རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐོག་རྒྱལ་ཁབ་ ༡༣ ནས་ཚོགས་ཞུགས་བྱས་འདུག  

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་དྭང་བླངས་བོད་དོན་ཞུ་གཏུག་ནང་གཞོན་སྐྱེས་མང་དག་གིས་ཆ་ཤས་བླངས་བར་བརྟེན་མ་འོངས་པར་གཞོན་སྐྱེས་འགན་འཁུར་མཁན་ཞིག་འདུག་བསམས་ནས་སེམས་པ་དགའ་བོ་བྱུང་སྐོར་གསུངས་སོང་།

དེ་རིང་ཕྱི་ཚེས་ ༣ ནས་ ༥ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག བཞུགས་སྒར་དྷ་རམ་ས་ལའི་ཉེ་འདབས་སུ་ཆགས་པའི་ཌི་པོ་ལོ་གསོལ་མགྲོན་ཁང་དུ། རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་གཉིས་པ་སྐོང་འཚོག་གནང་བཞིན་འདུག ཚོགས་འདུ་དབུ་འབྱེད་ཀྱི་མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་གཞོན་སྐྱེས་ཚོས་མཉམ་རུབ་ཀྱི་ཐོག་ནས་རྒྱལ་ཁབ་སོ་སོའི་ཆབ་སྲིད་ཀྱི་གནས་བབ་དང་བསྟུན། བོད་དོན་ཞུ་གཏུག་གང་ཐུབ་བྱ་རྒྱུ་དེ་ཧ་ཅང་གལ་ཆེན་པོ་ཡིན་སྐོར་སོགས་གསུངས་སོང་ལ། ཚོགས་ཆེན་དེའི་ཐོག་རྒྱལ་ཁབ་ ༡༣ ནས་ཚོགས་ཞུགས་བ་ཕོ་མོ་གྲངས་  ༡༠༥ ལྷག་གིས་མཉམ་ཞུགས་བྱས་འདུག

མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་ཕེབས་བསུའི་གསུང་བཤད་གནང་བའི་ནང་། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་མཛད་འགན་བཞེས་རྗེས། ཐོག་མར་ཡུ་རོབ་ཏུ་གཞུང་འབྲེལ་ཕྱོགས་ཕེབས་གནང་སྐབས། སུད་སིའི་རྒྱལ་ས་ཛུ་རིག་ཏུ་བོད་དོན་དྭང་བླངས་ཞུ་གཏུག་གི་ལས་འགུལ་དེ་དངོས་སུ་དབུས་འཛུགས་གནང་ཡོད་ཅིང་། བོད་རིགས་གཞོན་སྐྱེས་མང་དག་ཅིག་རྒྱ་བལ་འབྲུག་གསུམ་དང་། དེ་བཞིན་རྒྱལ་ཁབ་མང་དག་ཅིག་ཏུ་ཁ་འཐོར་ནས་ཡོད་ཀྱང་། བོད་པའི་མི་རབས་རིམ་གྱིས་བརྗེ་མུས་ཡིན་པ་དང་བསྟུན། བོད་ཀྱི་གཞོན་སྐྱེས་མི་རབས་གསར་པ་ཚོས་བོད་ཀྱི་རང་དབང་འཐབ་རྩོད་ཀྱི་ལམ་བུ་རུ་ཤར་སྐྱོད་སླད། སྐད་ཡིག་དང་། རིག་གཞུང་། བོད་དོན་སོགས་ཀྱི་ཐད་ལ་གོ་རྟོགས་སྤེལ་སླད་བོད་དོན་དྭང་བླངས་ཞུ་གཏུག་གི་ལས་འགུལ་འདི་མགོ་བརྩམས་པ་ཞིག་ཡིན་སྐོར་དང་། ད་ལྟ་བོད་ཀྱི་གཞོན་སྐྱེས་ཚོས་བོད་ཀྱི་སྤྱི་ཚོགས་འདྲ་མིན་ནང་འགན་ཁུར་ནས་བོད་དོན་ཞུ་གཏུག་སོགས་བགྱིས་པ་དེས། མ་འོངས་པར་བོད་ཀྱི་རྩ་དོན་དང་འཐབ་རྩོད་རྒྱུན་མ་ཆད་པར་བོད་པའི་སྤྱི་ཚོགས་ཀྱི་སྣེ་འཁྲིད་ཅིག་ཏུ་འགྱུར་བའི་རེ་བ་ཡོད་སྐོར་སོགས་གསུངས་སོང་། 

དེའི་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུ་འབྱེད་གསུང་བཤད་གནང་སྐབས། བོད་མི་རྣམས་ལ་ཆེ་མཐོང་དང་གཟི་བརྗིད་ལྡན་པ་ཞིག་ཡོང་གིན་ཡོད་པ་ནི་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ཉག་ཅིག་ལ་བརྟེན་ནས་བྱུང་བ་ཞིག་རེད་མ་གཏོགས། ང་རང་ཚོས་འཇོན་བཞག་པ་ཞིག་གང་ཡང་མེད། སྤྱིར་ང་ཚོའི་སྤྱི་ཚོགས་སུ་ལས་ཀ་ཞེ་དྲགས་བྱས་ཡིན་ལབ་མཁན་མང་པོ་ཞིག་ཡོད་རེད་དེ། དངོས་སུ་ལས་ཀ་བྱེད་མཁན་ག་ཚོད་ཙམ་ཞིག་ཡོད། ང་ཚོའི་སྤྱི་ཚོགས་ནང་རང་བཙན་དང་དབུ་མའི་ལྟ་བ་ག་རེ་ཁུར་ནའང་ཐོབ་ཐང་ཡོད་པ་རེད། དབུ་མའི་ལམ་དེ་དབུས་བོད་མིའི་སྒྲིག་འཛུགས་ཀྱི་ལངས་ཕྱོགས་རེད། དེ་བོད་མིའི་སྒྲིག་འཛུགས་ཀྱི་འགན་ཁུར་ནས་འགྲོ་ཡི་རེད། གཞུང་ཁོངས་མ་ཡིན་པའི་སྒྲིག་འཛུགས་དང་། གང་ཟག་སོགས་སུ་རང་བཙན་རྩོད་མཁན་ཡིན་ན་རྩོད་རྒྱུར་ཐོབ་ཐང་ཡོད་པ་རེད། གང་ཡིན་ཟེར་ན། ལོ་རྒྱུས་ཀྱི་ཐོག་ནས་བོད་དེ་རང་བཙན་རྒྱལ་ཁབ་ཅིག་ཡིན་པས། བོད་རང་བཙན་རྩོད་པའི་ཐོབ་ཐང་ཡོད་པ་རེད། དབུ་མ་ཡིན་ནའང་༧གོང་ས་རྒྱལ་བ་རིན་པོ་ཆེ་མཆོག་ནས་དངོས་ཡོད་ཀྱི་གནས་སྟངས་དང་། འཛམ་གླིང་གི་ཆབ་སྲིད་འགྱུར་འགྲོས། རྒྱ་ནག་གི་འགྱུར་འགྲོས་དང་བོད་ནང་གི་གནས་སྟངས་སོགས་མང་པོ་ཞིག་ལ་གཟིགས་ནས་བོད་ཆག་འཇིག་གི་དུས་དེར། བོད་ཀྱི་ཆོས་རིག་དང་། ངོ་བོ་གནས་པ་ཡིན་ན་འཛམ་གླིང་སྤྱི་ལ་ཕན་ཐོགས་ཡོད་པ་གཟིགས་གནང་བ་ཞིག་རེད།  ད་བར་༧གོང་ས་རྒྱལ་བ་རིན་པོ་ཆེ་མཆོག་སྐུ་རྐྱང་གིས་ཕྱག་གཉིས་མཐེ་བོང་བགྲེང་ནས་འཛམ་གླིང་དུ་ཕེབས་ཏེ། མི་ལོ་ ༦༥ རིང་བོད་པའི་འཐབ་རྩོད་མུ་མཐུད་དུ་གནས་ཐུབ་པ་དེ་༧རྒྱལ་བ་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་ཡོང་བ་ཡིན་པས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་མ་བརྗེད་པ་བྱ་རྒྱུ་དེ་ཧ་ཅང་གལ་ཆེན་པོ་རེད། ཅེས་གསུངས་སོང་། 

ཡང་སྲིད་སྐྱོང་མཆོག་གིས། ངས་ཕྱི་ལོ་ ༢༠༢༡ ཟླ་ ༡༡ ཚེས་ ༥ ཉིན་སུད་སི་ཛུ་རིག་ཏུ་བོད་དོན་དྭང་བླངས་ཞུ་གཏུག་བྱ་རྒྱུ་ཡིན་ཞེས་གསལ་བསྒྲགས་ཤིག་བྱས་ཡིན། ཡིན་ན་ཡང་། ང་ཚོའི་སྤྱི་ཚོགས་ནང་བསམ་བློ་གསར་པ་ག་རེ་ཡིན་ན་རེ་ཞིག་ཀླད་པའི་ནང་ཆུད་རྒྱུར་དཀའ་ལས་ཁག་པོ་ཞེ་དྲགས་ཡོད་པས། ལས་བྱེད་དང་སྒྲིག་འཛུགས་སོགས་ཀྱི་ཡིད་ཆེས་འཕེར་བ་བཟོ་དགོས་པས་ལོ་གཉིས་དང་ཕྱེད་ཀ་ལྷག་ཅིག་ཕྱིན་པ་རེད། ལོ་གཉིས་དང་ཕྱེད་ཀའི་རྗེས་ནས་ལྟ་དུས་གཞི་ནས་དྲོད་ཁོལ་ཡོང་བའི་ཟོལ་ཞིག་འདུག ལྷག་པར་ན་ནིང་བོད་དོན་དྭང་བླངས་ཞུ་གཏུག་གི་ཚོགས་ཆེན་དང་པོ་དེ་འཚོགས་པའི་སྐབས། སྤྱི་ཚོགས་ནང་ཕྱག་ལས་གནང་མཁན་དང་གསར་པ་མང་པོ་ཞིག་ཕེབས་ཡོད་པས། དེ་དག་ས་གནས་སོ་སོར་ཕེབས་རྗེས་བོད་དོན་དྭང་བླངས་ཞུ་གཏུག་གི་ལས་འགུལ་དེ་ཚ་ཚ་འུར་འུར་ཞིག་ཆགས་ཐུབ་ཡོད་རེད། རྒྱལ་ཁབ་སོ་སོའི་གནས་སྟངས་མི་འདྲ་བ་ཡོད་རེད་དེ། ཡུ་རོབ་ཀྱི་ཨོ་སི་ཊི་རི་ཡ་ནང་ཧུར་ཐག་འབད་ཐག་གནང་གི་འདུག ཡིན་ན་ཡང་། ལུང་པ་ཚང་མའི་གནས་སྟངས་མི་འདྲ་བ་རེད། དེ་བཞིན་ད་ལོ་ཨ་རིའི་བོད་དོན་ཞུ་གཏུག་ཉིན་ (Lobby day) ལ་མི་གྲངས་ཉིས་བརྒྱ་ལྷག་ཅིག་བསླེབས་ཡོད་པ་རེད། དེ་ནི་ང་ཚོའི་ལོ་རྒྱུས་ནང་བོད་དོན་ཞུ་གཏུག་ཁྲོད་མཉམ་ཞུགས་བྱས་པའི་མི་གྲངས་མང་ཤོས་ཆགས་ཡོད་ལ། དེའི་ནང་གཞོན་སྐྱེས་བདུན་བཅུ་བརྒྱད་ཅུ་ཞིག་ཡོད་པས། ང་ཚོས་རྒན་པ་ཚོས་དཀའ་ལས་བསྐྱོན་པ་དེར་མ་འོངས་པར་གཞོན་སྐྱེས་འགན་འཁུར་མཁན་ཞིག་འདུག་བསམས་ནས་སེམས་པ་དགའ་སོང་། ཞེས་གསུངས་སོང་།

མཇུག་ཏུ་སྲིད་སྐྱོང་མཆོག་གིས། བོད་དོན་དྭང་བླངས་ཞུ་གཏུག་ནི་བོད་མི་རྣམས་ཀྱི་ལྟ་བ་ལངས་ཕྱོགས་ལ་འབྲེལ་བ་གང་ཡང་མེད་པར། གཞོན་སྐྱེས་རྣམས་གཞི་གཅིག་ཏུ་བཏུས་ནས་ལྷན་གཅིག་ཏུ་མཉམ་རུབ་ཀྱི་ཐོག་ནས་བོད་དོན་ཞུ་གཏུག་བྱ་རྒྱུ་དང་། ད་བར་༧གོང་ས་རྒྱལ་བ་རིན་པོ་ཆེ་མཆོག་སྐུ་རྐྱང་གིས་བོད་དོན་ཐད་ཕྱག་ལས་གནང་ཡོད་པས། བོད་མི་ཚོས་མཉམ་རུབ་ཀྱིས་བོད་དོན་ཞུ་གཏུག་གནང་ན། མ་འོངས་པར་བོད་དོན་དྭང་བླངས་ཞུ་གཏུག་དེ། མི་མང་རང་བཞིན་ཅན་གྱི་ལས་འགུལ་ཞིག་ཏུ་བཟོ་ཐུབ་པའི་ཁར། བོད་ཀྱི་མ་འོངས་པའི་འཐབ་རྩོད་རྒྱུན་གནས་སླད་བོད་སྤྱི་པའི་རྩ་དོན་དང་སྒྲིག་འཛུགས་གོང་དུ་བཀུར་ནས་མི་སྒེར་གྱི་གནད་དོན་རྒྱབ་ལ་བཞག་སྟེ། མཉམ་རུབ་ཀྱི་འཐབ་རྩོད་བྱ་དགོས་སྐོར་སོགས་གསུངས་རྗེས། བོད་དོན་དྭང་བླངས་ཞུ་གཏུག་གི་ཚོགས་མི་ཁག་ཅིག་དང་དྲི་བ་དྲི་ལན་གནང་སོང་། 

