རྒྱ་ནག་ནང་ལོགས་ལ་ཐོས་བསམ་ཡ་མ་བྲལ་བ་བྱས་ནས་འགྲོ་རྒྱུ་དེ་ང་ཚོ་བོད་མིའི་ལས་འགན་རེད་ཅེས་གསུངས།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བོད་མི་བཙན་བྱོལ་བ་ཚོས་གསར་གཏོད་བྱས་ནས་རྒྱ་ནག་ནང་ལའང་ནང་ཆོས་རྩོད་པ་བརྩད་ནས་འགྲོ་རྒྱུ་དེ་རིམ་པས་རྒྱ་སྐྱེད་ཐུབ་ན་ཡག་པོ་རེད་ཅེས་གསུངས་སོང་།

དབུ་མའི་ལྡེ་མིག་གི་བཀའ་ཆོས་ཉིན་གཉིས་པའི་སྟེང་༧གོང་ས་རྒྱལ་བ་རིན་པོ་ཆེ་མཆོག་ནས། ང་ཚོའི་ངོ་བོ་དེ་བཙན་བྱོལ་བ་ཆགས་ཀྱི་ཡོད་པ་རེད་དེ། རྒན་གཞོན་ཚང་མས་སློབ་སྦྱོང་གི་ཐོག་ལ་དོ་སྣང་ཡོད་པ་དང་། སྐབས་སུ་བབ་པ་སློབ་ཕྲུག་ཕོ་མོ་མང་པོ་ཞིག་གིས་རྟགས་གསལ་བཏང་སོང་། རྒྱུན་དུ་དོ་སྣང་ཡོད་པའི་རྟགས་རེད། གདན་ས་ཁག་དང་ཆོས་ར་འགྲིམ་མཁན་ཚོས་རྟགས་གསལ་གཏོང་བ་མ་གཏོགས། སྤྱིར་བཏང་སྤྱི་འགྲོས་སྤྱི་མཚུངས་ཀྱིས་རྟགས་གསལ་གཏོང་བར་གོམས་འདྲིས་དེ་ཙམ་མེད་པ་རེད། ང་ཚོ་བཙན་བྱོལ་བ་ཆགས་དུས་གཞོན་སྐྱེས་ཚོས་རྟགས་གསལ་གཏོང་རྒྱུར་དོ་སྣང་བྱེད་པ་དེ་ཡག་པོ་ཞེ་དྲགས་རེད། སངས་རྒྱས་པའི་ཆོས་རྩོད་པ་བརྩད་ནས་འགྲོ་རྒྱུ་དེ་ན་ལེནྜའི་ཕྱག་སྲོལ་ཆགས་ཀྱི་ཡོད་པ་རེད། བོད་ནང་དུ་ཆ་བཞག་ནའང་། སེ་འབྲས་སོགས་སུ་རྩོད་པ་བརྩད་རྒྱུ་ཡག་པོ་ཞེ་དྲགས་ཡོད་རེད་དེ། སྤྱི་ཡོངས་ཀྱི་མི་སྐྱ་ཕོ་མོ་དང་སློབ་གྲྭའི་ནང་ལོགས་ལ་དེ་ཙམ་གྱིས་དར་སྲོལ་མེད་པ་རེད། ང་ཚོ་བཙན་བྱོལ་བ་ཆགས་ནས་ཁྱེད་རང་ཚོ་སློབ་ཕྲུག་ཕོ་མོ་དང་། སེར་སྐྱ་དབྱེ་བ་མེད་པར་ཚང་མས་དོ་སྣང་བྱས་ཏེ། རྩོད་པ་བརྩད་རྒྱུ་དང་རྟགས་གསལ་གཏོང་རྒྱུའི་བསམ་བློ་གཏོང་བ་དེ་ཡག་པོ་ཞེ་དྲགས་རེད་འདུག ང་ཚོ་བོད་ཀྱི་ཆོས་དང་རིག་གཞུང་ཉར་ཚགས་བྱ་རྒྱུའི་གནས་ཚུལ་གཅིག་པུ་མིན་པར་འཛམ་བུ་གླིང་འདིར་སྟོན་ཐུབ་པ་ཞིག་རེད། ཅེས་གསུངས།

