རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་གཉིས་པའི་ཐོག་བཀའ་ཟུར་བསྟན་པ་ཚེ་རིང་ལགས་ཀྱིས་བོད་དོན་ཐོག་རིམ་བཞིན་ཉམས་ཆག་ཡོང་ཉེན་ཡོད་པའི་ཐད་ནུས་པ་རྒྱུན་སྐྱོང་བྱེད་པར་བསམ་བློ་གཏོང་རྒྱུ་གལ་ཆེན་ཡིན་སྐོར་བརྗོད་སོང་།
ཁ་སང་ཕྱི་ཚེས་ ༣ ནས་ཉིན་གྲངས་གསུམ་རིང་བཞུགས་སྒར་དྷ་རམ་ས་ལའི་ཉེ་འདབས་སུ་ཆགས་པའི་ཌི་པོ་ལོ་གསོལ་མགྲོན་ཁང་དུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་གཉིས་པ་འཚོག་བཞིན་ཡོད་པ་དང་། ཐེངས་འདིའི་ཚོགས་ཆེན་ཐོག་རྒྱལ་ཁབ་ ༡༣ ནས་ཚོགས་བཅར་བ་ ༡༠༥ ལྷག་གིས་མཉམ་ཞུགས་བྱས་ཡོད་ཅིང་། དེ་རིང་ཚོགས་ཆེན་གྱི་ཉིན་གཉིས་པའི་ཐོག་དགའ་ལྡན་ཕོ་བྲང་ཡིག་ཚང་གི་རྒྱ་གར་དང་ཨེ་ཤ་ཡའི་ངེས་སྟོན་པ་དང་བཀའ་ཟུར་བསྟན་པ་ཚེ་རིང་ལགས་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། སུད་སི་ཨེཌ་ཝིལ་ཨེམ་སིའི་གྲོང་སྡེའི་སྤྱི་ཁྱབ་པ་གངས་གཞོན་ཚང་རྣམ་རྒྱལ་ལགས། ཁེ་ན་ཌ་པཱག་ཌེལ་ས་གནས་གྲོས་ཚོགས་འཐུས་མི་བུ་འཁྲིད་ལ་དཀར་པོ་ཆེ་ལགས་བཅས་ཀྱིས་འཁྲུག་ཆ་དོད་པའི་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་ཁྲོད་ཀྱི་བོད་དོན་འཐབ་རྩོད་ཀྱི་ལས་འགུལ་སོགས་ཀྱི་སྐོར་ལ་གཏམ་བཤད་གནང་འདུག
སྐབས་དེར་བཀའ་ཟུར་བསྟན་པ་ཚེ་རིང་ལགས་ཀྱིས། བོད་དོན་གྱི་རྒྱབ་ལྗོངས་ནི་བདེན་པ་དང་དྲང་བོ་ཆགས་ཡོད་ཀྱང་། འཛམ་གླིང་ཐོག་བོད་དོན་ནི་ལོ་ངོ་ ༧༠ ཙམ་གྱི་རིང་གི་གནས་ཚུལ་རྙིང་བ་ཞིག་ཆགས་ཀྱི་ཡོད་པས། བོད་དོན་རྒྱབ་སྐྱོར་བ་རྣམས་ཀྱི་གནས་སྟངས་དང་། རྒྱལ་སྤྱིའི་ཐོག་བོད་དོན་མ་ཡིན་པའི་ཛ་དྲག་གི་གནས་ཚུལ་མང་པོ་ཞིག་འབྱུང་བཞིན་ཡོད་པ་དང་། བཙན་བྱོལ་དུའང་ལོ་ཇི་ཙམ་གནས་དགོས་བྱུང་ཚེ་བོད་ཀྱི་སྐད་ཡིག་དང་རིག་གཞུང་སོགས་ཉམས་ཆག་འགྲོ་བའི་ཉེན་ཁ་ཡང་ཡོད་ལ། བོད་ནང་གི་བོད་མི་རྣམས་ལ་སེམས་ཤུགས་ཅི་ཙམ་ཡོད་ཀྱང་། རྒྱ་གཞུང་གི་སྲིད་ཇུས་འོག་ནས་འཚར་ལོངས་བྱུང་བཞིན་ཡོད་པས། བོད་དོན་རིམ་བཞིན་ཉམས་ཆག་ཡོང་བའི་ཉེན་ཁ་ཡོད་པའི་ཐད། ང་ཚོའི་ནུས་པ་རྒྱུན་སྐྱོང་བྱེད་པར་བསམ་བློ་གཏོང་རྒྱུ་གལ་ཆེན་པོ་རེད། ཅེས་སོགས་བརྗོད་སོང་།
