༧སྐྱབས་རྗེ་ཟམ་གདོང་རིན་པོ་ཆེ་མཆོག་ནས་ཉོན་མོངས་བ་མེད་པའི་སེམས་གཙང་མ་བཟོས་པའི་ཐབས་ཤེས་བྱས་པར་ཆོས་བྱས་ཟེར་གྱི་ཡོད་སྐོར་བཀའ་སློབ་བསྩལ།
ཟླ་འདིའི་ཕྱི་ཚེས་ ༡༤ ནས་ ༢༠ བར་ཉིན་གྲངས་དྲུག་རིང་ལ་དྭགས་ས་ཕུད་མངའ་རིས་ནང་ཆོས་རིག་ལམ་སློབ་གཉེར་ཁང་གི་འཇམ་དགོན་བཤད་སྒྲུབ་ཐེག་ཆེན་གླིང་དགོན་པ་རུ། ༧སྐྱབས་རྗེ་ཟམ་གདོང་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ནས་ལ་དྭགས་སེར་སྐྱ་མི་མང་དང་གཞོན་སྐྱེས་སློབ་ཕྲུག་རྣམས་ལ་བྱང་ཆུབ་ལམ་གྱི་རིམ་པར་ཤར་སྒོམ་བྱེད་ཚུལ་གྱི་བཀའ་ཆོས་གནང་གི་འདུག
༧སྐྱབས་རྗེ་ཟམ་གདོང་རིན་པོ་ཆེ་མཆོག་གིས། ལོ་སྔོན་མ་ནས་ལ་དྭགས་ནང་ཆོས་རིག་ལམ་སློབ་གཉེར་ཁང་གིས་རྒྱལ་མཆོག་ལྔ་བ་ཆེན་པོས་མཛད་པའི་ལམ་རིམ་ཁྲིད་ཆེན་བརྒྱད་ལས་གྲགས་ཆེ་བའི་འཇམ་དཔལ་ཞལ་ལུང་གི་འཆད་ཁྲིད་དགོས་ཀྱི་འདུག་གསུངས་ཡོད་ཀྱང་། དེ་ལ་དུས་ཚོད་མང་པོ་ཞིག་དགོས་ཀྱི་འདུག་པས་ད་ལོ་དུས་ཚོད་ཀྱིས་ལྕོགས་མ་བྱུང་། ལོ་ཁ་ཤས་ཀྱི་སྔོན་ལ་ངས་ལམ་རིམ་གྱི་དོན་ཆ་ཚང་བསྡུས་པའི་ལམ་རིམ་ཤར་སྒོམ་བྱེད་ཚུལ་བཤད་བཞག་པ་ཞིག་ཡོད། རྗེས་སུ་དོན་གཉེར་ཅན་ཁ་ཤས་ཀྱིས་ཡིག་ཐོག་ཏུ་ཕབ་སྟེ་དེབ་པར་སྐྲུན་བྱས་ཡོད། སྤྱིར་བཏང་བོད་ཀྱི་སྐད་ཡིག་ནང་ཁ་ནས་བཤད་པའི་སྐད་དང་ཡིག་ཐོག་ཏུ་བྲིས་པའི་སྐད་གཉིས་མི་འདྲ་བ་རེད། ངག་ཐོག་ནས་ཡོང་བའི་ཚིག་དེ་སྟབས་བདེ་བོ་མེད་པས། ནམ་རྒྱུན་ངས་ངག་ནས་བཤད་པ་ཡིག་ཐོག་ཏུ་ཕབ་པ་དེ་འགྲེལ་བ་ཞེ་དྲགས་བྱེད་ཀྱི་མེད། དེས་བོད་སྐད་ཡིག་གི་བརྡ་སྤྲོད་གཞུང་ལུགས་ཉམས་པ་དང་སྐྱོན་རྒྱག་པའི་ཉེན་ཁ་ཡོད། ཁ་ནས་བཤད་བཞག་པ་