དོན་གྲུབ་རྒྱལ་པོ་ལགས་དང་བསྟན་འཛིན་ཆོས་དབྱིངས་ལགས་གཉིས་སུ་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་པའི་གཟེངས་རྟགས་ཐོབ་འདུག
དོན་གྲུབ་རྒྱལ་པོ་ལགས་དང་བསྟན་འཛིན་ཆོས་དབྱིངས་ལགས་གཉིས། པར་བོད་ཀྱི་དུས་བབ་ཀྱིས་བཟོ་སྒྲིག་བྱས།
ལོ་ལྟར་དབུས་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་གཉིས་ལ་སྲི་ཞུ་ལས་བྱེད་ཀྱི་གཟེངས་རྟགས་ཕུལ་སྲོལ་ཡོད་པ་ལྟར། དེ་རིང་ཕྱི་ཟླ་ ༧ ཚེས་ ༢ ཉིན་ཕྱི་ལོ་ ༢༠༢༣ ལོའི་བོད་མིའི་སྒྲིག་འཛུགས་སྲི་ཞུ་ལས་བྱེད་གཉིས་ལ་གཟེངས་རྟགས་ཐོབ་ཡོད་པའི་གསལ་བསྒྲགས་གནང་བ་ལྟར་ན། ད་ལྟ་ལྡེ་ར་ལྡུན་ས་གནས་མགོ་འཛིན་གྱི་ལས་གནས་གཉེར་མུས་ཡིན་པའི་ཟུང་འབྲེལ་དྲུང་ཆེ་དོན་གྲུབ་རྒྱལ་པོ་ལགས་དང་། ཀ་སྦུག་ས་གནས་མགོ་འཛིན་ལས་ཁུངས་ཀྱི་ལས་དྲུང་བསྟན་འཛིན་ཆོས་དབྱིངས་ལགས་གཉིས་ཡིན་འདུག་ལ། འདི་ལོའི་༧སྐུའི་འཁྲུངས་སྐར་ཉིན་གཟེངས་རྟགས་དེ་དབུལ་རྒྱུ་ཡིན་འདུག
འདས་ལོའི་བོད་མིའི་སྒྲིག་འཛུགས་ཀྱི་འགན་འཛིན་སྡེ་ཚན་གྱི་གཟེངས་རྟགས་དེ། ད་ལྟ་ལྡེ་ར་ལྡུན་ས་གནས་མགོ་འཛིན་གནང་མུས་ཡིན་པའི་དོན་གྲུབ་རྒྱལ་པོ་ལགས་ཀྱིས་ཕྱི་ལོ་ ༢༠༠༦ ཙམ་ནས་དཔལ་འབྱོར་ལས་ཁུངས་དང་། ཀ་སྦུག་ས་གནས་མགོ་འཛིན། རྡོར་གླིང་དང་བསུ་ན་མདའ་ས་གནས་མགོ་འཛིན་གཅིག་ལྕོགས་དང་། ལ་དྭགས་བྱང་ཐང་འབྲེལ་མཐུད་པ། སྦན་ད་ར་ནོར་རྒྱས་གླིང་བཅས་ཀྱི་ས་གནས་མགོ་འཛིན་གནང་ཡོད་པ་མ་ཟད། འདས་པའི་མི་ལོ་ ༡༤ ལྷག་གི་རིང་དབུས་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་སོགས་གཙིགས་ཆེན་དུ་བཟུང་སྲི་ཞུ་བསྒྲུབས་ཡོད་པ་མ་ཟད། ཀ་སྦུག་ས་གནས་མགོ་འཛིན་གནང་སྐབས་ཀྱང་ལས་གཞི་ལག་བསྟར་དང་། མཇུག་སྐྱོང་རིགས་འཐུས་ཤོར་མེད་པར་གནང་ཡོད་འདུག
བསྟན་འཛིན་ཆོས་དབྱིངས་ལགས་ཀྱིས་ཕྱི་ལོ་ ༢༠༡༦ ལོར་ཚོད་ལྟའི་རྒན་དྲུང་ཐོག་སྦན་ད་ར་ནོར་རྒྱས་གླིང་ས་གནས་མགོ་འཛིན་ལས་ཁུངས་སུ་ལས་ཁུར་ཞུས་ཏེ། རྩིས་པ་དང་། ད་ལྟ་ཀ་སྦུག་ས་གནས་མགོ་འཛིན་ལས་ཁུངས་སུ་ལས་ཁུར་ཞུ་མུས་ཡིན་འདུག་ལ། བོད་མིའི་སྒྲིག་འཛུགས་ཀྱི་དྲ་རྒྱའི་བཀོད་པའི་གནས་ཚུལ་ལྟར་ན། བསྟན་འཛིན་ཆོས་དབྱིངས་ལགས་ཀྱིས་ས་གནས་ཁག་ཏུ་ལས་ཁུར་ཞུས་སྐབས། ས་གནས་མགོ་འཛིན་སོགས་ཀྱིས་ཁོང་མོའི་ལས་དོན་གནང་ཕྱོགས་ཀྱི་ཐད་བསྔགས་བརྗོད་གནང་བཞིན་ཡོད་པ་མ་ཟད། ལས་ཡུན་རིང་རྩིས་པ་དང་། ལས་དྲུང་། ས་གནས་མགོ་འཛིན་གཅིག་ལྕོགས་ཀྱི་ལས་འགན་འཐུས་ཤོར་མེད་པ་ཞུས་དང་ཞུ་མུས་བརྟེན། ཕྱི་ལོ་ ༢༠༢༣ ལོའི་ལས་བྱའི་སྡེ་ཚན་གྱི་ལས་བྱེད་གཟེངས་རྟགས་དེ་ཁོང་མོར་གནང་གཏན་འཁེལ་ཡོད་སྐོར་སོགས་གསལ་འདུག
གསར་འགོད་པ་དཔལ་ལྡན་གྱིས་བོད་མིའི་སྒྲིག་འཛུགས་ཀྱི་དྲ་རྒྱ་ནས་བཏུས།
