པ་ཀི་སི་ཐན་ནང་འབར་རྫས་དོན་རྐྱེན་གྱིས་རྒྱ་མི་གཉིས་བསད་འདུག

པ་ཀི་སི་ཐན་གྱི་བྷེ་ལོ་ཆི་སི་ཊན་བཅིངས་གྲོལ་དམག་སྡེའི་ཁོངས་ཀྱི་མི་ཞིག་གིས་འབར་རྫས་བཀོལ་སྤྱོད་ཀྱིས་རང་ཤི་བརྒྱབ་ནས་རྒྱ་མི་གཉིས་བསད་འདུག

དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། པ་ཀི་སི་ཐན་གྱི་གྲོང་ཁྱེར་ཀ་ར་ཆི་ (Karachi) རུ་རྟེན་གཞི་བྱས་པའི་ཇིན་ནཱ་རྒྱལ་སྤྱིའི་གནམ་ཐང་ (Jinnah International Airport) གི་ཉེ་འགྲམ་དུ་འབར་གས་དོན་རྐྱེན་གྱིས་རྒྱ་མི་གཉིས་བསད་ཡོད་པ་མ་ཟད། ཉུང་མཐར་མི་གྲངས་ ༡༠ ལ་རྨས་སྐྱོན་ཕོག་ཡོད་འདུག དེ་འབྲེལ་པ་ཀི་སི་ཐན་གྱི་བྷེ་ལོ་ཆི་སི་ཊན་བཅིངས་གྲོལ་དམག་སྡེ་ (Balochistan Liberation Army) ཟེར་བས་གསར་འགོད་བསྒྲགས་གཏམ་སྤེལ་བའི་ནང་། རྒྱ་མི་འཆར་འགོད་པ་དང་མ་འཛུགས་བྱེད་མཁན་གཉིས་ལ་དམིགས་ཏེ་འབར་རྫས་བེད་སྤྱོད་བྱས་ཡོད། ཅེས་དང་། རྒྱ་མི་གཉིས་ཀྱིས་རླངས་འཁོར་ནང་དུ་འབར་རྫས་ཤིག་འཁྱེར་ཡོད་པའི་དོགས་གཞིའི་འོག ཁ་སང་ཕྱི་ཚེས་ ༦ ཉིན་གྱི་དགོང་མོའི་ཆུ་ཚོད་ ༡༡ སྟེང་བྷེ་ལོ་ཆི་སི་ཊན་བཅིངས་གྲོལ་དམག་སྡེ་དེའི་ཁོངས་ཀྱི་མ་ཇི་ཏི་བྷི་རི་གྷེ་ཊེ་ (Majeed Brigade) ཟེར་བའི་ཚོགས་པའི་དམག་མི་ཤཱ་ཧྥ་ཧ་ཌི་ (Shah Fahad) ཟེར་བའི་ཉེས་ཅན་པས་འབར་རྫས་བཀོལ་སྤྱོད་ཀྱིས་རང་ཤི་བརྒྱབ་སྟེ་རྒྱ་མི་གཉིས་བསད་ཡོད་ཚུལ་བརྗོད་འདུག

