དེ་རིང་ཕྱི་ཟླ་ ༦ ཚེས་ ༨ ཉིན་བོད་ལྗོངས་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ཀྱིས་བོད་དོན་ཆེད་བཞུགས་སྒར་དྷ་ས་ནས་བོད་ཀྱི་རྒྱལ་ས་ལྷ་སའི་བར་ཞི་བའི་གོམ་བགྲོད་ཀྱི་ལས་འགུལ་སྤེལ་ཏེ། ནུབ་བྷང་གྷལ་གྱི་བོད་འཕགས་ས་མཚམས་ནས་བོར་བརླག་ཏུ་ཕྱིན་ནས་མི་ལོ་ ༡༡ སོང་བའི་ཉིན་མོ་སྲུང་གཙི་གནང་སོང་།
གླིང་ཚ་ཚེ་བརྟན་རྡོ་རྗེ་ལགས་རྗེས་དྲན་གྱི་མཛད་སྒོའི་ཐོག་སྤྱི་ཟུར་རྨོག་རུ་བསྟན་པ་རྒྱ་མཚོ་ལགས་ཀྱིས། སྤྱིར་དེ་རིང་བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་དང་འབྲེལ་བའི་གཏམ་གསར་པ་དང་། གནས་ཚུལ་གསར་པ་སོགས་ཅི་ཡང་བཤད་རྒྱུ་མེད། དེ་རིང་གི་ཉིན་མོ་འདིར་ཁོང་ཉིད་བོར་བརླག་ཏུ་གྱུར་ནས་མི་ལོ་ ༡༡ ཕྱིན་པའི་རྗེས་དྲན་བྱེད་ཀྱི་ཡོད་པ་རེད་ལ། ཟླ་ཚེས་དེ་གསར་འགྱུར་བརྒྱུད་ལམ་ཁག་ཏུ་གླིང་ཚ་ཀ་ལིང་པོག་ནས་བོར་བརླག་ཏུ་གྱུར་བའི་ཚེས་གྲངས་དེ་ཁེལ་ཡོད་ཀྱང་། ངས་ཚེས་གྲངས་དེ་ཏག་ཏག་ཅིག་ལ་ངོས་འཛིན་བྱེད་ཀྱི་མེད། རྒྱུ་མཚན་གང་ཡིན་ཟེར་ན། ལོ་དེའི་ཕྱི་ཟླ་ ༦ ཚེས་ ༡༡ ཉིན་གླིང་ཚ་སྒང་ཐོག་ཏུ་ཡོད་ཅེས་ཁ་པར་བསླེབས་སོང་། དེའི་རྗེས་ནས་གྲགས་འགུལ་གང་ཡང་མེད་པར་བོར་བརླག་ཏུ་གྱུར་བའི་གནས་ཚུལ་ཐོན་ཡོད་པས། དངོས་གནས་ཁོང་བོར་བརླག་ཏུ་གྱུར་བའི་ཚེས་གྲངས་དེ་ཕྱི་ཟླ་ ༦ ཚེས་ ༡༡ ལ་རེད། ཅེས་དང་། འདས་པའི་ལོ་ཤས་རིང་གླིང་ཚ་གང་དུ་ཡོད་རེད་དམ་ཞེས་པའི་དྲི་བ་དེ་ཚང་མར་ཡོད་པའི་ཁར། ཁ་ཤས་ཀྱིས་ཁོང་ཉིད་རྒྱ་གར་དམག་མིས་བཟུང་ཡོད་པ་དང་། ཡང་ལ་ཤས་ཀྱིས་བོད་ནང་དུ་ཡོད་པའི་དོགས་སློང་བྱེད་ཀྱི་ཡོད་ཀྱང་། དོན་དངོས་ཐོག་ད་ལྟ་བོད་དང་རྒྱ་གར་དམག་མི་སོགས་ཀྱིས་འཛིན་བཟུང་བྱས་ཡོད་པའི་ཁུངས་སྐྱེལ་ར་སྤྲོད་ཀྱི་བདེན་དཔང་ཅི་ཡང་མེད་སྐོར་སོགས་འགྲེལ་བརྗོད་གནང་སོང་།
ཡང་ཁོང་གིས། དེ་རིང་མདོ་སྨད་དབུས་སྤྱི་ཁྱབ་རྒྱུན་ལས་ཁང་གིས་གླིང་ཚའི་གནད་དོན་དེ་གླེང་གི་ཡོད་ཀྱང་། དོན་དངོས་ཐོག་ཁོང་གིས་མི་རིགས་ཤིག་གི་སྐྱིད་སྡུག་དང་རང་དབང་འཐབ་རྩོད་སླད། རང་གི་ནང་མི་བུ་ཕྲུག་སོགས་བློས་གཏོང་གིས་ཞི་བའི་འཐབ་རྩོད་ཀྱི་ལམ་བུ་འདིར་བསྙེགས་པ་ཡིན་པས། བཙན་བྱོལ་བོད་མིའི་ཆབ་སྲིད་འཐབ་རྩོད་ཀྱི་གོ་རིམ་ཁྲོད་ནས་བོད་མི་ཡོངས་ཀྱིས་གླིང་ཚ་གླེང་དགོས་ཏེ། ཁོང་གིས་བཏོན་པའི་དགོས་འདུན་དོན་ཚན་ལྔ་ནི་བོད་མི་ས་ཡ་དྲུག་གིས་རིང་ནས་སྙིང་ལ་བརྣགས་པའི་འདོན་འདུན་ཞིག་ཡིན་པ་ལས། གླིང་ཚ་མི་སྒེར་གྱི་དགོས་དོན་