༧མགོན་པོ་གང་ཉིད་ཀྱིས། ང་ཚོས་བསྡུས་གྲྭ་སློབ་པའི་སྐབས་ནས་རྟགས་གསལ་གཏོང་རྒྱུའི་འགྲོ་སྟངས་དེ་དག་ཤེས་ན་ཕན་ཐོགས་ཆེན་པོ་ཡོད་རེད། སློབ་གྲྭའི་ནང་རྟགས་གསལ་གཏོང་རྒྱུའི་གོམས་གཤིས་འཇགས་ཡོང་གི་ཡོད་པ་རེད། དཔེ་མི་སྲིད་པའི་ཡག་པོ་རེད། ང་ཚོས་བོད་ཀྱི་ཆོས་དང་རིག་གཞུང་སྲུང་སྐྱོབ་དང་ཉར་ཚགས་གང་འདྲ་བྱེད་ཀྱི་ཡོད་པ་མཚོན་ཐུབ་པ་ཞིག་རེད་འདུག ཁྱེད་རང་ཚོ་ཚང་མས་ཧུར་ཐག་འབད་ཐག་བྱེད་པ་དེ་ཡག་པོ་ཞེ་དྲགས་རེད། ང་ཚོ་བཙན་བྱོལ་བ་ཉུང་ཤས་ཡོད་པ་དེ་དག་གིས་དཔེ་ཆ་བལྟས་ནས་རྟགས་གསལ་གཏོང་རྒྱུ་དེ་དག་རྒྱ་ནག་ནང་ལ་ཆ་བཞག་ནའང་ཁྱབ་སྤེལ་གཏོང་ཐུབ་པ་ཞིག་སེམས་ལ་འཇོག་དགོས། སྔ་མོ་རྒྱ་རིགས་ནང་ནས་གྲྭ་སར་བཞུགས་མཁན་ཕྲན་བུ་ཡོད་པ་རེད། ད་ལྟ་རྒྱ་ནག་ནང་ལ་ནང་ཆོས་ལ་དོ་སྣང་བྱེད་མཁན་མང་དུ་འགྲོ་ཡི་ཡོད་པར་བརྟེན། རྟགས་གསལ་གཏོང་རྒྱུ་དེ་དག་རྒྱ་རིགས་ནང་ལ་ཁྱབ་སྤེལ་ཐུབ་རྒྱུ་སེམས་ལ་གཞག་དགོས་པ་རེད། ངོས་རང་བཙན་བྱོལ་བ་ཆགས་ནས་བསྡད་ཡོད་རེད་དེ། བོད་ཀྱི་ཆོས་དང་རིག་གཞུང་འདི་འཛམ་བུ་གླིང་འདིའི་སྒང་ལ་དོ་སྣང་གསར་པ་བསླེབ་རྒྱུར་འབད་པ་བྱེད་ཀྱི་ཡོད་པ་དེ་རླབས་ཆེན་པོ་ཆགས་ཀྱི་ཡོད་པ་རེད། ཅེས་གསུངས།

ཡང་༧མགོན་པོ་གང་ཉིད་ཀྱིས། ཕྱོགས་གཅིག་ནས་བསམ་བློ་བཏང་ན། རྒྱ་ནག་ནང་ལ་ནང་པ་ཤུགས་ཆེན་པོ་འདུག བོད་ཀྱི་ནང་ཆོས་ལ་དོ་སྣང་ཤུགས་ཆེ་རུ་འགྲོ་ཡི་འདུག