སྲིད་བློན་མུ་དྷི་མཆོག་གིས་པུ་ཊིན་ལ་མཇལ་འཕྲད་གནང་།

རྒྱ་གར་གྱི་སྲིད་བློན་མུ་དྷི་མཆོག་གིས་ཨུ་རུ་སུའི་མགོ་འཁྲིད་པུ་ཌིན་ལ་ཐུག་འཕྲད་གནང་སྟེ་ཡུལ་གཉིས་ཀྱི་ཚོང་འབྲེལ་ཡར་སྐུལ་དང་ཡུ་ཀེ་རིན་གྱི་སྐོར་ལ་གྲོས་མོལ་གནང་ཡོད་འདུག

ཟླ་འདིའི་ཕྱི་ཚེས་ ༨ ཉིན་རྒྱ་གར་གྱི་སྲིད་བློན་མུ་དྷི་མཆོག་གཞུང་འབྲེལ་ཐོག་ཨུ་རུ་སུར་ཕེབས་ནས་རྒྱ་གར་དང་ཨུ་རུ་སུ་གཉིས་ཀྱི་ལོ་འཁོར་ལྷན་ཚོགས་ཐེངས་ཉེར་གཉིས་པར་(22nd India-Russia annual summit )མཉམ་ཞུགས་གནང་ཡོད་པ་དང་། སྐབས་དེར་ཨུ་རུ་སུའི་མགོ་ཁྲིད་པུ་ཌིན་དང་ཐུག་འཕྲད་གནང་སྟེ་ཡུ་ཀེ་རིན་གྱི་སྐོར་སོགས་ལ་གྲོས་བསྡུར་གནང་ཡོད་འདུག་ལ། ཐེངས་འདིའི་གཟིགས་སྐོར་དེ་ནི་མུ་དྷི་མཆོག་གིས་སྲིད་འཛིན་ལས་ཁུར་གསུམ་པ་བཞེས་རྗེས་ཨུ་རུ་སུར་ཕེབས་ཐེངས་དང་པོ་ཡིན་འདུག

སི་ཨན་ཨན་སོགས་ཀྱིས་གནས་ཚུལ་སྤེལ་བ་ལྟར་ན། ཁ་སང་རྒྱ་གར་གྱི་སྲིད་བློན་མུ་དྷི་མཆོག་གིས། འཛམ་གླིང་ཁྱོན་ཡོངས་ཀྱི་མི་རབས་རྗེས་མ་ཚོར་ཞི་བདེ་ནི་མེད་ཐབས་མེད་པ་ཞིག་ཡིན་པས། ཕྱོགས་གཉིས་ཀྱི་བར་གཉིས་ཕན་གྱི་ཐོག་ནས་ཞི་བའི་གྲོས་མོལ་ཡོང་ཐབས་ལ་རེ་བ་གནང་གི་ཡོད་སྐོར་དང་། རྒྱ་གར་གཞུང་གིས་འཛམ་གླིང་ཞི་བའི་ལམ་དུ་དྲང་རྒྱུར་དམིགས་བསལ་གྱི་རྒྱབ་སྐྱོར་དང་རོགས་འདེགས་བྱེད་ཀྱི་ཡོད་པས། རེས་གཟའ་ཟླ་བའི་ཉིན་པུ་ཌིན་དང་ལྷན་དུ་ཡུ་ཀེ་རིན་གྱི་སྐོར་ལ་གྲོས་བསྡུར་གནང་ཡོད་སྐོར་སོགས་གསུངས་འདུག

ཨུ་རྒྱ་གཉིས་ཀྱིས་བསྡུས་པའི་ལྷན་ཚོགས་དེའི་ཐོག་མགོ་ཁྲིད་གཉིས་ཀྱིས་གླེང་སློང་བྱས་པའི་གནད་དོན་ཐད་གསལ་ཁ་མེད་པའི་ཁར། ཕྱོགས་གཉིས་ཀྱིས་མཉམ་འབྲེལ་གསལ་བསྒྲགས་གང་ཡང་བྱས་མེད་ཀྱང་། རྒྱ་གར་གཞུང་ནས་བསྒྲགས་གཏམ་ཞིག་སྤེལ་བའི་ནང་། ད་ལན་ཕྱོགས་གཉིས་ཀྱི་ཚོང་དོན་གྱི་མཉམ་ལས་ཚུད་པའི་ས་ཁུལ་དང་རྒྱལ་སྤྱི་ཡོངས་ཀྱི་དཀའ་རྙོག་མང་པོ་ཞིག་དང་། ཕྱོགས་གཉིས་ཀྱི་མ་འོངས་པའི་མཉམ་འབྲེལ་ལས་དོན་སོགས་ཀྱི་ཐོག་ལ་གོ་བསྡུར་བྱས་ཏེ། རྒྱ་གར་གཞུང་གིས་རྒྱལ་ཁབ་དེའི་ནང་ཞི་བདེ་དང་བརྟན་བརླིང་ཡོང་རྒྱུར་འབོད་སྐུལ་ཞུ་ཡོད་སྐོར་སོགས་གསལ་འདུག དེའི་ཐད་ཨ་རིའི་མགྲིན་ཚབ་པ་སྐུ་ཞབས་མེ་ཐའུ་(Mattew Miller ) ལགས་ཀྱིས་ཨུ་རྒྱ་གཉིས་ཀྱི་མགོ་ཁྲིད་བར་མཛའ་འབྲེལ་གྱི་ངང་ནས་ཐུག་འཕྲད་དང་གྲོས་མོལ་བྱས་ཏེ་ཨུ་རུ་སུར་འབྲེལ་ལམ་བཟུང་བ་དེས་ཨ་རིའི་གཞུང་ལ་སེམས་འཚབ་བསླངས་ཡོད་སྐོར་སོགས་བརྗོད་འདུག

ཁ་སང་སྲིད་བློན་མུ་དྷི་མཆོག་ཨུ་རུ་སུར་ཕེབས་འབྱོར་བྱུང་རྗེས་ཀྱི་ཆུ་ཚོད་ཁ་ཤས་རྗེས། ཨུ་རུ་སུས་ཡུ་ཀེ་རིན་གྱི་བྱིས་པའི་སྨན་ཁང་ཚུད་པའི་རྒྱལ་ས་ཁེབ་ཁུལ་དུ་གཏོར་རྒོལ་བྱས་ཏེ། ཉུང་མཐར་མི་གྲངས་ ༤༡ རྐྱེན་འདས་དང་མི་གྲངས་མང་པོ་ཞིག་ལ་རྨས་སྐྱོན་ཚབས་ཆེན་ཐེབས་ཡོད་སྟབས། ཡུ་ཀེ་རིན་གྱི་སྲིད་འཛིན་སྐུ་ཞབས་ཛི་ལེན་སི་ཀིས་སྒེར་གྱི་ཨེག་སི་འཕྲིན་སྟེགས་སྟེང་། འཛམ་གླིང་གི་དམངས་གཙོའི་རྒྱལ་ཁབ་ཆེ་ཤོས་ཀྱི་མགོ་ཁྲིད་ཀྱིས་ཁྲག་དམར་མཆེད་པའི་འཛམ་གླིང་གི་ནག་ཉེས་ཆེ་ཤོས་ཀྱི་མི་སྣ་ཞིག་ལ་དགའ་སྤྲོའི་ངང་ནས་འཐམ་འཁྱུད་བྱས་པ་ནི། རེ་ཐང་ཆད་པ་ཞིག་དང་ཞི་བདེ་རྨེག་མེད་དུ་བཏང་བ་ཞིག་ཡིན། ཞེས་བརྗོད་འདུག དེ་བཞིན་བྷི་བྷི་གསར་ཁང་ལྟར་ན། པུ་ཌིན་གྱིས་མུ་དྷི་ལ་འཐམ་ནས་” སྙིང་ཉེ་བའི་གྲོགས་མཆོག་ཁྱེད་རང་མཇལ་བར་དགའ་པོ་བྱུང་” ཞེས་བརྗོད་པའི་བརྙན་ཐུང་དེར་རྒྱ་གར་ནང་དར་ཁྱབ་ཤུགས་ཆེན་ཕྱིན་ཡོད་པ་མ་ཟད། དེར་སྐྱོན་བརྗོད་བྱེད་མཁན་ཡང་མང་དག་ཅིག་བྱུང་ཡོད་སྐོར་གསལ་འདུག

