ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་གཞོན་སྐྱེས་ཚོས་ཁ་བཀྲམ་ཡོད་པའི་བོད་པའི་སྤྱི་ཚོགས་ནང་འགན་ཁུར་ཏེ་བོད་ཀྱི་འཐབ་རྩོད་རྒྱུན་སྐྱོང་དང་བོད་ཀྱི་སྐད་དང་ཡི་གེ རིག་གཞུང་བཅས་མི་ཉམས་རྒྱུན་འཛིན་ཐུབ་པའི་བོད་མི་སྤོབས་པ་དང་ལྡན་པ་ཞིག་གནང་གལ་ཆེ་སྐོར་གསུངས་སོང་།
པར་དབང་། བོད་ཀྱི་དུས་བབ་གསར་ཁང་། ༢༠༢༤།༠༧།༠༥
དེ་རིང་ཉིན་རྒྱབ་ཆུ་ཚོད་ ༢ ཙམ་ནས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གོ་སྒྲིག་གནང་བའི་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་གཉིས་པའི་མཇུག་སྡོམ་མཛད་སྒོ་འཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས། དེ་བཞིན་དང་བླངས་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས། ཟབ་ཁྲིད་གནང་མཁན་རྣམ་པ་དང་ཕྱོགས་མཐའ་ཁག་ནས་ཕེབས་པའི་ཚོགས་བཅར་བ་བཅས་འཛོམས་འདུག
སྐབས་དེར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས། ང་ཚོས་བཞིན་ཉིན་གྲངས་གསུམ་རིང་ཚོགས་འདུ་འཚོགས་ནས་སྣང་མེད་དུ་གཏོང་རྒྱུ་མ་ཡིན་པར། དམིགས་ཡུལ་བཞིན་མ་འོངས་བོད་ཀྱི་འཐབ་རྩོད་རྒྱུན་སྐྱོང་དང་བོད་ཀྱི་སྐད་དང་ངོ་བོ། རིག་གཞུང་སོགས་བརླག་གི་འཇུག་མི་ཉན་པའི་སེམས་ཤུགས་འཁྱེར་ནས་ལས་འགུལ་སྤེལ་རྒྱུ་གལ་ཆེན་ཡིན་སྐོར་དང་། ད་རེས་ཚོགས་ཆེན་སྟེང་མཉམ་ཞུགས་གནང་མཁན་མང་ཆེ་བ་ཕྱིའི་ལུང་པར་སྐྱེས་འཚར་བྱུང་བ་ཤ་སྟག་ཡིན་པས། སོ་སོ་སྐྱེ་འཚར་བྱུང་སའི་ལུང་པའི་ནང་གི་བོད་མིའི་ཚོགས་པ་གཞན་དང་མཉམ་འབྲེལ་ཐོག བོད་མིའི་སྒྲིག་འཛུགས་ཀྱི་སྐུ་ཚབ་དོན་ལས་ཁུངས་ནས་ལམ་སྟོན་ཞུས་ཏེ། བོད་དོན་ཞུ་གཏུག་གནང་གལ་ཆེ་སྐོར། མ་འོངས་པར་གཞོན་སྐྱེས་ཚོས་བོད་མིའི་འཐབ་རྩོད་ཀྱི་འགན་འཁུར་དགོས་ཤིང་མི་རབས་རྗེས་མ་རྣམས་ལའང་རྩིས་སྤྲོད་ཐུབ་དགོས་བསམ་པའི་ཀུན་སློང་ཞིག་འཁུར་ནས་འགྲོ་རྒྱུ་གལ་ཆེན་ཡིན་པ་དང་། ཚོགས་ཆེན་དེ་བརྒྱུད་ནས་གཞོན་སྐྱེས་རྣམས་ལ་བོད་དོན་དྲིལ་བསྒྲགས་དང་ཞུ་གཏུག་བྱེད་ཕྱོགས་སོགས་ཀྱི་གནས་ཚུལ་མང་པོ་ཞིག་ཤེས་རྟོགས་ཐུབ་ཡོད་སྟབས། གཞོན་སྐྱེས་ཚོས་ཁ་བཀྲམ་ཡོད་པའི་བོད་པའི་སྤྱི་ཚོགས་ནང་འགན་ཁུར་ཏེ་བོད་ཀྱི་འཐབ་རྩོད་རྒྱུན་སྐྱོང་དང་བོད་ཀྱི་སྐད་དང་ཡི་གེ རིག་གཞུང་བཅས་མི་ཉམས་རྒྱུན་འཛིན་ཐུབ་པའི་བོད་མི་སྤོབས་པ་དང་ལྡན་པ་ཞིག་གནང་བའི་རེ་སྐུལ་བཅས་ཞུས་སོང་།
པར་དབང་། བོད་ཀྱི་དུས་བབ་གསར་ཁང་། ༢༠༢༤།༠༧།༠༥
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དེ་རིང་གི་ཚོགས་ཆེན་ཡག་པོ་བྱུང་ཡོད་རེད་བསམ་གྱི་འདུག ཚོགས་གཙོ་དང་ཚོགས་གཞོན་ཚུད་པའི་སྤྱི་འཐུས་ ༤༥ ཡོད་པ་རེད། བཙན་བྱོལ་གྱི་སྤྱི་ཚོགས་ནང་ལོགས་ལ་དམངས་གཙོ་ཟེར་བ་དེ་༧གོང་ས་རྒྱལ་བ་རིན་པོ་ཆེ་མཆོག་གིས་གསོལ་རས་གནང་བ་ལྟར། ད་ལྟའང་མུ་མཐུད་དུ་རྒྱུན་འཛིན་བྱེད་ཀྱི་ཡོད་པ་རེད། སྤྱིར་བཏང་དམངས་གཙོ་ཟེར་བ་དེ་མང་ཚོགས་ཀྱིས་འོས་འདེམས་བྱས་པའི་སྐུ་ཚབ་ཀྱིས་གཞུང་འཛིན་པ་ཞིག་ལ་རེད། ང་ཚོའི་དམངས་གཙོ་དེ་བཙན་བྱོལ་གྱི་གཞུང་ནང་བྱུང་བའི་དམངས་གཙོ་ཞིག་ཆགས་ཀྱི་ཡོད་པ་རེད། ཅེས་དང་། དམངས་གཙོའི་གཞུང་གི་བྱུང་སྟངས་ཀྱི་རྒྱབ་ལྗོངས་གནས་ཚུལ་སོགས་ངོ་སྤྲོད་གནང་བ་དང་། སྤྱི་འཐུས་ལྷན་ཚོགས་ཀྱི་ལས་དོན་གལ་ཆེ་བ་དེ་ཁྲིམས་བཟོ་རྒྱུ་དང་། ཕྱི་ཟླ་ ༣ པའི་ནང་སྔོན་རྩིས་ཀྱི་གྲོས་ཚོགས་དང་། ཕྱི་ཟླ་ ༩ པའི་ནང་འཛིན་སྐྱོང་གི་ལས་དོན་གནང་ཕྱོགས་ལ་ཞིབ་བཤེར་དང་གྲོས་བསྡུར་བྱ་རྒྱུ་སོགས་རེད། དུས་རྒྱུན་དུ་ནས་ཚོགས་གཙོ་དང་ཚོགས་གཞོན་ཚུད་པའི་རྒྱུན་ལས་ ༡༡ གིས་རྒྱལ་སྤྱིའི་ཆབ་སྲིད་དང་བོད་ནང་གི་གནས་ཚུལ་ལ་ཐུགས་སྣང་གནང་གི་ཡོད་པ་དང་། ལྷན་ཁང་ཁག་གི་ལས་དོན་དང་རྩིས་དང་འབྲེལ་བའི་ལས་དོན་ཁག་ལ་རྟོག་ཞིབ་གནང་གི་ཡོད་ཅིང་། བོད་རང་དབང་ལྡན་པའི་ལས་འགུལ་ཚོགས་ཆུང་གི་ཁག་གི་ལས་དོན་གནང་ཕྱོགས་ལ་ཐུགས་སྣང་གནང་གི་ཡོད་སྐོར་དང་། སྤྱི་འཐུས་ལྷན་ཚོགས་ཀྱི་ལས་དོན་གལ་ཆེ་བ་གཅིག་ནི་རྒྱལ་སྤྱིའི་གྲོས་ཚོགས་འཐུས་མི་དང་མཉམ་དུ་འབྲེལ་བ་བྱེད་ཀྱི་ཡོད་སྐོར་སོགས་གསུངས་སོང་།
པར་དབང་། བོད་ཀྱི་དུས་བབ་གསར་ཁང་། ༢༠༢༤།༠༧།༠༥