པ་ཀི་སི་ཐན་གྱི་སྲིད་བློན་ཤེ་བྷ་སི་ཤཱ་རི་ཧྥི་ (Shehbaz Sharif) ཡི་སྒེར་གྱི་སྤྱི་ཚོགས་དྲ་རྒྱ་ཨེག་སི་ (X) སྟེང་། འབར་གས་ཀྱི་དོན་རྐྱེན་དེ་ནི་ཚབས་ཆེན་ཞིག་ཡིན་པ་མ་ཟད། རྒྱ་རིགས་རྣམས་ལ་གདུང་སེམས་མཉམ་སྐྱེད་ཡོད། རྒྱ་ནག་ནི་པ་ཀི་སི་ཐན་གྱི་བློ་མཐུན་གྱི་གྲོགས་པོ་ཞིག་ཡིན་པ་མ་ཟད། ང་ཚོས་རྒྱ་མི་རྣམས་ཀྱི་བདེ་འཇགས་ལ་ལྟ་རྟོག་བྱ་རྒྱུའི་དམ་བཅའ་བརྟན་པོ་ཡོད། ཅེས་བརྗོད་འདུག་ལ། རྒྱལ་ཁབ་དེའི་ཕྱི་སྲིད་ལྷན་ཁང་གིས། དོན་རྐྱེན་དེ་དང་འབྲེལ་ནས་རྒྱ་ནག་གི་དཔོན་རིགས་དང་འབྲེལ་བ་བྱས་དང་བྱེད་མུས་ཡིན་པ་མ་ཟད། བྱ་སྤྱོད་དེ་འདྲ་སྤེལ་བའི་རྐྱེན་གྱིས་རྒྱལ་ཁབ་གཉིས་ཀྱི་འབྲེལ་ལམ་ལ་གནོད་སྐྱོན་ཚབས་ཆེན་བཟོ་ཡི་ཡོད་པར་བརྟེན། གཞུང་གིས་ནག་ཉེས་ཅན་དེ་བློས་གཏོང་བྱེད་ཀྱི་མེད་པ་མ་ཟད་ཁྲིམས་ཐོག་ནས་ཉེས་ཆད་གཏང་རྒྱུ་ཡིན་སྐོར་སོགས་བརྗོད་འདུག

དེ་འབྲེལ་ས་གནས་གསར་ཁང་ཁག་ཅིག་ཏུ་གནས་ཚུལ་ཐོན་པའི་ནང་། གནམ་ཐང་གི་ཉེ་འགྲམ་དུ་འབར་གས་ཀྱི་དོན་རྐྱེན་བྱུང་བ་དང་འབྲེལ་ནས་རྨས་སྐྱོན་ཕོག་པའི་མི་གྲངས་ཉུང་མཐར་ ༡༠ ཙམ་ཡོད་ཚུལ་བརྗོད་ཀྱང་། དོན་དངོས་སུ་མི་གྲངས་ཇི་ཙམ་ལ་གནོད་འཚེ་ཕོག་ཡོད་མེད་ཁ་གསལ་མེད་པ་མ་ཟད། ད་ལྟའི་ཆར་རྨས་སྐྱོན་ཕོག་པའི་མི་དེ་དག་གནམ་ཐང་གི་ཉེ་འགྲམ་དུ་སྨན་བཅོས་བྱས་དང་བྱེད་མུས་ཡིན་འདུག འབར་གས་ཀྱི་དོན་རྐྱེན་འབྱུང་ཡུལ་གྱི་གཞུང་ལམ་དུ་འགྲོ་སྐྱོད་བཀག་སྡོམ་བྱས་པ་ལས། གནམ་ཐང་བརྒྱུད་འཕུར་སྐྱོད་ཀྱི་འགྲིམ་འགྲུལ་མུ་མཐུད་བྱེད་ཆོག་གི་ཡོད་སྐོར་སོགས་གསལ་འདུག

