ཨོ་གླིང་གྲོས་ཚོགས་གོང་འོག་དང་གནད་ཡོད་མི་སྣར་མཇལ་འཕྲད།

བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཨོ་གླིང་གྲོས་ཚོགས་གོང་འོག་གཉིས་ཀྱི་གནད་ཡོད་མི་སྣ་མང་པོར་མཇལ་འཕྲད་གནང་སྟེ་བོད་ནང་གི་ཛ་དྲག་གནས་སྟངས་དང་བོད་དོན་ཐོག་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་འདུག

Senator Deborah O’Neill, MP Susan Templeman, Senator Dean Smith, Former Deputy Prime Minister & MP Michael Francis McCormack, and Former Speaker of the House and MP Andrew Bruce Wallace.

ཟླ་འདིའི་ཕྱི་ཚེས་ ༡༦ ནས་ ༢༤ བར་བོད་མི་མང་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་དང་། ཚེ་རིང་སྒྲོལ་མ་ལགས། ཆོས་གྲགས་རྒྱ་མཆོ་ལགས། རྡོ་རིང་བསྟན་འཛིན་ཕུན་ཚོགས་ལགས་བཅས་ཀྱི་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་གིས། ཨོ་གླིང་དང་ནེའུ་ཛི་ལེན་ཌི་གཉིས་སུ་གཞུང་འབྲེལ་སྐོར་སྐྱོད་གནང་མུས་ཡིན་པ་ལྟར། ཁ་སང་ཕྱི་ཚེས་ ༢༠ ཉིན་གྱི་སྔ་དྲོར་ཨོ་གླིང་ཐའེ་ཝན་གཞུང་ཚབ་ཆེན་མོ་སྐུ་ཞབས་ཞུས་ཡེས་ཐིན་(Douglas Yu-tien Hsu) ལགས་དང་མཇལ་འཕྲད་གནང་ཡོད་ཅིང་། སྐབས་དེར་བོད་དང་ཐའེ་ཝན་ཐུན་མོང་གི་དཀའ་ངལ་དང་། འགན་འཁྲི་སོགས་ཀྱི་གནད་དོན་སྐོར་བགྲོ་གླེང་གནང་ཡོད་འདུག ཉིན་རྒྱབ་ཨོ་གླིང་གྲོས་ཚོགས་གོང་མའི་ཕྱོགས་འགལ་ཚོགས་པའི་སྐུ་ཞབས་སི་མོན་བྷིར་མིང་གྷ་ཧམ་ (Simon Birmingham) ལགས་དང་། ཨ་རིའི་གཞུང་ཚབ་ཁང་གི་ཆབ་སྲིད་སློབ་སྟོན་པ་ཌེ་ཝི་ཌི་མུ་ནི་ཛི་ (David Muniz) ལགས་སོགས་ལ་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་གཙོས་བོད་དོན་ཐོག་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་ཡོད་འདུག

