གྲྭ་རྐྱང་ཞིག་གི་སེམས་བསྐྱེད་དང་། དེའི་གྲུབ་འབྲས།

མི་ཞིག་ལ་མཚོན་ན་ཆེས་གླེང་རིན་ཡོད་པ་ནི། སེམས་པ་བཟང་པོ་ཞིག་ཡོད་པ་དེ་ཡིན་ཞིང་། དེ་བས་ཀྱང་གལ་ཆེ་བ་ནི། སེམས་བསྐྱེད་དེ་ཉིད་ཁ་ཙམ་མིན་པར་ཉིན་རེའི་འཚོ་བའི་ནང་དངོས་སུ་ལག་བསྟར་བྱ་སྤོབས་པའི་སྙིང་སྟོབས་དེ་ཡིན། དེར་བརྟེན་བསམ་བློ་མ་འདྲ་བ་རེ་རེའི་དམིགས་རྣམ་ཐག་གཅོད་བྱ་ཚུལ་གྱིས་མི་དང་མིའི་བར་གྱི་རིན་ཐང་དང་། བརྩི་མཐོང་ལ་བཟང་ངན་དང་མཐོ་དམན་གྱི་ཁྱད་པར་ཤོར་གྱི་ཡོད་ཨང་།

གནད་དོན་དེས་ངས་༸གོང་ས་མཆོག་གི་བཀའ་སློབ་ཅིག་ཝ་ལེར་དྲན་བྱུང་། དེའི་ནང་ཁོང་གི་ཞལ་ནས་བཀའ་སྩལ་དོན།  “ རྒྱ་གར་ལ་འདས་པའི་ལོ་བཞི་བཅུ་ཞེ་གྲངས་ཤིག་གི་རིང་ལ་རིས་མེད་གནང་མཁན་ངས་ངོ་ཤེས་པ་ས་སྐྱའི་མཁན་པོ་རིན་ཆེན་ཁོང་གཅིག་བུ་ཡིན་ ” གསུངས་འདུག དེ་ལྟར་གསུངས་དོན་ཡང་མཁན་པོ་རིན་ཆེན་ལགས་ཀྱིས་བསྟན་པ་རིས་མེད་ལ་ཐོས་བསམ་རྒྱ་ཆེར་མཛད་པའི་ཐོག་མའི་སེམས་བསྐྱེད་དང་། དེ་ལས་བྱུང་བའི་གྲུབ་འབྲས་ལ་གཟེངས་བསྟོད་མཛད་པ་ཞིག་རེད།

བཀའ་སློབ་དེ་ནི་ཁོང་གིས་ཕྱི་ལོ་ ༡༩༩༣ ལོར་ལ་དྭགས་ཞི་བའི་ཚལ་དུ་སྩལ་ཡོད་ཅིང་། དེ་ནི་མིག་སྔར་༸གོང་ས་མཆོག་གིས་བོད་ཀྱི་མཁས་པ་ཞིག་ལ་བསྔགས་པ་མཛད་པ་ཚད་མཐོ་ཤོས་ཀྱི་གྲས་ཡིན། བཀའ་སློབ་དེས་བོད་བརྒྱུད་ནང་བསྟན་པའི་སྡེ་སྤྱི་དང་། ཡང་སྒོས་དགེ་ལྡན་པའི་གདན་ས་ཁག་ཏུ་རིས་མེད་ཀྱི་གསུང་རབ་ལ་ཐུགས་སྣང་དང་སློབ་གཉེར་ཐད་ཤུགས་རྐྱེན་ཆེན་པོ་ཐེབས་ཡོད།

