རྒྱ་ནག་དམར་གཞུང་གིས་བོད་དང་ཧོང་ཀོང་། ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནད་དོན་དང་འབྲེལ་ནས་རྒྱ་ནག་གི་དཔོན་རིགས་ཁག་ཅིག་ཨ་རིར་ཡོང་བར་བཀག་སྡོམ་གྱི་ཉེས་ཆད་གཅོད་རྒྱུ་ཡིན་པ་ཐག་གཅོད་གནང་འདུག
ཟླ་འདིའི་ཕྱི་ཚེས་ ༡༢ ཉིན་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་མེ་ཐིའུ་མི་ལར་ (Matthew Miller) ལགས་ཀྱིས། ཨ་རིས་མུ་མཐུད་དུ་རྒྱ་ནག་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་བཞིན་ཡོད་པ་དང་། རྒྱ་ནག་དམར་གཞུང་གིས་བོད་དང་ཧོང་ཀོང་། ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནད་དོན་དང་འབྲེལ་ནས་རྒྱ་ནག་གི་དཔོན་རིགས་ཁག་ཅིག་ཨ་རིར་ཡོང་བར་ཐོངས་མཆན་བཀག་སྡོམ་གྱི་ཉེས་ཆད་གཏོད་རྒྱུ་ཡིན་པ་ཐག་གཅོད་བྱས་ཡོད། གང་ཡིན་ཟེར་ན། རྒྱ་ནག་གིས་འགྲོ་བ་མིའི་ཐོབ་ཐང་ལ་བརྩི་བཀུར་དང་སྲུང་སྐྱོབ་བྱ་རྒྱུའི་ཁས་ལེན་ལག་བསྟར་མ་བྱས་པ་དང་། ཤར་ཊུར་ཀི་སི་ཐན་ནང་མུ་མཐུད་དུ་མི་རིགས་ཀྱི་ངོ་བོ་དང་རིག་གཞུང་སོགས་རྩ་མེད་བཟོ་ཐབས་བྱེད་བཞིན་ཡོད་ལ། དེ་བཞིན་ཧོང་ཀོང་ནང་གི་གཞི་རྩའི་རང་དབང་མེད་པ་བཟོ་བཞིན་ཡོད་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་དང་། འཛམ་གླིང་ཁྱོན་ཡོངས་སུ་རྒྱལ་མཚམས་ལས་བརྒལ་བའི་དྲག་གནོན་བྱེད་ཀྱི་ཡོད་པ་སོགས་ལས་གསལ་སྟོན་བྱེད་ཐུབ། ཅེས་གསུངས་འདུག
ཡང་ཁོང་གིས། རྒྱ་ནག་གཞུང་གིས་འཛམ་གླིང་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ནང་བཀོད་པའི་རྩ་དོན་ལ་བརྩི་སྲུང་ཞུ་རྒྱུ་དང་། ད་ལོའི་འགྲོ་བ་མིའི་ཐོབ་ཐང་གི་ཡོངས་ཁྱབ་དུས་མཚམས་བསྐྱར་ཞིབ་སྐབས་བཏོན་པའི་གྲོས་འཆར་རྣམས་དྭང་ལེན་བྱེད་དགོས་པ་དང་། རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་སྲིད་ཇུས་ལ་འགྱུར་བ་གཏོང་དགོས་པའི་འབོད་སྐུལ་ཞུ་ཡི་ཡོད་ལ། གང་བྱུང་འཛིན་བཟུང་དང་དྲང་བདེན་མིན་པའི་འཛིན་བཟུང་བཀག་ཉར་བྱས་པ་རྣམས་ཀློད་གྲོལ་གཏོང་དགོས་པའི་འབོད་སྐུལ་ཞུ་རྒྱུ་ཡིན། ཞེས་གསུངས་འདུག
ཉིན་དེར་རྒྱ་ནག་ཕྱི་སྲིད་ལྷན་ཁང་གིས་ཨ་རིའི་ཐག་གཅོད་དེ་དང་འབྲེལ་བའི་བསྒྲགས་གཏམ་ཞིག་སྤེལ་བའི་ནང་། ཨ་རིའི་རྒྱལ་སྲུང་བཟོ་གྲྭ་དྲུག་གིས་ཐའེ་ཝན་ལ་གོ་མཚོན་འཚོང་གི་ཡོད་པར་བརྟེན། བཟོ་ཚོང་ཁང་དང་ཚོང་འབྲེལ་བཀག་སྡོམ་དང་། ཚོང་ལས་ཁང་དེ་དག་གི་མཐོ་རིམ་འཛིན་སྐྱོང་དཔོན་རིགས་ ༥ རྒྱ་ནག་ནང་ཡོང་བར་བཀག་སྡོམ་བྱ་རྒྱུ་ཡིན་སྐོར་དང་། ཨ་རིའི་གཞུང་གིས་ཐའེ་ཝན་ལ་གོ་མཚོན་ཚོང་འབྲེལ་བྱས་ཏེ་རྒྱ་ནག་གི་ནང་སྲིད་ལ་ཐེ་ཇུས་བྱེད་ཀྱི་ཡོད་སྐོར་དང་། རྒྱ་ནག་རྒྱལ་ཁབ་གཅིག་གི་སྲིད་ཇུས་ལ་རྡོག་རོལ་གཏོང་གི་ཡོད་སྐོར་སོགས་རྒོལ་ལན་བསླགས་འདུག
