མགོན་པོ་སྐྱིད་ལགས་སུ་དྲང་བདེན་གྱི་ཁྲིམས་བཤེར་ཐག་གཅོད་བྱུང་མེད་པ་རེད།

མགོན་པོ་སྐྱིད་ལགས་ཀྱིས་ལྷ་སའི་ཁྲན་ཀཱན་སྤྱི་བདེ་ཉེན་རྟོག་ཁང་ཞུ་གཏུགས་བྱས་ཡོད་ཀྱང་། ཁྲིམས་ཁང་གིས་མགོན་པོ་སྐྱིད་ཀྱི་ཞུ་གཏུགས་དོན་ཚན་ལྔ་ལ་ངོས་ལེན་མ་བྱས་པའི་ཁར། རྒྱ་གཞུང་ཉེན་རྟོག་པས་ཁོང་མོར་གང་བྱུང་གཅར་རྡུང་བཏང་སྟེ་འཛིན་བཟུང་བཙོན་འཇུག་བྱས་པ་སོགས་ནི་ཁྲིམས་མཐུན་ཡིན་ལུགས་བརྗོད་འདུག

ཕྱི་ཟླ་ ༩ ཚེས་ ༢༤  ཉིན་ལྷ་ས་གྲོང་ཁྱེར་ཁྲན་ཀཱན་རྫོང་ཁྲིམས་ཁང་གིས་མགོན་པོ་སྐྱིད་ཀྱིས་ཁྲན་ཀཱན་སྤྱི་བདེ་ལས་ཁུངས་ཞུ་གཏུགས་བྱས་པའི་ཉེས་མིང་ལྔ་ཆ་ཚང་རྩིས་མེད་བཏང་འདུག་ཅིང་། མགོན་པོ་སྐྱིད་ཀྱི་ཞུ་གཏུགས་དེ་འདི་ལོའི་ཕྱི་ཟླ་ ༣ ནང་བྱས་པ་ཞིག་ཡིན་པ་རེད་ལ། གཙོ་བོ་ཁོ་མོས་ཞི་བའི་སྒོ་ནས་རང་གི་གཅེན་པོ་རྡོ་རྗེ་བཀྲ་ཤིས་ཀློད་གྲོལ་ཡོང་སླད་ཞི་བའི་ལས་འགུལ་སྤེལ་བར། ལྷ་སའི་ཁྲན་ཀཱན་རྫོང་སྤྱི་བདེ་ལས་ཁུངས་ཀྱིས་ཉིན་བཅུའི་རིང་བཙོན་འཇུག་བྱས་པ་དེས་ཁོ་མོའི་ཐོབ་ཐང་ལ་གནོད་འགལ་བྱས་ཡོད་ཅེས་ཞུ་གཏུགས་བྱས་ཡོད་པ་རེད།

