ཆབ་མདོ་ངག་ཕུན།
དབྱངས་གསལ་སོ་བཞི་ངག་ནས་སྒྲོག
ཆོས་དང་རིག་གཞུང་གཙུག་ཏུ་བཀུར།།
ཡ་རབས་བཟང་སྤྱོད་ཉམས་སུ་ལེན།།
དཔའ་ངར་ཞུམ་མེད་ལས་ལ་བརྩོན།།
ཞེས་ཚིགས་སུ་བཅད་པའི་སྔོན་བསུ་སྟེ། དེ་རིང་ངས་གླེང་འདོད་པ་ནི་བོད་ཀྱི་ཤེས་རིག་དང་བོད་ཀྱི་གནས་སྟངས་སྐོར་ཡིན་ཞིང་། དེ་ཡང་བོད་ཀྱི་དཔེ་མཛོད་ཁང་གི་ཐུགས་འགན་རླབས་ཆེན་བཞེས་གནང་མཛད་ནས་བོད་ཀྱི་སྐད་ཡིག་སྐོར་ལ་ཉིན་གསུམ་གྱི་རིང་དུ་བགྲོ་གླེང་ཚོགས་འདུ་ཞིག་བོད་ཀྱི་དཔེ་མཛོད་ཁང་དུ་ཚོགས་སོང་། ད་རེས་ཀྱི་ཚོགས་འདུ་དེའི་ནང་དུ་ཚོགས་བཅར་བ་མང་ཆེ་བ་ནི་དགེ་རྒན་དང་། དེ་བཞིན་ཤེས་ཡོན་གྱི་ཐོག་ཏུ་ཕྱག་ལས་གནང་མཁན་རྐྱང་རེད་འདུག དེ་འདྲའི་མཉམ་དུ་རང་ཉིད་ཀྱང་མཉམ་ཞུགས་བྱ་རྒྱུ་བྱུང་བ་ནི་སེམས་ནང་ཧ་ཅང་དགའ་ཞིང་བློ་སྐྱེད་ཡོང་བར་ཕན་ཐོགས་ཆེན་པོ་བྱུང་།
ལྷག་དོན་ཁོང་རྣམས་ནི་འདབ་གཤོག་གཉིས་ལྡན་ཡིན་པ་དང་། བོད་མི་རིགས་ཀྱི་སྐད་ཡིག་ཐོག་ཏུ་དགའ་ཞེན་ཡོད་མཁན་རྐྱང་རེད་འདུག་བསམ་པའི་ཚོར་སྣང་གསོན་པོ་དབང་མེད་དུ་སྐྱེས་བྱུང་། ད་ལྟའི་དུས་སྐབས་འདིར་བོད་མི་རིགས་གཞིས་བྱེས་གཉིས་སུ་གནས་དགོས་པའི་གནས་སྟངས་ཧ་ཅང་ཐབས་སྐྱོ་པོ་ཡིན་དུས་རང་རེའི་རྒན་དར་གཞོན་གསུམ་ཚང་མ་གནས་སྐབས་འཚོ་བའི་ཐོག་ཏུ་མགོ་འཐོམ་ནས་མ་བཞུགས་པར་བོད་རིགས་ཀྱི་བདེན་མཐའ་གསལ་ཐབས་ཆེད་ཚང་མས་ནུས་པ་གཅིག་ཏུ་སྤུངས་ནས་ལས་དོན་གནང་དགོས་པ་ཞིག་ཀྱང་རེད་སྙམ།