དེ་རིང་བཞུགས་སྒར་ཁུལ་དུ་འཚོག་མུས་ཡིན་པའི་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་གྱི་ཉིན་དང་པོའི་ཐོག བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་མགོ་ཁྲིད་ཀྱི་ནུས་པ་སྐྱེས་སྲིང་སྐོར་གཏམ་བཤད་དང་། བོད་ཀྱི་རྩོད་རྙོག་འདུམ་སྒྲིག་ཁང་གི་འགན་འཛིན་གཞོན་པ་བསོད་ནམས་ལགས་ཀྱིས་མགོ་ཁྲིད་ཀྱི་ནུས་པ་ཡར་རྒྱས་གཏོང་ཕྱོགས་ཐད་ལ་ཟབ་སྦྱོང་སྤྲད་ཡོད་ཅིང་། སང་ཉིན་ཕྱི་ཚེས་ ༤ ཉིན་བཀའ་ཟུར་བསྟན་པ་ཚེ་རིང་མཆོག་དང་། ཁེ་ན་ཌའི་གྲོས་ཚོགས་འཐུས་མི་བུ་འཁྲིད་དཀར་པོ་ཆེ་ལགས་སོགས་ཀྱིས་གཏམ་བཤད་གནང་རྒྱུ་དང་། དེ་བཞིན་ཕྱི་ཚེས་ ༥ ཉིན་བོད་ཀྱི་ཆབ་སྲིད་བཙོན་ཟུར་རྣམ་མཁྱེན་སྐྱིད་ལགས་ཀྱི་དཀའ་སྡུག་གི་མི་ཚེ་སོགས་ཀྱི་སྐོར་ལ་གཏམ་བཤད་དང་རྒྱལ་སྤྱིའི་བོད་དོན་འབྲེལ་མཐུད་ཁང་གིས་ཟབ་སྦྱོང་སོགས་སྤྲད་རྒྱུ་ཡིན་འདུག 

འདས་ལོའི་ཕྱི་ཟླ་ ༧ ཚེས་ ༡༨ ནས་ ༢༠ བར་ཉིན་གྲངས་གསུམ་རིང་བཞུགས་སྒར་དྷ་སའི་ཉེ་འགྲམ་གྱི་ཌི་པོ་ལོ་(D’Polo)གསོལ་མགྲོན་ཁང་དུ་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་དང་པོ་དེ་འཚོགས་ཡོད་པའི་ཁྲོད། འཛམ་གླིང་རྒྱལ་ཁབ་ ༡༦ ལྷག་ནས་ཕེབས་པའི་གཞོན་སྐྱེས་ཚོགས་བཅར་བ་ཁྱོན་ ༡༠༠ ལྷག་མཉམ་ཞུགས་བྱས་ཏེ། སྐབས་བཅུ་དྲུག་པའི་བཀའ་ཤག་གི་ཕུགས་དམིགས་སྐོར་དང་། བོད་ཀྱི་ལེགས་བྱང་དང་བོད་མིའི་ངོ་བོ། བྱུང་རབས་ལོ་རྒྱུས་སྐོར། བོད་ཀྱི་ཆོས་དང་རིག་གཞུང་། མི་རིགས་ཀྱི་ངོ་བོའི་སྐོར།   ལོ་མང་རིང་རྒྱ་ནག་གཞུང་གིས་བོད་ཀྱི་དངོས་བྱུང་ལོ་རྒྱུས་རྫུན་བཟོ་དང་འཁྱོག་བཤད་བྱེད་པར་ཁུངས་འཁྱོལ་ཐབས་མེད་པའི་སྐོར་སོགས་ཀྱི་ཐད་ལ་གྲོས་བསྡུར་གནང་ཡོད་འདུག 

གསར་འགོད་པ། དཔལ་ལྡན། 

རྩོམ་སྒྲིག་བྱེད་མཁན། པདྨ་མཚོ།