བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་རང་དབང་དང་དྲང་བདེན། མང་གཙོ་ཚད་དང་ལྡན་པ་ཡོང་རྒྱུར་དགོངས་པ་བཞེས་དགོས་གལ་ཆེ་སྐོར་སོགས་གསུངས་སོང་།
དེ་རིང་སྔ་དྲོའི་ཆུ་ཚོད་ ༩།༣༠ སྟེང་དྷ་ས་ས་གནས་མགོ་འཛིན་གྱི་ཚོགས་ཁང་དུ་བོད་ཀྱི་རྒྱལ་ཡོངས་མང་གཙོ་ཚོགས་པ་དབུ་བརྙེས་ནས་ལོ་ངོ་ཧྲིལ་པོ་ ༣༠ འཁོར་བའི་དུས་དྲན་སྲུང་གཙི་ཞུས་སོང་། མཛད་སྒོའི་སྟེང་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དམིགས་བསལ་སྐུ་མགྲོན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས། བོད་མི་མང་སྤྱི་འཐུས་ཚོགས་གཞོན་ཟུར་པ་ཨཅཱརྱ་ཡེ་ཤེས་ཕུན་ཚོགས་ལགས། བོད་ཀྱི་རྒྱལ་ཡོངས་མང་གཙོ་ཚོགས་པའི་སློབ་སྟོན་པ་ཐུབ་བསྟན་སྙན་གྲགས་ལགས། དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་དང་རྒྱུན་ལས། མི་མང་ཁྱོན་ ༧༠ ཙམ་ཚང་འཛོམས་བྱུང་ཡོད་འདུག
ཐོག་མར་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་འདུན་ཆོས་འཕེལ་ལགས་ཀྱིས་བོད་ཀྱི་རྒྱལ་ཡོངས་མང་གཙོ་ཚོགས་པའི་ལོ་རྒྱུས་དང་། འབྱུང་རིམ་ངོ་སྤྲོད་གནང་བ་དང་འབྲེལ། ལོ་ལྟར་མང་གཙོ་ཚོགས་པའི་ངོས་ནས་དགུན་ཚོང་དང་གཞིས་ཆགས་ཁག་ཏུ་དཔལ་འབྱོར་མཁོ་སྒྲུབ་བྱ་རྒྱུའི་ཆེད་སྐོར་སྐྱོད་དུ་འགྲོ་ཡི་ཡོད་ཀྱང་། མ་འོངས་པར་དཔལ་འབྱོར་མཁོ་སྒྲུབ་ཀྱི་ཆེད་དུ་དགོང་ཚོགས་འཚོག་འཆར་ཡོད་པ་དང་། མཐོ་སློབ་དང་གཞིས་ཆགས་ཁག་ཏུ་མང་གཙོའི་གོ་རྟོགས་དང་ལས་འགུལ་སྣ་མང་སྤེལ་འཆར་ཡོད་སྐོར་དང་། བོད་མི་རྣམས་རྡོག་རྩ་གཅིག་སྒྲིལ་དགོས་པ། རྒྱལ་སྤྱིའི་ཚོགས་སྡེ་ཁག་ལ་བོད་ནང་གི་ཛ་དྲག་གི་གནས་སྟངས་སྐོར་གོ་རྟོགས་གང་མང་སྤེལ་དགོས་སྐོར་སོགས་བརྗོད་སོང་།