དེ་བཞིན་ད་རེས་བགློ་གླེང་དེའི་ནང་དུ་བོད་མི་རིགས་ཀྱི་སྐད་ཡིག་ཉམས་ཆགས་མི་འགྲོ་བའི་ཆེད་དུ་དགོངས་ཚུལ་སྣ་ཚོགས་ཤིག་གསུང་གནང་སོང་ལ། དེ་དག་གོ་དུས་རང་ཉིད་ལ་མཚོན་ན་སེམས་ནང་དགའ་སྐྱོ་གཉིས་ལྡན་གྱི་སྣང་བ་ཞིག་སྐྱེས་བྱུང་། སྐྱོ་དགོས་པ་ནི་ང་ཚོའི་གཅེས་པར་འོས་པའི་ཕ་ཡུལ་དགྲ་ལག་ཏུ་ཤོར་ནས་གཞིས་བྱེས་གཉིས་སུ་མི་འདོད་བཞིན་དུ་འཚོ་བ་རོལ་དགོས་ཐུག་གི་ཡོད། དགའ་དགོས་པ་ནི་ང་ཚོ་བཙན་བྱོལ་ནང་གནས་དགོས་བྱུང་རུང་བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་རྒྱལ་བ་རིན་པོ་ཆེ་མཆོག་གི་ཐུགས་རྗེའི་བཀའ་དྲིན་ལས་མི་ཡུལ་ལུང་པར་ས་ཆ་ལག་མཐིལ་ཙམ་ཞིག་མེད་རུང་། བཙན་བྱོལ་བོད་མིའི་སློབ་གྲྭ་ཁག་དང་། དགོན་སྡེ། གཞིས་སྒར་ཁག་བཅས་འཆར་གཞི་གོ་རིམ་ལྡན་པ་གནས་ཐུབ་པ་ཙམ་དུ་མ་ཟད། བོད་མི་རིགས་ཀྱི་ཁྱད་ཆོས་མ་ཉམས་པར་གསོན་པོར་གནས་ཐུབ་པ་བྱུང་ཡོད་ལ། བོད་ཀྱི་ཤེས་རིག་ལ་འཛམ་གླིང་མི་རྣམས་ཀྱི་ཡིད་སྨོན་ཤོར་བའི་དར་རྒྱས་དང་འཛུགས་སྐྲུན་ཐུབ་པ་བྱུང་ཡོད།
ལྷག་དོན་ད་ལྟ་རང་རེའི་སྐད་ཡིག་འདི་ཉིད་ཉམས་ཆགས་འགྲོ་བའི་རྒྱུ་རྐྱེན་གཙོ་བོ་ནི་བོད་ཡུལ་རྒྱ་དམར་གྱིས་བཙན་འཕྲོག་བྱས་ནས་བོད་མི་རིགས་ཀྱི་ཆོས་དང་རིག་གཞུང་། གོམས་གཤིས་ལ་སོགས་མེད་པ་བཟོ་ཐབས་ཀྱི་ལས་འགུལ་གདུག་རྩུབ་ཅན་སྣ་ཚོགས་ཤིག་སྤེལ་དང་སྤེལ་བཞིན་ཡོད་ལ། དེང་སྐབས་གཞིས་ཀྱི་སློབ་གྲྭ་ཁག་ཏུ་བོད་ཡིག་སློབ་ཁྲིད་བྱེད་མི་བཅུག་པ་མ་ཟད། སློབ་ཆུང་སློབ་མ་རྣམས་གཏན་འཇགས་སློབ་གྲྭའི་ནང་བཙན་གྱིས་བཅུག་ནས་ཕ་མ་དང་བུ་ཕྲུག་རྒྱང་ཐག་རིང་དུ་བཏང་ནས་བོད་ཕྲུག་རྣམས་རྒྱ་ཕྲུག་ལ་བསྒྱུར་ཐབས་ཀྱི་ལས་འགུལ་སྤེལ་བཞིན་ཡོད། རྒྱ་གཞུང་གི་བྱེད་སྟངས་དེ་དག་ནི་བོད་ཡུལ་རྒྱ་ཡུལ་དུ་སྒྱུར་བའི་ཧ་ཅང་གི་ཉེན་འཚབ་ཆེ་བའི་ངན་ཇུས་ཞིག་ཀྱང་རེད་སྙམ་ལ། རྒྱ་གཞུང་གིས་ལས་འགུལ་ཐབས་སྡུག་དེ་དག་འཕྲལ་དུ་མཚམས་འཇོོག་བྱ་དགོས་པ་ཞིག་རེད། རྒྱུ་མཚན་དེ་དག་ལ་བརྟེན་རང་རེའི་བྱེས་འབྱོར་བ་ཚོས་ངེས་པར་དུ་རང་ཉིད་ཀྱི་བུ་ཕྲུག་ལ་བོད་ཀྱི་དྲི་མ་མ་ཡལ་བའི་ཐོག་ཏུ་ནུས་ཤུགས་སྤུངས་ནས་བོད་ཀྱི་སྐད་ཡིག་སློབ་གསོ་གནང་དགོས་པ་ཞིག་ལས། གནས་སྐབས་དགོས་མཁོ་ལ་གཟིགས་ཏེ་བོད་ཡིག་འདོར་མི་རུང་བ་དེ་ཡིན་པ་རེད།
ད་ནི་ང་ཚོ་བཙན་བྱོལ་བ་ཚོས་ཀྱང་བོད་ནང་གི་གནས་སྟངས་དེ་དག་ཡིད་དུ་བཟུང་སྟེ་རང་རེའི་ན་གཞོན་རྣམས་ལ་བོད་ཀྱི་སྐད་ཡིག་ཆུ་ཚད་གོང་འཐོར་གཏོང་ཐབས་ལ་བརྩོན་དགོས། དེ་ཡང་༧གོང་ས་མཆོག་གི་བཀའ་སློབ་ཕྱོགས་བསྡུས་ལས། “བོད་ཕྲུག་ཚོར་དེང་དུས་ཀྱི་ཤེས་ཡོན་ཡོད་དགོས་ལ། བོད་པའི་གོམས་གཤིས་བཟང་པོ་རྣམས་ཀྱང་མ་བརླག་པ་དགོས་པ་ལྟར་བོད་པའི་སློབ་གྲྭ་ཁག་ལོགས་སུ་བཙུགས། ཆོས་དགེ་འདྲ་ཆེད་དུ་བཏང་བའི་དགོས་དོན་དེ་ལྟར་རེད། དེར་བརྟེན་དགེ་རྒན་ཚོ་དང་། ཕྲུ་གུའི་ཕ་མ་ཚོས་གཟབ་གཟབ་བྱེད་དགོས།” ཞེས་བཀའ་སློབ་ལམ་སྟོན་ཕེབས་དོན་ལྟར་ད་ལྟ་ང་ཚོ་ཚང་མར་གནས་སྐབས་འཚོ་བའི་མཐུན་རྐྱེན་འགྲིགས་ཙམ་བྱུང་དུས་དེ་དག་ཆོག་ཤེས་འཛིན་ནས་དལ་ལྷོད་དུ་སྡོད་པའི་དུས་ཚོད་གཅིག་གཏན་ནས་མ་རེད་ལ། རྣམ་གཡེང་བྱེད་པའི་དུས་ཚོད་གཅིག་དེ་བས་ཀྱང་མ་རེད། རྒྱལ་ཁབ་ཡོད་པའི་བུ་ཕྲུག་ལས་ལྷག་གཅིག་ང་ཚོའི་བོད་ཕྲུག་ཚོ་ལ་ལས་འགན་ཆེ་བ་ཡོད། རྒྱལ་ཁབ་ཡོད་པའི་བུ་ཕྲུག་ཚོར་རྒྱལ་ཁབ་མེད་པའི་སེམས་ཁྲལ་དང་སྡུག་བསྔལ་གང་ཡང་མེད། ང་ཚོའི་རྒྱལ་ཁབ་གཞན་གྱི་བཙན་འོག་ཏུ་ཤོར་ནས་མི་ཡུལ་ལུང་པར་གནས་དགོས་ཐུག