འཕགས་མཆོག་ཝ་ཏི་བཟང་པོའི་རྣམ་ཐར་གྱི་དུས་ཐུང་འགྲེམས་སྟོན་གནང་གི་འདུག

དེ་རིང་སྔ་དྲོའི་ཆུ་ཚོད་ ༡༠ པའི་སྟེང་ཕྱི་དྲིལ་བོད་ཀྱི་འགྲེམས་སྟོན་ཁང་དུ་རང་བྱོན་འཕགས་མཆོག་ཝ་ཏི་བཟང་པོའི་རྣམ་ཐར་གྱི་དུས་ཐུང་འགྲེམས་སྟོན་དབུ་འབྱེད་གནང་སོང་།

དེ་རིང་ནས་ཕྱི་ཟླ་ ༩ ཚེས་ ༢༢ བར་ཟླ་བ་བཞིའི་རིང་བོད་ཀྱི་འགྲེམས་སྟོན་ཁང་དུ་འཕགས་མཆོག་ཝ་ཏི་བཟང་པོའི་རྣམ་ཐར་གྱི་དུས་ཐུང་འགྲེམས་སྟོན་གནང་མགོ་བཙུགས་སོང་། དབུ་འབྱེད་ཀྱི་མཛད་སྒོའི་ཐོག་སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་དང་། དམིགས་བསལ་སྐུ་མགྲོན་ཧོན་སུར་རྫོང་དཀར་ཆོས་སྡེའི་མཁན་རིན་པོ་ཆེ་བྱམས་པ་བཟོད་པ་མཆོག་རྣམ་གཉིས་དང་། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། ནང་དོན་འབྲི་རྩོམ་པ་འབུམ་རམས་པ་གཙང་ཕྲུག་སྟོབས་ལགས། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་སོགས་ཕེབས་ཡོད་འདུག

ཐོག་མར་འགན་འཛིན་སྟོབས་ལྡན་ལགས་ཀྱིས། ང་ཚོའི་ལོ་རྒྱུས་ཐོག་ནས་ཇོ་བོ་ཝ་ཏི་བཟང་པོ་རྟེན་གཙོ་བོ་ཞིག་ཡིན་པ་དང་། ཇོ་བོ་ཝ་ཏི་བཟང་པོ་བོད་ལ་གདན་འདྲེན་ཞུས་ནས་ད་བར་ལོ་ངོ་ ༡༣༨༩ ལྷག་འགྲོ་ཡི་འདུག དེར་བརྟེན་འགྲེམས་སྟོན་གྱི་ངོས་ནས་གནའ་རྫས་ཙམ་མིན་པར་བོད་མི་སྤྱི་ཡོངས་ཀྱི་ནུས་པ་དང་འགན་ཁུར་གཅིག་མཚུངས་ཡོད་པའི་རྟེན་གཙོ་ཆགས་ཀྱི་ཡོད་རེད། དུས་རབས་བདུན་པ་དང་དུས་རབས་བཅུ་བདུན་སྐབས་སུ་ཇོ་བོ་སྐྱིད་གྲོང་དུ་བསྡད་མི་ཐུབ་པར་ལྷ་སར་ཐེངས་གཉིས་ཙམ་ཕེབས་དགོས་པའི་གནས་སྟངས་དང་། ཕྱི་ལོ་ ༡༩༥༩ ལོར་རྒྱ་གར་དུ་ཕེབས་དགོས་བྱུང་བ་རེད། ༧གོང་ས་རྒྱལ་བ་རིན་པོ་ཆེ་མཆོག་གིས་ནམ་ཞག་རྒྱུན་དུ་ནས་དུས་རབས་ཉི་ཤུ་རྩ་གཅིག་པའི་ནང་པ་བྱ་དགོས་རེད་གསུང་གི་ཡོད་པ་རེད། དེར་བརྟེན་ཐེངས་འདིའི་འགྲེམས་སྟོན་ནང་ཇོ་བོ་ཝ་ཏི་བཟང་པོའི་རྒྱབ་ལྗོངས་ཀྱི་རྣམ་ཐར་དང་མཛད་པ་འཕྲིན་ལས། བོད་ཆོལ་ཁ་གསུམ་དང་ཆོས་ལུགས་རིས་མེད་ཐོག་ནས་གསུང་བྱོན་པ་རྣམས་འགྲེམས་སྟོན་ཞུ་ཡི་ཡོད། དུས་ཐུང་གི་འགྲེམས་སྟོན་འདིའི་ནང་ཇོ་བོ་ཝ་ཏི་བཟང་པོ་དང་འབྲེལ་བའི་དངོས་རྫས་ ༡༩ འགྲེམས་སྟོན་ཞུ་ཡི་ཡོད། ཅེས་བརྗོད་སོང་།