ད་དུང་ཚོགས་གཙོ་མཆོག་གིས། ད་ལྟའི་ཆར་འཛམ་གླིང་རྒྱལ་ཁབ་ ༢༠ ནང་བོད་དོན་རྒྱབ་སྐྱོར་ཚོགས་པ་བཙུགས་ཐུབ་ཡོད་པ་མ་ཟད། བོད་མི་རྣམས་ཀྱིས་བོད་དོན་རྒྱབ་སྐྱོར་བ་གང་མང་འཚོལ་དགོས་གལ་ཆེ་སྐོར་དང་། བོད་དོན་རྒྱབ་སྐྱོར་ཚོགས་ཆེན་སོགས་འཚོགས་པའི་སྐབས་རྒྱ་ནག་གཞུང་གིས་འགོག་རྐྱེན་མང་པོ་བཟོ་ཡི་ཡོད་པ་རེད། བོད་ནང་གི་དངོས་ཡོད་གནས་ཚུལ་དྲིལ་བསྒྲགས་བྱ་རྒྱུ་གལ་ཆེན་པོ་ཡིན་པ་དང་། མི་རབས་གསར་པ་ཚོས་མི་རབས་གསར་པའི་རྒྱབ་སྐྱོར་ཡོང་ཐུབ་པར་ལས་འགུལ་སྣ་མང་སྤེལ་དགོས་པ་དང་། བོད་ནང་གི་ཆབ་སྲིད་ཀྱི་གནས་སྟངས་འགྱུར་བ་འགྲོ་བཞིན་ཡོད་པ་རྣམས་དང་། བོད་ཀྱི་ཆོས་དང་རིག་གཞུང་གི་གནས་སྟངས་སོགས་རྒྱུས་ལོན་བྱ་རྒྱུ་གལ་ཆེན་ཡིན་ལ། རྒྱལ་སྤྱིའི་ཚོགས་སྡེ་ཁག་ལ་དྲིལ་བསྒྲགས་བྱ་རྒྱུའི་དགོངས་པ་བཞེས་དགོས་ཀྱི་ཡོད་སྐོར་དང་། བོད་ཀྱི་ཆབ་སྲིད་ཀྱི་གནད་དོན་དེ་རྒྱལ་སྤྱིའི་གནད་དོན་ཞིག་ལ་ངོས་འཛིན་ཐུབ་པར་བསམ་བློ་གཏོང་རྒྱུ་གལ་ཆེན་ཡིན་སྐོར་སོགས་གསུངས་སོང་།
པར་དབང་། བོད་ཀྱི་དུས་བབ་གསར་ཁང་། ༢༠༢༤།༠༧།༠༥
མཇུག་ཏུ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྐབས། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ཚོགས་ཆེན་དུ་ཕེབས་པ་དང་། སྤྱི་འཐུས་ལྷན་ཁང་གི་ལས་དོན་བྱེད་ཕྱོགས་དང་། སྤྱི་ཡོངས་ཀྱི་བོད་ཀྱི་ཛ་དྲག་གི་གནས་སྟངས། རྒྱལ་སྤྱིའི་ནང་ཆབ་སྲིད་འགྲོ་སྟངས་སོགས་ཀྱི་སྐོར་ལ་བཀའ་སློབ་ལམ་སྟོན་གནང་བར་ཐུགས་རྗེ་ཆེ་ཞུ་རྒྱུ་ཡིན། ཚོགས་འདུ་འདིར་གཞོན་སྐྱེས་ ༡༠༠ ལྷག་འཛོམས་ཡོད་པ་དང་། དམིགས་ཡུལ་གཙོ་བོ་དེ་བོད་དོན་ཞུ་གཏུག་བྱ་རྒྱུ་དེ་རེད། ས་གནས་མི་འདྲ་བ་ ༡༣ ནས་ཕེབས་པའི་གཞོན་སྐྱེས་རྣམས་མཉམ་ཞུགས་གནང་བར་ཐུགས་རྗེ་ཆེ་ཞུ་ཡི་ཡིན། ཚོགས་ཆེན་འདིར་ཕེབས་པའི་གསུང་བཤད་གནང་མཁན་དང་། ཟབ་ཁྲིད་གནང་མཁན། གསར་འགོད་པ་རྣམས་ལ་ཐུགས་རྗེ་ཆེ་ཞུ་ཡི་ཡིན། ཞེས་གསུངས་སོང་།
གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།
