གསར་འགོད་པའི་ཐོབ་ཐང་ལ་བརྩི་འཇོག་བྱ་དགོས་པའི་རེ་སྐུལ་ཞུས། 

རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཨིན་ཌོ་ནེ་ཤི་ཡ་གཞུང་ནས་གསར་འགོད་པ་དང་སློབ་མ་ཚུད་པའི་མི་དམངས་རྣམས་ཀྱི་གཞི་རྩའི་སྨྲ་བརྗོད་རང་དབང་དང་ཞི་བདེའི་འདུ་འཛོམས་ཀྱི་རང་དབང་ལ་བརྩི་འཇོག་དགོས་པའི་རེ་སྐུལ་ཞུས་འདུག

ཟླ་འདིའི་ཕྱི་ཚེས་ ༢༢ ཉིན་ལྷོ་ཤར་ཨེ་ཤ་ཡའི་མཚོ་རྒྱུད་དུ་ཆགས་པའི་ཨིན་ཌི་ནེ་ཤི་ཡའི་གྲོས་ཚོགས་ཀྱིས་ཁྲིམས་ལུགས་ཀྱི་སྲིད་ཇུས་སོགས་འགྱུར་བ་གཏང་རྒྱུའི་ཐད་གླེང་སློང་བྱས་རྗེས། ཡུལ་དེའི་གྲོང་ཁྱེར་ཆེ་ཁག་གི་སློབ་མ་ཚུད་པའི་མི་དམངས་རྣམས་སྲང་ལམ་དུ་བུད་ནས་ངོ་རྒོལ་བྱས་རྐྱེན། ཉེན་རྟོག་པ་དང་འགོག་སྲུང་བས་གསར་འགོད་པ་ ༡༡ ཚུད་པའི་མི་དམངས་རྣམས་ལ་དོན་མེད་གཅར་རྡུང་བྱས་ཡོད་པ་ལྟར། ཁ་སང་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། གསར་འགོད་པ་དེ་དག་གི་གནད་དོན་ཐད་མངོན་གསལ་དོད་པོ་དང་དྲང་བདེན་གྱི་ཐོག་ནས་ཚད་མཐོའི་ཞིབ་འཇུག་བྱ་དགོས་པའི་རེ་སྐུལ་ཞུས་འདུག

ཧྥ་རན་སིའི་རྒྱལ་ས་པེ་རི་སིར་རྟེན་གཞི་བྱས་པའི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་ཨེ་ཤ་ཡ་ཞི་བདེ་རྒྱ་མཚོ་ཁུལ་གྱི་ཚོགས་གཙོ་ཨེལ་ཝ་ནི་(Cédric Alviani) ལགས་ཀྱིས། ཉེན་རྟོག་པ་དེ་དག་གིས་གསར་འགོད་པ་དེ་དག་ལ་གཅར་རྡུང་དྲག་པོ་དང་ཅ་དངོས་ཆག་སྐྱོམ་དུ་བཏང་བར་གསལ་བཤད་གང་ཡང་བྱས་མེད། ང་ཚོས་ཨིན་ཌོ་ནེ་ཤི་ཡ་རྒྱལ་ཁབ་ཀྱི་གཞུང་འཛིན་ཚོགས་པའི་མགོ་ཁྲིད་ཚོས། མངོན་གསལ་དོད་པོ་དང་རང་དབང་གི་ཐོག་ནས་གསར་འགོད་པར་གཅར་རྡུང་བྱས་པའི་དྲག་སྤྱོད་ཀྱི་དོན་རྐྱེན་ཐད་ལ་ཞིབ་འཇུག་དང་། གསར་འགོད་པའི་ལས་རིགས་གཙོ་དམིགས་ཀྱིས་བདེ་འཇགས་ལ་སྲུང་སྐྱོབ་བྱ་རྒྱུའི་ཁས་ལེན་བྱ་དགོས། ཞེས་བརྗོད་འདུག

ཨིན་ཌོ་ནེ་ཤི་ཡའི་ཉེན་རྟོག་པས། མག་ན་(Makna Talks) ཞེས་པའི་གསར་ཁང་གི་གསར་འགོད་པ་ཨི་ཌོ་(Edo) དང་། ཌོ་རི་(Dory) ། ན་ས་རི་གློག་བརྙན་འཕྲིན་ (Narasi TV) གསར་ཁང་གི་གསར་འགོད་པ་ཇེན་རོ་བྷིན་(Robin) དང་། ཝ་ཧིབ་ (Achmad Wahib) ། ཌིམ་དུག་ཀ་ཧྥི་(media Deduktif) གསར་ཁང་གི་གསར་འགོད་པ་པར་མ་ན་(Angga Permana) སོགས་མི་དམངས་ཀྱི་ངོ་རྒོལ་བྱ་སའི་ཡུལ་དངོས་ཀྱི་བགྲོད་ལམ་བཀག་སྟེ་དོན་མེད་གཅར་རྡུང་བྱས་ནས་པར་ཆས་སོགས་བཅག་ཡོད་པ་མ་ཟད། པི་ཀི་རིན་གསར་ཁང་ (Pikiran-Rakyat) གི་བུད་མེད་གསར་འགོད་པ་ཨལ་ཛ་ (Alza Ahdira) ཟེར་བ་དང་། ཨ་ཌི་ཨན་དུས་བབ་གསར་ཁང་(IDN Times) དང་ཊེམ་པོ (Tempo) གསར་ཁང་གི་གསར་འགོད་པ་ཚུད་པའི་གསར་འགོད་པ་ ༡༡ ལ་དོན་མེད་གཅར་རྡུང་དང་པར་ཆས་སོགས་བཅག་ཡོད་འདུག

