ཧི་མ་ཅལ་མངའ་སྡེའི་བོད་སློབ་ནང་ཁུལ་གྱི་སྐབས་བཅུ་གཅིག་པའི་རིགས་ལམ་འདུ་འཛོམས་ཐོག་བོད་སློབ་ཁག་དྲུག་གི་སློབ་ཕྲུག་གྲངས་ ༣༠༠ ལྷག་མཉམ་ཞུགས་གནང་འདུག
ཕྱི་ཟླ་ ༩ ཚེས་ ༣༠ ནས་ཕྱི་ཟླ་ ༡༠ ཚེས་ ༥ བར་ཉིན་གྲངས་དྲུག་རིང་བོད་ཁྱིམ་གོ་པལ་པུར་དུ། ཧི་མ་ཅལ་མངའ་སྡེའི་བོད་སློབ་ནང་ཁུལ་གྱི་སྐབས་བཅུ་གཅིག་པའི་རིགས་ལམ་འདུ་འཛོམས་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས། བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་ངག་དབང་ལྷ་མོ་ལགས། གོ་པལ་པུར་བོད་ཁྱིམ་དབུ་འཛིན་སྐལ་བཟང་ཕུན་ཚོགས་ལགས། གོ་པལ་པུར་བོད་ཁྱིམ་སློབ་སྤྱི་ཀརྨ་ཤེས་རབ་མཐར་ཕྱིན་ལགས། སློབ་གྲྭ་ཁག་གི་ལྟ་གྲུབ་སློབ་དཔོན་རྣམས། དེ་བཞིན་སུ་ཇཱ་བོད་ཁྱིམ་དང་། དྷ་སྟེང་བོད་ཁྱིམ། ཅོན་ཏ་ར་བོད་ཁྱིམ། དཔེ་སྟོན་སློབ་གྲྭ སེ་ལ་ཀུལ་བོད་ཁྱིམ། གོ་པལ་པུར་བོད་ཁྱིམ་བཅས་ཀྱི་འཛིན་རིམ་ལྔ་བ་ནས་དགུ་བ་བར་གྱི་སློབ་ཕྲུག་ཁྱོན་གྲངས་ ༣༠༠ ལྷག་མཉམ་ཞུགས་གནང་ཡོད་འདུག
འདི་གའི་གསར་འགོད་པས་ཁ་པར་བརྒྱུད་རིགས་ལམ་འདུ་འཛོམས་ཀྱི་གལ་གནད་སྐོར་ལ་གོ་པལ་པུར་བོད་ཁྱིམ་སློབ་སྤྱི་ཀརྨ་ཤེས་རབ་མཐར་ཕྱིན་ལགས་སུ་དྲིས་པར་ཁོང་གིས། ལོ་ལྟར་ཤེས་ཡོན་ཚོགས་འདུའི་སྐབས་སུ་བརྗོད་གཞི་གཅིག་ནི་སློབ་གྲྭའི་ནང་རིགས་ལམ་ཡར་རྒྱས་གཏོང་ཕྱོགས་སྐོར་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་གི་སྡིངས་ཆའི་སྟེང་མི་མང་ལ་རིགས་ལམ་བརྒྱུད་ནས་ལེགས་སྐྱེས་ཆེ་ཤོས་ཤིག་འབུལ་ཐུབ་རྒྱུ་རེད་ཅེས་གསུངས་ཡོད་པ་བཞིན། སློབ་ཁྲིད་ཀྱི་ཐབས་ལམ་ནང་རིགས་ལམ་སྦྱར་ནས་སློབ་ཁྲིད་བྱེད་བཞིན་ཡོད། དགེ་རྒན་ཚོས་ཀྱང་དབྱར་ཁའི་ཟླ་གཉིས་ཙམ་རིང་རིགས་ལམ་སློབ་བཞིན་ཡོད། སྔོན་མ་རིགས་ལམ་འདུ་འཛོམས་ཐོག་སློབ་ཕྲུག་ཉུང་ཉུང་མ་གཏོགས་མཉམ་ཞུགས་བྱེད་ཀྱི་མེད། ད་ལན་སེ་ལ་ཀུལ་བོད་ཁྱིམ་ནས་སློབ་ཕྲུག་གྲངས་ ༢༠ མ་གཏོགས། སློབ་གྲྭ་གཞན་རྣམས་ནས་སློབ་ཕྲུག་གྲངས་ ༥༠ རེ་མཉམ་ཞུགས་གནང་བཞིན་ཡོད། སྔོན་མ་ལྟ་གྲུབ་སློབ་དཔོན་རྣམས་ཀྱིས་གང་འཁྲིད་པ་དེ་སློབ་ཕྲུག་གིས་བློ་འཛིན་བྱས་ཏེ་སྐྱོར་བཞིན་ཡོད། ད་ལྟ་སློབ་ཕྲུག་རྣམས་ཀྱིས་རང་ཉིད་ཀྱི་རིག་པ་བཏང་སྟེ་རྩོད་པ་རྒྱག་གི་འདུག དེ་ནི་ཧ་ཅང་སེམས་ཚོར་དགའ་བ་སྐྱེ་དགོས་པ་ཞིག་རེད། སྤྱིར་སློབ་ཕྲུག་ཡོངས་ལ་རིགས་ལམ་ཐོག་གོ་རྟོགས་ཡག་པོ་བྱུང་འདུག ཅེས་འགྲེལ་བརྗོད་གནང་བྱུང།