ཡང་ཁོང་གིས། རྒྱ་ནག་ལ་ཕྱི་ནས་ལྟ་དུས་སྟོབས་ཆེན་པོ་མཐོང་གི་ཡོད་ཀྱང་། མངོན་གསལ་དོད་པོ་མིན་པའི་ཐོག་རྒྱ་ནག་ནང་འགྱུར་བ་ཐེབས་བཞིན་ཡོད་པ་ཞིག་རེད། ཉེ་ཆར་རྒྱ་ནག་གི་དཔོན་རིགས་མང་པོ་ཞིག་ལྐོག་ཟ་རུལ་སུངས་དང་འབྲེལ་ནས་ཕྱིར་ཕུད་བཏང་ཡོད་ཅིང་། དེ་དག་ནི་རྒྱ་གཞུང་གིས་མི་མང་ནང་དམ་དྲག་ཤུགས་ཆེན་གཏོང་བཞིན་ཡོད་པས། མི་མང་ཁྲོད་དུ་རང་འགུལ་གྱིས་ངོ་རྒོལ་བྱེད་ཀྱི་ཡོད་པ་ལས་བྱུང་བ་ཞིག་རེད་བསམ་གྱི་འདུག མི་མང་གི་ངོ་རྒོལ་གྱི་ནུས་པ་ཐོན་ཚེ་རྒྱ་ནག་ནང་འགྱུར་བ་ཐེབས་སྲིད་པ་ཞིག་རེད། དེ་བཞིན་འཛམ་གླིང་ཐོག་རྒྱ་ནག་གི་དཔལ་འབྱོར་ཨང་དང་པོ་ཆགས་པར་ཐེ་ཚོམ་བྱེད་ཀྱི་མེད་ཀྱང་། དེང་སང་རྒྱ་ནག་ནང་དཔལ་འབྱོར་གྱི་ཉམས་ཆག་བྱུང་སྟེ། ཨེ་ཤ་ཡ་དང་ཨ་ཧྥི་རི་ཁ་ནང་འཛུགས་སྐྲུན་ཐད་དཔལ་འབྱོར་བུ་ལོན་གཡར་བཞིན་ཡོད་པར་འགལ་རྐྱེན་འཕྲད་ཡོད་པ་མ་ཟད། འཛམ་གླིང་ནང་རྒྱ་གཞུང་གིས་དཔལ་འབྱོར་མ་རྩ་རིང་ལུགས་ཀྱི་ཐབས་ཤེས་ཐོག་རྒྱུད་གཅིག་ལམ་གཅིག་གི་སྲིད་ཇུས་སྤེལ་བར་བརྟེན། ནུབ་ཕྱོགས་རྒྱལ་ཁབ་གཙོས་རྒྱལ་ཁབ་མང་དག་ཅིག་གིས་རྒྱ་ནག་གཞུང་གི་ཆབ་སྲིད་ཀྱི་ཀུན་སློང་ལ་དོགས་སློང་བྱེད་བཞིན་ཡོད། རྒྱལ་སྤྱི་དང་རྒྱ་ནག་ནང་གི་གནས་སྟངས་ཤེས་རྟོགས་བྱུང་ཚེ་བོད་དོན་ལས་འགུལ་སྤེལ་བར་ཐུགས་ཕན་གསོས་པ་ཞིག་རེད། ཅེས་བརྗོད་སོང་།
བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། མ་འོངས་པའི་མི་རབས་ལ་བདག་པོ་རྒྱག་རྒྱུ་ནི་དེང་སང་འཛམ་གླིང་ཐོག་ནམ་རྒྱུན་བརྗོད་གཞི་ཆེན་པོ་ཞིག་ཆགས་ཡོད། མ་འོངས་པའི་མི་རབས་ལ་བདག་པོ་རྒྱག་དགོས་ཟེར་བའི་སྐད་ཆ་དེ་ལས་སླ་བོ་ཞིག་མ་རེད། མ་འོངས་པའི་མི་རབས་ག་འདྲ་ཞིག་ལ་ཟེར་གྱི་ཡོད། ད་ལྟ་སྐྱེས་ཡོད་པའི་མི་རབས་ལ་བདག་པོ་མི་རྒྱག་རང་རྒྱག་རེད། དེ་ལ་བདག་པོ་མ་བརྒྱབ་ན་ཕ་མ་ཚོས་ཞབས་འདྲེན་རེད། དེའི་སྐབས་སུ་ཡོད་པའི་མགོ་ཁྲིད་རྣམས་ཀྱི་ཞབས་འདྲེན་ཡང་རེད། དེ་ལ་མགོ་ཁྲིད་བསྐྱེད་བསྲིངས་སོགས་ཀྱི་མིང་གང་བཏགས་ཀྱང་བདག་པོ་རྒྱག་རྒྱུ་གལ་ཆེན་པོ་རེད། མ་འོངས་པར་ཡོང་རྒྱུ་བསྡད་པའི་མི་རབས་གསོ་སྐྱོང་བྱེད་རྒྱུ་དེ། ད་ལྟའི་མི་རབས་རྣམས་ཀྱི་ལག་པར་ཡོད་བསྡད་པ་ཞིག་ཆགས་ཡོད་ལ། རང་ཉིད་ཀྱི་རིག་གཞུང་རྩ་ཆེན་འཛིན་སྐྱོང་སྤེལ་གསུམ་བྱེད་པར་མ་འོངས་པའི་མི་རབས་ཀྱང་དགོས་པ་རེད། ཅེས་སོགས་བརྗོད་སོང་།
དེ་བཞིན་སུད་སི་ཨེཌ་ཝིལ་ཨེམ་སིའི་གྲོང་སྡེའི་སྤྱི་ཁྱབ་པ་གངས་གཞོན་ཚང་རྣམ་རྒྱལ་ལགས་དང་། ཁེ་ན་ཌ་པཱག་ཌེལ་ས་གནས་གྲོས་ཚོགས་འཐུས་མི་བུ་འཁྲིད་ལ་དཀར་པོ་ཆེ་ལགས་གཉིས་ཀྱིས་རང་ཉིད་མི་ཚེའི་ཉམས་མྱོང་དང་འབྲེལ་ནས་རྒྱལ་སྤྱིའི་ཆབ་སྲིད་མི་སྣ་དང་འབྲེལ་ལམ་བྱེད་ཕྱོགས་སྐོར་ནས་གཏམ་བཤད་དང་དྲི་བ་དྲིས་ལན་གནང་འདུག
གསར་འགོད་པ། བྱམས་པ་ཚེ་རིང་།
