བོད་མི་དང་། བོད་ཡིག་གི་ལས་དབང་།

ཉེ་ལམ་ང་དབྱར་ཀའི་གུང་སེང་དང་འབྲེལ་ཡུ་རོབ་ཏུ་སོང་བ་ཡིན། དེ་ནི་གུས་པ་ཡུ་རོབ་ཏུ་སྐྱོད་ཐེངས་གསུམ་པ་དེ་ཡིན།  ཡུལ་དེར་འགྲོ་ཐེངས་རེ་རེ་བཞིན་ཆེས་ཚོར་བ་རྣོན་པོ་བྱ་ས་དེ་བོད་ཀྱི་ཕྲུ་གུ་ཚོས་སྐད་ཡིག་ལ་བཅངས་པའི་སྤྲོ་སྣང་དང་།  ལམ་བུ། དེའི་འགྲུབ་འབྲས་བཅས་ཡིན། ད་ལན་ཡང་འགྲུལ་བཞུད་དེའི་ཁྲོད་ངས་རང་དང་འབྲེལ་བའི་གྲོགས་པོ་ཚོས་རང་གི་བུ་ཕྲུག་ཚོ་ཇི་ལྟར་བོད་མི་དག་མ་ཞིག་ཏུ་བསྐྱེད་སྲིང་བྱས་དང་བྱེད་བཞིན་པའི་འཚོ་བ་དངོས་དེ་མཐོང་ཐོས་བྱུང་།

བརྒྱུད་རིམ་དེའི་ཁྲོད་འགའ་རེར་ཡིད་སྨོན་སྐྱེས་ཤིང་། ལ་ལར་སྐྱུགས་མེར་ལང་། ངས་གནས་ཚུལ་འདི་དག་མཐོང་སྐབས། ཉེ་ལམ་བཀླགས་མ་ཐག་པའི་རྩོམ་ཡིག་ཅིག་གི་ཁ་བྱང་དྲན་བྱུང་། དེའི་མིང་ལ་ “ འགྱུར་སོང་བའི་བོད་ཀྱི་གཤིས་ཀ ” ཞེས་བྲིས་ཡོད། ད་ནི་ངོ་མ་བོད་པ་ཚོ་འགྱུར་བཞིན་འདུག རྦད་དེ་འགྱུར་ཉེན་འདུག་ཨང་།

བོད་ཆས་ཙམ་གྱོན་པ་ལས། བོད་ཀྱི་སྐད་ཡིག་དང་རིག་གནས་མི་ཤེས་པའི་མི་རབས་ཇེ་མང་དུ་འགྱུར་བཞིན་པ་འདིས། དངོས་ཡོད་ཀྱི་ཉེན་ཁ་དེ་དག་གཅིག་རྗེས་གཉིས་མཐུད་ཀྱིས་ཡིད་ལ་དྲན་ཚེ་སེམས་པར་ན་ཟུག་རྒྱས་ཡོང་། ན་ཟུག་དེའི་སྣེ་མོ་ནས་བོད་ཡིག་འདིའི་ཆེད་དུ་སྐུ་ངལ་ཚད་མེད་བསྐྱོན་མཁན་གྱི་མཁས་པ་མང་པོ་ཞིག་གི་བཞིན་རས་དྲན་འོང་གི་འདུག

ཡུ་རོབ་ནས་བོད་པ་ཆེས་མང་ཤོས་ནི། ཧྥ་རན་སི་དང་སུད་སི་གཉིས་ཡིན། པེ་རི་སི་ལྟེ་བར་བྱས་པའི་ཧྥ་རན་སི་གཅིག་པུར་མཚོན་ན། ཕལ་ཆེར་བོད་པ་ཁྲི་གཉིས་ཙམ་གཏན་སྡོད་བྱས་ཡོད་སྐད། དེའི་རྒྱུ་མཚན་ནི། ཧྥ་རན་སི་གཞུང་གི་ངོས་ནས་ཀྱང་གལ་སྲིད་མི་ཞིག་བོད་མི་ཡིན་མིན་གྱི་ཐེ་ཚོམ་ཙམ་ཟོས་ཀྱང་སྐྱབས་བཅོལ་ཡིག་ཆ་སྤྲོད་རྐྱང་བྱེད་བཞིན་ཡོད་པས། བོད་རིགས་སུ་གཏོགས་པའི་ཧི་མ་ལ་ཡའི་སྤུན་ཟླ་ཚོས་ཀྱང་གོ་སྐབས་འདི་ལེན་རྐྱང་བྱས་པས་ཡིན་སྲིད།