་གི་ཡོད། རྒྱུ་མཚན་དེ་དག་ལ་བརྟེན་ནས་ང་ཚོ་བོད་པའི་ན་གཞོན་ཚོས་གནའ་དེང་གི་ཤེས་རིག་ཐོག་ཏུ་རྣམ་རིག་བསྒྲིམ་ནས་བོད་ཀྱི་བདེན་དོན་ཆེད་དུ་སྐད་ཅིག་ཙམ་ཡང་འཐུས་ཤོར་མེད་པར་འབད་བརྩོན་གནང་ནས་ང་ཚོར་རང་དབང་དགའ་སྐྱིད་ཀྱི་ཉི་མ་མྱུར་དུ་བསྐྱར་གསོ་ཐུབ་ཐབས་ལ་འབད་དགོས་པ་དེ་རེད་ལ། རང་གཞུང་གིས་ཀྱང་ཤེས་ཡོན་ཐོག་ཏུ་དོ་སྣང་ཆེ་བ་གནང་དགོས་པ་དང་། སློབ་མའི་ཤེས་ཡོན་ཆེད་དུ་མཐུན་རྐྱེན་ལས་དོན་གཞན་ལས་ཆེ་བ་བསྐྲུན་དགོས་པ་ནི་གལ་ཆེའི་གནད་དོན་ཞིག་རེད་འདུག་སྙམ། ངས་དེ་ལབ་དུས་རང་གཞུང་གི་མཐུན་རྐྱེན་བསྐྲུན་གྱི་མི་འདུག་དེ་འདྲ་གང་ཡང་ལབ་ཀྱི་མེད་མོད། སྔར་ལྷག་མཐུན་རྐྱེན་བཟང་བ་བསྐྲུན་ཐབས་བྱེད་དགོས་པ་དེ་རེད། དེ་བཞིན་བོད་མིའི་སྒྲིག་འཛུགས་ཀྱི་ཤེས་ཡོན་སྲིད་ཇུས་གསལ་དོན་ལྟར། ཤེས་ཡོན་གནས་ཚད་བཟང་ཤོས་རྣམས་དགེ་རྒན་གྱི་ལས་སྒོར་འཇུག་ཐབས་བྱ་རྒྱུ་དང་། དགེ་རྒན་གྱི་ཆེ་མཐོང་དང་མཐུན་རྐྱེན་བཟང་པོ་ཡོང་ཐབས་སུ་ཁྲིམས་ལུགས་ཀྱི་ཆ་རྐྱེན་བསྐྲུན་དགོས། ཞེས་གསལ་དོན་ལྟར་བཙན་བྱོལ་བོད་མིའི་ཁྲིམས་ལུགས་ནང་དུ་ཆ་རྐྱེན་དེ་དག་བསྐྲུན་ཡོད་པ་ཞིག་ད་བར་གོ་ཐོས་མ་བྱུང་། གཅིག་བྱས་ན་རང་ཉིད་ལྟ་རྒྱ་དང་མཐོང་རྒྱ་ཆུང་བའི་སྐྱོན་ཡིན་སྲིད། གལ་སྲིད་ཆེ་མཐོང་དང་མཐུན་རྐྱེན་བཟང་པོ་ཡོང་ཐབས་སུ་ཁྲིམས་ལུགས་ཀྱི་གཏན་འབེབས་གནང་མེད་ཚེ། དེ་དག་ངེས་པར་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་ཇུས་ནང་དུ་བཀོད་དོན་ལྟར་ངེས་པར་འབྲེལ་ཡོད་ཚོས་ཁྲིམས་ལུགས་ཆ་རྐྱེན་བསྐྲུན་ནས་ལག་བསྟར་གནང་དགོས་པ་དེ་རེད། དེ་ནི་གལ་ཆེན་པོ་ཞིག་རེད། ང་ཚོ་ཚང་མའི་ཤེས་ཡོན་གལ་ཆེན་པོ་ཡིན་རབས་གླེང་བཞིན་ཡོད་ན། དེར་སློབ་གསོ་གནང་མཁན་གྱི་དགེ་རྒན་རྣམ་པ་ལའང་ཆེ་མཐོང་དང་མཐུན་རྐྱེན་བསྐྲུན་དགོས་པ་ནི་བཤད་མ་དགོས།
