ཨ་རིའི་ཧོ་ལི་ཝིར་ཌི་གློག་བརྙན་འཁྲབ་སྟོན་པ་གྲགས་ཅན་བོད་དོན་རྒྱབ་སྐྱོར་བ་རི་ཆར་ཌི་གྷར་ལགས་ཀྱིས་༧གོང་ས་མཆོག་གི་མཛད་རྣམ་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་ཀྱིས་མ་འོངས་བར་འཛམ་གླིང་ནང་ཤུགས་རྐྱེན་ཆེན་པོ་ཞིག་སྤྲོད་ཐུབ་ཀྱི་རེད་ཅེས་བརྗོད་འདུག
ཟླ་འདིའི་ཕྱི་ཚེས་ ༣ ནས་ ༡༣ ཉིན་གྲངས་ ༡༡ རིང་སུད་སི་གྲོང་ཁྱེར་ཛུ་རིག་ཏུ། ཕྱི་ལོ་ ༢༠༢༤ ལོའི་ཛུ་རིག་གློག་བརྙན་དུས་སྟོན་འཚོག་བཞིན་ཡོད་ཅིང་། ཐེངས་འདིའི་གློག་བརྙན་དུས་སྟོན་ཐོག་འཛམ་གླིང་གི་རྒྱལ་ཁབ་འདྲ་མིན་གྱི་གློག་བརྙན་མི་འདྲ་བ་ ༡༠༠ ལྷག་མཉམ་ཞུགས་བྱས་པའི་ཁྲོད། ཁ་སང་ཕྱི་ཚེས་ ༨ ཉིན་༧གོང་ས་རྒྱལ་བ་རིན་པོ་ཆེ་མཆོག་གི་མཛད་རྣམ་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་ཞེས་པ་གཟིགས་འབུལ་ཞུས་ཡོད་ཅིང་། དབུ་འབྱེད་མཛད་སྒོའི་ཐོག་ཨ་རིའི་ཧོ་ལི་ཝིར་ཌི་གློག་བརྙན་འཁྲབ་སྟོན་པ་གྲགས་ཅན་བོད་དོན་རྒྱབ་སྐྱོར་བ་རི་ཆར་ཌི་གྷར་(Richard Gere) ལགས་དང་། སུད་སིའི་གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་( Barbara Miller)ལགས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག ༧སྐུའི་གཅུང་མོ་ཨ་མ་རྗེ་བཙུན་པདྨ་མཆོག་སོགས་མཉམ་ཞུགས་གནང་ཡོད་འདུག
ཉེ་ཆར་གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་ལགས་ཀྱིས། བདེ་སྐྱིད་ཀྱི་ཤེས་རབ་ཞེས་པའི་གློག་བརྙན་དེ་ནི་དགུང་ལོ་གྱ་དགུ་བཞེས་པའི་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་དངོས་སུ་བརྙན་མིག་བརྒྱུད་འཛམ་གླིང་སྤྱི་ལ་ཁྱབ་པའི་ནང་སེམས་ཀྱི་བདེ་སྐྱིད་དང་ཞི་བདེའི་འཚོལ་སྙེག་གི་དགོས་འདུན་དང་། དུས་རབས་ཉེར་གཅིག་པར་བདེ་སྐྱིད་དང་ཞི་བདེ་ངང་གནས་ཐུབ་པའི་སྐོར་གསུངས་ཡོད་པ་མ་ཟད། འཛམ་གླིང་ནོ་སྦེལ་ཞི་བདེ་གཟེངས་རྟགས་ཐོབ་མཁན་ཁྲོད་གློག་བརྙན་ནང་མི་སྒེར་གྱི་ལོ་རྒྱུས་ཞིབ་ཚགས་གསུང་མཁན་༧གོང་ས་མཆོག་ནང་བཞིན་ཞིག་བྱུང་མེད། ཅེས་བརྗོད་འདུག དེ་བཞིན་རི་ཆར་ཌི་གྷར་ལགས་ཀྱིས། གློག་བརྙན་ཐུང་ཐུང་འདིས་མ་འོངས་བར་འཛམ་གླིང་ནང་ཤུགས་རྐྱེན་ཆེན་པོ་ཞིག་སྤྲོད་ཐུབ་ཀྱི་རེད། ཅེས་བརྗོད་འདུག