སྐུ་ཞབས་ཁོང་ནི། ཕྱི་ལོ་ ༡༩༩༧ ལོར་བོད་ནས་གསར་དུ་འབྱོར་ཞིང་། ཕྱི་ལོ་ ༢༠༠༣ ལོར་རྒྱ་གར་རྡ་རམ་ས་ལའི་ཉེ་འཁོར་གྱི་ཉམ་ཐག་བྱིས་པ་ཚོའི་ཆེད་དུ་རྒྱལ་སྲས་བྱང་ཆུབ་སེམས་དཔའི་སྤྱོད་པ་བདག་གིར་བྱེད་པའི་ “ གཏོང་ལེན ” ཚོགས་པ་དེ་གསར་འཛུགས་གནང་ཡོད། ཁོང་གིས་དེ་ལྟར་གནང་བའི་རྒྱུ་མཚན་ནི། ཉམ་ཐག་པའི་བྱིས་པ་འགས་གད་སྙིགས་ཀྱི་གསེང་ནས་ཟས་ལྷག་སྒུམ་སྟེ་ངན་ངོན་གྱི་མི་ཚེ་སྐྱེལ་བཞིན་པ་དང་། ནད་དང་། ལྟོགས་སྐོམ་གྱིས་མནར་ཏེ་འཆི་བཞིན་པ་མཐོང་རྗེས། ༸གོང་ས་མཆོག་གི་བྱམས་བརྩེའི་ལམ་སྟོན་ཡིད་ལ་དྲན་ཏེ། དེ་དག་གི་ཆེད་ལས་དོན་ཞིག་མ་སྒྲུབ་ན་བཟང་སྤྱོད་དང་འགལ་ཡོང་དགོངས་ནས། ད་གཟོད་རང་གི་མི་ཚེ་དང་། སེམས་བསྐྱེད་གཉིས་ཀ་གཞན་དོན་དུ་བསྔོས་པའི་གྲྭ་རྐྱང་ངོ་མཚར་ཅན་ཞིག་ཡིན།

ངས་ཁོང་ལ་ ‘’ ངོ་མཚར་ཅན་ ‘’ ཞེས་འབོད་དོན་ནི། གསལ་པོར་བཤད་ན། སྐུ་ཞབས་ཁོང་ལ་འུ་ཅག་ལས་ཀྱང་ལྷག་པའི་༸གོང་ས་མཆོག་གི་བྱིན་རླབས་དང་། དམ་པའི་ཆོས་ནས་གསུངས་པའི་གཞན་ཕན་གྱི་བསམ་བློ་རྨ་མེད་པ་ཞིག་ལྡན་པས་ཡིན།

ཀློག་པ་པོ་ལགས། ཁྱེད་ཀྱིས་གཏོང་ལེན་གྱི་སྐུ་ཞབས་ཁོང་གི་སྐོར་ཤེས་སམ། ཁྱེད་ཅག་ཁོང་གིས་མཛའ་བརྩེས་སྐྱོང་བཞིན་པའི་གཏོང་ལེན་སློབ་གླིང་སྟེ། ཉམ་ཐག་པའི་བྱིས་པ་བརྒྱ་ཕྲག་ལས་གྲུབ་པའི་ཤེས་རིག་གི་གླིང་ག་ཆུང་ཆུང་དེར་ཕེབས་མྱོང་ངམ།

གལ་སྲིད་མ་མྱོང་ཚེ། རྡ་སར་འབྱོར་ཐེངས་གཅིག་ལ་གཏོང་ལེན་དུ་ལན་གཅིག་ཕེབས་དང་། གནས་དེ་ནས་བོད་ཀྱི་གྲྭ་རྐྱང་དཀྱུས་མ་ཞིག་གིས་བྱམས་བརྩེ་ཉམས་སུ་བཞེས་པའི་ཞབས་རྗེས་གསལ་པོར་མཐོང་ཐུབ་པར་མ་ཟད། གནས་དེ་ནས། རྒྱལ་ཁབ་ཤོར་ཡང་། གཞན་ཕན་གྱི་སྙིང་སྟོབས་ནམ་ཡང་ཤོར་མ་མྱོང་བའི་བོད་མི་དཀྱུས་མ་ཞིག་གིས་རྒྱ་གར་གྱི་རིམ་པ་ཧ་ཅང་དམའ་བའི་དབུལ་ཕོངས་ཀྱི་སྤྱི་ཚོགས་ཁྲོད་བོད་མིའི་ལྷག་བསམ་གྱི་རང་མདོག་གཙང་མ་ཇི་ལྟར་རྩ་བ་འབུས་ཤིང་ལོ་འདབ་རྒྱས་པའི་ངང་ཚུལ་དེ་མཇལ་ཐུབ་ཅིང་། རྒྱ་གར་ཚ་བའི་ལུང་པ་ནས་གཞན་དོན་དུ་དཀའ་སྤྱད་ཀྱི་རྔུལ་ཆུ་ཁྲོམ་ཁྲོམ་དུ་བཞུར་བའི་བརྒྱུད་རིམ་ཀྱག་ཀྱོག་དེ་གཏིང་ཟབ་པོར་རིག་ཐུབ། ད་དུང་་་་ཁོང་གི་བྱམས་བརྩེའི་སྙིང་སྟོབས་ལས་བྱུང་བའི་རླབས་ཆེན་གྱི་རྨི་ལམ་ཇི་ལྟར་མངོན་དུ་གྱུར་བའི་ལོ་ཟླའི་མཛེས་པ་དག་ཁྲ་ཆུང་མིག་གིས་མཐོང་ཐུབ་པར་མ་ཟད། དྭངས་གཙང་ཡིད་ཀྱིས་རྗེན་པར་མྱོང་ཐུབ་བོ། །

དེས་ཀྱང་ག་ལ་ཚད་དེ། གད་སྙིགས་རྒུམ་སྟེ་འཚོ་བ་སྐྱེལ་བཞིན་པའི་རྒྱ་གར་དབུལ་ཕོངས་ཀྱི་བྱིས་པ་ཁྱུ་ཞིག་ལ། འཚོ་བ་སྦྱར། ཤེས་རིག་བསླབ་སྟེ། མི་ཚེ་དོན་ལྡན་བཟོས་དང་བཟོ་བཞིན་པའི་ཡིད་འཕྲོག་གི་ལྟད་མོ་དག་གཅིག་རྗེས་གཉིས་མཐུད་ཀྱིས་རྟོགས་ཐུབ་བོ། །

མཚམས་འདིར་ངས་སྐུ་ཞབས་ཁོང་གི་སྐྱ་ཆི་ལེར་གྱུར་ཟིན་པའི་དབུ་སྐྲའི་ཁ་དོག་དང་། ནམ་ཡང་འཛུམ་མདངས་ཀྱིས་འཁྱུད་པའི་ཞི་འཇམ་གྱི་བཞིན་རས། དཀའ་ཁག་ཅི་ཙམ་ཆེ་ཡང་མགོ་སྒུར་མ་མྱོང་བའི་ངང་རྒྱུད་རིང་བའི་གཤིས་ཀ ཁ་ཙམ་མིན་པར་འཚོ་བ་དངོས་ཀྱི་ནང་རང་ལས་གཞན་གཅེས་པར་འཛིན་སྤོབས་པའི་སྐུ་ཞབས་ཁོང་དང་ཁོང་ལྟ་བུ་ནི། དུས་རབས་འདིར་བོད་ཀྱི་དགེ་འདུན་པའི་དཔེ་མཚོན་གསོན་པོར་བགྲང་ཆོག་ལ། མིག་དཔེ་ངོ་མར་བཀུར་ཆོག མདོར་ན། ཁོང་གི་སྐུ་གསུང་ཐུགས་ཀྱི་འགུལ་སྐྱོད་རེ་རེས་བོད་དང་བོད་ཀྱི་ཁྱད་ནོར་གླེང་གི་འདུག་ཅིང་། ཁོང་གི་ལྷད་མེད་པའི་འཛུམ་མདངས་རེ་རེས་བོད་ཀྱི་མེས་པོ་གོང་མ་ཚོའི་སྙིང་སྟོབས་དང་མཛད་རྗེས་གླེང་གི་འདུག་པས། རྒྱ་གར་གྱི་བྱིས་པ་བདག་མེད་ཚོ་དང་། ཕ་མ་ཉམ་ཐག་ཚོའི་ཆེད་དུ་རླབས་ཆེན་གྱི་གྲྭ་རྐྱང་ཁོང་སྐུ་ཚེ་བརྟན་དགོས་ཨང་།

ཅེས་པའང་གཏོང་ལེན་གྱི་འགན་འཛིན་སྐུ་ཞབས་འཇམ་དབྱངས་ལགས་ཀྱི་ངོ་མཚར་བའི་མཛད་རྗེས་ལ་སྙིང་ནས་ཡི་རངས་ཏེ་ཨ་འདུས་པས་རང་ཤག་ཏུ་ཤར་མར་བྲིས་སོ། །