ངས་ཤེས་གསལ་ལྟར་ན། ཡུ་རོབ་ནང་གི་བོད་པ་ཆེས་ཉུང་ཤོས་ཤིག་ནི་ཅེག་སྤྱི་མཐུན་རྒྱལ་ཁབ་ཡིན། ཡུལ་དེར་སྔོན་ནས་ད་བར་གཏན་སྡོད་བྱེད་མཁན་བོད་མི་བརྒྱད་ལས་མང་བ་བྱུང་མི་འདུག དེ་བཞིན་དུ་སི་པེན་ཡང་སྤྱིའི་ཆ་ནས་བོད་པ་ཉུང་ཤོས་ཀྱི་གྲས་སུ་གཏོགས། ཕྱི་ལོ་ ༢༠༡༣ ལོར་བྷར་སི་ལོ་ནར་བོད་མི་བརྒྱད་ཅུ་ཙམ་ཡོད་ཀྱང་། ད་ལོར་བོད་མིའི་གྲངས་འབོར་ཇེ་ཉུང་དུ་སོང་འདུག དེ་ལ་བལྟས་ན་ལྟོས་བཅས་ཀྱི་བྷེལ་ཇམ་ནི་བོད་མི་མང་ཉུང་ཧ་ཅང་འཚམ་པའི་རྒྱལ་ཁབ་ཅིག་ཡིན། ཧོ་ལན་དུ་ཡང་བོད་མི་བརྒྱ་ཕྲག་འགའ་ལས་མེད་པར་བཤད།

ཆེས་ཐོག་མར་བོད་མི་འབྱོར་ཡུལ་གྱི་རྒྱལ་ཁབ་ནི། སུད་སི་ཡིན། ཡུལ་དེར་ཕྱི་ལོ་ ༡༩༦༠ ནས་བོད་མི་སྐྱབས་བཅོལ་བ་འབྱོར་ཡོད་ཅིང་། སུད་སི་ནི་འཛམ་གླིང་གི་ཆེས་སྐྱིད་ཤོས་ཀྱི་རྒྱལ་ཁབ་ཅིག་ཀྱང་ཡིན། ད་ལྟའི་ཆར་སུད་སིར་མཚོན་ན་བོད་མི་ཆིག་ཁྲི་མ་ཟིན་ཙམ་ཡོད་ཅིང་། དེ་དག་གི་ཁྲོད་ད་དུང་ཡང་སྐྱབས་བཅོལ་བའི་ཡི་གེ་མ་ཐོབ་པར་ལུས་མཁན་ཡང་ཡོད།

མདོར་ན། ཡུ་རོབ་ཁྱོན་ཡོངས་ལ་བོད་མི་སྐྱབས་བཅོལ་བ་ཁྲི་ཕྲག་གསུམ་ལྷག་ཡོད་ཅིང་། དེས་བཙན་བྱོལ་བོད་མིའི་མི་འབོར་གྱི་བརྒྱ་ཆའི་ ༢༤ ཉེར་བཞི་ཙམ་ཟིན་ཡོད་པས།  ཡུ་རོབ་ནང་གི་བོད་མི་སྤྱི་དང་། ཡང་སྒོས་ན་གཞོན་ཚོས་སྐད་ཡིག་བཀོལ་སྤྱོད་བྱ་སྟངས་དང་།  དེ་ལ་བཟུང་བའི་རིན་ཐང་ལྟ་བ།  འདུ་ཤེས་བཅས་ནི། ང་ཚོ་རིག་གནས་འཐབ་རྩོད་བྱ་མཁན་གྱི་མི་རིགས་ཤིག་ཡིན་པའི་ངོས་ནས་བཤད་ན་ཧ་ཅང་གནད་འགག་ཆགས་ཡོད།

འཛམ་གླིང་འདིར་ང་ཚོའི་སྐད་ཡིག་ལ་ཆེས་མཐོང་ཆུང་དང་། དམའ་འབེབས་བྱ་མཁན་ཞིག་ཡོད་པ་ནི། རྒྱ་ནག་དམར་པོའི་གཞུང་ཁོ་ན་ཡིན་ལ། རྒྱ་ནག་གིས་ལོ་རེ་བཞིན་བོད་ཀྱི་སྐད་ཡིག་གི་གནས་སྟངས་ལྟག་ཆུ་ཆད་པའི་རྫིང་བུ་ལྟར་སྒྱུར་བཞིན་ཡོད། དེའི་དཔེ་མཚོན་ཧ་ཅང་མང་པོ་ཡོད་ནའང་། མིག་སྔར་ཆེས་གསར་པ་ཞིག་ཡོད་པ་ནི། ཟླ་གཅིག་གོང་དུ་བོད་ནང་གི་སྒེར་གཉེར་སློབ་གྲྭ་ཡག་ཤོས་རྭ་རྒྱ་ཤེས་རིག་ནོར་གླིང་གཏན་དུ་སྒོ་བརྒྱབས་པ་དང་།  ཉེ་ལམ་ཡང་རྔ་བ་ཀིརྟི་དགོན་པའི་ནང་བསྟན་སློབ་གླིང་དུ་ལོ་ན་བཅུ་དྲུག་བར་གྱི་སློབ་མ་ཚོ་དགོན་པའི་སློབ་གྲྭར་འགྲོ་མི་ཆོག་པ་བཟོས་པ་དེ་ཡིན།