འདི་ལོའི་ཕྱི་ཟླ་ ༩ ཚེས་ ༢༤ ཉིན་ལྷ་ས་གྲོང་ཁྱེར་གྱི་ཁྲན་ཀཱན་རྫོང་ཁྲིམས་ཁང་གིས་ཤོག་ངོས་ ༡༦ ཡོད་པའི་བཅད་ཁྲའི་ཡིག་ཆའི་ནང་། ཕྱི་ལོ་ ༢༠༢༢ ཟླ་ ༦ པ་ནས་བཟུང་བདེན་པའི་འཐབ་རྩོད་པ་མགོན་པོ་སྐྱིད་ལགས་ཀྱིས་ཁོང་མོའི་གཅུང་པོ་རྡོ་རྗེ་བཀྲ་ཤིས་ལགས་ཀྱི་གནད་དོན་ལ་དྲང་བདེན་གྱིས་ཐག་གཅོད་ཡོང་སླད། བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གཙོས་པའི་ས་གནས་ཉེན་རྟོག་ལས་ཁུངས་ཀྱི་སྒོ་མདུན་དུ་ཕྲེད་དར་རིགས་བསྣམས་པ་དང་ཕྱག་འཚལ་བ་སོགས་ཀྱི་ཞུ་གཏུག་ལས་འགུལ་རབ་དང་རིམ་པ་སྤེལ་ཡོད་པ་མ་ཟད། དེས་ས་གནས་ཁྲིམས་ཁང་དང་ཉེན་རྟོག་ལས་ཁུངས་ཁག་གི་ལས་དོན་བྱེད་ཕྱོགས་ལ་འགོག་རྐྱེན་བཟོས་ཡོད་ཚུལ་དང་། ཞུ་གཏུག་དེ་དག་གིས་སྤྱི་ཚོགས་ཀྱི་བརྟན་ལྷིང་ལ་གནོད་འཚེ་སྐྱེལ་ཡོད་ཚུལ་བཤད་དེ། ལྷ་ས་ཉེན་རྟོག་པས་ཁོང་མོ་འཛིན་བཟུང་བཙོན་འཇུག་གིས་གཅར་རྡུང་བཏང་བར་བརྟེན། མགོན་པོ་སྐྱིད་ལགས་ཀྱིས་ལྷ་ས་གྲོང་ཁྱེར་ཁྲན་ཀཱན་ས་ཁུལ་སྤྱི་བདེ་ཡན་ལག་ལས་ཁུངས་སུ་ཁྲིམས་གཏུག་བྱས་པ་དང་། འདི་ལོའི་ཕྱི་ཟླ་ ༣ ཚེས་ ༢༥ ཉིན་ཁྲིམས་གཏུག་རྩོད་གཞིའི་གྱོད་དོན་དེ་ངོས་ལེན་བྱས་ཡོད་ལུགས་བཤད་ཀྱང་། ཕྱི་ཟླ་ ༦ ཚེས་ ༢༧ ཉིན་ལྷ་ས་གྲོང་ཁྱེར་གྱི་ཁྲན་ཀཱན་མི་དམངས་ཁྲིམས་ཁང་དུ་ཁྲིམས་ར་འཚོགས་ནས་བྱ་སྤྱོད་དེ་དག་ཁྲིམས་མཐུན་ཡིན་ལུགས་བརྗོད་པ་མ་ཟད། ཁྲིམས་འགལ་གྱི་དངོས་ཡོད་གནད་དོན་གསལ་པོ་མེད་པ་དང་བདེན་དཔང་མེད་ཚུལ་སོགས་བཤད་དེ། མགོན་པོ་སྐྱིད་ལགས་ཀྱི་ཁྲིམས་གཏུག་དེར་ངོས་ལེན་བྱས་མེད་པ་སོགས་གསལ་འདུག ད་དུང་མགོན་པོ་སྐྱིད་ལགས་ཀྱིས་ཐེངས་འདིའི་ཁྲིམས་ཐག་དེ་ལ་འདོད་བློ་མ་ཁེངས་ཚེ། ཉིན་གྲངས་ ༡༥ ནང་ཚུད་དུ་གྱོད་གཞི་དེ་གོང་རིམ་ཁྲིམས་ཁང་ལ་གཏུག་དགོས། ཞེས་སོགས་གསལ་འདུག

དེ་འབྲེལ་མགོན་པོ་སྐྱིད་ལགས་ཀྱིས་བརྙན་ཐུང་ཞིག་བཟོས་ཡོད་པའི་ནང་། ཁོང་མོས་རྒྱལ་ཁབ་ཀྱི་ཁྲིམས་དང་འགལ་བའི་ལས་དོན་རིགས་གང་ཡང་བྱས་མེད་ཀྱང་། ལྷ་སའི་རྒྱ་ནག་ཉེན་རྟོག་པས་ཁོང་མོར་འཛིན་བཟུང་བཙོན་འཇུག་དང་། གཅར་རྡུང་ཚད་མེད་བཏང་སྟེ་ནད་པར་བཏང་ཡོད་པ་མངོན་གསལ་དང་། གལ་ཏེ་ས་གནས་རྒྱ་གཞུང་ཉེན་རྟོག་པས་རྒྱ་ནག་གི་རྩ་ཁྲིམས་ནང་གསལ་ཡོད་པའི་དྲང་བདེན་གྱི་ཁྲིམས་བཤེར་གཙོས་པའི་ཁྲིམས་ཀྱི་ལམ་ལུགས་ཇི་བཞིན་ལག་བསྟར་མ་བྱས་ཚེ། དེ་སྔ་ལྟར་མུ་མཐུད་དུ་ཞུ་གཏུག་གི་ལས་འགུལ་སྤེལ་རྒྱུ་ཡིན་སྐོར་བརྗོད་འདུག

ཕྱི་ལོ་ ༢༠༢༠ ལོ་སྟེ་རྡོ་རྗེ་བཀྲ་ཤིས་བཙོན་འཇུག་བྱས་ཏེ་ལོ་ ༡༠ ཕྱིན་པའི་སྐབས་དེར་ཁོང་གི་ཁྲིམས་རྩོད་པ་དང་ནང་མི་ཚོས་ཐེངས་མང་དྲང་བདེན་མིན་པའི་ཁྲིམས་ཆད་དེར་བསྐྱར་ཞིབ་དགོས་པའི་རེ་བ་བཏོན་ཡོད་ཀྱང་དོན་འབྲས་ཐོན་མེད་པར་བརྟེན། ཕྱི་ལོ་ ༢༠༢༣ ཟླ་ ༥ ཚེས་ ༡༠ དང་ ༡༦། ཟླ་ ༧ ཚེས་ ༥ དང་ ༡༣། ཕྱི་ཟླ་ ༨ ཚེས་ ༢། ཕྱི་ཟླ་ ༨ ཚེས་ ༢༥ ། ཕྱི་ཟླ་ ༡༢ ཚེས་ ༡༣ བཅས་སུ་མགོན་པོ་སྐྱིད་ལགས་ཀྱིས་ལྷ་ས་འབྲིང་རིམ་མི་མང་ཁྲིམས་ཁང་གི་མདུན་སོགས་ལ་སྔ་གཞུག་ཏུ་ཐེངས་ ༧ ལྷག་ལ་ཟས་བཅད་ངོ་རྒོལ་དང་རྐྱང་ཕྱག་འཚལ་བ་སོགས་བྱས་ནས་ཞུ་འབོད་ལས་འགུལ་སྤེལ་བར་བརྟེན། འདས་ལོའི་ཞི་བའི་ལས་འགུལ་མཐའ་མའི་སྐབས་རྒྱ་གཞུང་གིས་མགོན་པོ་སྐྱིད་ལགས་ཉིན་གྲངས་དགུའི་རིང་འཛིན་བཟུང་བཀག་ཉར་བྱས་ཡོད་པ་དང་། ཁོང་གི་བཟའ་ཟླ་ཆོས་སྐྱོང་ལགས་ཉིན་གྲངས་ལྔའི་རིང་བཀག་ཉར་བྱས་ཏེ་ཕྱིས་སུ་ཀློད་གྲོལ་བཏང་ཡོད་འདུག

ཕྱི་ལོ་ ༢༠༡༠ ཟླ་ ༦ ཚེས་ ༢༦ ཉིན་ལྷ་ས་མི་དམངས་འབྲིང་རིམ་ཁྲིམས་ཁང་གིས་གསང་བའི་ཁྲིམས་བཤེར་བྱས་ཏེ་རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཚེ་བཙོན་གྱི་ཁྲིམས་ཐག་བཅད་པ་དང་འབྲེལ། གཅེན་མོ་མགོན་པོ་སྐྱིད་དང་མོའི་ཁྱོ་ག་ཆོས་སྐྱོང་གཉིས་ལ་གཅར་རྡུང་བཏང་ནས་འཇིགས་སྐུལ་བྱས་པ་ཉུང་ཉུང་མིན་ལ། འདས་ལོའི་ཕྱི་ཟླ་ ༨ ནང་མགོན་པོ་སྐྱིད་ལགས་ཀྱིས་ལྷ་ས་ཆེས་མཐོའི་ཁྲིམས་ཁང་གི་མདུན་དུ་ཞུ་གཏུགས་ཀྱི་ལས་འགུལ་སྤེལ་སྐབས། རྒྱ་ནག་ཉེན་རྟོག་པ་སྐོར་ཞིག་ཡོང་ནས་ཁོང་མོ་ཉེན་རྟོག་ཁང་དུ་བཙན་འཁྲིད་བྱས་ཡོད་པ་དང་། དང་པོ་བཙན་འཁྲིད་བྱེད་སྐབས་བདེ་པོ་ཐང་པོ་ཡིན་ཡང་ཀློད་གྲོལ་ཐོབ་སྐབས་འགུལ་སྐྱོད་མི་ཐུབ་པར་རོ་ལྟ་དང་ལུས་ལ་གཅར་རྡུང་བཏང་ནས་སྔོ་སྨུག་གིས་ཁེངས་ཡོད་འདུག