འབར་གས་ཀྱི་དོན་རྐྱེན་དང་འབྲེལ་ནས་པ་ཀི་སི་ཐན་དུ་ཡོད་པའི་རྒྱ་ནག་གཞུང་ཚབ་ཁང་གིས་གསར་འགོད་གསལ་བསྒྲགས་སྤེལ་བའི་ནང་། ཁ་སང་ཕྱི་ཚེས་ ༦ ཉིན་འབར་གས་ཀྱི་དོན་རྐྱེན་བྱུང་ནས་རྒྱ་མི་གཉིས་བསད་ཡོད་སྐོར་དང་། རྒྱ་མི་འཆར་འགོད་པ་གཉིས་པོ་ནི་ཀ་ར་ཆི་རུ་རྟེན་གཞི་བྱས་པའི་རྒྱ་ནག་གིས་དཔལ་འབྱོར་མཐུན་འགྱུར་འོག་ཡོད་པའི་ཁཱ་སིམ་རྒྱ་མཚོའི་གྲུ་ཁའི་གློག་ཤུགས་སྐྱེད་སྤེལ་གྱི་བཟོ་གྲྭའི་ (Port Qasim Power Generation Co Ltd) ནང་རྡོ་སོལ་གློག་ཤུགས་བཟོ་གྲྭ་གཉིས་འཛུགས་སྐྲུན་གྱི་ལས་གཞིའི་འཆར་འགོད་པ་ཞིག་ཡིན་ཚུལ་བརྗོད་འདུག་ལ། རྒྱ་ནག་གཞུང་ཚབ་ཁང་གིས་པ་ཀི་སི་ཐན་དུ་ཡོད་པའི་རྒྱ་མི་དང་རྒྱ་རིགས་འཆར་འགོད་པ་རྣམས་དོགས་ཟོན་བྱ་དགོས་པའི་ཉེན་བརྡ་བཏང་ཡོད་པ་མ་ཟད། ཐེངས་འདིའི་དོན་རྐྱེན་དང་འབྲེལ་བའི་ལས་དོན་ལ་ཞིབ་འཇུག་ཞིབ་ཚགས་བྱེད་དགོས་སྐོར་སོགས་བསྒྲགས་འདུག གཞན་ཡང་། པ་ཀི་ས་ཐན་གྱི་བྷེ་ལོ་ཆི་སི་ཊན་ཞིང་ཆེན་དུ་སྣུམ་དང་གཏེར་རིགས་ཚུད་པའི་རང་བྱུང་ཐོན་ཁུངས་ཀྱི་ས་ཁུལ་དེར་རྒྱ་ནག་གིས་དཔལ་འབྱོར་མཐུན་རྐྱེན་སྦྱར་བའི་ཐོག པ་ཀི་སི་ཐན་ནང་གློག་ཤུགས་འཛུགས་སྐྲུན་གྱི་ལས་འཆར་དང་འབྲེལ་ནས་རྒྱལ་ཁབ་གཉིས་མཉམ་འབྲེལ་གྱིས་ལས་དོན་བྱས་དང་བྱེད་མུས་ཡིན་ཚུལ་སོགས་ཀྱང་བཀོད་འདུག

ཉེ་བའི་ལོ་ཤས་ནང་པ་ཀི་སི་ཐན་ནང་གི་རྒྱ་རིགས་མི་སེར་རྣམས་ལ་འཇབ་རྒོལ་གྱི་དོན་རྐྱེན་མང་པོ་འབྱུང་གི་ཡོད་པ་ལྟར། འདི་ལོའི་ཕྱི་ཟླ་ ༣ པའི་ནང་པ་ཀི་སི་ཐན་གྱི་བྷེ་ལོ་ཆི་སི་ཊན་བཅིངས་གྲོལ་དམག་སྡེས་གྷོ་ཝ་ཌར་གྲུ་ཁའི་ (Gwadar Port) འགྲམ་དུ་ཡོད་པའི་པ་ཀི་སི་ཐན་གྱི་མཚོ་དམག་དང་གནམ་དམག་གི་དམག་སྒར་ཞིག་ལ་མེ་མདའ་གང་བྱུང་འཕངས་པ་དང་འབར་རྫས་མང་པོ་གཡུགས་པའི་དོན་རྐྱེན་ཚབས་ཆེན་བྱུང་ཡོད་ཅིང་། དོན་རྐྱེན་དེ་ནི་པ་ཀི་སི་ཐན་གྱི་མཚོ་དམག་དང་གནམ་དམག་ལྟེ་གནས་ཤིག་ལ་འཇབ་རྒོལ་གྱི་དོན་རྐྱེན་ཆེ་ཤོས་ཐེངས་གཉིས་པ་བྱུང་བར་ངོས་འཛིན་བྱས་ཡོད་པ་རེད། ཕྱི་ལོ་ ༢༠༢༢ ལོར་ཚོགས་པ་ཞིག་གིས་ཀ་ར་ཆིའི་མཐོ་རིམ་སློབ་གཉེར་ཁང་གི་ཁུང་ཙི་སློབ་གསོའི་ལྟེ་གནས་ཀྱི་ཉེ་འགྲམ་དུ་འབར་རྫས་བཀོལ་སྤྱོད་ཀྱིས་རང་ཤི་བརྒྱབ་སྟེ། རྒྱ་རིགས་སློབ་སྟོན་པ་ ༣ དང་པ་ཀི་སི་ཐན་གྱི་རླངས་འཁོར་ཁ་ལོ་བ་གཅིག་བསད་ཡོད་འདུག

གསར་འགོད་པ། བསྟན་འཛིན་ཕུར་བུ།