ཕྱི་ཚེས་ ༡༩ ཉིན་གྱི་སྔ་དྲོ་ཨོ་གླིང་བོད་ཀྱི་སྐུ་ཚབ་དོན་གཅོད་ལས་ཁུངས་སུ། ཨོ་གླིང་བོད་དོན་ལྷན་ཁང་གི་འགན་འཛིན་འབུམ་རམས་པ་ཛོའི་བྷེ་ཌི་ཕོར་ཌི་ལགས་དང་ལྷན་མཇལ་འཕྲད་གནང་ཞིང་། སྐབས་དེར་འབུམ་རམས་པ་ཛོའི་ལགས་ཀྱིས་ཨོ་གླིང་གི་མང་གཙོའི་འགྲོ་ལུགས་སྐོར་ངོ་སྤྲོད་གནང་ཡོད་པ་དང་། ཨོ་གླིང་རྒྱལ་སྤྱིའི་སློབ་གཉེར་ཁང་གི་འགན་འཛིན་འབུམ་རམས་པ་བྷེ་རེ་སི་ཝེག་ཧྥིལ་ཊི་ (Dr. Byrce Wakefield) ལགས་དང་ལྷན་མཇལ་འཕྲད་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་ཐོག་བགྲོ་གླེང་གནང་འདུག ཉིན་དེའི་ཉིན་རྒྱབ་ཏུ་ཨོ་གླིང་དབུས་གྲོས་ཚོགས་ཀྱི་ཚོགས་ཁང་དུ། ཨོ་གླིང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་དང་གྲོས་ཚོགས་གོང་མའི་འཐུས་མི་ལྕམ་སྐུ་ཌེ་བྷོ་རཱ་ཨོ་ནིལ་ (Deborah O’Neill) ལགས་དང་། གྲོས་ཚོགས་འོག་མའི་འཐུས་མི་ལྕམ་སྐུ་སུ་སན་ཊེམ་པལ་མན་ (MP Susan Templeman) ལགས། གྲོས་ཚོགས་གོང་མའི་འཐུས་མི་སྐུ་ཞབས་ཌེན་སི་མིཏི་ ( Dean Smith) ལགས། ཨོ་གླིང་གི་སྲིད་བློན་གཞོན་པ་ཟུར་པ་དང་། གྲོས་ཚོགས་འོག་མའི་འཐུས་མི་སྐུ་ཞབས་མེ་ཀལ་ཧྥ་རན་སིས་མེཀ་ཀོར་མེཀ་( Michael Francis McCormack) ལགས། གྲོས་ཚོགས་འོག་མའི་ཚོགས་གཙོ་ཟུར་པ་སྐུ་ཞབས་ཨན་ཌི་རིའུ་བྷུ་རུ་སི་ཝ་ལེ་སི་(Andrew Bruce Wallace) ལགས། གྲོས་ཚོགས་འོག་མའི་འཐུས་མི་སོ་ཧྥི་ཡ་སི་ཀེམ་སི་ (Dr. Sophie Scamps) ལགས་བཅས་སུ་མཇལ་འཕྲད་གནང་ཡོད་ཅིང་། སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྙན་དོན་ཚན་བཅུ་གཉིས་ཅན་ཞིག་ཕུལ་ཡོད་པ་དང་། ཨོ་གླིང་གྲོས་ཚོགས་བོད་དོན་རྒྱབ་སྐྱོར་བ་རྣམས་ཀྱིས་ཞུ་སྙན་གྱི་དོན་ཚན་ཁག་གི་ཐོག་གང་ཐུབ་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་འདུག་ལ། དགོང་དྲོར་ཨོ་གླིང་གྲོས་ཚོགས་བོད་དོན་རྒྱབ་སྐྱོར་ཚོགས་པས་ཕྱོགས་ཕེབས་བོད་མི་མང་སྤྱི་འཐུས་རྣམ་པར་ཕེབས་བསུ་དང་ཆེ་བསྟོད་སླད། གྲོས་ཚོགས་ནང་གསོལ་སྟོན་ཞིག་བཤམས་ཤིང་། སྐབས་དེར་ཨོ་གླིང་གྲོས་ཚོགས་འོག་མའི་ཚོགས་གཞོན་ལྕམ་སྐུ་ཤཱ་རོན་ཁེ་ལེ་ཊོན་ (Sharon Clayton) ལགས་དང་། གྲོས་ཚོགས་གོང་མའི་འཐུས་མི་སྐུ་ཞབས་ཇོར་ཌོན་ཨེ་ལེག་ཛན་ཌར་སི་ཊི་ལེ་ཇོན་ (Jordon Alexander Steele-John) ལགས་སོགས་ཕེབས་ཡོད་འདུག

ཟླ་འདིའི་ཕྱི་ཚེས་ ༡༦ ཉིན་ཨོ་གླིང་ཝིག་ཊོ་རི་ཡ་མངའ་སྡེའི་གྲོས་ཚོགས་ཀྱི་ཚོགས་གཙོ་ལྕམ་སྐུ་རེ་ཨི་ཌི་ཝར་ཌ་སེ་ལགས་དབུ་བཞུགས་ཐོག བོད་ཀྱི་གནད་དོན་གལ་གནད་ཇི་ཆགས་ (Why Tibet Matters) ཞེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་འཚོགས་ཡོད་ཅིང་། སྐབས་དེར་ལྕམ་སྐུ་ལགས་ཀྱིས། བོད་ནང་གི་ཛ་དྲག་གི་གནས་སྟངས་ལ་མི་སྒེར་དང་། ལྷག་པར་དུ་ཨོ་གླིང་གྲོས་ཚོགས་ཀྱི་རྒྱབ་སྐྱོར་དང་གདོང་ལེན་གནང་ཕྱོགས། དེ་བཞིན་ཝིག་ཊོ་རི་ཡ་མངའ་སྡེའི་ནང་ཉེ་ལམ་བོད་དོན་རྒྱབ་སྐྱོར་ཚོགས་པ་གསར་འཛུགས་བྱས་པ་མཚོན་པའི་ཨོ་གླིང་གཞུང་སྒེར་གཉིས་ཀྱིས་བོད་ནང་གི་བོད་མིའི་གནས་བབ་ལ་རྒྱུས་ལོན་དང་རྒྱབ་སྐྱོར་བྱ་དགོས་སྐོར་གསུངས་འདུག་ལ། སྤྱི་འཐུས་རྣམས་ཀྱིས་བོད་དོན་དང་འབྲེལ་བའི་གཏམ་བཤད་དང་དྲི་བ་དྲི་ལན་སོགས་གནང་ཡོད་ཅིང་། སྐབས་དེར་ཨོ་གླིང་སྐུ་ཚབ་དོན་གཅོད་ཀརྨ་སེངྒེ་ལགས་དང་། རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས། མེལ་བྷོན་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་བསམ་འགྲུབ་ལགས་དང་། ཚོགས་གཞོན་ཆོས་གྲགས་ལགས། མེལ་བྷོན་ས་གནས་དང་བླངས་བོད་དོན་ཞུ་གཏུགས་ལས་འགུལ་གྱི་འབྲེལ་མཐུད་པ་བསྟན་འཛིན་ནོར་འཛིན་ལགས་བཅས་ཀྱིས་ཀྱང་མཉམ་ཞུགས་གནང་ཡོད་འདུག

