རྒྱ་ནག་གོ་ལའི་དུས་བབ་ཀྱི་རྩོམ་སྒྲིག་པ་ཟུར་བ་ཧུ་ཤི་ཅིན་གང་དུ་ཡོད་དམ།

རྒྱ་ནག་གོ་ལའི་དུས་བབ་ཀྱི་རྩོམ་སྒྲིག་པ་ཟུར་བ་ཧུ་ཤི་ཅིན་གྱིས་རྒྱ་ནག་གི་དཔལ་འབྱོར་གནས་བབ་ཐད་ཀྱི་རྩོམ་ཡིག་སྤེལ་རྗེས་དྲ་ལམ་སོགས་ནས་གྲགས་འགུལ་གང་ཡང་མེད་པར་གྱུར་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་འཐོན་མུས་ཡིན་པའི་གནས་ཚུལ་ལྟར་ན། ཕྱི་ཟླ་ ༧ ཚེས་ ༢༢ ཉིན་རྒྱ་ནག་གོ་ལའི་དུས་བབ་ཀྱི་སྤྱི་ཁྱབ་རྩོམ་སྒྲིག་པ་ཟུར་བ་ཧུ་ཤི་ཅིན་(Hu Xijin) ཟེར་བ་དེས། རྒྱ་ནག་གི་ཚོང་དོན་སྲིད་ཇུས་སོགས་ཀྱི་ཐད་ལ་དཔྱད་བརྗོད་མི་འདྲ་བ་དྲུག་ཙམ་སྤེལ་རྗེས། ཟླ་དེའི་ཕྱི་ཚེས་  ༢༧ ནས་ཁོ་རྒྱ་ནག་གི་སྤྱི་ཚོགས་དྲ་ལམ་སོགས་ནས་གྲགས་འགུལ་མེད་པར་གྱུར་བའི་གནས་ཚུལ་འཐོན་མུས་ཡིན་པའི་ཁར། ད་ལྟ་ཁོ་གང་དུ་ཡོད་མེད་ཐད་གསལ་ཁ་གང་ཡང་མི་འདུག

ཕྱི་ཟླ་ ༧ ཚེས་ ༢༢ ཉིན་རྒྱ་ནག་གོ་ལའི་དུས་བབ་ཀྱི་མགྲིན་ཚབ་པ་ཟུར་བ་དེས་སྒེར་གྱི་སྐད་འཕྲིན་དུ། རྒྱ་ནག་དམར་ཤོག་ཚོགས་པའི་ཀྲུང་གོ་གུང་ཁྲན་ཏང་སྐབས་ཉི་ཤུ་པའི་ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐེངས་གསུམ་པ་ཟེར་བའི་སྐབས་སུ་རྒྱ་ནག་གི་དཔལ་འབྱོར་བཅོས་སྒྱུར་གྱི་གྲོས་ཆོད་བཞག་སྟེ། འབྱུང་འགྱུར་གྱི་ལོ་ལྔའི་རིང་གི་དཔལ་འབྱོར་སྲིད་ཇུས་རྣམས་གཏན་འབེབས་བྱས་པའི་ཁྲོད། དམར་ཤོག་སྲིད་གཞུང་ནི་རྒྱ་ནག་གི་ཚོང་དོན་ཡར་རྒྱས་འགྲོ་བའི་གཞི་མ་ཡིན་ལུགས་བརྗོད་པ་དེ་ཐེར་འདོན་བྱས་ཡོད་པ་མ་ཟད། རྒྱ་ནག་གཞུང་གིས་གཞུང་དང་སྒེར་གྱི་ལས་དོན་འདྲ་མཉམ་གྱི་འཕེལ་རྒྱས་ཡོང་བར་རེ་བ་བྱེད་ཀྱི་ཡོད་ལུགས་བརྗོད་ཀྱི་ཡོད་པའི་དྲིལ་བསྒྲགས་ཐེར་འདོན་བྱས་པའི་རྩོམ་ཡིག་ཅིག་སྤེལ་རྗེས། སྐད་འཕྲིན་སྤྱི་སྟེགས་ཀྱིས་ཁོའི་རྩོམ་ཡིག་དེ་ནག་བསུབས་སུ་བཏང་ནས། སྤྱི་ཚོགས་དྲ་ལམ་དང་གསར་འགྱུར་བརྒྱུད་ལམ་ཁག་ནས་ཁོ་ལ་རྒྱ་ནག་གི་ཚོང་དོན་འཕེལ་རྒྱས་ཀྱི་འགུལ་ཤུགས་ཐད་ལ་ལོག་འགྲེལ་བྱེད་ཀྱི་ཡོད་ལུགས་ཀྱི་སྐྱོན་བརྗོད་ཆེན་པོ་བྱས་ཡོད་འདུག