འཛམ་བུ་གླིང་ཤར་ནུབ་ལྷོ་བྱང་དེ་དག་ལའང་བོད་ཀྱི་ནང་ཆོས་ལ་དོ་སྣང་ཤུགས་ཆེ་རུ་འགྲོ་ཡི་ཡོད་པ་རེད། ནང་ཆོས་ལ་དོ་སྣང་ཤུགས་ཆེ་རུ་ཕྱིན་པའི་སྐབས། རྩོད་པ་བརྩད་རྒྱུ་དེ་ཧ་ཅང་གལ་ཆེན་པོ་རེད། དེར་བརྟེན་ང་ཚོ་བཙན་བྱོལ་བ་ཉུང་ཤས་ཀྱིས་མིག་དཔེ་བལྟ་ས་བྱས་ཏེ། བོད་ཀྱི་ཆོས་དང་རིག་གཞུང་ནི་དཔེ་ཆ་སྐྱོར་རྒྱུ་གཅིག་པུ་མིན་པར་བསམ་བློ་གཏོང་བ་དང་རྩོད་པ་བརྩད་དེ་ཆོས་དང་རིག་གཞུང་ལ་བདག་པོ་རྒྱག་སྟངས་ལ་དོ་སྣང་ཤུགས་ཆེ་རུ་ཕྱིན་ནས། འཕྲལ་དུ་བོད་མི་བཙན་བྱོལ་བའི་ནང་དུ་རིགས་ལམ་གྱི་འགྲོ་སྟངས་ཀྱི་ཐོག་ནས་བསྟན་པ་ཉམས་པ་སོར་ཆུད་དང་། མི་ཉམས་གོང་འཕེལ་བརྒྱུད་ནས་རྒྱ་ནག་ནང་ལོགས་ལ་ཐོས་བསམ་ཡ་མ་བྲལ་བ་ཞིག་ཡོང་རྒྱུ་ང་ཚོའི་ལས་འགན་རེད། ད་ལྟ་ཡོངས་གྲགས་སུ་བལྟས་པ་ཡིན་ན། རྒྱ་ནག་ཏུ་ནང་ཆོས་ཤུགས་ཆེན་པོ་དར་བ་དང་། ནང་ཆོས་རྩོད་པ་བརྩད་ནས་འགྲོ་རྒྱུའི་བཟོ་ལྟ་འདུག དེས་བསྟན་པའི་ཞབས་འདེགས་རླབས་ཆེན་པོ་སྒྲུབ་ཀྱི་ཡོད་པ་རེད། ང་ཚོ་བོད་མི་བཙན་བྱོལ་བ་རེད་དེ། ང་ཚོས་གསར་གཏོད་བྱས་ནས་རྒྱ་ནག་ཏུ་ནང་ཆོས་རྩོད་པ་བརྩད་ནས་འགྲོ་རྒྱུའི་ཕྱག་ལེན་རིམ་པས་རྒྱ་བསྐྱེད་ཐུབ་ན་ཡག་པོ་རེད། ཅེས་གསུངས།

ཡང་མགོན་པོ་གང་ཉིད་ཀྱིས། ནང་པའི་ཆོས་དང་གཏན་ཚིགས་རིག་པའི་ཐོག་ལ་ནུབ་ཕྱོགས་རྒྱལ་ཁབ་དེ་སྔ་ནང་ཆོས་ལ་འབྲེལ་བ་ཁྱོན་ནས་མེད་མཁན་ཚོས་ནང་ལོགས་ལའང་དོ་སྣང་གསར་པ་ཞིག་བྱེད་བཞིན་འདུག དེར་བརྟེན་གཏན་ཚིགས་རིག་པའི་འགྲོ་སྟངས་ལ་དོ་སྣང་གསར་པ་སླེབ་ཀྱི་ཡོད་པ་རེད། དེའི་ཐོག་ནས་ང་ཚོ་བོད་ཀྱི་ཆོས་དང་རིག་གཞུང་དཔལ་ན་ལེནྜ་ནས་བརྒྱུད་པ་དུས་ད་ལྟ་བར་དུ་ང་ཚོས་བདག་པོ་བརྒྱབ་པ་དེ་འཛམ་བུ་གླིང་འདིའི་སྒང་ལ་མངོན་གསལ་དོད་པོའི་ཐོག་ནས་མཐོང་ཐུབ་པ་ཞིག་དང་། དོ་སྣང་གསར་པ་བསླེབས་ནས་བདག་པོ་རྒྱག་ཐུབ་པ་ཞིག་ནི་ང་ཚོའི་ལས་འགན་རེད། ཧ་ཅང་གལ་ཆེན་པོ་འདུག དེ་རིང་སློབ་གྲྭའི་ཕྲུ་གུ་ཚོས་རྟགས་གསལ་བཏང་བ་ཧ་ཅང་དགའ་པོ་བྱུང་། ཡག་པོ་འདུག