སྔོན་མ་ཡིན་ན། ཀུན་གཟིགས་པཎ་ཆེན་རིན་པོ་ཆེ་དང་། གུང་ཐང་རིན་པོ་ཆེ། མཁན་ཆེན་འཇིགས་མེད་ཕུན་ཚོགས་ལྟ་བུའི་བོད་ཀྱི་བླ་མ་དཔའ་མཛངས་གཉིས་ལྡན་མང་པོ་ཡོད་ལ། འབའ་བ་ཕུན་ཚོགས་དབང་རྒྱལ་ལྟ་བུའི་ལྷག་བསམ་ཅན་དང་སྙིང་སྟོབས་ཅན་གྱི་བོད་པ་ཏང་ཡན་པ་ཡང་རེ་ཟུང་ཡོད།

དེ་ལྟ་ནའང་།  དེང་སང་ནི་བོད་ནང་བཤད་ཕོད་པས་མི་ཡོང་ཞིང་། བསྒྲུབས་ཕོད་པས་དེ་བས་ཀྱང་མི་ཡོང་སྟེ། བོད་ལ་ཤ་ཚ་དང་། ལར་ཞེན། བོད་ཀྱི་སྐྱིད་སྡུག་ངོ་མ་དྲ་ཐོག་ནས་གཏམ་བཤད་ཕྲན་བུ་བྱས་ཀྱང་། སྐད་ཅིག་འགའི་རྗེས་སུ་ཁྱོད་རང་གཤེད་མ་ལྟ་བུའི་མི་ཚོགས་ཤིག་གིས་འདེད་ཡོང་། དེའི་གྲུབ་འབྲས་ནི་རྡུང་བརྡེག་དང་། བཙོན་ཁང་ཡིན། འདི་ནི་དུས་རབས་ཉེར་གཅིག་པའི་བོད་ཀྱི་ལས་དབང་རེད། འདི་ནི་གུང་ཁྲན་ཏང་གིས་བོད་བཅོས་བསྒྱུར་བྱས་རྗེས་སུ་སླར་ཡང་བོད་མི་མང་ལ་ཕུལ་བའི་རང་དབང་དང་དམངས་གཙོའི་ལེགས་སྐྱེས་རེད།

འོ་རེད། ད་མང་པོ་མི་བཤད། གང་ལྟར་ཕྱི་རྒྱལ་ན་ཡོད་པའི་བོད་མི་ཚོས། སེམས་བསམ་པའི་གཏིང་ནས། ཤ་རུས་པའི་གསེང་ནས་རང་གི་ལས་དབང་རང་གིས་བསྲུང་འདོད་ན། ལྷག་དཀར་ཉིན་བོད་ཆས་གཙང་མ་རེ་གྱོན་ནས་སྐོར་བྲོ་རེ་འཁྲབ་སྟེ་རང་ཉིད་བོད་མི་ཡིན་པའི་འདུ་ཤེས་ཙམ་ཉར་བས་རྔོ་མི་ཐོགས། འོ་ན་ཅི་བྱ་དགོས་ཤེ་ན། དུས་རྒྱུན་བོད་ཀྱི་ཆོས་དང་རིག་གཞུང་། དེ་ཉིད་གང་ལ་བརྟེན་པའི་སྐད་ཡིག་རྩ་ཆེན་འདི་མི་རེ་རེ་ངོ་ནས་རང་ནུས་ཡོད་རྒུས་ཉིན་རེའི་འཚོ་བའི་ནང་བཀོལ་སྤྱོད་དང་། རྒྱུན་འཛིན། དར་སྤེལ་བྱ་རྒྱུའི་དུས་ལ་བབས་ཡོད།

རིག་གཞུང་རྒྱུད་འཛིན་ནི། ཕ་མེས་ཡང་མེས་ཚོའི་ཁྱད་ནོར་ཡིན། རིག་གཞུང་སྲུང་སྐྱོབ་ནི་བོད་ཀྱི་དཔའ་བོ་དཔའ་མོ་ཚོའི་ཞལ་ཆེམས་ཡིན། རིག་གཞུང་དར་སྤེལ་ནི། ང་ཚོ་ནམ་ཡང་གསོན་ཐུབ་པའི་ལམ་བུ་ཁོ་ན་ཡིན།

ཕྲུ་གུ་སྐྱེས་མ་ཐག་པའི་ཕ་མ་ལགས། གལ་སྲིད། ཡུ་རོབ་ལྟ་བུའི་རང་དབང་ལུང་པར་བོད་མི་སྐྱབས་བཅོལ་བ་འབུམ་ཕྲག་འགའ་ཡོད་ཀྱང་། བོད་སྐད་དང་བོད་ཡིག་ཤེས་མཁན་འགའ་ལས་མེད་ཚེ། ང་ཚོའི་སྐད་ཡིག་རྩ་མེད་གཏོང་མཁན་ནི། ང་ཚོ་རང་ཉིད་ཡིན་པ་ལས། མི་རིགས་གཞན་ལ་ཁག་དཀྲི་ས་ཡེ་ནས་མེད་པའི་གནས་ལུགས་དེ་ཁྱེད་ཅག་གིས་མཁྱེན་པར་མཛོད་ཅིག  །

ཅེས་པའང་ཨ་འདུས་པས་རང་མི་རིགས་ཀྱི་སྐད་ཡིག་གི་ལས་དབང་ལ་ཤ་ཚ་བཞིན་བྲིས་སོ། །