རྒྱ་གར་གྱི་ཚོང་འབྲེལ་བ་རྣམས་ཀྱིས་རྒྱ་ནག་པེ་ཅིན་གཞུང་གིས་ས་མཚམས་ཀྱི་ཚོང་འབྲེལ་སླར་ཡང་སྒོ་འབྱེད་དགོས་པའི་འབོད་སྐུལ་ཞུས་འདུག
ཉེ་ལམ་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཕྱི་ལོ་ ༢༠༡༩ ལོར་ཏོག་དབྱིབས་གཉན་རིམས་ཁྱབ་གདལ་ཤུགས་ཆེན་འགྲོ་བཞིན་ཡོད་པར་བརྟེན། རྒྱ་ནག་གཞུང་གིས་འཕགས་བོད་གཉིས་ཀྱི་ཚོང་ལམ་ལི་པུ་ལེག་ (Lipulekh pass) སྒོ་བརྒྱབ་ཡོད་པ་མ་ཟད། རྒྱ་ནག་ནང་ཡོད་པའི་རྒྱ་གར་གྱི་ཚོང་པ་རྣམས་བཙན་གྱིས་ཕྱིར་རྒྱ་གར་དུ་བཏང་ཡོད་འདུག
ཏོག་དབྱིབས་གཉན་རིམས་རྗེས་ནས་ད་བར་ཚོང་ལམ་སྒོ་བརྒྱབ་པའི་རྐྱེན་གྱིས་ཚོང་པའི་འཚོ་གནས་ལ་དཀའ་ངལ་འཕྲད་བཞིན་ཡོད་པར་བརྟེན། རིམ་པས་རྒྱ་ནག་དང་བལ་ཡུལ་བར་གྱི་ས་མཚམས་ཚོང་ལམ་ ༡༤ ཙམ་སྒོ་ཕྱེས་ཡོད་ཀྱང་། རྒྱ་གར་དང་རྒྱ་ནག་གཉིས་ཀྱི་ཚོང་ལམ་སྒོ་བརྒྱབ་ནས་མི་ལོ་ལྔ་ཕྱིན་ཡོད་ཀྱང་། ད་བར་རྒྱ་ནག་གཞུང་གིས་ཚོང་ལམ་སྒོ་ཕྱེས་མེད་པར་བརྟེན། རྒྱ་གར་གྱི་ཚོང་པ་དང་བལ་ཡུལ་གྱི་ཚོང་པ་མང་པོ་ཞིག་གིས་ཚོང་དོན་གཉེར་མ་ཐུབ་པའི་རྐྱེན་གྱིས་ས་གནས་མི་མང་གི་དཔལ་འབྱོར་ལ་དོ་ཕོག་ཤུགས་ཆེན་ཐེབས་ཀྱི་ཡོད་པས། ཚོང་ལམ་དེ་བསྐྱར་དུ་སྒོ་འབྱེད་དགོས་པའི་འབོད་སྐུལ་ཞུ་བཞིན་འདུག
དེ་འབྲེལ་འཕགས་བོད་ས་མཚམས་ཀྱི་ཚོང་འབྲེལ་ཚོགས་པའི་ཚོགས་གཙོ་ཇི་ཝན་སིང་ (Jeewan Singh Rongkali) གིས། ད་བར་རྒྱ་གར་དབུས་གཞུང་ལ་རྒྱ་གར་དང་རྒྱ་ནག་གི་ས་མཚམས་ཚོང་ལམ་སྒོ་འབྱེད་དགོས་པའི་སྐོར་ལ་གྲོས་མོལ་བྱ་དགོས་པའི་འབོད་སྐུལ་གྱི་ཡི་གེ་ཐེངས་ ༢༢ བཏང་ཡོད་ཀྱང་། ད་བར་རྒྱ་ནག་གཞུང་གིས་ལན་འདེབས་གང་ཡང་སྤྲད་མེད་སྐོར་དང་། ཕྱི་ལོ་ ༢༠༡༩ ལོར་ཚོང་ལམ་སྒོ་བརྒྱབ་པའི་རྐྱེན་གྱིས་རྒྱ་གར་གྱི་གདོད་མའི་ཚོང་པ་ ༤༥༠ ལྷག་གི་ཅ་དངོས་རྣམས་རྒྱ་ནག་ནང་ལྷག་ཡོད་པ་དང་། ཅ་དངོས་དེ་དག་གི་གནས་སྟངས་གང་འདྲ་ཡོད་མེད་ཤེས་རྟོགས་གང་ཡང་མེད་སྐོར་སོགས་བརྗོད་འདུག