ཕྱི་ལོ་ ༢༠༠༨ ལོར་བོད་ནང་གི་ས་བྱི་ལོའི་ཞི་རྒོལ་ཆེན་མོའི་སྐབས་སུ་རྡོ་རྗེ་བཀྲ་ཤིས་ལགས་མཉམ་ཞུགས་དང་སྐུལ་སློང་བྱས་པའི་མ་ཉེས་ཁ་གཡོགས་ཀྱིས་ཟླ་མང་པོའི་རིང་འཛིན་བཟུང་བྱས་ཏེ་མནར་གཅོད་བཏང་ཡོད་ཀྱང་། ཁོང་ལ་ཉེས་འཛུགས་བྱས་པ་ཅི་ཡང་ཁས་ལེན་བྱས་མེད་པས། རྒྱ་གཞུང་ནས་ཡང་བསྐྱར་ཁོང་ལ་ཁ་བྲལ་རིང་ལུགས་པར་དཔལ་འབྱོར་གྱི་རོགས་རམ་བྱས་པའི་ནག་ཉེས་ཤིག་བཙུགས་ཀྱང་། ནག་ཉེས་ཀྱི་དཔང་རྟགས་ཅི་ཡང་སྟོན་ཐུབ་མེད་པས། མཐར་ཁོང་ལ་བུ་ལོན་གཡོ་ལེན་བྱས་པའི་ནག་ཉེས་བཙུགས་ནས་ཚེ་བཙོན་གྱི་ཁྲིམས་ཐག་བཅད། རྡོ་རྗེ་བཀྲ་ཤིས་ལགས་ཀྱི་ནང་མིས་རྒྱ་ནག་པེ་ཅིན་སོགས་སུ་ཁྲིམས་རྩོད་པ་ལ་བགླས་ནས་ཁྲིམས་གཏུགས་རབ་དང་རིམ་པ་མང་པོ་བྱས་ཀྱང་། ཁྲིམས་གཏུགས་ལ་དྲང་བདེན་ཅི་ཡང་མ་བྱུང་པས། མཐའ་མ་ཐབས་ཟད་འུ་ཐུག་གིས་ཨ་ཅག་མགོན་པོ་སྐྱིད་ལགས་ཀྱིས་ལྷ་སའི་ཁྲིམས་ཁང་གི་སྒོ་མདུན་དང་། བཙོན་ཁང་གི་མདུན་དུ་ཉིན་རེ་བཞིན་ལས་འགུལ་སྤེལ་དགོས་བྱུང་ཡོད་ཅིང་། རྒྱ་ནག་གི་རྩ་ཁྲིམས་ཐོག་ནས་དྲང་བདེན་ཅི་ཡང་བྱུང་མེད་པའི་ནག་ཉེས་ལ་བསྐྱར་ཞིབ་བྱ་དགོས་སྐད་འབོད་བརྒྱབ་པས། ཁོང་མོ་གཅར་རྡུང་དང་བཙོན་འཇུག་སོགས་བྱས་ཡོད་པ་རེད།

གསར་འགོད་པ། བསྟན་འཛིན་ཕུར་བུ།