རྒྱ་ནག་གིས་ཐའེ་ཝན་གྱི་གནད་ཡོད་མགོ་ཁྲིད་མི་སྣ་བཅུ་ཁ་བྲལ་བའི་མིང་འོག་ཏུ་བཅུག་པ་དང་ས་མཚོ་གནམ་གསུམ་གྱི་ཐོག་ནས་ཐའེ་ཝན་ལ་འཇིགས་སྐུལ་བྱེད་བཞིན་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པར་གཞིགས་ན། ད་ལྟ་རྒྱ་ནག་གིས་ཐའེ་ཝན་གྱི་མགོ་ཁྲིད་གནད་ཡོད་མི་སྣ་ ༡༠ ལ ཁ་བྲལ་རིང་ལུགས་པའི་ཉེས་མིང་གཡོགས་ཏེ། རྒྱ་ནག་མི་མང་གིས་ཐའེ་ཝན་གྱི་གནད་ཡོད་མགོ་ཁྲིད་དེ་དག་གི་ནག་ཉེས་རིགས་ཀྱི་གནས་ཚུལ་བརྒྱུད་བསྒྲགས་བྱེད་དགོས་པའི་སྐུལ་མ་བྱས་འདུག་ལ། དེ་འབྲེལ་རྒྱ་ནག་གཞུང་འབྲེལ་གོ་ལའི་དུས་བབ་ཟེར་བས། ཐའེ་ཝན་གྱི་མགོ་ཁྲིད་ཀླད་པ་མཁྲེགས་བཟུང་ཅན་བཅུ་ཡིས། ཁ་བྲལ་དང་འབྲེལ་བའི་ལས་འགུལ་སྤེལ་བ་དང་མཉམ་ཞུགས་བྱས་དང་བྱེད་བཞིན་ཡོད་སྟབས། མི་དེ་དག་ལ་ཁྲིམས་ཐོག་ནས་ཆད་པ་གཅོད་དགོས་ཡོད་པ་ལས། ད་རེབ་ཀྱི་འགུལ་སྐྱོད་འདི་ཐའེ་ཝན་གྱི་རྒྱ་ཆེ་བློ་མཐུན་མི་མང་ལ་དམིགས་པ་ཞིག་མིན། ཞེས་བརྗོད་འདུག
དེ་འབྲེལ་གནས་ཚུལ་ནང་། ད་ལྟའི་ཐའེ་ཝན་གྱི་སྲིད་འཛིན་གཞོན་པ་ཞའོ་མེ་ཆིན ་(蕭美琴) ལགས་དང་ཐའེ་ཝན་བདེ་སྲུང་ལྷན་ཁང་གི་སྤྱི་ཁྱབ་འགན་འཛིན་ (Joseph Wu) ལགས་དང་འགན་འཛིན་གཞོན་པ (Lin Fei-fan)། དེ་བཞིན་ཐའེ་ཝན་རང་བཙན་དང་མང་གཙོ་གཙོ་འདོན་བྱེད་མཁན་གྱི་དམངས་གཙོ་ཡར་ཐོན་ཚོགས་པའི་འཐུས་མི་རྒན་པ་ཤ་སྟག་མིང་འདོན་བྱས་ཡོད་འདུག་མོད། ཨ་རིའི་ནེའུ་ཡོག་དུས་བབ་ཀྱི་་གནས་ཚུལ་ནང་། ཐའེ་ཝན་གྱི་རྒྱ་ནག་སྐམ་ས་ཆེན་མོའི་ལས་དོན་ལྷན་ཁང་གིས། རྒྱ་ནག་གིས་ཐའེ་ཝན་ཐོག་བཟུང་བའི་ལྟ་ཚུལ་གྱི་འོག་ནས་གནས་སྐབས་ཐའེ་ཝན་མི་མང་རྒྱ་ནག་དང་ཧོང་ཀོང་། ཨོ་མན་བཅས་སུ་སོང་ན་བདེ་འཇགས་མིན་པའི་ཉེན་བརྡ་བཏང་ཡོད་ཅིང་། ཐའེ་ཝན་སྲིད་འཛིན་ལེ་ཆིན་ཏི་ལགས་ཀྱིས། རྒྱ་ནག་གཞུང་རྒྱལ་མཚམས་ལས་བརྒལ་ཏེ་ཐའེ་ཝན་མི་མང་གི་ཆབ་སྲིད་ཀྱི་མངོན་འདོད་དང་ཐོབ་ཐང་ལ་ཐེ་ཇུས་དང་ཉེས་ཆད་ཟེར་བ་གཅོད་པའི་ཐོབ་ཐང་མེད། ཅེས་དང་། དམངས་གཙོ་ནི་ནག་ཉེས་མ་རེད། སྲིད་དབང་སྒེར་གཅོད་ནི་ངན་སེམས་དང་ནག་ཉེས་ཡིན། ཞེས་བརྗོད་ཡོད་འདུག