དེ་སྔ་བོད་ལ་བསམ་བློ་གུ་དོག་པོ་བྱས་ནས་སློབ་གྲྭའི་ཕྲུ་གུ་ཚོས་རྟགས་གསལ་བཏང་བ་ཡིན་ན་སྣང་བ་འགྲོ་ཡི་མེད་པ་རེད། ང་ཚོ་བཙན་བྱོལ་བ་ཆགས་ནས་སློབ་ཕྲུག་ཕོ་མོ་ཚོས་རྟགས་གསལ་གཏོང་གི་ཡོད་པ་ནི་ཡར་རྒྱས་རེད། ན་ལེནྜ་ནས་བརྒྱུད་པའི་བོད་ཀྱི་ཆོས་དང་རིག་གཞུང་བདག་པོ་རྒྱག་སྟངས་ནི་དམའ་རིམ་གྱི་སློབ་གྲྭ་ནས་བདག་པོ་རྒྱག་ཐུབ་པ་ཞིག་དང་། ཕྲུ་གུ་ཚོས་ད་ལྟ་བར་དུ་ཧུར་ཐག་བྱས་པ་རེད།  མུ་མཐུད་ཧུར་ཐག་གནང་རོགས། ཞེས་གསུངས་སོང་།

མཇུག་ཏུ་༧མགོན་པོ་གང་ཉིད་ཀྱིས། འཛམ་བུ་གླིང་འདིའི་སྒང་ལ་བཙན་བྱོལ་བ་མང་པོ་ཡོད་རེད་དེ། ང་ཚོ་བོད་པ་ཚོ་ཕལ་ཆེར་ཚགས་ཚུད་ཤོས་དང་གྱོང་ཤོས་ཡིན་པ་ལྟ་བུ་འདུག ཚང་མས་ད་ལྟ་བར་དུ་སེམས་ཤུགས་བསྐྱེད་ནས་ཧུར་ཐག་བྱས་པ་རེད་ལ། ད་དུང་འཛམ་བུ་གླིང་འདིའི་སྒང་ལ་སེམས་ཤུགས་བསྐྱེད་དེ་ཧུར་ཐག་བྱེད་དགོས་རེད། ངོས་རང་གི་གཉིད་ལམ་ལ་ངོས་རང་གི་མཇིང་པའི་སྒང་ལ་དཔལ་ལྡན་ལྷ་མོ་ཡོད་པ་དང་། ངོས་རང་ལོ་བརྒྱ་དང་བཅུ་གྲངས་ཤིག་བསྡད་ཐུབ་ཀྱི་རེད་ཟེར་ནས་གསུངས་པ་ཞིག་གཉིད་ལམ་བྱུང་། གཉིད་ལམ་ནང་བཞིན་གཟུགས་པོའི་གནས་སྟངས་བྱས་ནའང་ཕལ་ཆེར་ལོ་བརྒྱ་དང་བཅུ་གྲངས་ཤིག་བསྡད་རྒྱུའི་བཟོ་ལྟ་འདུག གཙོ་ཆེ་ཤོས་ང་ཚོ་ཚང་མ་དད་པ་དམ་ཚིག་གཡོ་བ་མེད་པར་སྡོད་ཀྱི་ཡོད་པ་རེད། ངོས་རང་གི་ངོས་ནས་ཆ་བཞག་ནའང་། སེམས་ཅན་གྱི་དོན་དག་སྤྱི་དང་ལྷག་པར་དུ་གངས་ཅན་པ་དང་དེ་དང་འབྲེལ་ཡོད་ཀྱི་མི་སྣ་ཚོའི་དོན་དག་ལ་ཞོགས་པ་ཡར་ལངས་པ་དང་སེམས་བསྐྱེད་ནས་སྨོན་ལམ་རྒྱག་གི་ཡོད། ཁྱེད་རང་ཚོ་ཚང་མ་བློ་བདེ་བྱོས། སེམས་སྐྱིད་པོ་བྱོས་ནས་སྡོད་ཨ། ཞེས་གསུངས་སོང་།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།