རྩོམ་པ་པོ་ཧན་ཀང་ལགས་ཀྱིས་ལོ་རྒྱུས་ཀྱི་དཀའ་ངལ་ལ་གདོང་ལེན་དང་འགྲོ་བ་མིའི་ཚེ་སྲོག་གི་ཉམ་ཆུང་བའི་རྣམ་པ་མཚོན་པའི་བརྩམས་ཆོས་ལ་འདི་ལོའི་ནོ་སྦེལ་རྩོམ་རིག་གཟེངས་རྟགས་ཕུལ་གཏན་ཁེལ་འདུག
ཁ་སང་ཟླ་འདིའི་ཕྱི་ཚེས་ ༡༠ ཉིན་སུ་ཝེ་ཌན་གྱི་ཚན་རིག་སློབ་གླིང་དུ། ནོ་སྦེལ་གཟེངས་རྟགས་ཚོགས་ཆུང་གིས་གསལ་བསྒྲགས་སྤེལ་བ་ལྟར་ན། ཕྱི་ལོ་ ༢༠༢༤ ལོའི་ནོ་སྦེལ་རྩོམ་རིག་གཟེངས་རྟགས་དེ་ལྷོ་ཀོ་རི་ཡའི་རྩོམ་པ་པོ་ཧན་ཀང་ལགས་ལ་ཕུལ་འདུག་ཅིང་། རྩོམ་པ་པོ་ཧན་ཀང་ལགས་ལ་འདི་ལོའི་ནོ་སྦེལ་གཟེངས་རྟགས་འབུལ་དོན་ནི། ཁོང་མོས་ལོ་རྒྱུས་ཀྱི་དཀའ་སྡུག་ལ་གདོང་ལེན་བྱས་ཡོད་པ་མ་ཟད། འགྲོ་བ་མིའི་ཚེ་སྲོག་གི་ཉམ་ཆུང་བའི་རྣམ་པ་གསལ་བར་མཚོན་པའི་སྙན་ངག་གི་ཉམས་འགྱུར་ལྡན་པའི་ལྷུག་རྩོམ་བརྩམས་ཆོས་བསྟོད་བསྔགས་གནང་ཡོད་འདུག
དེ་འབྲེལ་ནོ་སྦེལ་གཟེངས་རྟགས་ཚོགས་ཆུང་གི་གསལ་བསྒྲགས་ནང་། ལྷོ་ཀོ་རི་ཡའི་རྩོམ་པ་པོ་ཧན་ཀང་ལགས་ཀྱི་བརྩམས་ཆོས་ལ་སྡུག་བསྔལ་གྱི་རྣམ་པ་གཉིས་ཕྱིར་འདོན་བྱས་པའི་ཁྱད་ཆོས་ལྡན་པ་མ་ཟད། ལུས་དང་སེམས་གཉིས་ཀྱི་སྡུག་བསྔལ་གྱི་བསླངས་བའི་འཛམ་གླིང་གི་ཤར་ཕྱོགས་པ་རྣམས་ཀྱི་བསམ་བློ་གཏོང་སྟངས་དང་འབྲེལ་བ་ཟབ་མོ་ཡོད། ཧན་ཀང་གི་སྒྲུང་ཐུང་ཡོ་རོ་པ་ཞེས་པའི་ནང་དུ། སྒྲུང་བཤད་མཁན་སྐྱེས་པ་ཞིག་བུད་མེད་ཞིག་ཏུ་བརྫུས་ཏེ། གཉེན་སྒྲིག་ཞིག་ལ་འདོད་པ་མེད་པར་ཁ་ཐོར་བའི་བུད་མེད་ཞིག་དང་མཉམ་དུ་གསང་སྟབས་ཀྱིས་བརྩེ་དུང་ཆགས། ཁོང་གི་མཛའ་མོས་གལ་ཏེ་ཁྱོད་ཀྱི་བསམ་དོན་བཞིན་འཚོ་བ་བསྐྱལ་ཐུབ་ཚེ། ཁྱོད་ཀྱི་མི་ཚེ་ནང་ཅི་ཞིག་བྱེད་འདོད་ཡོད་དམ་ཞེས་འདྲི་སྐབས། སྒྲུང་བཤད་མཁན་ཁུ་སིམ་མེར་བསྡད་པ་རེད། དེ་ནི་འདོད་པ་ཁེངས་བ་དང་འགྱོད་བཤགས་བྱས་པ་གང་གི་ཆེད་དུའང་མ་རེད། ཅེས་བརྗོད་འདུག