ཕྱི་ཟླ་ ༧ ཚེས་ ༢༧ ནས་ཧུ་ཤི་ཅིན་གྱིས་སྒེར་གྱི་སྐད་འཕྲིན་དང་། པོད་འཕྲིན། ཨེག་སི་(X) སྤྱི་ཚོགས་དྲ་ལམ་ཁག་ཏུ་མི་སྒེར་གྱི་འཚོ་བ་དང་། གནས་སྟངས་མཚོན་པའི་གནས་ཚུལ་གང་ཡང་མ་སྤེལ་བར་འཇམ་ཅག་གེར་ལུས་ཡོད་སྟབས། བྷི་ལུམ་བྷིག་(Bloomberg) གསར་ཁང་གིས། རྒྱ་ནག་གཞུང་གིས་ཧུ་ཟེར་བ་དེ་རྒྱ་ནག་གི་སྤྱི་ཚོགས་དྲ་ལམ་ནས་བཀག་སྡོམ་བྱས་ཡོད་པའི་གནས་ཚུལ་སྤེལ་འདུག་ཀྱང་། ཧོང་ཀོང་གླིང་ཕྲན་གྱི་ཉིན་རེའི་གསར་འགྱུར་(星島日報) གསར་ཁང་གིས་གནས་ཚུལ་སྤེལ་བའི་ནང་། ཧུ་ཤི་ཅིན་གྱིས། “ང་སྒེར་གྱིས་ཅི་ཡང་བཤད་འདོད་མེད། ཁྱེད་རང་གིས་དྲ་ལམ་ནས་ཀློག་ཐུབ། སྐུ་མཁྱེན། བསམ་ཤེས་མཛོད། “ ཅེས་བཤད་ཡོད་ལུགས་བྲིས་འདུག

གནད་དོན་དབྱེ་ཞིབ་པ་ཁག་ཅིག་གིས། ད་ལྟའི་ཆར་རྒྱ་ནག་གི་དཔལ་འབྱོར་འཕེལ་རྒྱས་སུ་འགྲོ་ཚད་ཧ་ཅང་དལ་ནའང་། ཚོགས་ཆེན་སྟེང་ནས་དམར་ཤོག་ཚོགས་པས་དཔལ་འབྱོར་བཅོས་སྒྱུར་གྱི་འཆར་གཞི་བཏིང་ཟིན་པ་དང་། ཧུ་ཤི་ཅིན་གྱི་དོན་རྐྱེན་དེས་དོན་དངོས་སུ་རྒྱ་ནག་གི་དཔལ་འབྱོར་གནས་བབ་ཐད་དྲང་ལྡོག་གཉིས་ཀྱི་བསམ་ཚུལ་ལ་ཚོད་འཛིན་དང་དམ་དྲག་ནན་མོ་བྱེད་ཀྱི་ཡོད་པའི་རྟགས་མཚན་གསལ་པོ་ཞིག་ཡིན་པའི་ཚོད་དཔག་བྱེད་ཀྱི་ཡོད་འདུག་ལ། ཨ་རིའི་རྒྱལ་སྤྱིའི་གནས་ཚུལ་དབྱེ་ཞིབ་ལྟེ་གནས་ཁང་ (Atlantic Council) གི་རྒྱ་ནག་དབྱེ་ཞིབ་ཚན་པའི་འགན་འཛིན་རོ་བྷར་ཊི་ (Dexter Roberts) ལགས་ཀྱིས། ད་ལྟ་རྒྱ་ནག་གི་དཔལ་འབྱོར་འཕེལ་རྒྱས་ཀྱི་གནས་བབ་ངེས་གཏན་མེད་པར་འགྱུར་བཞིན་ཡོད་སྟབས། རྒྱ་ནག་གི་མགོ་ཁྲིད་ཚོས་སྤྱི་ཚོགས་བརྟན་བརླིང་ལ་གནོད་གཞི་ཆེན་པོ་ཡོད་ལུགས་བཤད་ནས། དཔལ་འབྱོར་ཚོང་ལས་དང་འབྲེལ་བའི་གནས་ཚུལ་རིགས་ལ་བཀག་སྡོམ་ཤུགས་ཆེན་བྱེད་བཞིན་ཡོད་པ་བསྟན་ཡོད། ཅེས་བརྗོད་འདུག

