འདི་ལོའི་རྒྱལ་སྤྱིའི་ཨ་ཕའི་ཉིན་མོ་དང་བསྟུན་བོད་ཀྱི་པཱ་ལགས་རྐང་སྤོལ་རྩེད་འགྲན་ཐེངས་དང་པོ་འཚོག་གཏན་འཁེལ་ཡོད་པས་དགུང་ལོ་ ༤༠ བརྒལ་བའི་སྐྱེས་པའི་རུ་ཁག ༡༤ ཡིས་རྩེད་འགྲན་གནང་རྒྱུ་ཡིན་འདུག
པཱ་ལགས་རྐང་རྩེད་སྤོ་ལོའི་ཚོགས་པ་ (All Pala Football Association) ཡི་གོ་སྒྲིག་འོག རྒྱལ་སྤྱིའི་ཨ་ཕའི་ཉིན་མོ་སྟེ་ཟླ་འདིའི་ཕྱི་ཚེས་ ༡༦ ནས་ཉིན་བཅུ་ལྷག་རིང་ལྡེ་ར་རྡུན་དོན་གྲུབ་གླིང་བོད་མིའི་གཞིས་ཆགས་ཀྱི་རྐང་རྩེད་སྤོ་ལོའི་རྩེད་ཐང་དུ། ཕྱི་ལོ་ ༢༠༢༤ ལོའི་ཨ་ཕའི་གསེར་གྱི་བུམ་པའི་རྐང་སྤོལ་འགྲན་ཚོགས་བསྡུ་རྒྱུ་ཡིན་འདུག་ལ། འདི་ལོའི་རྩེད་འགྲན་ནང་རྒྱ་གར་དང་བལ་ཡུལ་ཡིན་པའི་དགུང་ལོ་ ༤༠ བརྒལ་བའི་ཁྱོན་རུ་ཁག་ ༡༤ ནས་མཉམ་ཞུགས་གནང་རྒྱུ་ཡིན་ཞིང་། ད་ལྟ་རུ་ཁག་སོ་སོས་སྦྱོང་བརྡར་བྱེད་བཞིན་པའི་སྒང་རེད་འདུག
ཐེངས་འདིའི་རྩེད་འགྲན་ནང་དྷ་རམ་ས་ལ་དང་དོན་གྲུབ་གླིང་གཞིས་ཆགས་ཀ་ལི་མན་གྲོང་ (Clement Town)གི་རུ་ཁག་གཉིས། བདེ་སྐྱིད་གླིང་། བལ་ཡུལ་ཀ་ཐ་མན་ཌུ། ཨོ་ཌི་ཤ། མོན་གྷོ་འདོད་རྒུ་གླིང། ལྡི་ལི་གངས་ཅན་པ་རུ་ཁག རྡོ་རྗེ་གླིང་། སྒང་ཏོག པུ་རུ་ཝ་ལ། མེའུ་ཆོས་འཕེལ་གླིང་། སྤོན་ཊ་ཆོལ་གསུམ་རྩེད་མོའི་རུ་ཁག ཀོ་ལི་གྷལ་དོན་ལྡན་གླིང་བཅས་ནས་རུ་ཁག་ ༡༤ ཡིས་མཉམ་ཞུགས་གནང་གི་ཡོད་འདུག
འདི་གའི་གསར་འགོད་པས་ཁ་པར་བརྒྱུད་པཱ་ལགས་རྐང་རྩེད་སྤོ་ལོའི་ཚོགས་པའི་ཚོགས་གཙོ་ཚེ་རིང་ཡེ་ཤེས་ལགས་སུ་ཚོགས་པ་དེ་བཙུགས་པའི་དགོས་དམིགས་སྐོར་དྲིས་པར་ཁོང་གིས། ང་ཚོའི་སྤྱི་ཚོགས་ནང་ལོོ་ ༤༠ བརྒལ་བའི་མི་རབས་ཀྱི་འཕྲོད་བསྟེན་ཡར་རྒྱས་གཏོང་རྒྱུར་དམིགས་ཏེ་རྐང་སྤོལ་འགྲན་བསྡུར་དེ་འཚོག་གི་ཡོད་སྐོར་བརྗོད་བྱུང་།
བཙན་བྱོལ་བོད་མིའི་སྤྱི་ཚོགས་ཁྲོད་བོད་རྒྱལ་ཡོངས་རྩེད་རིགས་ཚོགས་པའི་ཁོངས་སུ་གྲགས་ཆེ་བའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་འགྲན་ཚོགས་དང་བོད་ཀྱི་བུད་མེད་ཀྱི་རྐང་སྤོལ་རྩེད་འགྲན་སོགས་རྐང་སྤོལ་དང་སིལ་སྤོལ་གྱི་རྩེད་འགྲན་ཁག་ཅིག་ཡོད་ལ། ད་ལོ་ནས་པཱ་ལགས་གསེར་གྱི་བུམ་པའི་རྐང་སྤོལ་རྩེད་འགྲན་ཞེས་པ་འདི་ཡང་གསར་དུ་མགོ་འཛུགས་གནང་འདུག་ལ། མ་འོངས་པར་ལོ་འཆར་ཅན་ལྟར་ཨ་ཕའི་ཉིན་མོར་རྩེད་འགྲན་འཚོག་འཆར་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
