དེ་རིང་ས་རཱ་མཐོ་སློབ་དབུ་བརྙེས་ནས་ལོ་ངོ་ཉེར་དྲུག་འཁོར་བའི་མཛད་སྒོ་དང་བསྟུན་རྩོམ་རིག་དང་ལོ་རྒྱུས་གཙུག་ལག་རབ་འབྱམས་པའི་མཐར་ཕྱིན་སློབ་མ་ ༡༢ འདུག
དེ་རིང་སྔ་དྲོ་ཆུ་ཚོད་ ༡༠།༣༠ སྟེང་ས་རཱ་མཐོ་རིམ་སློབ་གཉེར་ཁང་དུ་ས་རཱ་མཐོ་སློབ་དབུ་བརྙེས་ནས་ལོ་ངོ་ ༢༦ འཁོར་ཞིང་། མཐོ་སློབ་ཀྱི་སྐབས་ལྔ་བའི་ལོ་རྒྱུས་དང་སྐབས་བཞི་བའི་རྩོམ་རིག་གཙུག་ལག་རབ་འབྱམས་པ་སློབ་ཐོན་བཅས་ཀྱི་མཛད་སྒོ་ཞིག་འཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོར་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། རིག་སློབ་མ་ལུག་གཉིས་ཀྱི་དྲུང་ཆེ་བསྟན་འཛིན་སྟོབས་རྒྱས་ལགས། ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱི་གཙོས་སློབ་སྤྱི་གཞོན་པ་དགེ་བཤེས་འཇིགས་མེད་བློ་གྲོས་ལགས། ལོ་རྒྱུས་དང་རྩོམ་རིག་སོགས་རིགས་ཚན་ཁག་གི་སློབ་དཔོན་བགྲེལ་གཞོན་རྣམ་པ་གཙོ་བྱས་པའི་དགེ་ལས་དང་སློབ་མ་བཅས་འཛོམས་འདུག
མཛད་སྒོའི་སྟེང་སྐུ་མགྲོན་གཙོ་བོ་དགེ་བཤེས་ལྷག་རྡོར་ལགས་ནས། འདི་ལོར་ས་རཱ་མཐོ་སློབ་ཀྱི་སྐབས་ལྔ་བའི་ལོ་རྒྱུས་གཙུག་ལག་རབ་འབྱམས་པའི་སློབ་མ་ ༧ དང་རྩོམ་རིག་གཙུག་ལག་རམ་འབྱམས་པའི་སློབ་མ་གྲངས་ ༥ བཅས་སློབ་མ་ཁྱོན་ ༡༢ ལ་བསླབ་པ་མཐར་སོན་གྱི་ངོས་འཛིན་ལག་འཁྱེར་གནང་སོང་ལ། སྐབས་དེར་སློབ་སྤྱི་པ་སངས་ཚེ་རིང་ལགས་ཀྱིས། ས་རཱ་མཐོ་སློབ་དེ་ཐོག་མར་ཕྱི་ལོ་ ༡༩༩༡ ལོར་ཐོག་མར་ས་ཆ་ཉོ་སྒྲུབ་བྱས་པ་ནས་ཕྱི་ལོ་ ༡༩༩༨ ལོའི་ཟླ་ ༨ ཚེས་ ༡༣ ཉིན་རིགས་སློབ་དངོས་སུ་དབུ་འཛུགས་གནང་བའི་བརྒྱུད་རིམ་སོགས་ངོ་སྤྲོད་གནང་གྲུབ་མཚམས། ས་རཱ་མཐོ་རིམ་སློབ་གཉེར་ཁང་ནི་བོད་ཀྱི་སྐད་ཡིག་གཙོ་བོར་བྱས་པའི་རྒྱལ་རབས་ལོ་རྒྱུས་དང་། ཆོས་དང་རིག་གཞུང་ཉར་ཚགས་སྲུང་སྐྱོབ་དང་གོང་སྤེལ་གཏོང་སླད་བཙུགས་པའི་ཆེད་སྦྱོང་ཤེས་རིག་གི་ཞིང་ས་ཤིག་ཡིན་པ་ལྟར། ད་ལྟའི་ཆར་ས་རཱ་མཐོ་སློབ་ནང་དགེ་རྒན་གྲངས་ ༥༨ དང་སློབ་མ་ ༢༣༣ བཅས་ཁྱོན་དགེ་སློབ་གྲངས་ ༢༩༡ ཡོད་ཅིང་། ད་སྔ་བར་ས་རཱ་མཐོ་རིམ་སློབ་གཉེར་ཁང་ནས་ལོ་རྒྱུས་གཙུག་ལག་རབ་འབྱམས་པའི་སློབ་མ་ ༢༠ ལྷག་དང་རྩོམ་རིག་གཙུག་ལག་རབ་འབྱམས་པའི་སློབ་མ་ ༢༠ བཅས་སློབ་མཐར་ཕྱིན་ཡོད་སྐོར་བརྗོད་སོང་།
སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། ས་རཱ་བོད་ཀྱི་མཐོ་སློབ་དབུ་བརྙེས་ནས་ལོ་ངོ་ ༢༦ འཁོར་བའི་དུས་ཡུན་རིང་བོད་མིའི་སྤྱི་ཚོགས་ལ་ཕན་རླབས་ཆེན་པོ་བྱུང་ཡོད་པ་དང་། རྣམ་རྒྱལ་གྲྭ་ཚང་གི་རིགས་སློབ་གཉིས་ནི་གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་འོག་བྱུང་བ་ཞིག་ཡིན་པར་བརྟེན་མཐོ་སློབ་དེར་བྱིན་རླབས་ཆེ་བས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་དྲན་པའི་ཐོག་ནས་༧ཁོང་གི་སྐུ་གཟུགས་གསལ་ཐང་ཡོང་བའི་སྨོན་འདུན་ཞུ་གལ་ཆེ་ཞིང་། ས་རཱ་མཐོ་སློབ་གསར་འཛུགས་གནང་མཁན་རྒན་བློ་བཟང་རྒྱ་མཚོ་མཆོག་དབུས་པའི་རྒན་རབས་པ་རྣམས་ཀྱི་བཀའ་དྲིན་དྲན་རྒྱུ་གལ་ཆེན་ཡིན་སྐོར་དང་། སློབ་སྦྱོང་གནང་བའི་བརྒྱུད་རིམ་ཁྲོད་མི་གཅིག་ཡག་པོ་བཟོ་ཐུབ་པ་ཡིན་ན། མི་དེ་བསྟན་འགྲོ་སྤྱི་དང་ཡང་སྒོས་བོད་སྤྱི་བའི་དོན་དུ་ཞབས་འདེགས་ཆེན་པོ་སྒྲུབ་མཁན་ཞིག་ཆགས་ཀྱི་ཡོད་པར་བརྟེན། ད་ལྟ་མི་གཞན་གྱིས་ས་རཱ་མཐོ་སློབ་ནས་བོད་པའི་སྤྱི་ཚོགས་ནང་ཞབས་འདེགས་བསྒྲུབས་པའི་ཆེ་མཐོང་ཤུགས་ཆེན་མངོན་ཡོང་གི་ཡོད་པ་དེ་མུ་མཐུད་གནང་དགོས་པའི་འབོད་སྐུལ་བཅས་ཞུས་སོང་།
