རྒྱ་ནག་གཞུང་གིས་བོད་ནང་འགྲོ་འོང་གི་ཐད་སྔར་ལྷག་གིས་དམ་དྲག་བྱས་དང་བྱེད་བཞིན་པའི་གནས་སྟངས་འོག་འདས་པའི་ལོ་ལྔའི་རིང་ཨ་རིའི་གཞུང་འབྲེལ་སྐུ་ཚབ་མི་སྣ་གཅིག་ཀྱང་བོད་རང་སྐྱོང་ལྗོངས་ཟེར་བའི་ནང་བསྐྱོད་ཐུབ་མེད་པ་རེད་འདུག
ཨ་རིའི་གཞུང་གིས་བོད་ནང་འགྲོ་འོང་དང་འབྲེལ་བའི་ལོ་འཁོར་སྙན་ཐོ་ཞིག་བཏོན་པའི་ནང་། རྒྱ་ནག་གཞུང་གིས་བོད་ནང་དུ་ཡོད་པའི་ཨ་རིའི་མི་སེར་རྣམས་ལ་འཇིགས་སྐུལ་དང་། སོ་ལྟ། བརྙས་བཅོས་སོགས་བྱེད་བཞིན་ཡོད་པ་མ་ཟད། ཨ་རིའི་གཞུང་འབྲེལ་སྐུ་ཚབ་མི་སྣ་དང་འབྲེལ་ཡོད་ལས་བྱེད། གསར་འགོད་པ་དང་ཡུལ་སྐོར་བ་སོགས་བོད་ནང་དུ་བསྐྱོད་རྒྱུར་བཀག་སྡོམ་ཤུགས་ཆེན་བྱེད་ཀྱིན་ཡོད་པ་གསལ་སྟོན་བྱས་འདུག
དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་ཏོག་དབྱིབས་གཉན་རིམས་སྐབས་རྒྱ་ནག་གི་ས་ཁུལ་གཞན་དུ་འགྲོ་འོང་བྱེད་པའི་དམ་དྲག་ལྷོད་ཡངས་སུ་བཏང་ཡོད་ཀྱང་། ད་ལྟའང་བོད་རང་སྐྱོང་ལྗོངས་ཟེར་བའི་ནང་རྒྱ་ནག་གི་ཞིང་ཆེན་གཞན་ནང་བྱེད་མ་མྱོང་བའི་དམ་དྲག་ཧ་ཅང་ཤུགས་ཆེན་བྱེད་བཞིན་ཡོད་པ་དང་། འདས་ལོར་ཨ་རིའི་གཞུང་འབྲེལ་མི་སྣ་བོད་ནང་དུ་བསྐྱོད་ཆོག་པའི་ཆོག་མཆན་ཐེངས་གསུམ་རིང་ཞུས་ཀྱང་ཆོག་མཆན་ལ་ངོས་ལེན་བྱས་མེད་ཁར། ཨ་རིའི་གཞུང་གི་འབྲེལ་ཡོད་ལས་བྱེད་ཅིག་ཡིན་ཕྱིན་བོད་ནང་དུ་བསྐྱོད་པར་བཀག་སྡོམ་བྱས་དང་བྱེད་བཞིན་ཡོད་འདུག
ཡང་དེ་འབྲེལ་སྙན་ཐོའི་ནང་། ཨ་རིའི་གཞུང་འབྲེལ་སྐུ་ཚབ་མི་སྣ་བོད་རང་སྐྱོང་ལྗོངས་ཟེར་བ་མིན་པའི་བོད་ཀྱི་ས་ཁུལ་གཞན་དུ་བསྐྱོད་ཐུབ་ཡོད་ཀྱང་། རྒྱ་གཞུང་གིས་ཨ་རིའི་མི་སྣ་དེ་དག་ལ་སོ་ལྟ་བྱས་ཏེ། འཇིགས་སྐུལ་བརྙན་བཅོས་སོགས་ལྐོག་ཐབས་ཀྱི་ལམ་ནས་དམ་དྲག་བྱས་ཡོད་སྐོར་དང་། རྒྱ་ནག་གཞུང་གིས་ཁྲི་ཏུ་རུ་ཡོད་པའི་ཨ་རིའི་གཞུང་ཚབ་ཁང་སྒོ་བརྒྱབ་སྟེ། ད་ལྟ་བོད་དོན་དང་འབྲེལ་བའི་ཨ་རིའི་གཞུང་ཚབ་མི་སྣ་དེ་དག་པེ་ཅིན་དུ་ཡོད་པའི་ཨ་རིའི་གཞུང་ཚབ་ཁང་དུ་སྡོད་དགོས་བྱུང་ཡོད་སྐོར་སོགས་གསལ་འདུག་ཅིང་། ད་ལན་ནི་ཨ་རིའི་གཞུང་གིས་བོད་ནང་འགྲོ་འོང་དང་འབྲེལ་ནས་དམ་དྲག་ཅི་ཙམ་བྱེད་ཀྱི་ཡོད་མེད་སྐོར་ལ་ཞིབ་འཇུག་སྙན་ཐོ་བཏོན་པ་ཐེངས་ ༦ པ་ཆགས་ཀྱི་ཡོད་འདུག
སྙན་ཐོ་དེའི་གྲུབ་དོན་ལ་གཞིགས་ན། རྒྱ་ནག་གི་བཀག་སྡོམ་འོག ཕྱི་ལོ་ ༢༠༡༩ ནས་ད་བར་ཨ་རིའི་གཞུང་འབྲེལ་སྐུ་ཚབ་མི་སྣ་གཅིག་ཀྱང་བོད་རང་སྐྱོང་ལྗོངས་ཟེར་བའི་ནང་དུ་བསྐྱོད་ཐུབ་མེད་པ་དང་། རྒྱལ་སྤྱིའི་གསར་འགོད་པ་རྣམས་ཀྱི་འགྲོ་འོང་ད་དུང་ཡང་མུ་མཐུད་བཀག་སྡོམ་འོག་བཞག་ཡོད་ཅིང་། ཕྱི་ལོ་ ༢༠༡༩ ལོར་རྒྱ་ནག་གིས་ཨ་རིའི་གསར་འགོད་པ་སྐོར་ཞིག་བོད་ནང་བསྐྱོད་དུ་བཅུག་ཡོད་ཀྱང་། རྒྱ་ནག་གཞུང་གིས་ཁོ་ཚོའི་རང་དབང་ལ་བཀག་སྡོམ་གྱིས་བོད་ནང་གི་གནས་སྟངས་བརྒྱུད་བསྒྲགས་བྱེད་མི་ཆོག་པར་བཟོས་ཁར། ཨ་རིའི་གསར་འགོད་པ་དེ་དག་ལ་རྒྱ་རིགས་རྣམས་དང་ཐུག་འཕྲད་ཀྱིས་བཅར་འདྲི་བྱེད་པའི་གོ་སྐབས་ཀྱང་བཀག་འགོག་བྱས་ཡོད་འདུག
དེ་བཞིན། ཨ་རིའི་མི་སེར་ཡིན་པའི་བོད་མི་རྣམས་ལ་དམིགས་བསལ་གྱིས་ཐོངས་མཆན་ཞུ་སྐབས་སོགས་སུ་དམ་དྲག་ཤུགས་ཆེན་བྱེད་བཞིན་ཡོད་ཅིང་། ཁོ་ཚོ་བོད་དུ་བསྐྱོད་སྐབས་འཐབ་ཕྱོགས་གཅིག་གྱུར་ཁང་དུ་འབོད་འགུག་གིས་འཇིགས་སྐུལ་བྱེད་པ་དང་། ཁ་པར་ནང་རྗེས་འདེད་གཏོང་བྱེད་ཀྱི་མཉེན་ཆས་སོགས་ཕབ་ལེན་བྱེད་དུ་འཇུག་གི་ཡོད་པའང་གསལ་བ་མ་ཟད། ཨ་རིའི་ནང་ཡོད་པའི་བོད་མི་ཁག་ཅིག་གིས་རང་ཉིད་ཀྱི་ཕ་ཡུལ་དུ་ཡོད་པའི་ཕ་མ་དང་སྤུན་མཆེད་དང་གཉེན་ཉེ་སོགས་ལ་གནོད་སྐྱོན་མི་འབྱུང་བའི་ཕྱིར་དུ་རང་རང་གི་འགྲོ་འདུག་སྤྱོད་གསུམ་ལའང་ཚོད་འཛིན་བྱས་ནས་འདུག་དགོས་བྱུང་ཡོད་སྐོར་སོགས་ཀྱི་གནས་ཚུལ་སྤེལ་འདུག
ཨ་རིའི་གཞུང་གིས་ཕྱི་ལོ་ ༢༠༡༨ ལོར་བོད་ནང་འགྲོ་འོང་འདྲ་མཉམ་དགོས་པའི་ཁྲིམས་འཆར་ཞིག་གཏན་འབེབ་བྱས་ཏེ། ཨ་རིའི་གཞུང་འབྲེལ་སྐུ་ཚབ་མི་སྣ་དང་རང་དབང་ཅན་གྱི་སྡེ་ཚན་གསར་འགོད་པ་སོགས་བོད་ནང་བསྐྱོད་དུ་བཅུག་སྟེ་བོད་ནང་གི་དངོས་ཡོད་གནས་སྟངས་ལ་རྒྱུས་ལོན་བྱེད་དགོས་པའི་དགོས་འདུན་བཏོན་ཡོད་ཀྱང་། ད་སྔ་བར་རྒྱ་ནག་གཞུང་གིས་བོད་ནང་རྒྱལ་སྤྱིའི་རང་བཞིན་གྱི་སྐུ་ཚབ་མི་སྣ་གདན་ཞུ་བྱས་མེད་ཁར། བོད་ནང་རྒྱ་བསྒྱུར་གྱི་སྲིད་ཇུས་མང་དག་ཅིག་ལག་བསྟར་བྱས་དང་བྱེད་བཞིན་པ་རེད་ལ། ཕྱི་ལོ་ ༢༠༢༤ ལོའི་ཨ་རིའི་རང་དབང་ཁང་པས་ཕྱི་ལོ་ ༢༠༢༣ ལོར་བོད་དེ་འཛམ་གླིང་གི་རང་དབང་ཆེས་སྡུག་ཤོས་ཀྱི་ས་ཁུལ་ཡིན་པ་གསལ་སྟོན་བྱས་ཡོད།
གསར་འགོད་པ། སྐལ་བཟང་སྦྱིན་པ།
