བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་ཁྲིད་གཞོན་པ་ཟུར་བ་ཝང་ཡུང་གིས་ཁྲིམས་འགལ་ཚབས་ཆེན་བྱས་པའི་ནག་ཉེས་འོག་གཞུང་གི་ལས་གནས་དང་དམར་ཤོག་ཚོགས་པའི་ཚོགས་ཁོངས་ནས་ཕྱིར་ཕུད་བྱས་ཡོད་ལུགས་བསྒྲགས་འདུག
ཞི་ཅིན་ཕིན་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བ་སོགས་ཀྱི་ནག་ཉེས་འོག་ཁྲིམས་ཆད་ཕོག་གི་ཡོད་པ་ལྟར། ཉེ་ལམ་རྒྱ་ནག་དམར་ཤོག་སྒྲིག་ཁྲིམས་ཞིབ་བཤེར་ཁང་དང་རྒྱལ་ཁབ་ལྟ་ཞིབ་ཁང་གིས། བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་ཁྲིད་གཞོན་པ་ཟུར་བ་ཝང་ཡུང་གིས་དམར་ཤོག་གི་ཁྲིམས་སྒྲིག་དང་འགལ་བའི་ནག་ཉེས་ཚབས་ཆེན་བསགས་ཏེ་དོགས་གཞིའི་འོག་ཞིབ་བཤེར་བྱས་ཡོད་སྐོར་བསྒྲགས་འདུག
དེའི་ཐད་རྒྱ་ནག་སྒྲིག་ཁྲིམས་ཞིབ་བཤེར་ཁང་དང་རྒྱལ་ཁབ་ལྟ་ཞིབ་ཁང་ཟེར་བས། ཝང་ཡུང་གིས་ཀོས་ཀྲུའུ་ཞིང་ཆེན་མཁའ་ལམ་འགྲིམ་འགྲུལ་ཁང་གི་འགན་འཛིན་གཞོན་པ་དང་། བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་ཁྲིད་གཞོན་པ་སོགས་ཀྱི་གོ་གནས་བེད་སྤྱོད་ལོག་པར་བཏང་སྟེ། ལས་གནས་དང་མི་སྒེར་གྱི་ཁེ་ལས། ལྐོག་རྔན་འབོར་ཆེན། གཞུང་གི་དངོས་ཟོག་ཚོང་སྒྱུར་བྱས་ནས་ཁེ་བཟང་བླངས་བ་སོགས་ཀྱི་དོགས་གཞིའི་འོག་ནས་ཞིབ་བཤེར་བྱས་ཏེ། ལས་གནས་དང་། དམར་ཤོག་ཚོགས་ཁོངས་ནས་ཕྱིར་ཕུད་དང་། བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་ཚོགས་ཆེན་ཐེངས་ ༡༠ ཟེར་བའི་འཐུས་མིའི་ཐོབ་ཐང་ཕྱིར་བསྡུ་བྱས་ཡོད་ལུགས་བསྒྲགས་འདུག
ཝང་ཡུང་ནི་ཕྱི་ལོ་ ༡༩༧༡ ལོར་སི་ཁྲོན་ཞིང་ཆེན་ཧུའུ་ཀྲུའུ་ནས་ཡིན་ཞིང་། ཕྱི་ལོ་ ༡༩༩༡ ལོར་སི་ཁྲོན་མཐོ་སློབ་ནས་རྩིས་འཕྲུལ་རིག་པའི་སྡེ་ཁག་ཏུ་སློབ་གཉེར་བྱས། ཕྱི་ལོ་༢༠༡༡ ལོར་ཀོས་ཀྲུའུ་ཞིང་ཆེན་མི་མང་གནམ་ཐང་གི་བདེ་འཇགས་ཚན་པའི་མགོ་ཁྲིད་བྱས། ཕྱི་ལོ་ ༢༠༡༥ ནས་ ༢༠༡༩ ཀོས་ཀྲུའུ་ཞིང་ཆེན་གནམ་ཐང་གི་འགན་འཛིན་གཞོན་པ་དང་། གནམ་ཐང་འཛུགས་སྐྲུན་སྤྱི་ཁྱབ་འགན་འཛིན་སོགས་བྱས། ཕྱི་ལོ་ ༢༠༢༡ ལོའི་ཟླ་ ༤ བར་བོད་རང་སྐྱོང་ལྗོངས་མི་མང་སྲིད་གཞུང་ཟེར་བའི་མགོ་ཁྲིད་གཞོན་པ་བྱས། འདི་ལོའི་ཕྱི་ཟླ་ ༡ ཚེས་ ༢༩ ཉིན་རྒྱ་ནག་རྒྱལ་ཡོངས་ལྟ་ཞིབ་ཁང་གིས་ཞིབ་བཤེར་བྱེད་མགོ་ཚུགས་ཡོད།
དེ་བཞིན་བོད་རང་སྐྱོང་ལྗོངས་མི་མང་སྲིད་གཞུང་ཟེར་བའི་དམར་ཤོག་ཚོགས་པའི་ཁོངས་མི་དང་དྲུང་ཡིག་ཆེན་མོ། གཞུང་དོན་ཁང་གི་དམར་ཤོག་ཚོགས་པའི་དྲུང་ཡིག་ཀྲུའུ་ཆང་ལ་ཁྲིམས་འགལ་ཚབས་ཆེན་བྱས་པའི་དོགས་གཞི་འོག བོད་རང་སྐྱོང་ལྗོངས་སྒྲིག་ཁྲིམས་ལྟ་ཞིབ་ཁང་ཟེར་བས་ཞིབ་བཤེར་བྱེད་བཞིན་ཡོད་འདུག་ལ། འདི་ལོ་གཅིག་པུར་བོད་རང་སྐྱོང་ལྗོངས་ཟེར་བའི་ནང་མཐོ་རིམ་མགོ་འཁྲིད་བདུན་གནས་དབྱུང་བཏང་སྟེ་ཞིབ་བཤེར་བྱས་ཡོད་འདུག དེ་ཡང་འདི་ལོའི་ཕྱི་ཟླ་དང་པོའི་ནང་བོད་རང་སྐྱོང་སྲིད་གཞུང་དམར་ཤོག་ཚོགས་པའི་མགོ་འཁྲིད་གཞོན་པ་ཀྲང་ཧོང་ཙི་དང་། ཕྱི་ཟླ་ ༣ པའི་ནང་བོད་རང་སྐྱོང་ལྗོངས་དམངས་ཆེན་གྱི་རྒྱུན་ལས་མགོ་འཁྲིད་གཞོན་པ་ཇི་གོ་ཀང་། ཕྱི་ཟླ་ ༦ ཚེས་ ༡༤ ཉིན་བོད་རང་སྐྱོང་ལྗོངས་རྒྱུན་ལས་ལྷན་ཁང་གི་མགོ་འཁྲིད་གཞོན་པ་ཅང་ཅེ། ཕྱི་ཟླ་ ༦ ཚེས་ ༡༦ ཉིན་བོད་རང་སྐྱོང་ལྗོངས་ཟེར་བའི་དྲུང་ཆེ་ཟུར་པ་ཝུའུ་ཡིན་ཅེ་སྔ་རྗེས་སུ་གནས་དབྱུང་བཏང་སྟེ་ཞིབ་བཤེར་བྱས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