ཡིག་ཐོག་ཏུ་ཕབ་པའི་སྐབས་སུ་ཕལ་ཆེར་གང་ལབ་པ་འབྲི་དགོས་པའི་སྲོལ་ཞིག་ཡོད། བར་ལམ་ཞིག་ནས་ཡིག་ཐོག་ཏུ་ཕབ་མཁན་མང་པོ་ཞིག་གིས་དོ་སྣང་བྱས་ཏེ། ཡིག་ཐོག་ཏུ་བཀོད་མི་རུང་བའི་ཚིག་རྣམས་བསལ་ཏེ་འགྲོ་བཞིན་འདུག ད་ལྟ་ང་ཚོས་འཆད་ཉན་བྱེད་སའི་གཞུང་འདི་ཡང་ངག་གི་སྐད་ཡིན་ཙང་། ཡིག་སྐད་དང་མ་མཐུན་པའི་ཚིག་གང་འཚམ་ཡོང་སྲིད་པ་རེད་དེ། བརྡ་སྤྲོད་ཀྱི་གཞུང་དང་ཧ་ཅང་འགལ་བ་ཆེན་པོ་ཞིག་མཐོང་མ་སོང་ལ། ཉིན་ལྔའི་རིང་གཞུང་འདིའི་ལུང་དང་སྦྲགས་ནས་འཆད་ཁྲིད་མདོར་བསྡུས་ཤིག་བྱ་རྒྱུ་ཡིན།
ཉིན་ལྔའི་རིང་སྐྱེ་བོ་གསུམ་གྱི་ལམ་གྱི་རིམ་པ་ཆ་ཚང་བཤད་ཟེར་བ་དེ། གཅིག་བྱས་ན་ང་ཚོ་ཏོག་ཙམ་ཧམ་པ་ཚ་བའི་སྲོལ་ཞིག་ཆགས་ཀྱང་འབད་རྩོལ་ཞུ་རྒྱུ་ཡིན། དེང་རབས་ཀྱི་སྤྱི་ཚོགས་ནང་དུ་མི་ཚང་མས་དུས་ཚོད་དེ་གལ་ཆེ་ཤོས་སུ་བརྩི་བ་ཞིག་ཆགས་ཡོད་དུས། དུས་ཚོད་ཐུང་ཐུང་ཞིག་གི་ནང་དུ་གཞུང་ཆེན་མོ་ཞིག་འཆད་ཉན་བྱེད་པའི་འབད་རྩོལ་ཞུ་བཞིན་ཡོད། སྔོན་བྱུང་གི་བླ་མ་དམ་པའི་འཆར་གཞི་བཞིན་ལམ་རིམ་འཆད་ཉན་བྱེད་སྐབས། རྒྱུན་དུ་མཆོད་བསྟོད་ཀྱི་ཐོག་མར་ཆོ་ག་ཕྱག་ལེན་སོགས་མང་པོ་ཡོད་ཀྱང་། དུས་ཚོད་ཀྱིས་ལྕོགས་ཀྱི་མེད་པར་མདོར་བསྡུས་ཞུ་རྒྱུ་ཡིན། ཞེས་གསུངས་སོང་།
ཡང་ཟམ་གདོང་རིན་པོ་ཆེ་མཆོག་གིས། ཆོས་ཟེར་བ་དེ་བཅོས་པའི་དོན་རེད། ག་རེ་བཅོས་ཀྱི་ཡོད་ཟེར་ན་སེམས་དེ་བཅོས་ཀྱི་ཡོད་པ་རེད། སེམས་དེ་གང་འདྲ་བཅོས་ཀྱི་ཡོད་ཟེར་ན་འདོད་ཆགས་དང་།ཞེ་སྡང་སོགས་ཉོན་མོངས་བའི་གཞན་དབང་དུ་སོང་བའི་སེམས་དེ། ཉོན་མོངས་བ་མེད་པའི་སེམས་གཙང་མ་བཟོས་པའི་ཐབས་ཤེས་བྱས་པར་ཆོས་བྱས་ཟེར་བ་རེད། སེམས་བཅོས་པར་སྔགས་བགྲངས་པ་དང་། ཕྱག་འཚལ་བ། སྐོར་བ་རྒྱག་པ་སོགས་ཀྱིས་བསོད་ནམས་བསགས་པར་བརྟེན་ནས་ཕན་ཐོགས་ཕྲན་བུ་འབྱུང་སྲིད་ཀྱང་། བསོད་ནམས་དེའི་ཐད་ཀར་སེམས་ལ་བྱ་བ་བྱེད་ཀྱི་མ་རེད། སེམས་ཀྱི་ཐད་ཀར་བྱ་བ་གང་འདྲ་བྱེད་དགོས་ཟེར་ན་སོ་སོའི་དངོས་པོའི་དོན་ལ་བསམ་བློ་བཏང་སྟེ། སེམས་དེ་ཉོན་མོངས་བའི་ཕྱོགས་ནས་བཅོས་དགོས་པ་མ་གཏོགས། བསམ་བློ་མ་བཏང་ནས་བཅོས་རྒྱུ་གང་ཡང་ཡོད་པ་མ་རེད། ཅེས་གསུངས་སོང་།
དེ་བཞིན་ཟམ་གདོང་རིན་པོ་ཆེ་མཆོག་གིས། བྱང་ཆུབ་ལམ་གྱི་རིམ་པ་ཞེས་པ་སངས་རྒྱས་ཀྱིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པའི་ནང་སྐྱེ་བོ་གསུམ་གྱི་ལམ་གྱི་རིམ་པ་གང་རུང་སྟོན་གྱི་ཡོད་ལ། ཕྱིས་སུ་སངས་རྒྱས་ཀྱིས་སྡེ་སྣོད་གསུམ་དང་། རྒྱུད་སྡེ་བཞི་ལ་སོགས་ནས་གསུངས་བའི་ལམ་གྱི་རིམ་པ་རྒྱ་ཆེ་བ་དག་ལ་གང་ཟག་གཅིག་གིས་གདན་ཐོག་གཅིག་ཏུ་ཉམས་སུ་ལེན་པའི་གོ་བ་ལེན་པ་ཁག་པོ་ཆགས་པས། ཇོ་བོ་རྗེ་དཔལ་ལྡན་ཨ་ཏི་ཤ་བོད་དུ་བསྟན་པ་བསྐྱར་གསོ་བྱེད་ཆེད་གདན་འདྲེན་ཞུ་སྐབས། ལྷ་བླ་མ་བྱང་ཆུབ་འོད་ཀྱིས་ལམ་གྱི་རིམ་པ་ཆ་ཚང་བའི་གཞུང་ཞིག་བརྩམས་རོགས་ཞུས་པར་བརྟེན། ཇོ་བོ་རྗེས་བྱང་ཆུབ་ལམ་སྒྲོན་བརྩམས་པ་རེད། སྡེ་སྣོད་གསུམ་དང་རྒྱུད་སྡེ་བཞི་ནས་བཤད་པའི་ལམ་གྱི་རིམ་པ་དེ། གང་ཟག་གཅིག་གིས་གདན་ཐོག་གཅིག་ནས་ཉམས་སུ་ལེན་པའི་ཚུལ་མདོར་བསྟན་པ་ཞིག་རེད། ད་ལྟའི་ཆར་བོད་བརྒྱུད་ནང་བསྟན་ཁྲོད་བྱང་ཆུབ་ལམ་རིམ་གྱི་འཆད་ཉན་བྱེད་པར་ཐུན་མོང་མ་ཡིན་པའི་ལམ་སྲོལ་དར་ཡོད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
