Keiji) ལགས་སོགས་ཀྱིས། བོད་ནང་གི་ཆོས་དད་རང་དབང་གི་ཐོག་ལ་རྒྱབ་སྐྱོར་བྱ་རྒྱུའི་ཁས་ལེན་གནང་བ་དང་། རྒྱ་ནག་གིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་གནང་ཕྱོགས་ཐད་ཐེ་ཇུས་བྱ་མི་ཆོག་པའི་བསྒྲགས་གཏམ་སྤེལ་རྒྱུ་ཡིན་སྐོར་སོགས་འགྲེལ་བརྗོད་གནང་འདུག
གསར་འགོད་པ། བསྟན་འཛིན་ཕུར་བུ།