དེ་བཞིན་ཟླ་འདིའི་ཕྱི་ཚེས་ ༢༣ ཉིན་རྒྱལ་སྤྱིའི་ཉེས་ཡང་ཚོགས་པས་ཨིན་ཌོ་ནེ་ཤི་ཡའི་གཞུང་འཛིན་ཚོགས་པས་སློབ་མ་དང་གསར་འགོད་པ། ངོ་རྒོལ་བ་སོགས་ལ་ཁྲིམས་མཐུན་མིན་པའི་ཐོག་ནས་གཅར་རྡུང་བྱས་ཏེ། སྨྲ་བརྗོད་རང་དབང་བཀག་འགོག་བྱེད་མཚམས་འཇོག་དགོས་པའི་ནན་བརྗོད་བྱས་པ་དང་འབྲེལ། ཨིན་ཌོ་ནེ་ཤི་ཡའི་རྒྱལ་སྤྱིའི་ཉེས་ཡང་ཚོགས་པའི་ཚོགས་གཙོ་ཧཱ་མིད་(Usman Hamid) ལགས་ཀྱིས། ངོ་རྒོལ་དེ་ནི་ཞི་བའི་ཡོ་ལང་ཞིག་ཡིན་ཡང་། རྒྱལ་སའི་ཁུལ་དུ་དམག་མི་འབོར་ཆེན་བཀྲམ་ནས། མི་དམངས་ཀྱི་ཞི་རྒོལ་ལ་དམ་དྲག་ཤུགས་ཆེན་བྱེད་ཀྱི་འདུག་པས། དེ་ནི་འགྲོ་བ་མིའི་རིགས་ཀྱི་གཞི་རྩའི་སྨྲ་བརྗོད་རང་དབང་དང་ཞི་བདེ་ལྡན་པའི་འདུ་འཛོམས་ཀྱི་རང་དབང་ལ་བརྩི་འཇོག་མ་བྱས་པ་ཡིན། ཞེས་བརྗོད་འདུག

འདི་ལོའི་ཕྱི་ཟླ་ ༥ ཚེས་ ༦ ཉིན་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། ཕྱི་ལོ་ ༢༠༢༤ ལོའི་རྒྱལ་སྤྱིའི་གསར་འགོད་རང་དབང་གི་སྙན་ཐོ་བཏོན་ཡོད་པའི་ཁྲོད། འཛམ་གླིང་རྒྱལ་ཁབ་དང་ས་ཁུལ་མི་འདྲ་བ་  ༡༨༠ ཡི་གསར་འགོད་རང་དབང་གི་གནས་བབ་སྐོར་ལ་ཞིབ་འཇུག་བྱས་ཏེ། རྒྱ་ནག་ནི་འཛམ་གླིང་གི་གསར་འགོད་པ་བཙོན་འཇུག་བྱེད་མཁན་ཆེ་ཤོས་དེ་ཡིན་པ་གསལ་སྟོན་བྱས་འདུག་ལ། གསར་འགོད་རང་དབང་ཆེས་སྡུག་ཤོས་ཀྱི་རྒྱལ་ཁབ་བཅུའི་ཁྲོད། ཨེ་ཊི་རེ་ཡ། སི་རེ་ཡ་དང་ཨབ་གྷ་ནེ་སི་ཐན། བྱང་ཀོ་རི་ཡ། ཨི་རན། ཊར་ཀེ་མན་སི་ཐན། ཝི་ཏི་ནམ། རྒྱ་ནག་དང་འབར་མ་ཨི་ཇབ་ཊི་བཅས་དང་། ཕྱི་ལོ་ ༢༠༢༣ ལོའི་འཛམ་གླིང་གི་གསར་འགོད་རང་དབང་ལེགས་ཤོས་ཀྱི་རྒྱལ་ཁབ་ལྔ་ནི་ནོར་ཝེ་དང་ཌེན་མག སུ་ཝེ་ཌན། ནེ་ཐར་ལན་ཌི། ཧྥི་ལན་ཌི་བཅས་ཡིན་ཞིང་། ཨི་ཌོ་ནེ་ཤི་ཡ་དེ་འཛམ་གླིང་གསར་འགོད་རང་དབང་གི་ཨང་རིམ་ ༡༡༡ པ་དེ་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།