རྒྱ་ནག་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ལུགས་ལག་བསྟར་བྱས་ཏེ་ཡུལ་དེའི་གསར་འགོད་རང་དབང་ཇེ་སྡུག་ཏུ་ཕྱིན་ནས་ཉུང་མཐར་གསར་འགོད་པ་ ༩༠༠ ཡི་ལས་ཀ་ཤོར།
ཉེ་སྔོན་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་སྙན་ཐོ་ཞིག་བཏོན་པའི་ནང་། ཕྱི་ལོ་ ༢༠༢༠ ལོ་ནས་བཟུང་རྒྱ་ནག་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ལུགས་ལག་བསྟར་བྱེད་མགོ་བཙུགས་ཏེ། ད་བར་ཉུང་མཐར་གསར་འགོད་པ་ ༩༠༠ ཙམ་གྱི་ལས་ཀ་ཤོར་ཡོད་འདུག་ལ། གསར་འགོད་པ་བརྒྱ་ཕྲག་ཁ་ཤས་ཕྱིའི་རྒྱལ་ཁབ་ཏུ་ཕྱིན་ནས་དབྱིན་ཡུལ་དང་ཐའེ་ཝན་རྒྱལ་ཁབ་ཏུ་གསར་ཁང་ ༡༠ ཙམ་གསར་འཛུགས་བྱས་ཡོད་འདུག
ཐའེ་ཝན་དུ་ཡོད་པའི་ཧྥོ་ཊོན་གསར་ཁང་ (Photon Media) གི་རྩོམ་སྒྲིག་པ་ཤར་ལི་ (Shirley Leung Ka Lai) ལགས་ཀྱིས། ཀུ་ཤུ་ཉིན་རེའི་ཚགས་པར་ཁང་གི་ལས་བྱེད་བརྒྱ་ཆ་ ༥ ད་ལྟའང་གསར་འགོད་པའི་ཕྱག་ལས་གནང་མུས་ཡིན་ཡང་། ལས་བྱེད་མང་ཆེ་བའི་ལས་ཀ་བརྗེ་དགོས་བྱུང་ཡོད་སྐོར་དང་། ཧོང་ཀོང་བཞག་སྟེ་རྒྱལ་ཁབ་གཞན་དུ་ཕྱིན་པར་སེམས་པ་སྐྱོ་ཡོད་ཀྱང་། རྒྱལ་ཁབ་གཞན་དུ་གསར་ཁང་གསར་འཛུགས་བྱས་པར་བློ་སྟོབས་སྦྱིན་ཡོད་སྐོར་སོགས་བརྗོད་འདུག
གསར་ཁང་ཁག་ནི་ཧོང་ཀོང་ནང་གི་གནས་ཚུལ་མཁོ་སྒྲུབ་ཀྱི་འབྱུང་ཁུངས་གལ་ཆེན་ཞིག་ཡིན་ཡང་། ཡུལ་དེའི་ནང་གི་གསར་འགོད་རང་དབང་ཇེ་སྡུག་ཏུ་འགྲོ་བཞིན་ཡོད་པ་མ་ཟད། རྒྱལ་མཚམས་ལས་བརྒལ་ནས་འགྲོ་བ་མིའི་ཐོབ་ཐང་རྡོག་རོལ་ཤུགས་ཆེན་གཏོང་བཞིན་ཡོད་འདུག དེར་བརྟེན། རྒྱལ་སྤྱིའི་ཚོགས་སྡེ་ཁག་གིས་བཙན་བྱོལ་དུ་ཡོད་པའི་གསར་འགོད་པ་དང་གསར་ཁང་ཁག་ལ་རྒྱབ་སྐྱོར་དང་། ཐོངས་མཆན་སྤྲོད་དགོས་པའི་འབོད་སྐུལ་ཞུ་བཞིན་འདུག
ཀུ་ཤུ་ཉིན་རེའི་ཚགས་པར་གྱི་སྤྱི་ཁྱབ་རྩོམ་སྒྲིག་པ་ཟུར་པ་ཁྲུང་ལི་ (Edward Ka Chung Li) ལགས་ཀྱིས། ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ལུགས་ལག་བསྟར་འོག ཡུལ་དེའི་གསར་ཁང་ཁག་དང་གསར་འགོད་པ་རྣམས་གནས་ཚུལ་ཁྱབ་སྤེལ་བྱས་པར་དམ་དྲག་ཤུགས་ཆེན་བྱེད་ཀྱི་ཡོད་འདུག ཕྱིའི་རྒྱལ་ཁབ་ཏུ་ཡོད་པའི་གསར་ཁང་ཁག་གིས་ཧོང་ཀོང་དང་འབྲེལ་བའི་གནས་ཚུལ་སྤེལ་བར་དམ་དྲག་མེད་སྐོར་སོགས་བརྗོད་འདུག
འདས་པའི་ལོ་བཞིའི་རིང་རྒྱ་ནག་གཞུང་གིས་རྒྱལ་ཁབ་བདེ་འཇགས་ཀྱི་ཁྲིམས་ལུགས་ལག་བསྟར་ལ་ཁ་གཡར་ནས་གསར་འགོད་པ་ཉུང་མཐར་ ༢༨ སྲོག་ཐོག་བཏང་བ་དང་། རང་དབང་དོན་གཉེར་བ་ ༡༠ ཙམ་ད་ལྟའང་བཙོན་ཁང་དུ་ཡོད་པ་རེད། ད་དུང་ཀུ་ཤུ་ཉིན་རེའི་ཚགས་པར་དང་། སི་ཊེན་ཌི་གསར་ཁང་ (Stand News) ཆེ་ཁག་གཉིས་སྒོ་བརྒྱབ་བཅུག་ཡོད་པ་མ་ཟད། ཀུ་ཤུ་ཉིན་རེའི་ཚགས་པར་གྱི་བདག་པོ་ཇི་མི་ལའེ་ (Jimmy Lai) དང་། སི་ཊེན་ཌི་གསར་ཁང་གི་གསར་འགོད་པ་རྒན་པ་དྲུག་འཛིན་བཟུང་བྱས་ཡོད་འདུག་ལ། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་སྐུ་ཚབ་ཚོགས་མི་ཧོང་ཀོང་དུ་བསྐྱོད་པར་བཀག་སྡོམ་བྱེད་བཞིན་ཡོད་འདུག
རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཕྱི་ལོ་ ༢༠༢༤ ལོའི་འཛམ་གླིང་གསར་འགོད་རང་དབང་གི་གྲངས་ཐོར་གཞིགས་ན། འཛམ་གླིང་རྒྱལ་ཁབ་ ༡༨༠ ནང་ནས་ཧོང་ཀོང་གི་གསར་འགོད་རང་དབང་དེ་ཨང་རིམ་ ༡༣༥ དང་རྒྱ་ནག་ཨང་རིམ་ ༡༧༢ ཡིན་འདུག
ཕྱི་ལོ་ ༢༠༢༣ ལོར་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཧོང་ཀོང་ཚུད་པའི་འཛམ་གླིང་རྒྱལ་ཁབ་ ༦༢ ནང་ཡོད་པའི་གསར་འགོད་པ་ ༤༦༠ ལ་དཔལ་འབྱོར་གྱི་མཐུན་རྐྱེན་སྦྱར་ཡོད་པ་དང་། རྒྱ་ནག་དང་ཧོང་ཀོང་སོགས་དང་འབྲེལ་བའི་གནས་ཚུལ་མཁོ་སྒྲུབ་ཡར་རྒྱས་གཏོང་སླད་ཉུང་མཐར་གསར་འགོད་པ་ ༨༩༠ ལ་དྲ་ལམ་བརྒྱུད་པ་དང་དངོས་སུ་ཐུག་སྟེ་སྦྱོང་བརྡར་སྤྲོད་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
