ཧི་མ་ཅལ་མངའ་སྡེའི་ཉེན་རྟོག་པའི་རྩེད་འགྲན་ཚོགས་ཆེན་སྐབས་ ༥༢ པའི་ཐོག་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་སུ་ཆེ་བསྟོད་གཟེངས་རྟགས་ཤིག་གནང་ཡོད་འདུག
ཕྱི་ཟླ་ ༧ ཚེས་ ༢༤ ཉིན་ཧི་མ་ཅལ་མངའ་སྡེའི་ཀངྒ་རྫོང་གི་སྤྱི་ཁྱབ་ཉེན་རྟོག་པ་ཟུར་པ་དང་རྒྱ་གར་གྱི་དམག་སྡེ་གཉིས་པའི་དམག་དཔོན་གཞོན་པ་སྐུ་ཞབས་ཀུ་ཤཱལ་ཤཱར་མ་མཆོག་གི་མཚན་ཐོག་ནས་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་སུ་ཆེ་བསྟོད་གཟེངས་རྟགས་ཤིག་གནང་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་ས་གནས་མགོ་འཛིན་དཀོན་མཆོག་མིག་དམར་ལགས་སུ་གཟེངས་རྟགས་དེའི་སྐོར་དྲིས་པར་ཁོང་གིས། སྐུ་ཞབས་ཀུ་ཤཱལ་ཤཱར་མ་མཆོག་ཀངྒ་རྫོང་གི་སྤྱི་ཁྱབ་ཉེན་རྟོག་པ་ཡིན་པའི་སྐབས་སུ་ང་ཚོ་དང་འབྲེལ་ལམ་ཡག་པོ་བྱུང་སྟེ། ལས་དོན་མང་པོ་ཞིག་མཉམ་ལས་བྱ་རྒྱུ་བྱུང་། ལོ་ལྟར་ཧི་མ་ཅལ་མངའ་སྡེ་ཡོངས་ཀྱི་ཉེན་རྟོག་པའི་རྩེད་འགྲན་གྱི་ཚོགས་ཆེན་ཞིག་འཚོག་བཞིན་ཡོད་པར་དྷ་ས་ས་གནས་མགོ་འཛིན་ལས་ཁུངས་ནས་རོགས་རམ་རྒྱབ་སྐྱོར་ཞུ་བཞིན་ཡོད། དེ་བཞིན་མི་མང་གི་བདེ་འཇགས་དང་འབྲེལ་བའི་ལས་ཀ་མང་པོ་ཞིག་མཉམ་དུ་བྱེད་བཞིན་ཡོད་དུས། ཉེ་ཆར་ཁོང་གིས་ང་ལ་འབྲེལ་བ་བྱས་ཏེ་གཟེངས་རྟགས་ཆ་རྐྱེན་ཞིག་བསྐྲུན་རྒྱུ་ཡིན་པའི་འབྲེལ་བ་བྱུང་ཞིང་། ཁ་སྔོན་ང་མེད་པའི་སྐབས་སུ་གཟེངས་རྟགས་དེ་ས་གནས་མགོ་འཛིན་ལས་ཁུངས་སུ་ཕུལ་འདུག གཟེངས་རྟགས་ཀྱི་ནང་དོན་གཙོ་བོ་དྷ་སའི་ས་གནས་མགོ་འཛིན་ལས་ཁུངས་དང་ཉེན་རྟོག་པ་མཉམ་ལས་ཀྱི་ཐོག་མ་འོངས་པར་སྤྱི་ཚོགས་ཡར་རྒྱས་ཀྱི་ལས་དོན་བྱེད་ཕྱོགས་སྐོར་རེད། ཅེས་འགྲེལ་བརྗོད་གནང་བྱུང་།
ཁོང་གིས། སྤྱིར་ས་གནས་མགོ་འཛིན་གཅིག་པོ་མ་རེད། བོད་པ་སུ་རུང་ཞིག་ལ་སྤྱི་པའི་འགན་འཁུར་ནས་གཟེངས་རྟགས་ཐོབ་ན་ཡག་པོ་རེད་བསམ་གྱི་འདུག ལས་ཀ་བྱེད་པའི་སྐབས་གཙོ་བོ་ང་ཚོ་ཚང་མའི་ཤེས་རྟོགས་བྱུང་བ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ལས་ང་ཚོས་ཞབས་ཞུ་སྒྲུབ་པའི་གོ་སྐབས་ཤིག་བྱུང་ཡོད་པ་རེད། ང་ལ་མཚོན་པ་ཡིན་ནའང་ཕྱི་ལོ་ ༡༩༩༧ ལོར་བོད་ནས་རྒྱ་གར་དུ་བཙན་བྱོལ་དུ་འབྱོར་བའི་ཕྲུ་གུ་ཞིག་ཡིན། བོད་ཕྲུག་ཁྱིམ་སྡེ་ནས་སློབ་སྦྱོང་བྱེད་པའི་གོ་སྐབས་ཐོབ། བོད་མིའི་སྒྲིག་འཛུགས་ཀྱི་མཐུན་སྦྱོར་འོག་མི་མང་གིས་འོས་བླུགས་ཏེ་ཞབས་སྟེགས་འདི་འདྲ་ཞིག་ལ་བསྐྱལ་ཡོད་པས། མི་མང་གི་ཆེད་དུ་ཧུར་ཐག་འབད་ཐག་གིས་ལས་ཀ་བྱེད་རྒྱུ་རང་ཉིད་ཀྱི་ལས་འགན་ཡིན་པ་མ་ཟད། མ་འོངས་བའི་ལས་དོན་བྱེད་ཕྱོགས་ལ་འཆར་གཞི་སྒྲིག་གི་ཡོད་པའི་ཐོག རྒྱ་གར་གྱི་སྤྱི་ཚོགས་དང་གནད་ཡོད་མི་སྣ་རྣམས་ཀྱིས་ངོས་འཛིན་བྱེད་ཀྱི་ཡོད་པའི་ཚོར་བ་བྱུང་སོང་། ཞེས་འགྲེལ་བརྗོད་གནང་བྱུང་།
བོད་པ་དང་རྒྱ་གར་ཡུལ་མིའི་མཉམ་ལས་ཀྱི་གལ་གནད་སྐོར་ལ་ཁོང་གིས། སྤྱིར་ང་ཚོ་སྐྱབས་བཅོལ་བའི་གནས་སྟངས་འོག་བསྡད་ཡོད་དུས། རྒྱ་གར་གྱི་ཡུལ་ཁྲིམས་འཁུར་རྒྱུ་ཧ་ཅང་གལ་ཆེན་པོ་རེད། ང་ཚོས་ལས་དོན་མང་པོ་ཞིག་རྒྱ་གར་ཡུལ་མི་དང་འཛིན་སྐྱོང་མཉམ་དུ་བྱེད་དགོས་ཀྱི་ཡོད་པར་བརྟེན། དྷ་ས་ས་གནས་མགོ་འཛིན་ལས་ཁུངས་ཀྱིས་ད་ལྟ་བར་ལས་དོན་ཁག་ལ་འབད་བརྩོན་བྱེད་མུས་ཡིན་པ་ཟད། མ་འོངས་བའང་བོད་པའི་སྤྱི་ཚོགས་དང་རྒྱ་གར་གྱི་སྤྱི་ཚོགས་གཉིས་མཐུན་ལམ་ཡག་པོ་ཡོང་བའི་ཆེད་དུ་འཕྱར་གྲུ་མཉམ་འདེགས་བྱ་རྒྱུ་གལ་ཆེན་པོ་རེད། ཅེས་བརྗོད་བྱུང་།
ཆེ་བསྟོད་གཟེངས་རྟགས་ཀྱི་འཚམས་འཕྲིན་ནང་། ཁྱེད་ཀྱིས་རིན་ཐང་བྲལ་བའི་རོགས་རམ་མང་པོ་གནང་བར་ངེད་ཀྱིས་སེམས་གཏིང་ནས་བཀའ་དྲིན་ཆེ་ཞུ་རྒྱུ་ཡིན། ཁྱེད་ཀྱི་ལྷག་བསམ་རྣམ་དག་ཐོག་ནས་མཉམ་ལས་བྱེད་རྒྱུ་བྱུང་བར་བསྔགས་བརྗོད་བྱ་འོས་པ་ཞིག་རེད། ཧི་མ་ཅལ་མངའ་སྡེའི་ཉེན་རྟོག་པའི་རྩེད་འགྲན་ཚོགས་ཆེན་སྐབས་ ༥༢ པའི་རིག་གཞུང་མཛད་སྒོའི་ཐོག་ཁྱེད་ཀྱི་མཉམ་ལས་ལ་ཐུགས་རྗེ་ཆེ་ཞུ་རྒྱུ་ཡིན། ཉེན་རྟོག་པ་དང་བོད་མིའི་སྒྲིག་འཛུགས་གཉིས་འདི་ལྟ་བུའི་མཉམ་ལས་ཀྱིས་སྤྱི་ཚོགས་ཀྱི་ལས་དོན་ཡར་རྒྱས་གཏོང་བ་དང་། མི་མང་ལ་ཞབས་ཞུ་སྒྲུབ་པའི་ལས་དོན་ཚགས་ཚུད་ཡོང་བར་ཕན་ཐོགས་ཆེ་བའི་ཡིད་ཆེས་བྱེད་ཀྱི་ཡོད། ཁྱེད་ཀྱིས་མུ་མཐུད་དུ་མཉམ་ལས་ཀྱི་ལས་དོན་ཡར་རྒྱས་གཏོང་བར་འབད་བརྩོན་བྱེད་པའི་རེ་འདུན་བྱེད་ཀྱི་ཡོད་ཅིང་། མ་འོངས་པར་ང་ཚོས་མུ་མཐུད་དུ་སེམས་ཤུགས་ཀྱི་ཐོག་ནས་མཉམ་ལས་བྱ་ཐུབ་པའི་རེ་འདུན་ཡོད། ཅེས་འཁོད་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