རྒྱ་གར་དང་ཨུ་རུ་སུ་གཉིས་ནི་གྲང་དམག་གི་དུས་ནས་ཕྱོགས་གཉིས་ཀྱི་མཐའ་མཚམས་འགོག་སྲུང་དང་མཉམ་འབྲེལ་ཐབས་ཇུས་ཀྱི་ཐོག་ནས་འབྲེལ་ལམ་ཟབ་མོ་ཡོད་ཅིང་། ཨུ་རུ་སུས་རྒྱ་གར་ལ་དམག་དོན་གྱི་མཚོན་ཆ་ཚོང་འགྲེམས་བྱེད་ཀྱི་ཡོད་ལ། ད་བར་ཕྱོགས་གཉིས་ཀྱི་མཉམ་འབྲེལ་ནུས་པ་ལ་བརྟེན་ནས། འཕྲུལ་རིག་དང་། ཚན་རྩལ་སོགས་ཀྱི་ཐད་ལ་མཉམ་ལས་ཤུགས་ཆེན་བྱེད་མུས་ཡིན་པ་མ་ཟད། ལྷག་པར་དུ་རྒྱ་གར་ནི་འཛམ་གླིང་ཁྲོད་ཨུ་རུ་སུ་ལ་ས་སྣུམ་མཁོ་འདོན་བྱེད་མཁན་གཙོ་བོ་དེ་ཡིན་པར་བརྟེན། གནད་དོན་དབྱེ་ཞིབ་པ་མང་པོ་ཞིག་གིས། རྒྱ་གར་ནི་ཨེ་ཤ་ཡའི་ཨ་རིའི་མཐུན་ཕྱོགས་རྒྱལ་ཁབ་ཆེ་ཤོས་དེ་ཡིན་ཡང་། རྒྱ་གར་གཞུང་གིས་ཚོང་དོན་མཉམ་ལས་དང་། རྒྱལ་ཁབ་རང་གི་མཐའ་མཚམས་འགོག་སྲུང་སོགས་ལ་དམིགས་པའི་འབྲེལ་བ་རྒྱུན་འཁྱོངས་བྱེད་བཞིན་པ་ནི་རྒྱུན་ལྡན་ལྟར་སྣང་གི་ཡོད་འདུག

ཕྱི་ལོ་ ༢༠༢༠ ལོ་ཙམ་ནས་རྒྱ་གར་གྱིས་རྒྱ་གར་ཞི་བདེ་རྒྱ་མཚོའི་མངའ་ཁུལ་གྱི་ཨ་རི་དང་ཉི་ཧོང་། ཨོ་གླིང་བཅས་ཀྱིས་མཉམ་ཞུགས་བྱས་པའི་ཁོ་ཝ་ཊི་(Quad)ནང་འཛུལ་ཞུགས་བྱས་ཏེ། ཨེ་ཤ་ཡའི་ཁུལ་གྱི་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་སྲུང་བྱེད་ཐབས་ཀྱི་མཉམ་འབྲེལ་དམག་སྦྱོང་སྤེལ་ཡོད། ཕྱོགས་ཁག་རྒྱལ་ཁབ་བཞིའམ་ཁོ་ཝ་ཊི་ (Quad)ཡིས་རྒྱ་ནག་གཞུང་གི་ལངས་ཕྱོགས་ལ་ཁ་གཏད་གཅོག་མཁན་ཞིག་ཏུ་གྱུར་ཡོད་ལ།  རིམ་གྱིས་ཨེ་ཤ་ཡའི་བྱང་ཆིངས་སྒྲིག་འཛུགས་ (ASIAN NATO) ཞིག་ཏུ་འགྱུར་སྲིད་པའི་ཚོད་དཔག་བྱེད་ཀྱི་ཡོད་ཀྱང་། འདས་པའི་ལོ་ཤས་གོང་ནས་རྒྱ་ནག་གིས་ཨུ་རུ་སུར་འབྲེལ་ལམ་ཡར་རྒྱས་གཏོང་མུས་ཡིན་པའི་ཁར། རྒྱ་གར་དང་ཨུ་རུ་སུ་ཡང་འབྲེལ་ལམ་བཟང་དུ་འགྲོ་མུས་ཡིན་པས། ཨ་རི་དང་རྒྱ་གར་གཉིས་ཀྱི་འབྲེལ་ལམ་ལའང་དོ་ཕོག་འགྲོ་མི་སྲིད་པ་ཞིག་མིན་པའི་ཚོད་དཔག་ཀྱང་བྱེད་ཀྱི་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།