ནོ་སྦེལ་རྩོམ་རིག་གཟེངས་རྟགས་ཐོབ་མཁན་ཧན་ཀང་ལགས་ཀྱིས། མི་ཁ་ཤས་ཀྱིས་ང་ལ་ནོ་སྦེལ་རྩོམ་རིག་གཟེངས་རྟགས་ཐོབ་པའི་སྐོར་བརྗོད་བྱུང་། དེ་དུས་ལྷོ་ཀོརི་ཡའི་དགོང་མོའི་ཆུ་ཚོད་བརྒྱད་པ་ཙམ་རེད། ངས་རང་ཉིད་ཀྱི་བུ་ཆུང་དང་མཉམ་དུ་དགོང་ཟས་ལ་རོལ་ཙམ་ཡིན། དེ་ནི་ཧ་ཅང་གི་ཞི་བདེའི་དགོང་མོ་ཞིག་རེད། ང་རང་དངོས་གནས་ཧང་སངས་བྱུང་། ང་རང་ལྷོ་ཀོ་རི་ཡ་རུ་ཆུང་དུས་ནས་དཔེ་ཆ་དང་མཉམ་དུ་འཚར་ལོངས་བྱུང་བ་ཡིན། ངའི་ཚོར་བ་ལྷོ་ཀོ་རི་ཡའི་རྩོམ་རིག་དང་མཉམ་དུ་འབྲེལ་བ་དམ་ཟབ་ཡོད་ཅེས་བཤད་ཐུབ། འདི་ནི་ལྷོ་ཀོ་རི་ཡའི་རྩོམ་ཡིག་ཀློག་པ་པོ་དང་། ངའི་གྲོགས་པོ། རྩོམ་པ་པོ་རྣམས་ལ་གསར་འགྱུར་ཡག་པོ་ཞིག་དུ་འགྱུར་བའི་རེ་བ་ཡོད། ཅེས་དང་། ང་ལ་མཚོན་ན་བྱིས་པའི་སྐབས་ནས་བཟུང་རྩོམ་པ་པོ་ཚང་མ་མཉམ་འབྲེལ་གྱི་ངོ་བོ་ཞིག་རེད། ཁོ་ཚོས་ཚེ་སྲོག་གི་དོན་སྙིང་འཚོལ་བཞིན་ཡོད་ཅིང་། མཚམས་རེར་ཁོ་ཚོར་ཕམ་ཁ་བྱུང་བ་དང་། སྐབས་འགར་ཁོ་ཚོ་བློ་བརྟན་འགྱུར་མེད་ཡིན་པས། ཁོ་ཚོའི་འབད་བརྩོན་དང་སྟོབས་ཤུགས་ཀྱིས་ང་ལ་སྐུལ་མ་ཐེབས་བྱུང་། རྩོམ་པ་པོ་མང་པོའི་ཁྲོད་ཀྱི་ཤུགས་རྐྱེན་ཐེབས་མཁན་ཁ་ཤས་ཀྱི་མིང་འདེམས་དགོས་ཚེ། དེ་ནི་ང་ལ་མཚོན་ན་ཧ་ཅང་ཁག་པོ་ཞིག་རེད། ཅེས་བརྗོད་འདུག
རྩོམ་པ་པོ་ཧན་ཀང་ནི་ཕྱི་ལོ་ ༡༩༧༠ ལོར་ལྷོ་ཀོ་རི་ཡའི་ཝན་ཇུ་ (gwangju )གྲོང་ཁྱེར་དུ་སྐྱེས་ཅིང་། ཁོང་མོ་ལོ་ ༩ ཐོག་ཏུ་ཁྱིམ་མི་དང་མཉམ་དུ་རྒྱལ་ས་སོལ་(Seoul) དུ་གནས་སྤོ་བྱས། ཁོང་གི་པ་ལགས་ནི་སྙན་གྲགས་ཅན་གྱི་བརྩམས་སྒྲུང་རྩོམ་པ་པོ་ཞིག་ཡིན་པ་མ་ཟད། སྒྱུ་རྩལ་དང་རོལ་མོར་དམིགས་བསལ་གྱི་དོ་སྣང་ཡོད་མཁན་ཞིག་ཡིན་འདུག ཕྱི་ལོ་ ༡༩༩༣ ལོ་ནས་བཟུང་ཁོང་མོས་ལྷོ་ཀོ་རི་ཡའི་རྩོམ་རིག་དང་སྤྱི་ཚོགས་ཞེས་པའི་དུས་དེབ་ནང་སྙན་ངག་འབྲི་མགོ་བཙུགས། ཕྱི་ལོ་ ༡༩༩༥ ལོར་ཡོ་སུའི་བརྩེ་དུང་ཞེས་པའི་སྒྲུང་ཐུང་ཕྱོགས་སྒྲིག་ཞིག་བྱས། དེའི་རྗེས་སུ་སྒྲུང་རིང་དང་སྒྲུང་ཐུང་ཁ་ཤས་ཤིག་ཀྱང་བརྩམས། དེའི་ཁྲོད་དུ་ཕྱི་ལོ་ ༢༠༠༢ ལོར་བརྩམས་པའི་ཁྱེད་ཀྱི་ལག་པ་གྲང་མོ་ཞེས་པའི་སྒྲུང་རིང་ནང་དུ། ཁོང་མོ་སྒྱུ་རྩལ་ལ་དོ་སྣང་ཡོད་པའི་རྣམ་པ་གསལ་པོར་མཐོང་ཐུབ་ཡོད། དེབ་དེ་ནི་བུད་མེད་ཀྱི་གཟུགས་བརྙན་བཞེངས་སྐྲུན་བྱེད་རྒྱུར་དགའ་བའི་བརྐོས་རིགས་སྒྱུ་རྩལ་བ་ཞིག་གར་སོང་ཆ་མེད་དུ་གྱུར་ཞིང་། ཁོས་རྒྱབ་ཏུ་སྐྱུར་བའི་རོ་མོའི་བརྩམས་ཆོས་ནང་བརྐོས་རིགས་སྒྱུ་རྩལ་བ་ཞིག་གི་སྒྱུ་རྩལ་དང་དེའི་ཁྱད་ཆོས་གཉིས་བར་འགལ་ཟླ་བྱུང་བའི་བརྒྱུད་རིམ་གསལ་སྟོན་བྱས་ཡོད། དེབ་དེའི་མཇུག་ཏུ་མི་ཚེ་ནི་རྒྱ་མཚོ་ངོགས་ཀྱི་ཤོག་བུ་ཞིག་ཡིན་ཞིང་། ང་ཚོ་ཆུ་རྐྱལ་བར་བརྫུས་ཏེ་འཚོ་གནས་བྱེད་བཞིན་ཡོད་ཅེས་བཀོད་འདུག རྒྱལ་སྤྱིའི་ཐོག་ཏུ་ཁོང་མོའི་བརྩམས་ཆོས་དཀར་ཟས་མཁན་དང་། དཔེ་དེབ་དཀར་པོ། འགྲོ་བ་མིའི་སྒྱུ་རྩལ། ང་ཚོ་ཁ་མི་བྲལ་བཅས་ལ་སྔ་རྗེས་གཟེངས་རྟགས་ཐོབ་ཡོད་འདུག
སྤྱིར་ཕྱི་ལོ་ ༡༩༠༡ ནས་ད་བར་ནོ་སྦེལ་རྩོམ་རིག་བྱ་དགའ་ཐེངས་ ༡༡༧ ལ་སྤྲད་དེ་གཟེངས་རྟགས་ཐོབ་མཁན་རྩོམ་པ་པོ་གྲངས་ ༡༢༡ བྱུང་ཡོད་པའི་ཁྲོད། ཕྱི་ལོ་ ༢༠༡༩ ལོའི་ནོ་སྦེལ་རྩོམ་རིག་བྱ་དགའ་དེ་ཡུ་རོབ་ཨོ་སི་ཊི་ཡའི་རྩོམ་པ་པོ་པི་ཊར་(Peter Handke ) དང་། ཕྱི་ལོ་ ༢༠༢༠ དེ་ཨ་རིའི་སྙན་ངག་པ་ལུ་སི་ཡ་སུ་(Louise Glück ) ། ཕྱི་ལོ་ ༢༠༢༡ དང་ ༢༠༢༢ ལོར་སྐུ་ཞབས་ཨབ་དྷུལ་ར་ཛག་གྷུར་ནཱ་ (Abdulrazak Gurnah) དང་། ཧྥ་རན་སིའི་རྩོམ་པ་པོ་ཨེ་ནི་(Annie Ernaux ) བཅས་སུ་ཐོབ། ཕྱི་ལོ་ ༢༠༢༣ ལོར་ནོར་ཝེའི་བརྩམས་སྒྲུང་དང་འཁྲབ་གཞུང་རྩོམ་པ་པོ། སྙན་ངག་པ་སྐུ་ཞབས་ཇོན་ཧྥོ་སི་( Jon Fosse) ལགས་སུ་ཕུལ་ཡོད་འདུག
གསར་འགོད་པ། བྱམས་པ་ཚེ་རིང་།
