བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྦར་སི་ལོ་ན་བོད་ཁང་དབུ་བརྙེས་ཏེ་ལོ་ངོ་ ༣༠ འཁོར་བའི་དུས་དྲན་སྲུང་གཙི་དང་བསྟུན་བོད་ཀྱི་ས་བབ་ཆགས་ཚུལ་གྱི་གལ་གནད་དང་འབྲེལ་ནས་གསུང་བཤད་གནང་ཡོད་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཡུ་རོབ་རྒྱལ་ཁབ་ཁག་ཏུ་གཞུང་འབྲེལ་འཚམས་གཟིགས་གནང་མུས་ཡིན་པ་ལྟར། ཁ་སང་ཕྱི་ཚེས་ ༡༤ ཉིན་སྲིད་སྐྱོང་སྤེན་པ་ཚེ་རིང་མཆོག་སྦར་སི་ལོ་ནའི་གནམ་ཐང་དུ་ཕེབས་འབྱོར་བྱུང་ཞིང་། སྐབས་དེར་ཡུ་རོབ་དང་ཨ་ཧྥི་རི་ཀའི་སྤྱི་འཐུས་ཐུབ་བསྟན་དབང་ཆེན་ལགས་དང་། སེ་པན་བོད་རིགས་ཚོགས་པ། ས་གནས་བོད་མི། བོད་དོན་རྒྱབ་སྐྱོར་བ་ཁག་ཅིག་གིས་ཕེབས་བསུ་སྣེ་ལེན་ཞུས་ཡོད་འདུག
ཟླ་འདིའི་ཕྱི་ཚེས་ ༡༠ ནས་ ༡༦ བར་སྦར་སི་ལོ་ན་བོད་ཁང་ (Casa Del Tibet Barcelona) གི་གོ་སྒྲིག་འོག སྦར་སི་ལོ་ནའི་བོད་ཁང་དབུ་བརྙེས་ནས་ལོ་ངོ་ ༣༠ འཁོར་བའི་དུས་དྲན་སྲུང་གཙི་དང་བསྟུན། བོད་ཀྱི་དུས་སྟོན་དང་འགྲོ་བ་མིའི་ཐོབ་ཐང་ཐེངས་བཅུ་གཉིས་པ་འཚོགས་བཞིན་ཡོད་པ་ལྟར། ཁ་སང་ཕྱི་ཚེས་ ༡༤ ཉིན་གྱི་ཕྱི་དྲོའི་ཆུ་ཚོད་ ༧ པའི་སྟེང་སྦར་སི་ལོ་ན་བོད་ཁང་དུ། སྲིད་སྐྱོང་སྤེན་པ་ཚེ་རིང་མཆོག་གིས་ཆུ་ཚོད་གཉིས་རིང་བོད་ཀྱི་ས་བབ་ཆགས་ཚུལ་གྱི་གལ་གནད་ཐད་གསུང་བཤད་གནང་ཡོད་འདུག དེ་རྗེས་སྦར་སི་ལོ་ནའི་ཁུལ་གྱི་ཆབ་སྲིད་མི་སྣ་དང་ཁུལ་དེར་གནས་སྡོད་བོད་རིགས་མང་ཚོགས་མཇལ་འཕྲད་གནང་འཆར་འདུག
ཟླ་འདིའི་ཕྱི་ཚེས ༡༢ ཉིན་རྒྱབ་ཏུ་སྲིད་སྐྱོང་མཆོག་ཡུ་རོབ་རྒྱལ་ཁབ་པོར་ཅུ་གྷལ་ (Portugal) གྱི་རྒྱལ་ས་ལི་སི་བྷོན་ (Lisbon) དུ་ཕེབས་འབྱོར་བྱུང་སྟེ། ཕྱི་ཚེས་ ༡༣ ཉིན་གྱི་སྔ་དྲོར་ལི་སི་བྷོན་ནང་དུ་རྟེན་གཞི་བྱས་པའི་ལུ་སཱ་གསར་ཁང་ (Lusa News Agency) དང་ཨེག་སི་པི་རེ་སོ་གསར་ཤོག་ཁང་ (Expresso) གཉིས་ལ་བཅར་འདྲི་གནང་གྲུབ་མཚམས། པོར་ཏོ་གྲོང་སྡེའི་སྤྱི་ཁྱབ་གཞོན་པ་ཟུར་པ་དང་། ཆབ་སྲིད་པ་དང་སློབ་དཔོན་པོ་ལོ་མོ་ར་ཡི་སི་ (Paulo de Morais) ལགས་དང་། སློབ་དཔོན་བྷ་ཊ་ལ་ (Dr. Batalha) ལགས་རྣམ་གཉིས་དང་མཇལ་འཕྲད་གནང་ཡོད་འདུག ཕྱི་ལོ་ ༢༠༠༡ དང་ ