ཁ་སང་འཛམ་གླིང་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གི་རྒྱལ་ཁབ་བདེ་འཇགས་སྒྲོམ་གཞིར་བསྐྱར་ཞིབ་བྱ་དགོས་པའི་ནན་སྐུལ་ཡང་བསྐྱར་བྱས་འདུག
མཉམ་འབྲེལ་རྒྱལ་ཚོགས་ཀྱི་དྲ་རྒྱའི་སྟེང་སྤེལ་བའི་གནས་ཚུལ་ལྟར་ན། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ཚན་པས་རྒྱ་ནག་གཞུང་གིས་བོད་དང་ཤར་ཊུ་ཀི་སི་ཐན་མི་རིགས་ཀྱི་ཐོབ་ཐང་དང་ཆོས་དད་རང་དབང་། དེ་བཞིན་རྒྱ་ནག་ནང་ལོགས་ཀྱི་འགྲོ་བ་མིའི་ཐོབ་ཐང་དང་རང་དབང་སོགས་ལ་རྡོག་རོལ་གཏོང་བཞིན་པའི་སྲིད་ཇུས་ཁག་ལ་བསྐྱར་ཞིབ་དགོས་པ་དང་རྒྱ་ནག་གི་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྒྲིག་གཞི་ཁག་དང་འགལ་བའི་བྱ་སྤྱོད་རིགས་ལ་མུ་མཐུད་རྟོག་ཞིབ་བྱེད་བཞིན་ཡོད་སྐོར་བརྗོད་འདུག
དེ་འབྲེལ་གནས་ཚུལ་ནང་། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ཚན་པས་རྒྱ་ནག་གཞུང་དང་ལྷན་དུ་རྒྱ་ནག་ནང་གི་ཛ་དྲག་གི་གནད་དོན་ཐོག་གླེང་སློང་བྱས་ཡོད་ཅིང་། དེའི་ཁྲོད་རྒྱ་ནག་གཞུང་གིས་བོད་དང་ཤར་ཊུ་ཀི་སི་ཐན་གྲངས་ཉུང་མི་རིགས་ཀྱི་ཐོབ་ཐང་དང་ཆོས་ལུགས་རང་དབང་སོགས་ལ་གནོད་སྐྱོན་བཟོ་ཐབས་ཀྱི་སྲིད་ཇུས། དྲག་སྤྱོད་རིང་ལུགས་བཀག་སྡོམ་གྱི་ཁྲིམས་དང་སྲིད་ཇུས་ཟེར་བ། ཉེས་ཁྲིམས། དེ་བཞིན་ཧོང་ཀོང་ནང་འདྲ་མཉམ་ཡོང་བ་དང་དབྱེ་འབྱེད་མེད་པ། རྒྱལ་ཁབ་བདེ་འཇགས་ཀྱི་ཁྲིམས་དང་། སེམས་འཚབ་ཆེ་བའི་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་སྐོར་ལ་གླེང་སློང་བྱས་ཡོད་འདུག
རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ཚན་པའི་མགྲིན་ཚབ་པ་ར་ཝི་ན་ (Ravina Shamdasani) ལགས་ཀྱིས། ཕྱི་ཟླ་ ༧ པའི་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་ཚོགས་མི་ཁག་ཅིག་རྒྱ་ནག་ཏུ་ཕྱིན་ནས། ཤར་ཊུར་ཀི་སི་ཐན་ནང་དུ་དཀའ་རྙོག་ཅན་གྱི་ཁྲིམས་དང་སྲིད་ཇུས་ལག་བསྟར་མུ་མཐུད་བྱེད་བཞིན་ཡོད་སྟབས། ང་ཚོས་རྒྱ་ནག་གི་དཔོན་རིགས་རྣམས་ལ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། རྒྱལ་ཁབ་ཀྱི་བདེ་འཇགས། དྲག