དེ་བཞིན་བོད་ནི་འཛམ་གླིང་གི་སྣེ་གསུམ་པ་ཞེས་གྲགས་པའི་རི་བོ་མཐོ་ཞིང་། མཚོ་དང་མཚེའུ་ཉམས་དགའ་བའི་གནས་མཆོག་ཅིག་ཀྱང་ཡིན་པ་རེད། གནས་དེར་འཚོ་ཞིང་ནང་བཅུད་ཀྱི་སེམས་ཅན་རྣམས་ཞི་བདེའི་བག་ཕེབས་ཀྱི་ངང་ནས་འཚོ་སྡོད་བྱེད་ཀྱི་ཡོད། དེ་འདྲའི་གནས་མཆོག་ཉམས་དགའ་བ་དེར་རྒྱ་དམར་གྱིས་དྲག་པོའི་བཙན་འཕྲོག་བྱས་པ་ནས་བཟུང་སྟེ་བོད་མཐོ་སྒང་གི་ཁོར་ཡུག་ལ་གནོད་སྐྱེན་ཆེན་པོ་ཐེབས་ཡོད་ལ། དེ་ཡང་བོད་མཐོ་སྒང་ཐོག་གི་གནམ་གཤིས་འགྱུར་ལྡོག་གི་ཤུགས་རྐྱེན་ཞེས་པའི་དེབ་ལས། “བོད་མཐོ་སྒང་གི་གཏན་ཆགས་འཁྱགས་རིམས་དང་རྩྭ་ཐང་མང་པོ་ཞིག་རྩ་བརླག་དང་གཏོར་སྐྱོན་བཏང་ཡོད། རང་བྱུང་གི་རླངས་རྫས་དང་རྡོ་སྣུམ་རིགས་ཙམ་མིན་པར། ཟངས་དང་། ལྕགས། གསེར། དཀར་གཡའ། ལི་ཐི་ཡམ། དངུལ། རྡོ་རྗེ་ཕ་ལམ། རྡོ་རྒྱུས། ཐལ་ཚྭ་ལྟ་བུའི་བང་མཛོད་ཧ་ཅང་ཕྱུག་པོ་ཡོད་པ་རྣམས་སྔོག་འདོན་གྱི་བྱ་བས་ཕྱི་ལོ་ ༡༩༥༠ ནས་བཟུང་བོད་མཐོ་སྒང་གི་གཏེར་འདོན་ལས་མི་རྣམས་ལས་བྲེལ་ངང་གནས་པར་བྱས་ཡོད།” ཅེས་གསལ་ཡོད་པ་དང་། དེ་བཞིན་བོད་མི་ཚོས་གནས་རི་རྩ་ཆེར་ངོས་འཛིན་བྱེད་སའི་གནས་ཆེན་ཨ་མྱེས་རྨ་ཆེན་ནས་གཏེར་ཁ་སྔོག་འདོན་ཆེ་བའི་དབང་གིས་ཛ་དྲག་གི་སྟངས་ཤིག་ཏུ་འགྱུར་ཡོད། དེ་ཡང་བོད་ཀྱི་དུས་བབ་འདོན་ཐེངས་ ༩༦༤ ལས། “ཟངས་གཏེར་ཚོང་གཉེར་ཁང་དེས་གཏེར་ཁ་སྔོག་འདོན་སྔར་ལས་ཤུགས་ཆེ་རུ་བཏང་སྟེ་འདས་པའི་ལོ་ངོ་ཉེར་བདུན་ལྷག་གི་རིང་ཟངས་གཙོ་བོར་གྱུར་བའི་གཏེར་རིགས་སྔོན་འདོན་ཤུགས་ཆེན་བྱས་ཏེ། གནས་རིར་སྐྱོན་ཆག་དང་འབག་བཙོག་ཤུགས་ཆེན་བཟོས་ཡོད་པ་མ་ཟད། བཟོ་གྲྭའི་བཙོག་ཆུ་རྣམས་དགུ་ཆུའི་ནང་དུ་ཐད་ཀར་གཏོང་གི་ཡོད་སྟབས། དགུ་ཆུའི་འགྲམ་གྱི་འབྲོག་མང་གིས་དགུ་ཆུ་འཐུང་མི་ནུས་པར་གྱུར་བ་དང་།” ཞེས་གསལ་དོན་ལྟར་གནས་སྟངས་ཛ་དྲག་གང་འདྲ་ཞིག་ཏུ་གྱུར་ཡོད་པ་ང་ཚོས་རོབས་ཙམ་ཤེས་ཐུབ་པ་དེ་རེད། དེར་མི་མང་གི་བདེ་སྡུག་ཞུ་འབོད་བྱས་རུང་དོན་འབྲས་སོན་གྱི་མེད་པ་དེ་རེད།
དེང་སྐབས་རྒྱ་གཞུང་གིས་བོད་ལ་ཡར་རྒྱས་གཏོང་ཆེད་རྒྱ་སྒོར་དུང་ཕྱུར་མང་པོ་བཏང་ཡོད་རབས་བརྗོད་ཀྱི་ཡོད་མོད། དོན་དུ་དེ་དག་བོད་སྡོད་དམག་ཕོགས་དང་། ལས་བྱེད་ཀྱི་གླ་ཕོགས་སོགས་ཡིན་པ་རེད། བོད་མི་རིགས་ཀྱི་འཚོ་བའི་ཐོག་ཏུ་ཕན་ཐོགས་གང་ཡང་ཡོང་གི་མེད། མེ་འཁོར་ལྕགས་ལམ་དང་གཞུང་ལམ་བཟོས་བ་དེ་དག་ནི་བོད་ནས་གཏེར་ཁ་སྔོག་འདོན་གྱི་འུར་འདྲེན་བྱ་སའི་ཆེད་ཡིན་པ་ལས་བོད་མི་རིགས་ཀྱི་ཁེ་ཕན་ཆེད་དུ་དམིགས་ནས་བཟོས་པ་ཞིག་དེ་བས་ཀྱང་མིན། རྒྱ་དམར་གཞུང་གིས་བོད་མི་རྣམས་ཀྱི་འགྲོ་འདུག་སྤྱོད་གསུམ་ཐོག་ཏུ་ཚོད་འཛིན་གྱིས་རྟག་ཏུ་སུན་པོ་ཡང་ཡང་བཟོ་བཞིན་ཡོད་ལ། བོད་མི་རྣམས་ལ་འགྲོ་འདུག་སྤྱོད་གསུམ་གྱི་རང་དབང་སྤུ་ཙམ་ཡང་མེད་པར་དེ་འདྲའི་དཀའ་སྡུག་འོག་ཏུ་གནས་དགོས་ཐུག་གི་ཡོད། ཤེས་ལྡན་པ་ཚོར་རང་ཉིད་ཀྱི་བསམ་ཚུལ་ཙམ་ཡང་བཤད་པའི་རང་དབང་མེད། གལ་སྲིད་རྒྱ་གཞུང་གིས་ལྟ་བ་དང་ལངས་ཕྱོགས་མ་མཐུན་པའི་རྩོམ་ཡིག་སྤེལ་ཚེ་ལམ་སེང་ཁ་བྲལ་གྱི་ཉེས་མིང་བཙན་གྱིས་བཀལ་ནས་སྡུག་སྦྱོང་མནར་གཅོད་གཏོང་གི་ཡོད་ལ། བཙོན་ཁང་དུ་བཅུག་ནས་རིག་འཚོ་མ་ཟིན་པ་བཟོ་ཡི་ཡོད། བོད་མི་རྣམས་ལ་རང་ས་རང་ལ་སྤྱོད་དབང་ཙམ་ཡང་མེད་པའི་གནས་སྟངས་ཐབས་སྐྱོ་པོར་འགྱུར་བཞིན་ཡོད་ལ། ཞི་བདེ་བག་ཕེབས་ལྡན་པའི་གནའ་བོའི་གྲོང་དང་གྲོང་ཁྱེར་དེ་དག་ད་སྐབས་ཡར་རྒྱས་ལ་ཁ་གཡར་ནས་དམིགས་ཡུལ་ངན་པ་ཞིག་འཛིན་པའི་ཐོག་ནས་ཁྲ་ཁྲ་ཟིང་ཟིང་ཅན་དུ་བཙན་གྱིས་རྒྱ་ཡུལ་གྱི་གྲོང་ཁྱེར་ནང་བཞིན་སྒྱུར་བཞིན་ཡོད། བོད་ཀྱི་ཐོག་ཏུ་རྒྱ་གཞུང་གིས་ཡིག་ཐོག་ཏུ་བཀོད་པ་དང་ངོས་སུ་ས་གནས་སུ་ལག་བསྟར་གཉིས་མི་མཐུན་པའི་གུང་ཁྲན་ཏང་གི་འགོ་ཁྲིད་ཚོས་བྱེད་སྟངས་དེ་དག་ལ་བོད་མི་རྣམས་ཞེན་པ་གཏིང་ནས་ལོགས་ཀྱི་ཡོད། རྒྱ་གཞུང་གིས་བོད་ས་ཡོངས་རྫོགས་དྲག་པོའི་བཙན་བཟུང་བྱས་ནས་མི་ལོ་རེ་ལྔ་ལྷག་ཙམ་འགྲོ་བཞིན་ཡོད་ཅིང་། ལོ་ཟླ་དེ་དག་གི་རིང་དུ་བོད་མི་རིགས་ཀྱི་སེམས་ཁམས་སུ་སྡུག་བསྔལ་ལས་བདེ་སྐྱིད་ཀྱི་ཉི་མ་ཤར་མྱོང་གཏན་ནས་མེད། དེ་འདྲའི་སེམས་ནང་དཀའ་སྡུག་དེ་དག་མ་བཟོད་ནས་བོད་མི་རྣམས་སྐུ་སྲོག་མཆོད་མེར་སྒྲོན་དགོས་ཐུག་གི་ཡོད། རྒྱ་གཞུང་གིས་དེ་དག་ལ་བསམ་ཤེས་བྱ་རྒྱུ་ལས་ལྡོག་སྟེ་སྐུ་སྲོག་མཆོད་མེར་སྒྲོན་མཁན་དེ་དག་རིགས་འཚོ་མ་ཟིན་པ་ཡིན་ལུགས་འཛམ་གླིང་མི་དམངས་ཀྱི་མདུན་དུ་འགྲེལ་ལོག་བརྒྱབ་ཡོད་རུང་། འཛམ་གླིང་གི་བློ་གཟུ་བོར་གནས་པའི་མི་མང་དང་སྲིད་གཞུང་ཚོས་རྒྱ་གཞུང་གིས་བཤད་པའི་སྐད་ཆ་དེ་དག་བདེན་པར་ངོས་འཛིན་བྱེད་མཁན་མེད། འོན་ཀྱང་ད་དུང་རྒྱ་གཞུང་གིས་ཨུ་ཚུགས་ཀྱིས་ལོག་འགྲེལ་རྒྱག་བཞིན་ཡོད།
