རྒྱ་གར་གྱི་སྲིད་བློན་མུ་དྷི་མཆོག་གིས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་དང་ཐུག་འཕྲད་ཀྱིས་རྒྱ་གར་དང་ཨ་རིའི་བར་གྱི་གོ་ོལའི་མཉམ་འབྲེལ་མདུན་སྐྱོད་བྱེད་བཞིན་པར་ཡི་རངས་གནང་འདུག
རྒྱ་གར་གྱི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་གར་གྱི་རྒྱལ་ས་ལྡི་ལི་རུ་རྒྱ་གར་གྱི་སྲིད་བློན་མུ་དྷི་མཆོག་གིས་ཨ་རིའི་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་མའེ་ཁེལ་ (Michael McCaul) ལགས་ཀྱིས་སྣེ་འཁྲིད་ཅིང་། གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ (Nancy Pelosi) ལགས་དབུས་པའི་སྐུ་ཚབ་ཚོགས་ཆུང་དེར་ཐུག་འཕྲད་གནང་ཡོད་པ་དང་། སྐབས་དེར་རྒྱ་གར་གྱི་ཕྱི་སྲིད་བློན་ཆེན་ཇའེ་ཤན་ཁར་ལགས་དང་ཕྱི་སྲིད་དྲུང་ཆེ་ཝི་ན་མོ་ཧན་ལགས་གཉིས་ཀྱང་ལྷན་དུ་ཡོད་འདུག
ཐེངས་འདིའི་ཐུག་འཕྲད་ཀྱི་སྐོར་ལ་སྲིད་བློན་མུ་དྷི་མཆོག་གིས་རང་ཉིད་ཀྱི་ X སྤྱི་ཚོགས་བརྒྱུད་ལམ་དུ། སྐུ་ཞབས་མའེ་ཁེལ་ལགས་ཀྱིས་སྣེ་འཁྲིད་པའི་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་མི་གྲོགས་པོ་ཚོར་ཐུག་འཕྲད་བགྱིས་ཏེ་བསམ་ཚུལ་བརྗེ་རེས་བྱ་རྒྱུ་བྱུང་། ཨ་རིའི་གྲོས་ཚོགས་གོང་འོག་གཉིས་ནས་ཨ་རི་དང་རྒྱ་གར་གཉིས་ཀྱི་གོ་ལའི་ཐབས་ཇུས་ཀྱི་མཉམ་འབྲེལ་ལ་རྒྱབ་སྐྱོར་བྱས་ཏེ་མདུན་སྐྱོད་བྱེད་བཞིན་པར་ཧ་ཅང་གལ་ཆེན་དུ་བརྩི་བཞིན་ཡོད། ཅེས་བརྗོད་འདུག་ལ། རྒྱ་གར་ཕྱི་སྲིད་ལྷན་ཁང་གིས། ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པར་ཐུག་འཕྲད་བྱ་རྒྱུ་བྱུང་བ་ཧ་ཅང་དགའ་པོ་བྱུང་། ཁོང་ཚོས་རྒྱ་གར་དང་ཨ་རིའི་མཉམ་འབྲེལ་སྲིད་ཇུས་ལ་མུ་མཐུད་རྒྱབ་སྐྱོར་བརྟན་པོ་བྱེད་བཞིན་པར་ཡི་རངས་ཞུ་ཡི་ཡོད། ཅེས་བརྗོད་འདུག
ཟླ་འདིའི་ཕྱི་ཚེས་ ༡༩ ཉིན་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་གིས་རྒྱ་ནག་ནས་རྒོལ་གཏམ་བསྒྲགས་མིན་ལ་མ་ལྟོས་པར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཏེ་གྲོས་ཚོགས་གོང་འོག་གཉིས་ནས་གཏན་འབེབ་གནང་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སྤྱན་འབུལ་ཞུས་ཡོད་ལ། ཉིན་དེར་བོད་མིའི་སྒྲིག་འཛུགས་ནས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་དེར་ཕེབས་བསུའི་ཆེ་བསྟོད་སླད་གཞུང་འབྲེལ་མཛད་སྒོ་ཞིག་ཚོགས་པའི་སྟེང་ཨ་རིའི་གྲོས་ཚོགས་འཐུས་མི་ཡོངས་ནས་ཁ་གཅིག་གྲགས་ཀྱིས་ཁོང་ཚོས་མུ་མཐུད་བོད་དོན་ལ་རྒྱབ་སྐྱོར་བྱ་རྒྱུ་ཡིན་པ་དང་རྒྱ་ནག་གཞུང་ནས་ཞི་བའི་ལམ་ནས་བོད་རྒྱའི་དཀའ་རྙོག་སེལ་དགོས་པའི་གཏམ་བཤད་གནང་ཡོད།
ཕྱི་ཚེས་ ༡༨ ཉིན་ཨ་རིའི་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་མའེ་ཁེལ་ (Michael McCaul) ལགས་ཀྱིས་སྣེ་འཁྲིད་འོག་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ (Nancy Pelosi) ལགས་དབུས་པའི་སྐུ་ཚབ་ཚོགས་ཆུང་དེ་བཞུགས་སྒར་དྷ་སར་ཕེབས་འབྱོར་བྱུང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་བོད་མིའི་སྒྲིག་འཛུགས་ཀྱི་ལས་བྱེད་རྣམ་པ་དང་། གཞུང་དང་གཞུང་ཁོངས་མིན་པའི་ཚོགས་སྡེ་ཁག དེ་བཞིན་མི་མང་དང་སློབ་ཕྲུག་བཅས་ཀྱིས་དགའ་དགའ་སྤྲོ་སྤྲོའི་ངང་ནས་ཕེབས་བསུ་ཞུས། ཉིན་རྒྱབ་ཏུ་ཚོགས་ཆུང་གིས་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་བོད་མི་མང་སྤྱི་འཐུས་ལྷན་ཁང་དང་བོད་ཀྱི་འགྲེམས་སྟོན་ཁང་སོགས་སུ་འཚམས་གཟིགས་གནང་ཡོད།
གསར་འགོད་པ། སྐལ་བཟང་སྦྱིན་པ།