ཡང་སྲིད་འཛིན་ལེ་ཆིན་ཏི་ལགས་ཀྱིས། ཐའེ་ཝན་གྱིས་རང་བཙན་འདོད་པའི་འབོད་སྐུལ་ཧ་ལམ་མཚམས་འཇོག་བྱས་ཡོད་པས། རྒྱ་ནག་དང་ཐའེ་ཝན་གཉིས་ནས་གྲོས་མོལ་བྱས་ཏེ། ཐའེ་ཝན་རང་སྲིད་འཛིན་སྐྱོང་བྱས་ནས་སྡོད་རྒྱུ་ཡིན་སྐོར་བསྒྲགས་འདུག་ནའང་། རྒྱ་ནག་གིས་ཐའེ་ཝན་གྱི་འབོད་སྐུལ་དེ་དག་ལ་ཆ་འཇོག་མི་བྱེད་པར་ཐའེ་ཝན་མཚོ་འགག་ཁུལ་དུ་དམག་དཔུང་ངོམ་སོ་བྱེད་པ་སོགས་བྱས་ནས་ཐའེ་ཝན་ལ་མུ་མཐུད་འཇིགས་སྐུལ་བྱེད་ཀྱིན་ཡོད་འདུག་ལ། དེ་རིང་ཕྱི་ཚེས་ ༩ ཉིན་རྒྱ་ནག་གིས་ཐའེ་ཝན་གྱི་རྒྱལ་སྲུང་མངའ་ཁུལ་དུ་དམག་དོན་གནམ་གྲུ་ ༡༨ དང་དམག་དོན་མཚོ་གྲུ་ ༩ སྡེབ་གཏོང་བྱས་ཏེ། རྒྱ་ནག་བཅིངས་གྲོལ་དམག་མི་ཟེར་བས་གནམ་མཚོ་གཉིས་ནས་ཐའེ་ཝན་མི་དམངས་ལ་འཇིགས་སྐུལ་བྱས་ཡོད་སྟབས། ཐའེ་ཝན་དམག་དོན་བདེ་སྲུང་ཚན་པས་ཀྱང་གནམ་མཚོ་གཉིས་སུ་དམག་མི་མངགས་ནས་རྒོལ་ལན་བསློགས་ཡོད་འདུག
ཉེ་བའི་ལོ་ཤས་ནང་རྒྱ་ནག་གིས་ཐའེ་ཝན་མཚོ་འགག་ཁུལ་དུ་ས་མཚོ་གནམ་གསུམ་གྱི་ཐོག་ནས་འཇིགས་སྐུལ་བྱེད་པའི་དམག་དོན་ལས་འགུལ་ཇེ་མང་དུ་ཕྱིན་ཡོད་ཅིང་། འདི་ལོའི་ཕྱི་ཟླ་ ༣ ནང་རྒྱ་ནག་གིས་ཐའེ་ཝན་ཐོག་མཁྲེགས་བཟུང་བྱེད་པའི་སྲིད་ཇུས་ལག་བསྟར་བྱེད་སླད་རྒྱལ་སྲུང་གི་འགྲོ་གྲོན་བརྒྱ་ཆ་ ༧།༢ སྤར་ཡོད་པ་མ་ཟད། རྒྱ་ནག་ཞི་བའི་གཅིག་གྱུར་ཞེས་པའི་ཐ་སྙད་དེ་མེད་པར་བཟོས་ཏེ། ཐའེ་ཝན་རྒྱ་ནག་གི་འོག་ཏུ་ཞི་བའི་ངང་ནས་ཡོང་རྒྱུའི་དུས་སྐབས་རྫོགས་ཟིན་པའི་ཐ་ཚིག་བསྒྲགས་ཡོད་ལ། ཕྱི་ལོ་ ༢༠༢༧ ལོ་ནི་རྒྱ་ནག་བཅིངས་གྲོལ་དམག་མིའི་སྒྲིག་འཛུགས་དབུ་བརྙེས་ནས་ལོ་ངོ་བརྒྱ་འཁོར་གྱི་ཡོད་པ་དང་བསྟུན། ཞི་ཅིན་ཕིན་སྐབས་བཞི་བའི་རྒྱ་ནག་གི་སྲིད་འཛིན་དུ་བསྡད་དེ། ཕྱི་ལོ་ ༢༠༣༠ ལོར་རྒྱ་ནག་བཅིངས་གྲོལ་དམག་གིས་ཐའེ་ཝན་བཙན་བཟུང་བྱེད་སྲིད་སྐོར་སོགས་རོའུ་ཊར་གསར་ཁང་གིས་བརྗོད་འདུག
ཉེ་ལམ་ཐའེ་ཝན་གྱི་རྒྱལ་སྲུང་བདེ་འཇགས་དང་འབྲེལ་བའི་ལྷན་ཁང་ཞིག་གིས་ཞིབ་འཇུག་བྱས་པ་ལྟར་ན། གལ་ཏེ་ཐའེ་ཝན་དང་རྒྱ་ནག་བར་དམག་འཁྲུག་ཤོར་ཚེ། ཨ་རིས་ཐའེ་ཝན་ལ་རྒྱབ་སྐྱོབ་བྱ་ངེས་རེད་ཅེས་པར་ཐའེ་ཝན་གྱི་མི་མང་ཤོས་ཀྱིས་ངོས་ལེན་ཡིད་ཆེས་བྱས་ཡོད་ཅིང་། ཐའེ་ཝན་གྱི་ལོ་ ༤༠ འོག་གི་གཞོན་སྐྱེས་ཚོས་ཐའེ་ཝན་རང་བཙན་ལ་རྒྱབ་སྐྱོར་ཤུགས་ཆེན་བྱེད་བཞིན་ཡོད་པ་དང་། རྒྱ་ནག་ཏུ་ལོག་འདོད་རྩ་བ་ཉིད་ནས་མེད་པ་སོགས་གསལ་འདོན་བྱས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
