ཕྱི་ལོ་ ༢༠༢༤ ལོའི་དངོས་ཁམས་རིག་པའི་ནོ་སྦེལ་གཟེངས་རྟགས་དེ་བཅོས་མའི་རིག་རྩལ་ལ་བརྟེན་ནས་འཕྲུལ་རིགས་བཀོལ་སྤྱོད་ཐུབ་པའི་གསར་གཏོད་པ་གཉིས་ལ་ཐོབ་འདུག
དེ་རིང་ཉིན་རྒྱབ་སུ་ཝེ་ཌན་གྱི་རྒྱལ་ས་སི་ཊོག་ཧོམ་དུ་ནོ་སྦེལ་གཟེངས་རྟགས་ཚོགས་ཆུང་གིས། བཅོས་མའི་དབང་རྩའི་མ་ལག་ལ་བརྟེན་ནས་འཕྲུལ་རིགས་བཀོལ་སྤྱོད་ཐུབ་པའི་གསར་གཏོད་དང་རྨང་གཞི་ཞིབ་འཇུག་ཐུབ་པའི་ངོས་འཛིན་འོག འདི་ལོའི་དངོས་ཁམས་རིག་པའི་ནོ་སྦེལ་གཟེངས་རྟགས་དེ། ཨ་རིའི་པི་རིན་སི་ཊོན་གཙུག་ལག་སློབ་ཆེན་གྱི་སློབ་དཔོན་ཆེན་མོ་རྗོན་རྗོ་སེབ་ (John Joseph Hopfield) ལགས་དང་། ཁེ་ན་ཌའི་ཊོ་རོན་ཊོའི་གཙུག་ལག་སློབ་ཆེན་གྱི་སློབ་དཔོན་ཆེན་མོ་རྗའེ་ཧྥི་རི་ཧན་ཊོན་ (Geoffrey Hinton) ལགས་རྣམ་གཉིས་ལ་ཕུལ་ཡོད་འདུག
ནོ་སྦེལ་གཟེངས་རྟགས་ཚོགས་ཆུང་གིས། སྤྱིར་གློག་ཀླད་ཀྱིས་བསམ་བློ་གཏོང་མི་ཤེས་ཀྱང་། ད་ལྟ་འཕྲུལ་རིགས་ཀྱིས་དྲན་པ་ཉར་གསོག་དང་སློབ་སྦྱོང་ལ་ལད་ཟློས་བྱེད་ཐུབ་པས། འདི་ལོའི་དངོས་ཁམས་ནོ་སྦེལ་གཟེངས་རྟགས་ཐོབ་མཁན་གྱིས་འཕྲུལ་རིགས་ལ་བརྟེན་ནས་བསམ་བློ་གཏོང་ཐུབ་པར་བཟོས་ཡོད། ཅེས་བརྗོད་འདུག་ལ། འདི་ལོའི་དངོས་ཁམས་གཟེངས་རྟགས་ཐོབ་མཁན་ལ་ཨ་སྒོར་ས་ཡ་གཅིག་གི་བྱ་དགའ་ཡོད་འདུག
འདི་ལོའི་དངོས་ཁམས་ནོ་སྦེལ་གཟེངས་རྟགས་ཐོབ་མཁན་ཧན་ཊོན་ལགས་ཀྱིས། འཕྲུལ་རིགས་བྱེད་ནུས་ཀྱིས་འཕྲོད་བསྟེན་དང་བཟང་ཕྱོགས་ཀྱི་འཕེལ་རྒྱས་ཤུགས་ཆེན་གཏོང་གི་རེད་ལ། བཅོས་མའི་རིག་རྩལ་ལ་བརྟེན་ནས་འཕྲུལ་རིགས་བཀོལ་སྤྱོད་བྱེད་ཐུབ་པ་དེ་བཟོ་ལས་གསར་བརྗེར་འགྲན་མཚུངས་བྱེད་ཐུབ་ཀྱང་། གསར་གཏོད་འདི་མི་མང་པོའི་ལུས་ཤུགས་ལས་ལྷག་པའི་བསམ་བློའི་ནུས་པ་ལས་བརྒལ་ཐུབ། ང་ཚོར་ད་སྔ་བར་ང་ཚོ་ལས་ལྷག་གིས་རིག་རྩལ་རྣོ་བའི་འཕྲུལ་རིགས་ཀྱི་ཉམས་མྱོང་མེད། འོན་ཀྱང་། ང་ཚོས་སྟངས་འཛིན་བྱེད་མི་ཐུབ་པའི་མཇུག་འབྲས་འབྱུང་སྲིད་པའི་བསམ་བློ་གཏོང་དགོས། ཞེས་བརྗོད་འདུག
རྗོན་རྗོ་སེབ་ལགས་ནི་ཕྱི་ལོ་ ༡༩༣༣ ལོར་ཨ་རིའི་གྲོང་ཁྱེར་ཆི་གྷ་གྷོ་ (Chicago) རུ་སྐྱེས་ཤིང་། ༡༩༥༤ ལོར་ཨ་རིའི་མངའ་སྡེ་པེན་སིལ་ཝེ་ནི་ཡ་ (Pennsylvania) རུ་ཡོད་པའི་སྒེར་གཉེར་གྱི་སྒྱུ་རྩལ་རིག་པའི་མཐོ་སློབ་ནས་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན། དེ་ནས་ཕྱི་ལོ་ ༡༩༥༨ ལོར་ཨ་རིའི་ནེའུ་ཡོག་གྲོང་ཁྱེར་དུ་རྟེན་གཞི་བྱས་པའི་ཁོར་ནཱལ་གཙུག་ལག་སློབ་ཆེན་ནས་འབུམ་རམས་པའི་སློབ་མཐར་ཕྱིན། ཁོང་གིས་ཨ་རིའི་མངའ་སྡེ་ནེའུ་འཇར་སི་རུ་ཡོད་པའི་པི་རིན་སི་ཊོན་གཙུག་ལག་སློབ་ཆེན་གྱི་སློབ་དཔོན་ཆེན་མོ་གནང་མུས་ཡིན་པ་རེད།
རྗའེ་ཧྥི་རི་ཧན་ཊོན་ལགས་ནི་ཕྱི་ལོ་ ༡༩༤༧ ལོར་དབྱིན་ཡུལ་གྱི་རྒྱལ་ས་ལོན་ཌོན་དུ་སྐྱེས་ཤིང་། ༡༩༧༠ ལོར་ཀིང་སི་མཐོ་སློབ་ (King’s College) ནས་སེམས་ཁམས་རིག་པའི་བརྟག་དཔྱད་ཐོག་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན་རྗེས། ཕྱི་ལོ་ ༡༩༧༨ ལོར་སི་ཀཱོ་ཊི་ལན་ཌི་ (Scotland) རུ་ཡོད་པའི་ཨི་ཌིན་བྷག་གཙུག་ལག་སློབ་ཆེན་ (University of Edinburgh) ནས་བཅོས་མའི་རིག་རྩལ་ཐོག་འབུམ་རམས་པའི་བསླབ་པ་མཐར་སོན། ད་ལྟའི་ཆར་ཁོང་གིས་ཁེ་ན་ཌའི་ཊོ་རོན་ཊོ་གཙུག་ལག་སློབ་ཆེན་དུ་སློབ་དཔོན་ཆེན་མོའི་ཕྱག་ལས་གནང་མུས་ཡིན་འདུག
གསར་འགོད་པ། བསྟན་འཛིན་ཕུར་བུ།