དོན་ཚན་ཞིག་གཏན་ནས་མིན་སྐོར་དང་། བཙན་བྱོལ་བོད་མིའི་ཚོགས་པ་ཁག་དང་མི་སྒེར་སོགས་ཀྱི་གླིང་ཚ་ཚ་གླེང་དང་འཚོལ་ཞིབ་བྱ་དགོས་ན། ཐོག་མར་ཁོང་གིས་བོད་དོན་ཞི་བའི་ལས་འགུལ་གྱི་དགོས་དམིགས་དང་། རྒྱབ་ལྗོངས། འཐབ་རྩོད་ཀྱི་གོ་རིམ། དགོས་འདུན་དོན་ཚན་དེ་དག་གི་ཐབས་ལམ་སོགས་ཀྱི་ཐད་ནས་ཞིབ་འཇུག་དང་འཚོལ་སྙེག་བྱ་རྒྱུ་ཧ་ཅང་གལ་ཅེན་ཡིན་སྐོར་སོགས་བརྗོད་སོང་།
བོད་དོན་ཞི་བའི་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་ལགས།
ཕྱི་ལོ ༢༠༡༢ ལོར་གླིང་ཚ་ཚེ་བརྟན་རྡོ་རྗེ་དང་ཁོང་གི་ཨ་མ་འདས་མོ་ལྡོམ་པོ་སྐྱིད། སྲིང་མོ་ལྷ་མོ་སྐྱིད་བཅས་ཀྱིས་གསུམ་བཅུའི་དུས་དྲན་ཉིན་དྷ་ས་ནས་མགོ་འཛུགས་ཏེ། བོད་དོན་ཆེད་ཞི་བའི་གོམ་བགྲོད་ཀྱིས་ཕ་ཡུལ་བོད་དུ་འགྲོ་འཆར་བྱས་ཏེ་བལ་ཡུལ་བརྒྱུད་བསྐྱོད་སྐབས། གླིང་ཚ་ཚེ་བརྟན་རྡོ་རྗེ་བལ་ཡུལ་ཉེན་རྟོག་པས་འཇུ་བཟུང་བྱས་ཏེ་ཟླ་དགུའི་རིང་བཀག་ཉར་བྱས། ཁོང་བལ་ཡུལ་བཙོན་ཁང་ནས་ཀློད་གྲོལ་ཐོབ་རྗེས། ༢༠༡༣ ལོའི་གསུམ་བཅུའི་དུས་དྲན་ཉིན་གླིང་ཚ་ཚེ་བརྟན་རྡོ་རྗེ་ལགས་ཀྱིས་དགོས་འདུན་དོན་ཚན་ ༥ ཡི་འོག བཞུགས་སྒར་དྷ་རམ་ས་ལ་ནས་བོད་སྐྱོད་ཞི་བའི་གོམ་བགྲོད་ཐེངས་ ༢ པ་མགོ་འཛུགས་ཀྱིས་ཉིན་གྲངས་ ༨༩ རིང་རྒྱ་གར་མངའ་སྡེ་ ༦ཙམ་བརྒྱུད་དེ། ཁྱོན་སྤྱི་ལེ་ ༢༡༤༨ ཙམ་གྱི་སར་ཞི་བའི་གོམ་བགྲོད་གནང་རྗེས། ལོ་དེའི་ཕྱི་ཟླ་ ༦ ཚེས་ ༨ ཉིན་གྱི་ཞོགས་པར། རྒྱ་གར་ནུབ་བྷིང་གྷིལ་(West Bengal)མངའ་སྡེའི་ཀ་ལོན་སྦུག་སྲད་རྒྱུད་གྲྭ་ཚང་ནས་རྐང་འཁོར་དང་ཅ་ལག་ཚང་མ་བཞག་སྟེ་གར་སོང་ཆ་མེད་ཆགས་ཡོད་ཅིང་། འདི་ལོར་བོད་དོན་ལས་འགུལ་བ་ཁོང་བོར་བརླག་ཏུ་གྱུར་ནས་མི་ལོ་ ༡༡ འཁོར་གྱི་ཡོད་འདུག
བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ཀྱིས་བཏོན་པའི་དགོས་འདུན་དོན་ཚན་ལྔ་ནི། ཆ་རྐྱེན་གང་ཡང་མེད་པར་༧གོང་ས་མཆོག་ཕྱིར་བོད་ནང་དུ་ཕེབས་སུ་འཇུག་དགོས། ཆ་རྐྱེན་གང་ཡང་མེད་པར་༧པན་ཆེན་ཆུང་སྲིད་རིན་པོ་ཆེས་གཙོས་བོད་ཀྱི་ཆབ་སྲིད་བཙོན་མ་རྣམས་ཀློད་གྲོལ་་གཏང་དགོས། བོད་མིར་རང་གི་སྐད་དང་ཡི་གེ་སྦྱོང་རྒྱུར་རང་དབང་སྤྲད་དགོས། བོད་མིར་རང་ཡུལ་གྱི་ཆོས་གོས་དང་། གོམས་གཤིས་སོགས་རང་དབང་ཆ་ཚང་སྤྲད་དགོས། ད་ལྟ་བོད་ནང་དུ་སྡུག་སྦྱོང་དང་། མནར་གཅོད་གཏོང་མཁན་རྒྱ་ནག་གི་དམག་མི་ཡོངས་རྫོགས་བོད་ནས་ཕྱིར་འཐེན་བྱ་དགོས་པ་བཅས་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཆོ།