ཨ་རིའི་རྒྱལ་ས་ཝ་ཤིང་ཊོན་དུ་ཡོད་པའི་རྒྱ་ནག་གཞུང་ཚབ་ཁང་གི་མགྲིན་ཚབ་པ་ལིའུ་ཧྥོང་ཡུ་ (Liu Pengyu) ཡིས། ཨ་རིས་བོད་དང་ཧོང་ཀོང་། ཤར་ཊུར་ཀི་སི་ཐན་གྱི་གནད་དོན་དང་། རྒྱལ་མཚམས་ལས་བརྒལ་བའི་དྲག་གནོན་སོགས་ལ་ཁ་གཡར་ནས་རྒྱ་ནག་གི་དཔོན་རིགས་ལ་ཁྲིམས་འགལ་གྱིས་ཉེས་ཆད་བཏང་བ་རྣམས་མེད་པ་བཟོ་དགོས་སྐོར་དང་། གལ་ཏེ་དེ་ལྟར་མི་བྱས་ཚེ། རྒྱ་ནག་གི་རྒོལ་ལན་ངན་པ་སློག་གི་ཡིན། ཞེས་བརྗོད་འདུག
ཉེ་ལམ་ཨ་རིའི་སྲིད་འཛིན་རྗོ་བྷའེ་ཌིན་མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་བསྐྱོན་པར་བརྟེན། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་མའི་ཉིང་ (Mao Ning) གིས། ཁྲིམས་དེས་བོད་རང་བཙན་ཡིན་པར་སྐུལ་འདེད་བཏང་སྟེ་རྒྱ་ནག་གི་ནང་སྲིད་ལ་ཐེ་ཇུས་ཚབས་ཆེན་བྱེད་ཀྱི་ཡོད་པའི་སྐྱོན་བརྗོད་དང་། ཨ་རིའི་གཞུང་གིས་རྒྱ་ནག་བརྟན་ལྷིང་མེད་པ་བཟོ་རྒྱུའི་དམིགས་ཡུལ་འགྲུབ་སླད་བོད་རྒྱའི་དཀའ་རྙོག་སེལ་ཐུབ་མེད་པའི་རྫུན་གཏམ་བཤད་ཀྱི་ཡོད་སྐོར་དང་། ཨ་རིའི་གཞུང་གིས་བོད་དེ་རྒྱ་ནག་གི་ཆ་ཤས་ཡིན་པར་ངོས་ལེན་བྱ་དགོས་པ་དང་། བོད་རང་བཙན་ཡིན་པར་ངོས་ལེན་བྱེད་ཆོག་གི་མེད་སྐོར་སོགས་བརྗོད་འདུག
རྒྱལ་སྤྱིའི་ཚོགས་སྡེ་ཁག་ནས་རྒྱ་ནག་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ལུགས་ཟེར་བ་ལག་བསྟར་བྱེད་བཞིན་པར་བློ་འཚབ་བྱེད་ཀྱི་ཡོད་ལ། འདི་ལོའི་ཕྱི་ཟླ་ ༦ པའི་ནང་ཡུ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་གི་མཉམ་འབྲེལ་གྲོས་མོལ་ཐེངས་ ༣༩ པའི་སྟེང་། བོད་དང་ཧོང་ཀོང་། ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་ཚབས་ཆེན་གཏོང་བཞིན་པར་བློ་འཚབ་ཡོད་སྐོར་དང་། རྒྱ་ནག་གི་བཟོ་ཚོང་ཁང་ ༡༤ དང་ཚོང་འབྲེལ་མཚམས་འཇོག་བྱས་ཡོད་འདུག་ལ། ཨ་རིའི་གཞུང་གིས་རྒྱ་ནག་གི་འཕྲུལ་ལས་དང་འབྲེལ་བའི་ཚོང་ལས་ཁང་ ༡༢ ཙམ་ལ་ཚོང་འབྲེལ་བྱེད་མཚམས་བཞག་ཡོད་པ་རེད།
གཞན་ཡང་། ཕྱི་ལོ་ ༢༠༢༡ ཟླ་ ༣ པའི་ནང་ཡུ་རོབ་མཐུན་ཚོགས་ཀྱིས་ཨ་རི་དང་ཁེ་ན་ཌ། དབྱིན་ཡུལ་བཅས་ཀྱི་ཤར་ཊུར་ཀི་སི་ཐན་ཉེན་རྟོག་དཔོན་ཁྲིན་མིང་གོ་ (Chen Mingguo) དང་། ཡུ་གུར་མི་རིགས་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ཟུར་པ་ཀྲུའུ་ཧའེ་ལུན་ (Zhu Hailun) གཙོས་ལས་བྱེད་རྒན་པ་ཝང་ཅིན་ཀྲིན་ (Wang Junzheng) དང་། ཝང་མིང་ཧྲན་ (Wang Mingshan) བཅས་རྒྱ་ནག་གི་དཔོན་རིགས་བཞི་དང་། ཤར་ཊུར་ཀི་སི་ཐན་གྱི་ཐོན་སྐྱེད་འཛུགས་སྐྲུན་རྟོག་ཞིབ་ཉེན་རྟོག་ཁང་ (Xinjiang Production and Construction Corps Public Security Bureau) ལ་སྲིད་དོན་ཉེས་ཆད་བཅད་དེ། འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་བྱ་སྤྱོད་མཚམས་འཇོག་མ་བྱས་བར་དུ་ཡུ་རོབ་ནང་ཡོང་མི་ཆོག་པ་བཟོས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
