ཉི་ཧོང་གི་སྲིད་བློན་གསར་པར་འཚམས་འདྲི་མཛད།

༧གོང་ས་མཆོག་ནས་ཉི་ཧོང་གི་སྲིད་བློན་གསར་པ་སྐུ་ཞབས་ཤི་གྷེ་རུ་ཨི་ཤི་བྷ་མཆོག་ལ་འཚམས་འདྲི་དང་སྦྲགས་ཉི་ཧོང་མི་མང་གི་རེ་བ་དང་མངོན་འདོད་ལྟར་ལས་དོན་མཐའ་དག་བསྒྲུབ་ཐུབ་རྒྱུ་དང་ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུའི་ཐུགས་རེ་ཡོད་ཅེས་གསུངས།

ཁ་སང་ཕྱི་ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་གསར་དུ་འོས་འདེམས་བྱུང་བའི་ཉི་ཧོང་གི་སྲིད་བློན་ཐེངས་ ༦༥ པ་ཤི་གྷེ་རུ་ཨི་ཤི་བྷ་ (Shigeru Ishiba) མཆོག་ལ་འཚམས་འདྲིའི་གསུང་འཕྲིན་བསྩལ་འདུག་ཅིང་། གསུང་འཕྲིན་ནང་འདས་པའི་ལོ་ངོ་མང་པོའི་ནང་ངོས་རང་ཉི་ཧོང་དུ་ཡང་ཡང་བསྐྱོད་རྒྱུའི་གོ་སྐབས་བྱུང་ཡོད་པ་མ་ཟད། ངོས་ནས་འགྲོ་བ་མིའི་གཞི་རྩའི་རིན་ཐང་སྙིང་རྗེ་དང་ཆོས་ལུགས་མཐུན་སྒྲིལ་གོང་འཕེལ་གཏོང་བར་འབད་བརྩོན་དང་། རྡུལ་ཕྲན་མཚོན་ཆ་ཚུད་པའི་གོ་མཚོན་མེད་པའི་འཛམ་གླིང་ཞི་བདེ་བསྐྲུན་ཐབས་ཐད་ལ་རྒྱལ་ཁབ་འདིའི་མི་མང་རྣམས་ཀྱིས་དོ་སྣང་དང་སྤྲོ་སེམས་བསྟན་པར་རྗེས་སུ་ཡི་རངས་ཡོད། ཅེས་གསུངས།

ཉི་ཧོང་མི་མང་གིས་སོ་སོའི་རྒྱལ་ཁབ་དེ་འཛམ་གླིང་ནང་གི་ཆེས་དེང་རབས་ཅན་གྱི་རྒྱལ་ཁབ་ཅིག་ཏུ་བསྒྱུར་བའི་ལས་དོན་ལ་ངོས་རང་གིས་ཡིད་སྨོན་སྐྱེ་ཡི་ཡོད། ཉི་ཧོང་རྒྱལ་ཁབ་ཀྱིས་དུས་རྒྱུན་དུ་འཛམ་གླིང་ནང་ཞི་བདེ་བསྐྲུན་ཐབས་ཀྱི་ལས་དོན་སྣེ་ཁྲིད་བྱས་ཡོད་ལ། ཁྱེད་ཀྱི་རྒྱལ་ཁབ་ཀྱི་སྲོལ་རྒྱུན་ཆོས་ལུགས་ནང་ཞི་བདེ་ལ་རིན་ཐང་ཆེན་པོ་འཇོག་གི་ཡོད་པས། སྲིད་བློན་ཁྱེད་ཀྱིས་གཞུང་འཛིན་པའི་སྐབས་སུ་རྨང་གཞི་བརྟན་པོ་ཞིག་འཛུགས་ཐུབ་རྒྱུའི་རེ་བ་ཡོད། དམིགས་བསལ་གྱིས་ད་ལྟའི་ཆར་འཛམ་གླིང་གི་ཡུལ་གྲུ་མང་པོ་ཞིག་གི་ནང་དུ་འགྱུར་ལྡོག་འགྲོ་བཞིན་པའི་སྐབས་འདིར། གྲོས་མོལ་དང་རྒྱལ་འབྲེལ་ཐབས་ལམ་བརྒྱུད་དཀའ་རྙོག་རྣམས་སེལ་བར་མཉམ་རུབ་ཀྱི་འབད་པ་བྱ་རྒྱུ་ནི་གལ་འགངས་ཤིན་ཏུ་ཆེན་པོ་རེད། ཅེས་དང་། ངོས་ནས་སྐུ་ཞབས་ཨི་ཤི་ཌ་མཆོག་གིས་ཉི་ཧོང་མི་མང་གི་རེ་བ་དང་མངོན་འདོད་ལྟར་ལས་དོན་ལམ་ལྷོངས་ཡོང་བའི་སྨོན་འདུན་དང་། ཞི་བདེ་དང་སྙིང་རྗེ་ལྡན་པའི་འཛམ་གླིང་ཞིག་བསྐྲུན་རྒྱུའི་ཐུགས་རེ་ཡོད། ཅེས་གསུངས་འདུག

ཤི་གྷེ་རུ་ཨི་ཤི་བྷ་ལགས་ནི་ཕྱི་ལོ་ ༡༩༥༧ ཟླ་ ༢ ཚེས་ ༤ ཉིན་ཉི་ཧོང་གི་ཆི་ཡོ་ཌ་ (Chiyoda) གྲོང་ཁྱེར་དུ་སྐྱེས། ཉི་ཧོང་གི་གྲོང་ཁྱེར་མཱི་ན་ཏོ་ (Minato) རུ་རྟེན་གཞི་བྱས་པའི་ཀིའོ་མཐོ་རིམ་སློབ་གཉེར་ཁང་ (Kieo University) ནས་སློབ་མཐར་ཕྱིན་རྗེས་དངུལ་ཁང་གི་ལས་ཀ་བྱས། ཕྱི་ལོ་ ༡༩༨༦ ལོར་ཁོང་ཉི་ཧོང་གི་གྲོས་ཚོགས་འོག་མའི་འཐུས་མིར་བདམས་ཐོན་བྱུང་། ཕྱི་ལོ་ ༢༠༠༧ ནས་ ༢༠༠༨ བར་རྒྱལ་སྲུང་བློན་ཆེན་དང་། ༢༠༡༢ ནས་ ༢༠༡༤ བར་ཉི་ཧོང་གི་གུ་ཡངས་དམངས་གཙོའི་ཆབ་སྲིད་ཚོགས་པའི་སྤྱི་ཁྱབ་དྲུང་ཆེའི་ལས་དོན་གཉེར། འདི་ལོར་ཨི་ཤི་བྷ་མཆོག་ཉི་ཧོང་གི་གུ་ཡངས་དམངས་གཙོ་ཚོགས་པའི་སྲིད་འཛིན་དང་ཉི་ཧོང་གི་སྲིད་བློན་ཐེངས་ ༦༥ པའང་ཡིན་འདུག་ལ། ཟླ་འདིའི་ཕྱི་ཚེས་ ༡ ཉིན་ནས་བཟུང་སྲིད་བློན་གྱི་ལས་ཁུར་དངོས་སུ་མགོ་བཙུགས་ཡོད་པ་རེད།

གསར་འགོད་པ། བསྟན་འཛིན་ཕུར་བུ།