སྲིད་འཛིན་བྷའེ་ཌིན་མཆོག་ནས་ཨ་རིའི་དམངས་གཙོ་ཚོགས་པའི་སྲིད་འཛིན་འོས་མི་ནས་དགོངས་པ་ཞུས།

ཨ་རིའི་སྲིད་འཛིན་ལས་ཐོག་བྷའེ་ཌིན་མཆོག་གིས་འདི་ལོའི་དམངས་གཙོ་ཚོགས་པའི་སྲིད་འཛིན་འོས་མི་ནས་དགོངས་པ་ཞུས་ཡོད་པས་སྲིད་དོན་ཚོགས་པ་དེའི་སྲིད་འཛིན་འོས་མི་སུ་ཡིན་ནམ།

དེ་རིང་ཕྱི་ཟླ་ ༧ ཚེས་ ༢༢ ཉིན་ཨ་རིའི་སྲིད་འཛིན་སྐུ་ཞབས་བྷའེ་ཌིན་མཆོག་གིས་ཡོངས་ཁྱབ་གསལ་བསྒྲགས་ཤིག་སྤེལ་ཏེ། ཁོང་གིས་ཕྱི་ལོ་ ༢༠༢༤ ཟླ་ ༡༡ ཚེས་ ༥ ཉིན་ཨ་རིའི་སྲིད་འཛིན་སྐབས་ ༤༧ པའི་འོས་བསྡུ་ཆེན་མོ་ལས་ཕྱིར་འཐེན་བྱས་ཏེ། དམངས་གཙོ་ཚོགས་པའི་ལས་ཐོག་སྲིད་འཛིན་གཞོན་པ་ལྕམ་ཀ་མ་ལ་ཧ་རི་སི་ (Kamala Harris) མཆོག་དམངས་གཙོ་ཚོགས་པའི་སྲིད་འཛིན་འོས་མིར་གདམ་རྒྱུར་ཐུགས་རེ་གནང་གི་ཡོད་ཀྱང་། ཕྱི་ལོ་ ༢༠༢༤ ལོའི་བྷའེ་ཌིན་དང་ཊོམ་ཕུ་གཉིས་ཀྱི་འོས་བསྡུའི་རྒྱལ་ཕམ་རྩོད་པའི་འགྲན་སྐོར་གཉིས་པ་དེ་མཇུག་རྫོགས་ཡོད་པ་རེད།

སྲིད་འཛིན་མཆོག་གི་གསལ་བསྒྲགས་དེའི་ནང་། ད་ལྟ་ཨ་རི་ནི་འཛམ་གླིང་གི་དཔལ་འབྱོར་སྟོབས་ཤུགས་ཆེ་ཤོས་དེ་ཡིན། ང་ཚོས་ལོ་རྒྱུས་རང་བཞིན་ལྡན་པའི་མ་འཇོག་བྱས་ཏེ། རྒྱལ་ཁབ་བསྐྱར་གསོ་དང་། སྨན་རིན་ཆག་ཡང་། སྔོན་ཆད་བྱུང་མ་མྱོང་བའི་སྨན་བཅོས་རིན་གོང་ཇེ་དམའ་རུ་བཏང་ཡོད་ལ།  ང་ཚོས་དུག་རྫས་ཀྱིས་མནར་བའི་དམག་ཟུར་ས་ཡ་གཅིག་ལ་སྨན་བཅོས་མཐུན་འགྱུར་དང་། ལོ་སུམ་ཅུའི་རིང་ལ་མེ་མདའི་བདེ་འཇགས་ཁྲིམས་སྒྲིག་གཏན་འབེབས་བྱས་ཡོད། ཨ་རིའི་ཆེས་མཐོའི་ཁྲིམས་ཁང་དུ་ཨ་ཧྥེ་རི་ཁའི་བུད་མེད་ཐོག་མའང་བསྐོས་ཡོད་པས། ཨ་རིར་ད་ལྟ་ནང་བཞིན་མགོ་ཁྲིད་པ་ཡང་དག་ཅིག་བྱུང་མྱོང་མེད། ཅེས་གསུངས་འདུག

ཡང་གསལ་བསྒྲགས་ནང་། ངས་རང་ཉིད་ཀྱི་མི་ཚེའི་ནང་ཁྱེད་ཅག་གི་སྲིད་འཛིན་གྱི་ལས་དོན་གཉེར་བ་ནི། ཆེས་གཟི་བརྗིད་ལྡན་པའི་ལས་དོན་དེ་ཡིན་ལ། ང་རང་བསྐྱར་དུ་སྲིད་འཛིོན་གྱི་འོས་མིར་ལང་རྒྱུ་ནི་རང་གི་རེ་སྙེག་ཁོ་ན་ཡིན་ཡང་། ཆབ་སྲིད་ཚོགས་པ་དང་རྒྱལ་ཁབ་ཀྱི་དར་རྒུད་ལ་བསམ་གཞིགས་བྱས་ཏེ། སྲིད་འཛིན་གྱི་འོས་མི་ནས་ཕྱིར་འཐེན་བྱས་ནས་ད་ལྟའི་སྲིད་འཛིན་གྱི་ལས་དོན་མཇུག་འཁྱོངས་པ་བྱ་རྒྱུ་ཡིན། ཞེས་དང་།  སྲིད་འཛིན་གཞོན་པ་ཀ་མ་ལ་ཧ་རེ་སི་ནི་ལས་དོན་འདིའི་ཁྲོད་ཀྱི་ཐུན་མོང་མ་ཡིན་པའི་ལས་རོགས་ཤིག་ཡིན།  ཁྱེད་ཚོས་ང་ལ་ཡིད་ཆེས་བྱས་པར་སྙིང་ཁོང་རུས་པའི་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག

གནད་དོན་དབྱེ་ཞིབ་པ་མང་པོས། སྲིད་འཛིན་བྷའེ་ཌིན་མཆོག་གིས་ཐག་གཅོད་དེ་ལོ་གཅིག་གི་སྔོན་ནས་གནང་དགོས་པའི་གནད་དོན་ཞིག་ཡིན་ཞིང་། ད་ལན་ཁོང་གིས་གློ་བུར་དུ་ཕྱིར་འཐེན་བྱས་པའང་དོགས་སློང་སྐྱེས་དགོས་པའི་གནད་དོན་ཞིག་ཡིན་པའི་ཁར། ཐག་གཅོད་ཀྱི་བརྒྱུད་རིམ་འདི་ལ་མཚོན་ནའང་ཏོག་ཙམ་ཕྱི་དྲགས་པ་ཞིག་ཏུ་ངོས་འཛིན་བྱེད་ཀྱི་འདུག ཁ་གཏད་དུ་ལངས་བའི་ཨ་རིའི་སྲིད་འཛིན་ཟུར་པ་དང་ཕྱུག་བདག་སྐུ་ཞབས་ཊོམ་ཕུ་ལགས་ཀྱིས། རྒྱལ་ཁབ་དེ་ད་ལྟ་སུས་སྣེ་འཁྲིད་བྱེད་ཀྱི་ཡོད་དམ། ཁོས་ད་ལྟ་ཁོ་གང་དུ་ཡོད་མེད་ཤེས་ཀྱི་མི་འདུག གལ་ཏེ་ཁོས་རང་གི་ཡིག་ཚང་གཉེར་མ་ཐུབ་ན། རྒྱལ་ཁབ་ཀྱི་སྣེ་འཁྲིད་མ་ཐུབ་པ་རེད། ཅེས་སྐྱོན་བརྗོད་བྱས་འདུག

ཕྱི་ལོ་ ༢༠༢༠ ལོའི་ཨ་རིའི་སྲིད་འཛིན་གྱི་འོས་བསྡུའི་ཁྲོད་ཊོམ་ཕུ་ལགས་ལ་འོས་གྲངས་བརྒྱ་ཆའི་ ༤༦།༩ དང་། རྗོ་བྷའེ་ཌན་ལགས་ལ་འོས་གྲངས་ཀྱི་བརྒྱ་ཆའི་ ༥༡།༣ ཐོབ་སྟེ། ཁོང་ཨ་རོའི་སྲིད་འཛིན་ཐེངས་ ༤༦ པར་བདམས་ཡོད་པ་དང་། ད་ལན་སླར་ཡང་ཁོང་གཉིས་ཀྱི་འོས་བསྡུའི་གདོང་ཐུག་གི་ཁྲོད་ནས་རྣམ་པར་རྒྱལ་རྒྱུར་རེ་བ་ཡོད་ཀྱང་། སྲིད་འཛིན་བྷའེ་ཌིན་མཆོག་གིས་གློ་བུར་དུ་ཕྱིར་འཐེན་གནང་བའི་རྒྱུ་རྐྱེན་ཤེས་རྟོགས་བྱུང་མེད་ཀྱང་། ཁོང་གིས་བདུན་ཕྲག་རྗེས་མར་གནས་ཚུལ་ཞིབ་ཕྲ་ཕྱིར་བསྒྲགས་གནང་རྒྱུ་ཡིན་སྐོར་སོགས་བསྒྲགས་འདུག

ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། དམངས་གཙོ་ཚོགས་པའི་ཁོངས་ནས་སྐུ་ཞབས་བྷའེ་ཌིན་མཆོག་གིས་སྲིད་འཛིན་འོས་བསྡུ་ལས་ཕྱིར་འཐེན་གནང་རྗེས། ད་ལྟའི་ལས་ཐོག་སྲིད་འཛིན་གཞོན་པ་ཀ་མ་ལ་ཧ་རི་སི་ (Kamala Harris)། ཨ་རིའི་སན་ཧྥ་རིན་སི་ཁོའི་གྲོང་སྡེའི་སྤྱི་ཁྱབ་ཟུར་པ་སྐུ་ཞབས་གྷ་ཝན་ནི་ཝི་སོན་(Gavin Newsom) དང་། ཨ་རིའི་ཕྱུག་བདག་ཆེན་མོ་པེ་ཛི་ཀར་ (JB Pritzker) ། ཨ་རིའི་པེ་སི་ནི་ཝི་ཡ་མངའ་སྡེའི་ཁྲིམས་རྩོད་པ་ཆེན་པོ་སྐུ་ཞབས་ཇོ་ཤི་(Josh Shapiro) སོགས་དམངས་གཙོ་སྲིད་དོན་ཚོགས་པའི་སྲིད་འཛིན་འོས་མིར་བཞེངས་སྲིད་སྐོར་གསལ་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།