ལྷག་དོན་རྒྱ་གཞུང་གིས་བོད་ཀྱི་ཆུ་ཆེན་ཁག་ལ་ཆུ་རགས་བརྩིགས་ནས་དེའི་རྒྱུད་དུ་གནས་པའི་དགོན་སྡེ་ཁག་བཙན་པོ་དབང་ཡོད་ཀྱི་ཐོག་ནས་གནས་སྤོ་བཅུག་གི་ཡོད།མི་མང་གིས་ཞུ་འབོད་ག་ཚོད་བརྒྱབ་རུང་གསན་རོགས་བྱེད་ཀྱི་མེད་ལ། མི་དམངས་རྣམས་ཀྱི་ཞུ་འབོད་ལ་སྤྱི་ཚོགས་དཀྲུག་རྐྱེན་སློང་མཁན་ཞེས་བརྗོད་ནས་བཙོན་འཇུག་བྱེད་ཀྱི་ཡོད། རྒྱ་དམར་གྱི་མགོ་འཁྲིད་ཚོས་ཁ་ནས་བོད་རིགས་སྤུན་ཟླ་ཡིན་ཚུལ་སྒྲོག་གི་ཡོད་རུང་དོན་དུ་བོད་མི་རྣམས་དགྲ་བོ་ལ་ངོས་འཛིན་གྱིས་མཐོང་ཆུང་དང་མནར་གཅོད་བཏང་དང་གཏོང་བཞིན་ཡོད།
ད་ནི་ང་ཚོའི་མ་འོངས་པའི་བོད་ཕྲུག་སོན་རྩ་རྣམས་ལ་རྒྱལ་ཞེན་སློབ་གསོ་སྤྲོད་རྒྱུ་དེ་ནི་མི་རིགས་ཀྱི་འཐབ་རྩོད་པ་ཞིག་ལ་མཚོན་ན་གལ་ཆེའི་གནད་དོན་ཞིག་རེད་འདུག་སྙམ། མི་སུ་ཡིན་ནའང་སེམས་ནང་དུ་རྒྱལ་ཞེན་གྱི་བསམ་བློ་དེ་མེད་སོང་ན་མི་རིགས་ཀྱི་རིག་གཞུང་ལ་བརྩེ་བ་དེ་ལས་ཀྱང་ཡོང་གི་མ་རེད་ལ། སེམས་ནང་དུ་རྒྱལ་ཞེན་གྱི་བསམ་བློ་ཞིག་ཡོད་པ་ནི་རང་བཞིན་གྱིས་མི་རིགས་ལ་ཞབས་འདེབས་ཞུ་བསམ་པའི་ཀུན་སློང་དེ་ཡོང་གི་རེད་ལ། དེང་སྐབས་སློབ་གྲྭ་ཁག་ཏུ་རྒྱལ་ཞེན་སློབ་ཁྲིད་དེ་ཉུང་བའི་སྐྱོན་ཞིག་མཐོང་གི་འདུག་ལ། གཅིག་བྱས་ན་རང་ཉིད་མཐོང་རྒྱ་དང་ཐོས་རྒྱ་ཆུང་བའི་སྐྱོན་ཡང་ཡིན་སྲིད་པ་ཞིག་རེད། གང་ལྟར་འབྲེལ་ཡོད་ཚོའི་དགོངས་པ་ཆེར་བཞེས་གནང་ནས་བོད་ཕྲུག་ལ་རྒྱལ་ཞེན་གྱི་སློབ་གསོ་་སྤྲོད་པར་ཐུགས་བསམ་བཞེས་དགོས་པའི་དུས་ལ་བསླེབས་འདུག་སྙམ། ད་ནི་ཙམ་ཞིག་ཡིན་ཡིག་རྙོག་མང་པོ་བྱུང་སོང་ན་དགོངས་འགལ་མེད་པར་མཛོད།
ཕྱི་ལོ་ ༢༠༢༤ ཕྱི་ཟླ་ ༦ ཚེས་ ༣༡ ཉིན་མོར་ཕུལ།