མ་འོངས་བའི་རིགས་ལམ་ཡར་རྒྱས་གཏོང་ཕྱོགས་སྐོར་ལ་ཁོང་གིས། ང་ཚོས་རིགས་ལམ་ཐོག་སློབ་ཁྲིད་ཀྱི་ཤུགས་རྒྱག་རྒྱུ་ཡིན། དེ་ཡང་བོད་ཡིག་དང་། དབྱིན་ཡིག ཨང་རྩིས། ཚན་རིག་སོགས་རིགས་ལམ་སློབ་ཁྲིད་ཀྱི་ཐབས་ལམ་ཐོག་ནས་ནུས་པ་སྤུངས་ཐུབ་ཚེ། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་དང་། སློབ་ཕྲུག་གི་མི་ཚེ་ནང་རིག་པའི་ལམ་ནས་ལེགས་ཉེས་བླང་དོར་འབྱེད་ཐུབ་པའི་མི་ཞིག་ཏུ་འགྱུར་ཐུབ་པའི་རེ་བ་བྱེད་བཞིན་ཡོད། ད་དུང་ཡིན་ཡང་ང་ཚོས་རིགས་ལམ་ཐོག་འབད་བརྩོན་བྱེད་དགོས་ཀྱི་འདུག་ལ། ང་ཚོས་མུ་མཐུད་དུ་རིགས་ལམ་ཐོག་འབད་བརྩོན་བྱེད་པའི་དམ་བཅའ་བརྟན་པོ་ཡོད། ཅེས་བརྗོད་བྱུང་།
མཛད་སྒོའི་ཐོག་བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་ངག་དབང་ལྷ་མོ་ལགས་ཀྱིས། དབྱིན་ཡིག་དང་ཚན་རིག་སོགས་ཀྱི་སློབ་ཚན་ས་ཆ་གང་དུའང་སློབ་སྦྱོང་བྱེད་རྒྱུ་ཡོད། ཡིན་ནའང་བོད་པའི་སློབ་གྲྭ་ནས་མི་འདྲ་བ་ཞིག་ནི་བོད་ཀྱི་སྐད་ཡིག་དང་། ཆོས། རིག་གཞུང་གི་སློབ་སྦྱོང་ཡིན། རིགས་ལམ་དེའང་ལས་རིམ་གྱི་ངོ་བོ་ཙམ་མིན་པར་སློབ་ཚན་ཐོག་སློབ་ཁྲིད་བྱེད་ཀྱི་ཡོད། དེའང་སློབ་གྲྭ་ཁག་གི་ལྟ་གྲུབ་སློབ་དཔོན་རྣམས་ཀྱིས་རིགས་ལམ་སློབ་ཁྲིད་ལ་ཧུར་བརྩོན་བྱེད་བཞིན་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་དང་། ཆོས་ལུགས་ལ་མ་བརྟེན་པའི་བཟང་སྤྱོད་ཐོག་ཧ་ཅང་དཀའ་ལས་མང་པོ་རྒྱག་གི་ཡོད། ཅེས་བརྗོད་སོང་།
དེ་བཞིན་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས། ང་ཚོས་ཨང་རྩིས་དང་ཚན་རིག་སོགས་རིགས་ལམ་གྱི་ཐབས་ལམ་ཐོག་སློབ་ཁྲིད་བྱེད་ཐུབ་ཚེ། འཛམ་གླིང་གི་ཤེས་ཡོན་སློབ་གསོའི་ཐོག་བོད་ཀྱི་ཐུན་མོང་མ་ཡིན་པའི་རིག་གཞུང་འགྲོ་སྟངས་ཀྱིས་ཞབས་འདེགས་ཞུ་ཐུབ་པར་བསམ་གྱི་ཡོད། དགེ་རྒན་དང་སློབ་ཕྲུག་ཡོངས་ཀྱིས་བསམ་བློ་དེའི་ཐོག་འབད་བརྩོན་ཞུ་རྒྱུ་གལ་ཆེན་པོ་རེད། ཐེངས་འདིའི་རིགས་ལམ་འདུ་འཛོམས་སྐབས་སུ་ཕན་ཚུན་གྱི་བསམ་བློ་བརྗེ་རེས་དང་བློ་བསྐྱེད་གསར་བ་ལེན་དགོས། དེའི་ཁྲོད་དུ་སློབ་གཉེར་བའི་མཐོང་རྒྱ་དང་ཐོས་རྒྱ་ཆེ་རུ་འགྲོ་ངེས་ཡིན། དེང་སྐབས་སློབ་གྲྭ་ནས་དགེ་རྒན་གྱིས་སློབ་ཁྲིད་བྱེད་པའི་རྣམ་པ་འགྱུར་བཞིན་ཡོད་པས། དུས་ཀྱི་འགྱུར་བ་དང་བསྟུན་ནས་ཤེས་ཡོན་ཡར་རྒྱས་ཐད་བསམ་བློའི་ཁ་ཕྱོགས་གསར་བ་འཚོལ་རྒྱུ་གལ་ཆེན་པོ་རེད། ཅེས་བརྗོད་སོང་།
གསར་འགོད་པ། བྱམས་པ་ཚེ་རིང་།