གཞན་ཡང་། ཕྱི་ལོ་ ༢༠༡༩ ལོའི་རྒྱ་ནག་གཞུང་གིས་རྒྱལ་སྟོན་དུས་ཆེན་དང་བསྟུན་རྒྱལ་ཡོངས་ནང་དྲ་ལམ་ཚད་བཀག་ཤུགས་ཆེན་བྱས་པར་བརྟེན། ཧུ་ཤི་ཅིན་(Hu Xijin) ཟེར་བ་དེས་སྒེར་གྱི་ཝེ་པོ་ཐོག རྒྱལ་སྟོན་དུས་ཆེན་བསླེབ་ལ་ཉེ་བ་དང་བསྟུན། དྲ་ལམ་ནང་ཞུགས་རྒྱུ་ཧ་ཅང་ཁག་པོ་འདུག ང་ཚོ་གོ་ལའི་དུས་བབ་ཀྱི་ལས་ཀར་ཡང་དོ་ཕོག་ཐེབས་བཞིན་འདུག ཅེས་དང་། རྒྱལ་ཁབ་འདི་ཉམ་ཆུང་ཞིག་མིན་པ་དང་། རྒྱ་ནག་གི་སྤྱི་ཚོགས་ལ་ཕྱིའི་དྲ་རྒྱར་ཞུགས་རྒྱུའི་གོ་སྐབས་ཆེ་བ་དགོས་ཀྱི་འདུག དེ་ལྟར་བྱས་ཚེ་རྒྱ་ནག་གི་མང་ཚོགས་ཀྱི་བསམ་ཚུལ་དང་། ཚན་རིག་ཞིབ་འཇུག ཕྱིའི་འབྲེལ་ལམ། དེ་བཞིན་རྒྱ་ནག་གི་ཁེ་ཕན་བཅས་ཀྱི་གནས་ཚད་མཐོ་རུ་དང་སྲ་བརྟན་ཡོང་རྒྱུར་ཕན་ཐོགས་ཡོད་སྐོར་བརྗོད་དེ་རྒྱ་ནག་གཞུང་ལ་སྐྱོན་བརྗོད་བྱས་ཡོད་འདུག

ད་ལྟ་རང་ལོ་ ༦༤ ཡིན་པའི་ཧུ་ཤི་ཅིན་ནི་རྒྱ་ནག་གི་རྒྱལ་ས་པེ་ཅིན་དུ་སྐྱེས། ཁོ་ནི་རྒྱ་ནག་དམར་ཤོག་ཚོགས་པའི་འཐུས་མི་དང་། རྒྱ་ནག་གཞུང་གིས་ཆེད་གཉེར་གོ་ལའི་དུས་བབ་གསར་ཁང་གི་རྩོམ་སྒྲིག་པ་ཟུར་བ་དང་གསར་འགོད་པ་ཞིག་ཡིན་ལ།  རྒྱ་ནག་གོ་ལའི་དུས་བབ་ནི་རྒྱ་ནག་དབུས་རླུང་བརྙན་འཕྲིན་ལས་ཁུངས་ཀྱི་ཁྱབ་ཁོངས་རྒྱལ་སྤྱིའི་གསར་འགྱུར་ཚན་པ་ཞིག་ཡིན་ལ། རྒྱ་ནག་དམར་ཤོག་གི་ཆབ་སྲིད་ལངས་ཕྱོགས་སོགས་རྒྱལ་སྤྱིའི་ཐོག་ཁྱབ་བསྒྲགས་གཏོང་ཆེད་ཕྱི་ལོ་ ༡༩༩༧ ནས་ཐད་གཏོང་གི་ཚོད་ལྟའི་ལས་དོན་མགོ་བརྩམས་ཤིང་། ཕྱི་ལོ་ ༢༠༡༩ ཟླ་ ༡༠ ཚེས་ ༨ ཉིན་ཡུ་རོབ་ཀྱི་སྡེ་ཚན་དེ་དབྱིན་ཡུལ་གྱི་རྒྱལ་ས་ལོན་ཊོན་དུ་བཙུགས་ནས་དབྱིན་སྐད་དང་ཨུ་རུ་སུའི་སྐད། སི་པིན་གྱི་སྐད། ཧྥ་རན་སིའི་སྐད། ཨ་རབ་ཀྱི་སྐད་སོགས་ཀྱི་ནང་གནས་ཚུལ་སྤེལ་བཞིན་ཡོད་ཅིང་། ཁོས་མི་ལོ་མང་དག་ཅིག་གི་རིང་རྒྱ་ནག་གོ་ལའི་དུས་བབ་ཀྱི་མགྲིན་ཚབ་པ་ལྟ་བུ་ཞིག་བྱས་ཏེ། རྒྱལ་སྤྱིའི་སྤྱི་ཚོགས་སུ་རྒྱ་ནག་གི་དྲིལ་བསྒྲགས་མང་དག་ཅིག་སྤེལ་ཐབས་བྱས་ཡོད་ཀྱང་། ཕྱི་ལོ་ ༢༠༢༡ ལོའི་ལོ་མཇུག་ཏུ་གློ་བུར་དུ་ལས་གནས་ནས་དགོངས་པ་ཞུས་འདུག

གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།