གློག་བརྙན་འཁྲབ་ཁྲིད་པ་ཨོ་རེན་མོ་ཝར་མན་ལགས་ཀྱིས། རང་ཉིད་གློག་བརྙན་བཟོ་སྐྲུན་བྱེད་མཁན་ཞིག་ཡིན་པའི་ཆ་ནས་བྱམས་བརྩེའི་མཛེས་སྡུག་གིས་ཁེངས་ཤིང་ཁྱད་དུ་འཕགས་པའི་གློག་བརྙན་འདིའི་ནང་དུ་མགྲོན་འབོད་བྱས་ཏེ་མཉམ་ཞུགས་ཐུབ་པར་སེམས་གཏིང་ནས་བཀའ་དྲིན་ཆེ་ཞུ་བཞིན་ཡོད། བདེ་སྐྱིད་ཀྱི་ཤེས་རབ་ཞེས་པའི་གློག་བརྙན་གྱིས་ལྟད་མོ་བ་རྣམས་ལ་གཞན་དང་མི་འདྲ་བའི་གློག་བརྙན་གྱི་མྱོང་ཚོར་ཞིག་སྤྲོད་ཐུབ་པ་མ་ཟད། ང་ཚོ་འགྲོ་བ་མི་ཚང་མ་བློ་གྲོས་དང་སྤྲོ་སྣང་ལྡན་པ་གསལ་སྟོན་བྱེད་བཞིན་ཡོད། ཅེས་བརྗོད་འདུག
དེ་བཞིན་གློག་བརྙན་འཁྲབ་ཁྲིད་པ་ཧྥི་ལི་ཕི་ཌེ་ལཱ་ཁི་སི་(Philip Delaquis) ལགས་ཀྱིས། དངོས་བྱུང་གློག་བརྙན་འདིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེའི་རིང་གི་དམག་འཁྲུག་དང་གནམ་གཤིས་འགྱུར་ལྡོག་དང་། གོ་ལའི་དཀའ་ངལ་གདོང་ལེན་བྱེད་ཕྱོགས་ཀྱི་ཐད་གསལ་སྟོན་བྱས་ཡོད། ང་ཚོས་གློག་བརྙན་འདི་བཟོ་སྐྲུན་བྱེད་དགོས་པའི་ཀུན་སློང་ཡང་འཛམ་གླིང་མི་མང་གིས་དུས་རབས་ཀྱི་དཀའ་ངལ་དང་། འཇིགས་སྣང་། ལྷིང་འཇགས་མེད་པའི་ཚོར་བ་ལ་སེམས་བཟང་པོའི་ཐོག་ནས་གདོང་ལེན་བྱས་ཏེ་མཐུན་སྒྲིལ་དང་རེ་བ་གསལ་སྟོན་བྱ་རྒྱུ་དེ་ཡིན། ཞེས་བརྗོད་འདུག
བདེ་སྐྱིད་ཀྱི་ཤེས་རབ་ཞེས་པའི་དངོས་བྱུང་གློག་བརྙན་འདིའི་ནང་དུ་ད་ལྟ་བར་བོད་གཞུང་ནས་པར་སྐྲུན་བྱས་མེད་པའི་ཡིག་ཆ་དང་གསར་དུ་ཉར་ཚགས་བྱས་པའི་ཡིག་ཚགས་བཀོད་དེ། ༸གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་གི་ཆོས་སྲིད་གཉིས་ཀྱི་མཛད་རྣམ་ཕབ་སྐྲུན་བྱས་ཡོད་ཅིང་། ཉེ་ལམ་ཡུ་རོབ་ཀྱི་ཨ་སི་ཁོ་ཌི་ཨེ་ལི་ཊི་དང་ཨེ་ཁི་སི་གློག་བརྙན་ཚོང་གཉེར་ཁང་གཉིས་ཀྱིས་འཇར་མན་སྐད་ཡིག་བེད་སྤྱོད་བྱེད་བཞིན་པའི་ས་གནས་ཁག་ཏུ་གློག་བརྙན་འགྲེམས་སྤེལ་གྱི་པར་དབང་ཐོབ་ཐང་བླངས་ཡོད་པ་མ་ཟད། སུད་སི་རྒྱལ་ཁབ་ཀྱི་གློག་བརྙན་ས་ཚིགས་ཁག་ཏུ་མུ་མཐུད་གཟིགས་འབུལ་ཞུ་རྒྱུ་ཡིན་འདུག་ལ། ཟླ་འདིའི་ཕྱི་ཚེས་ ༢༠ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་གཟིགས་འབུལ་ཞུ་འཆར་ཡོད་འདུག
གསར་འགོད་པ། བྱམས་པ་ཚེ་རིང།
