བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྣེ་ཁྲིད་པའི་སྤྱི་འཐུས་ལྷན་ཚོགས་ཀྱི་ཚོགས་ཆུང་ཞིག་གིས་རྒྱ་གར་རྒྱལ་ས་ལྡི་ལི་ཁུལ་དུ་བོད་དོན་ཞུ་སྐུལ་གནང་མུས་ཡིན་འདུག
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཆུང་ཞིག་གིས་ལྡི་ལིར་བོད་དོན་ཞུ་སྐུལ་གནང་སྐབས། བོད་མི་མང་སྤྱི་འཐུས་ལྷན་ཚོགས་ཀྱི་པར།
ཉེ་ལམ་རྒྱ་གར་གྱི་སྔོན་རྩིས་གྲོས་ཚོགས་འཚོག་མུས་ཡིན་པ་དང་བསྟུན། ཟླ་འདིའི་ཕྱི་ཚེས་ ༥ ནས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྣེ་ཁྲིད་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཆུང་ཞིག་རྒྱ་གར་རྒྱལ་ས་ལྡི་ལི་ཁུལ་དུ་ཆེད་ཕེབས་གནང་སྟེ། རྒྱ་གར་དབུས་གཞུང་གི་བློན་ཆེན་དང་། གྲོས་ཚོགས་གོང་འོག་གཉིས་ཀྱི་འཐུས་མི་སོགས་དང་མཇལ་འཕྲད་ཀྱིས་བོད་དོན་ཞུ་སྐུལ་གནང་མུས་ཡིན་པ་རེད།
ཟླ་འདིའི་ཕྱི་ཚེས་ ༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཆུང་གིས། བྷི་ཇེ་པི་སྲིད་དོན་ཚོགས་པའི་རྒྱ་གར་གྲོས་ཚོགས་འོག་མའི་འཐུས་མི་དང་། རྒྱ་གར་དབུས་གཞུང་གི་བློན་ཆེན་ཟུར་བ་སྐུ་ཞབས་ཧྥ་གྷན་སིངྒ་ཀུ་ལ་ས་ཊེ་(Shri Faggan Singh Kulaste) མཆོག་དང་། རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་པར་དིབ་ཀུ་མར་ཝར་མ་(Shri Pradip Kumar Varma) མཆོག བྷི་ཇེ་པི་སྲིད་དོན་ཚོགས་པའི་རྒྱ་གར་གྲོས་ཚོགས་གོང་མའི་འཐུས་མི་དྷི་པག་པར་ཀཱ་ཤ་ (Shri Deepak Prakash) མཆོག རྒྱ་གར་གྲོས་ཚོགས་འོག་མའི་འཐུས་མི་ལྕམ་སྐུ་བྷན་སུ་རི་ས་ཝ་རཱ་ཇཱ་ (Smt. Bansuri Swaraj) མཆོག རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨར་ཀེ་ཁེར་མི་ (R.K.Khrimey) མཆོག་བཅས་སུ་མཇལ་འཕྲད་གནང་སྟེ་བོད་དོན་ཞུ་སྐུལ་གནང་འདུག
ད་ལན་གྱི་བོད་དོན་ཞུ་སྐུལ་སྐབས། ཕྱི་ལོ་ ༡༩༥༩ ལོ་ནས་རྒྱ་ནག་གཞུང་གིས་བོད་ས་བཙན་འཛུལ་བྱས་ཏེ་བོད་ནང་གི་བོད་མི་རྣམས་ལ་ཚད་ལས་འདས་པའི་སྡུག་སྦྱོང་མནར་གཅོད་གཏོང་མུས་ཡིན་པ་མ་ཟད། ཉེ་ལམ་བོད་ནང་དུ་སྔར་ལས་ལྷག་པའི་དམ་དྲག་བྱས་ཏེ་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཛ་དྲག་ཏུ་འགྱུར་མུས་ཡིན་པའི་སྐོར་དང་། ཉེ་ལམ་རྒྱ་ནག་གཞུང་གིས་ཀིརྟི་དགོན་པ་དང་། ལྷ་མོ་ཀིརྟི་དགོན་གཙོས་བོད་ནང་གི་དགོན་སྡེ་ཁག་ནས་གྲྭ་ཕྲུག་རྣམས་བཙན་ཤེད་ཀྱིས་ཕྱིར་ཕུད་བྱེད་མུས་ཡིན་པའི་ཁར། འདི་ལོའི་ཕྱི་ཟླ་ ༧ ཚེས་ ༢༢ ཉིན་རྒྱ་ནག་གཞུང་གིས་བོད་ནང་བོད་སྐད་ཡིག་སྲུང་སྐྱོབ་ཀྱི་གནས་བབ་མཐོ་བོ་བཟུང་བའི་རྭ་རྒྱ་ཤེས་རིག་ནོར་གླིང་སྒོ་བརྒྱབ་བཅུག་པ་སོགས། བོད་ནང་གི་བོད་སྐད་ཡིག་གི་ཤེས་ཡོན་སྐྱེས་ཚལ་ཁག་བཙན་གྱིས་སྒོ་བརྒྱབ་ཏུ་བཅུག་ནས། བོད་ཀྱི་སྐད་ཡིག་དང་། རིག་གཞུང་། ངོ་བོ་སོགས་ཤུལ་མེད་དུ་བཟོ་ཐབས་ཀྱི་སྲིད་ཇུས་གདིང་མུས་ཡིན་པའི་སྐོར་ལ་ངོ་སྤྲོད་གནང་འདུག
དེ་བཞིན། དབུས་བོད་མིའི་སྒྲིག་འཛུགས་ཀྱིས་གཉིས་ཕན་དབུ་མའི་ལམ་གྱི་སྲིད་ཇུས་ཀྱི་ཐོག་ནས། ཕྱི་ལོ་ ༢༠༠༢ ནས་ ༢༠༡༠ བར་རྒྱ་ནག་གཞུང་དང་ལྷན་གྲོས་མོལ་ཐེངས་དགུ་བྱས་ཡོད་ཀྱང་། ཕྱི་ལོ་ ༢༠༡༠ ནས་རྒྱ་ནག་གཞུང་གིས་ཡ་ལན་མ་བྱས་སྟབས། ད་ལྟ་བོད་རྒྱའི་དཀའ་རྙོག་དེ་སེལ་མ་ཐུབ་པར་ལྷག་བསྡད་ཡོད་ཀྱང་། དབུས་བོད་མིའི་སྒྲིག་འཛུགས་ཀྱིས་བོད་རྒྱའི་ཞི་མོལ་བསྐྱར་གསོ་ཡོང་ཐབས་ལ་རེ་བ་བཅང་མུས་ཡིན་སྐོར་སོགས་ངོ་སྤྲོད་གནང་འདུག
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྣེ་འཁྲིད་པའི་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཁྲོད། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་དང་། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས། སྤྱི་འཐུས་ཙ་ནེ་ཚང་དོན་གྲུབ་བཀྲ་ཤིས་ལགས། སྤྱི་འཐུས་དགེ་བཤེས་རྔ་བ་གངས་རི་ལགས། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས། སྤྱི་འཐུས་ཚེ་རིང་དབྱངས་ཅན་ལགས་བཅས་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