ནང་དོན་འབྲི་རྩོམ་པ་འབུམ་རམས་པ་གཙང་ཕྲུག་སྟོབས་ལགས་ཀྱིས། ད་ལན་འཕགས་མཆོག་ཝ་ཏི་བཟང་པོ་དང་འབྲེལ་བའི་དུས་ཐུང་འགྲེམས་སྟོན་གྱི་ནང་དོན་གཙོ་བོ་མཚོན་ཐབས་གསུམ་ཡོད་པ་རེད། ཆོས་ལུགས་དང་། གནའ་རྫས། ཆབ་སྲིད་ཀྱི་ཐོག་ནས་མཚོན་ཐབས་བྱས་ཡོད། ཆོས་ལུགས་དང་འབྲེལ་བའི་ཐོག་ནས་ཇོ་བོ་ཝ་ཏི་བཟང་པོའི་རྣམ་ཐར་དང་། བོད་ཀྱི་སྐྱེས་ཆེན་དམ་པས་ཇོ་བོ་ལ་གསོལ་འདེབས་ཞུས་པ། དེ་བཞིན་ཇོ་བོའི་ངོས་ནས་བོད་ཀྱི་སྐྱེས་ཆེན་དམ་པ་ལ་བྱིན་རླབས་གནང་བ་དང་། འཕགས་པ་ལྷ་ཁང་། ཇོ་བོ་ནི་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཡིན་པ་དང་། ༧གོང་ས་རྒྱལ་བ་རིན་པོ་མཆོག་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཡིན་པར་བརྟེན། ཇོ་བོ་དང་༧གོང་ས་མཆོག་གི་སྐུ་ཕྲེང་རིམ་བྱོན་བར་གྱི་འབྲེལ་བའི་གནད་དོན་འདིའི་ཐོག་ནས་རྩ་ཆེན་པོ་ཡིན་པའི་གནས་ཚུལ་མཚོན་ཐབས་བྱས་ཡོད། གནའ་རྫས་ཀྱི་ཐོག་ནས་ཇོ་བོ་དང་འབྲེལ་བའི་རྣམ་ཐར་དཔེ་རྙིང་དང་། འཕགས་པ་ལྷ་ཁང་གི་ཆོས་དེབ་དང་རྟེན་དེབ་ལ་སོགས་པ་ཡིག་ཆ་རྙིང་པ་མང་པོ་ཞེ་དྲགས་ཡོད་པ་དེ་ཚོའི་ཐོག་ནས་བོད་པའི་ལམ་ལུགས་ཀྱི་ཐོག་ནས་དོན་སྙིང་ཆེན་པོ་འདུག དེ་བཞིན་ཆབ་སྲིད་ཀྱི་ཐོག་ནས་ཇོ་བོ་ལྷ་ས་ལ་ཐེངས་མ་གཉིས་གདན་འདྲེན་ཞུས་ཡོད་ལ། ༡༩༥༩ ལོར་རྒྱ་ནག་གིས་བོད་ལ་བཙན་འཛུལ་བྱས་པར་བརྟེན་ཇོ་བོ་རྒྱ་གར་ལ་གདན་འདྲེན་ཞུས་ཡོད་པ་དང་། ད་ལྟ་བར་དུ་ཇོ་བོ་དང་འབྲེལ་བའི་ཡིག་ཆ་རྣམས་བསྡུ་རུབ་བྱས་ཏེ་གྲ་སྒྲིག་གང་ཡག་བྱས་ཡོད། ཅེས་བརྗོད་སོང་།

དམིགས་བསལ་སྐུ་མགྲོན་མཁན་རིན་པོ་ཆེ་བྱམས་པ་བཟོད་པ་མཆོག་གིས། ཇོ་བོ་ཝ་ཏི་བཟང་པོ་དུས་རབས་བདུན་པའི་ནང་བྱུང་བ་དང་། ཁོང་གི་འཁྲུངས་རབས་དང་། གོར་དམག་གི་ཉེན་གཡོལ་གྱི་ཆེད་དུ་ཇོ་བོ་བོད་ལ་ཕེབས་ཡོད་པ་དང་། ཕྱི་ལོ་ ༡༩༥༩ ལོར་རྒྱ་ནག་གིས་མངའ་འོག་ནས་རྒྱ་གར་དུ་ཕེབས་ཡོད་པའི་མཛད་པ་འཕྲིན་ལས་སོགས་ངོ་སྤྲོད་གནང་བ་དང་། བཙན་བྱོལ་དུ་ཡོད་པའི་བོད་མི་རྣམས་གཅིག་སྒྲིལ་གྱི་ཐོག་ནས་ཇོ་བོ་རིན་པོ་ཆེ་མཆོག་དང་། ༧གོང་ས་རྒྱལ་བ་རིན་པོ་ཆེ་མཆོག་ངོ་བོ་དབྱེར་མེད་དུ་ལྟ་བའི་ཐོག་ནས་ཕྱག་མཆོད་གསོལ་འདེབས་དང་སྨོན་ལམ་འདེབས་དགོས་གལ་ཆེ་སྐོར་དང་། བོད་ཀྱི་བདེན་མཐའ་གསལ་བར་ཕྱག་མཆོད་སྨོན་ལམ་འདེབས་དགོས་ཀྱི་ཡོད་སྐོར་སོགས་གསུངས་སོང་།

སྐུ་མགྲོན་གཙོ་བོ་བློ་བཟང་སྦྱིན་པ་མཆོག་གིས། སྲོང་བཙན་སྒམ་པོས་རྒྱ་བཟའ་དང་བལ་བཟའ་གཉིས་བཙུན་མོར་བཞེས་པའི་རྗེས་སུ། ཇོ་བོ་ཐོག་མར་བོད་ལ་གདན་འདྲེན་ཞུས་ཡོད་སྐོར་དང་། ཇོ་བོའི་གནས་སྟངས་དང་། ཇོ་བོའི་སྐུ་བརྙན་གྲུབ་སྟངས་སོགས་ངོ་སྤྲོད་དང་། ལོ་རྒྱུས་ཀྱི་རྒྱབ་ལྗོངས་ཀྱི་ཐོག་ནས་བོད་ལ་བསྟན་སྲུང་མང་པོ་ཡོད་པ་དང་། བོད་ཙམ་མིན་པར་ཧི་མ་ལ་ཡའི་རི་རྒྱུད་དང་ཐད་ཀར་འབྲེལ་བ་ཡོད་སྐོར་སོགས་འགྲེལ་བརྗོད་གནང་སོང་། མཐའ་དོན་དུ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་མཇུག་བསྡོམས་གསུང་བཤད་གནང་སྟེ། ཐེངས་འདིའི་འགྲེམས་སྟོན་ནང་མི་མང་གང་མང་མཉམ་ཞུགས་གནང་དགོས་སྐོར་སོགས་བརྗོད་སོང་།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།