Tibetan parliamentary delegation continues advocacy in Australia

ཉིན་དེའི་དགོང་མོར་ཨོ་གླིང་དུ་ཕེབས་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ལ་མེལ་བྷོན་ཁུལ་གྱི་བོད་རྒྱ་མཛའ་འབྲེལ་ཚོགས་པས་ཆེད་བསྟོད་གསོལ་ཚིགས་ཤིག་གོ་སྒྲིག་བྱས་ཡོད་ཅིང་། སྐབས་དེར་རྒྱ་ནག་གཞུང་གིས་བོད་རྒྱ་མི་རིགས་གཉིས་ལ་ཚད་ལས་འདས་པའི་དྲག་གནོན་དང་སྡུག་སྦྱོང་གཏོང་མུས་ཡིན་པ་སོགས་ཀྱི་ཐད་ལ་གྲོས་མོལ་བྱུང་ཡོད། དེ་བཞིན་ཁུལ་དེའི་གནད་ཡོད་མི་སྣ་དང་བོད་དོན་རྒྱབ་སྐྱོར་བ་སོགས་ལའང་ཐུག་འཕྲད་གནང་འདུག

དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་དྲ་རྒྱ་ལྟར་ན། ཟླ་འདིའི་ཕྱི་ཚེས་ ༡༩ ནས་ ༢༢ བར་སྤྱི་འཐུས་ཀརྨ་དགེ་ལེགས་ལགས་དང་བློ་བཟང་རྒྱ་མཚོ་སྲི་ཐར་ལགས། བསྟན་འཛིན་ཆོས་འཛིན་ལགས་བཅས་ཀྱིས་ཨ་རིའི་ཆི་ཀ་གོ་ (Chicago) གྲོང་ཁྱེར་དུ་འཚོགས་གཏན་ཁེལ་བའི་ཕྱི་ལོ་ ༢༠༢༤ ལོའི་རྒྱལ་སྤྱིའི་དབུ་ཁྲིད་ཀྱི་ཚོགས་འདུ་ (2024 International Leaders Forum) ཁྲོད་མཉམ་ཞུགས་བྱ་རྒྱུ་དང་། ཟླ་འདིའི་ཕྱི་ཚེས་༢༢ ནས་ ༢༦ བར་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་ཀུན་དགའ་བསོད་སྟོབས་ལགས་གཉིས་མོན་གྷོ་འདོད་རྒུ་གླིང་གཞིས་ཆགས་སུ་ས་གནས་འཐུས་ཚོགས་ཚགས་ཚུད་དང་སྲ་བརྟན་སླད་ལས་དོན་བྱེད་ཕྱོགས་ཀྱི་ཟབ་སྦྱོང་སྤྲོད་ཆེད་ཕེབས་རྒྱུ་ཡིན་འདུག

གསར་འགོད་པ་བྱམས་པ་ཚེ་རིང་གིས་བོད་མི་མང་སྤྱི་འཐུས་ལྷན་ཚོགས་ཀྱི་དྲ་བ་ལས་བཏུས།

རྩོམ་སྒྲིག་པ། སྐལ་བཟང་སྦྱིན་པ།