ད་ལྟའི་ཆར་བོད་དང་རྒྱ་གར་དབར་ལ་སྐམ་སའི་ཚོང་ལམ་གསུམ་ཡོད་པའི་ཁྲོད་ནས། ཕྱི་ལོ་ ༡༩༦༢ ལོའི་རྒྱ་དཀར་ནག་གི་དམག་འཁྲུག་རྗེས་ཆེས་ཐོག་མར་ཕྱེས་པའི་ཚོང་ལམ་དེ་ནི། ཕྱི་ལོ་ ༡༩༩༢ ལོར་བསྐྱར་གསོ་བྱུང་བའི་བོད་མངའ་རིས་སྤུ་ཧྲེང་རྫོང་དང་རྒྱ་གར་གྱི་བྱང་ཕྱོགས་ཨུ་ཏ་ར་ཁན་ཌི་ (Uttarakhand) མངའ་སྡེའི་དྷར་ཅུ་ལ་ (Darchula) རྫོང་གི་ས་མཚམས་སུ་ཆགས་པའི་ལི་པུ་ལེག་ (Lipulekh) ཅེས་པ་དེ་ཡིན་ཞིང་། དེ་ནི་གནའ་སྔ་མོ་ནས་ཚོང་ལམ་ཙམ་དུ་མ་ཟད་རྒྱ་གར་གྱི་ཧིན་དྷུའི་ཆོས་ལུགས་རྗེས་འབྲང་བ་རྣམས་གངས་རིན་པོ་ཆེར་གནས་མཇལ་དུ་སྐྱོད་པའི་ལམ་བུ་གཙོ་བོ་ཞིག་ཡིན་པ་རེད། ཚོང་ལམ་གཉིས་པ་ནི་སྲིབ་སྐྱིད་ལའི་ཚོང་ལམ་ (Shipki La) དེ་ཕྱི་ལོ་ ༡༩༩༤ ལོར་བསྐྱར་གསོ་བྱུང་བ་དང་། ཕྱི་ལོ་ ༢༠༡༩ ལོར་ཏོག་དབྱིབས་གཉན་རིམས་རྐྱེན་གྱིས་གནས་སྐབས་ཚོང་ལམ་སྒོ་བརྒྱབ་ནས་ ༢༠༢༣ ལར་སླར་ཡང་སྒོ་ཕྱེས་འདུག གསུམ་པ་ནི་ལོ་ངོ་ ༤༤ རིང་སྒོ་བརྒྱབ་རྗེས་མཐར་ཕྱི་ལོ་ ༢༠༠༦ ལོར་བསྐྱར་གསོ་བྱས་པའི་རྒྱ་གར་གྱི་མངའ་སྡེ་འབྲས་ལྗོངས་དང་བོད་ཀྱི་གྲོ་མོ་དང་ས་འབྲེལ་ཡིན་པའི་རྣ་ཐོས་ལ་ཡིན་ཞིང་། ཕྱི་ལོ་ ༢༠༡༥ ལོའི་ཟླ་ ༦ བར་རྣ་ཐོས་ལ་དེ་ཉིད་ཡུལ་སྐོར་སྤྲོ་འཆམ་པའི་ས་ཚིགས་ཤིག་དང་། རྒྱ་གར་གྱི་གངས་རིན་པོ་ཆེ་གནས་མཇལ་བ་རྣམས་ཀྱི་བགྲོད་ལམ་དུའང་གཏན་འབེབ་བྱས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