་སྤྱོད་པ་བཀག་སྡོམ་གྱི་སྲིད་ཇུས་ཟེར་བ་སོགས་ལ་བསྐྱར་ཞིབ་བྱ་དགོས་པ་དང་། གྲངས་ཉུང་མི་རིགས་ཀྱི་ཐོབ་ཐང་ཡར་རྒྱས་གཏོང་དགོས་སྐོར། འགྲོ་བ་མིའི་ཐོབ་ཐང་ལ་རྡོག་རོལ་བཏང་བའི་ཉེས་འཛུགས་འོག་མནར་གཅོད་གཏོང་བཞིན་པ་སོགས་ལ་ཞིབ་འཇུག་མཐིལ་ཕྱིན་པ་བྱེད་དགོས། ཞེས་བརྗོད་འདུག
རྒྱ་ནག་ནང་གི་མི་ཚང་མའི་འགྲོ་བ་མིའི་ཐོབ་ཐང་སྲུང་སྐྱོབ་གོང་འཕེལ་སླད། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་རྒྱ་ནག་གཞུང་དང་སྤྱི་དམངས་ཀྱི་ཚོགས་སྡེ་ཁག་དང་ལྷན་དུ་འབྲེལ་ལམ་རྒྱུན་མཐུད་བྱས་ཏེ། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་དང་འབྲེལ་བའི་མི་སྒེར་ལ་འཇིགས་སྐུལ་དང་རྒྱ་ནག་ནང་ལོགས་ཀྱི་གནས་ཚུལ་རིགས་ལ་དམ་དྲག་ཤུགས་ཆེན་བྱེད་བཞིན་ཡོད་པར་མ་ལྟོས་པར་རྒྱ་ནག་ནང་གི་ད་ལྟའི་འགྲོ་བ་མིའི་ཐོབ་ཐང་གི་གནས་སྟངས་ལ་རྗེས་འདེད་རྟོག་ཞིབ་བྱེད་བཞིན་ཡོད་སྐོར་བརྗོད་འདུག
ད་དུང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་རྒྱ་ནག་གཞུང་དང་ལྷན་དུ་གར་སོང་ཆ་མེད་དུ་གྱུར་བ་དང་། གང་བྱུང་འཛིན་བཟུང་བཀག་ཉར་བྱས་པའི་མི་རྣམས་ཀློད་གྲོལ་གཏོང་དགོས་པ་དང་། ཁོ་ཚོའི་ནང་མིར་མི་དེ་དག་གི་གནས་སྟངས་དང་གང་དུ་ཡོད་མེད་སོགས་གསལ་འདོན་དགོས་པའི་སྐུལ་མའང་བྱས་ཡོད་འདུག་ལ། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་ཚོགས་གཙོ་ཝོལ་ཀར་ (Volker Türk) ལགས་ཀྱིས་རྒྱ་ནག་གཞུང་དང་ལྷན་དུ་མུ་མཐུད་གླེང་མོལ་བྱས་ཏེ། གནོད་འཚེ་ཕོག་པའི་མི་མང་གི་འགྲོ་བ་མིའི་ཐོབ་ཐང་སྲུང་སྐྱོབ་དང་ཞུ་གཏུགས་བྱ་རྒྱུའི་དམ་བཅའ་འཇོག་ཡོད། ཅེས་བརྗོད་འདུག
ཕྱི་ལོ་ ༢༠༢༢ ཟླ་ ༨ ཚེས་ ༣༡ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱིས་སྙན་ཐོ་བཏོན་པའི་ནང་། རྒྱ་ནག་གཞུང་གིས་ཤར་ཊུ་ཀི་སི་ཐན་གྱི་གྲངས་ཉུང་མི་རིགས་ནང་གི་དྲག་སྤྱོད་ཟེར་བར་དམིགས་ཏེ་ཐལ་སྤྱོད་སྲིད་ཇུས་ལག་བསྟར་གྱིས་རྒྱ་སྒྱུར་སློབ་གསོ་སྤྲོད་ཀྱི་ཡོད་པ་དང་འབྲེལ་བའི་སྙན་ཐོ་བཏོན་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