བོད་མི་མང་སྤྱི་འཐུས་ཚོགས་གཞོན་ཟུར་པ་ཨཅཱརྱ་ཡེ་ཤེས་ཕུན་ཚོགས་ཀྱིས། བོད་ཀྱི་རྒྱལ་ཡོངས་མང་གཙོ་ཚོགས་པ་དབུ་བརྙེས་ནས་ལོ་ངོ་ ༣༠ འཁོར་བའི་དུས་དྲན་ལ་འཚམས་འདྲི་ཞུས་པ་དང་བསྟུན། ཚོགས་པ་དང་སྒྲིག་འཛུགས་ཁག་ཚགས་ཚུད་པོ་དགོས་པ་དང་། ཚོགས་པ་ཁག་མཉམ་རུབ་ཀྱིས་ལས་འགུལ་སྤེལ་ན་ལེགས་པོ་ཡོད་པ་མ་ཟད། ཚོགས་པ་སོ་སོའི་ངོས་ནས་ལས་འགུལ་སྣ་མང་སྤེལ་དགོས་གལ་ཆེ་ཁར། དྷ་ས་མེག་གྷན་ཁུལ་དུ་ལས་འགུལ་སྤེལ་བ་ཙམ་མིན་པར་དམིགས་བསལ་གྱིས་ལྡི་ལི་རུ་ལས་འགུལ་ངེས་པར་དུ་སྤེལ་དགོས་སྐོར་དང་། མ་འོངས་པར་རྒྱལ་ཡོངས་མང་གཙོ་ཚོགས་པའི་ངོས་ནས་མང་གཙོའི་འཕེལ་རིམ་སྐོར་ལ་ཁྱབ་སྤེལ་བྱ་རྒྱུ་དེ་གནད་འགག་ཡིན་པར་བརྟེན། དོ་ནན་པོའི་ཐོག་ནས་ཁྱབ་སྤེལ་བྱ་གལ་ཆེ་ཞིང་། ཚོགས་མི་རྒྱ་སྐྱེད་གཏོང་ཐབས་བྱས་ཏེ། ལས་དོན་ཚང་མའི་ཐོག་སེམས་ཤུགས་མ་ཆགས་པར་འགན་འཁུར་གནང་དགོས་སྐོར་བརྗོད་སོང་།
གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས། ཕྱི་ལོ་ ༡༩༥༩ ལོར་རྒྱ་དམར་གཞུང་གིས་བོད་རྒྱལ་ཁབ་བཙན་འཕྲོག་བྱས་པ་དང་། ༧གོང་ས་རྒྱལ་བ་རིན་པོ་ཆེ་མཆོག་བཙན་བྱོལ་དུ་ཕེབས་དགོས་པའི་གནས་སྟངས་བྱུང་བ་ནས་བཟུང་། ཕྱི་ལོ་ ༡༩༦༠ ལོར་༧གོང་ས་རྒྱལ་བ་རིན་པོ་མཆོག་གི་དགོངས་པ་གཞིར་བཟུང་ང་ཚོའི་བཙན་བྱོལ་སྒྲིག་འཛུགས་ཀྱི་མང་གཙོའི་གཞུང་དབུ་བརྙེས་པ་རེད། བཙན་བྱོལ་གྱི་མི་མང་རྣམས་ཆབ་སྲིད་ཀྱི་ཕོངས་པའི་མི་རིགས་ཤིག་དང་འཐབ་རྩོད་པ་ཞིག་རེད། བོད་ནང་དུ་བཞུགས་པའི་བོད་མི་རྣམས་ང་ཚོའི་འཐབ་རྩོད་ཀྱི་མ་རྩ་རེད། ཁོང་རྣམ་པའི་ལྷག་བསམ་དང་། སྙིང་སྟོབས། སེམས་ཤུགས་ཞུམ་པ་མེད་པ་རེད། བོད་ནང་དུ་ཡོད་པའི་བོད་མི་རྣམས་ཀྱིས་ཡིད་ཆེས་དང་རེ་བ་བྱེད་ས་ནི་བཙན་བྱོལ་དུ་བཞུགས་པའི་༧གོང་ས་རྒྱལ་བ་རིན་པོ་ཆེ་མཆོག་དབུས་པའི་ང་ཚོ་བཙན་བྱོལ་བ་མི་རེ་ངོ་རེ་རེད། དེར་བརྟེན། ང་ཚོས་དེ་དག་དུས་ནམ་ཡང་བརྗེད་རྒྱུ་མེད། བཙན་བྱོལ་བོད་གཞུང་གི་ལས་འགན་གཙོ་བོ་ནི་བོད་དོན་བདེན་མཐའ་གསལ་རྒྱུ་དང་། བོད་རྒྱའི་དཀའ་རྙོག་སེལ་ཐབས་དང་འགྲིག་འཇགས་ཡོང་ཐབས་ཐོག་རྒྱལ་སྤྱིའི་གཙོས་པའི་གནད་དོན་ཐོག་ཕྱག་ལས་གནང་གི་ཡོད་པ་རེད། མང་ཚོགས་རྣམས་ཀྱིས་ཀྱང་བོད་ནང་གི་བོད་མི་རྣམས་ཀྱི་རེ་བ་དང་བློས་གཏོང་དེ་དག་མ་བརྗེད་པར་བོད་དོན་འཐབ་རྩོད་མུ་མཐུད་བྱ་རྒྱུ་གལ་ཆེན་པོ་རེད། ཅེས་བརྗོད་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། བོད་ཀྱི་མང་གཙོའི་འཕེལ་རིམ་སྤྱིའི་སྐོར་ངོ་སྤྲོད་དང་སྦྲགས ༧གོང་ས་རྒྱལ་བ་རིན་པོ་ཆེ་མཆོག་གིས་རྒྱལ་སྤྱིའི་ཐོག་ནས་ཆབ་སྲིད་ཚོགས་པའི་ལམ་ལུགས་དགོས་པའི་དགོངས་པ་བཞེས་ནས། ༧གོང་ས་མཆོག་གི་བཀའ་ལུང་ལ་བརྟེན་ནས་རྒྱལ་ཡོངས་མང་གཙོ་ཚོགས་པ་ཐོག་མར་གསར་འཛུགས་བྱས་པ་རེད། དེ་གལ་ཆེན་པོ་ཞེ་དྲགས་རེད། མ་འོངས་པར་གོམས་པ་གང་འདྲ་སྤོས་རུང་མི་མང་གི་འདོད་མོས་ལྟར་ཡིན་པ་དང་། མི་མང་དང་མགོ་ཁྲིད་ཀྱི་རྣམ་དཔྱོད་ཟུང་འབྲེལ་གྱི་ཐོག་ནས་མང་གཙོའི་ལམ་ལ་འགྲོ་ཐུབ་དགོས་ཀྱི་ཡོད་སྐོར་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་མང་གཙོ་གསོལ་རས་གནང་བ་དང་། ལག་ལེན་བསྟར་མཁན་གྱི་མི་མང་ལ་རྣམ་དཔྱོད་དགོས་ཀྱི་ཡོད་པར་བརྟེན། མི་མང་ལ་གོ་རྟོགས་དང་ཤེས་ཡོན། གུ་ཡངས། བློས་གཏོང་སོགས་དགོས་ཀྱི་ཡོད་ཅིང་། དེང་སང་མང་གཙོ་མཚན་ཉིད་ཚང་བ་ཡོང་བར་དཀའ་ངལ་མང་པོ་འཕྲད་ཀྱིན་ཡོད་པའི་གཞི་རྩ་གཙོ་བོ་ནི་མགོ་ཁྲིད་ཀྱི་ཕྱོགས་ཞེན་ཆེ་དྲགས་པ་དང་། ཡང་ན་མང་ཚོགས་ཀྱི་ཕྱོགས་ཞེན་ཆེ་དྲགས་ནས་བརྡབ་གསིག་ཡོང་གི་ཡོད་པར་བརྟེན། ཆབ་སྲིད་ཚོགས་པ་དགོས་པ་དང་དེའི་ལས་དོན་གནང་ཕྱོགས་དེ་མང་གཙོའི་ལྟ་གྲུབ་ཐོག་ནས་འགྲོ་ཐུབ་དགོས་སྐོར། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་གཞིར་བཟུང་། རང་དབང་དང་། དྲང་བདེན། མང་གཙོ་ཚད་དང་ལྡན་པ་ཡོང་རྒྱུར་དགོངས་པ་བཞེས་ཐུབ་དགོས་གལ་ཆེ་སྐོར་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
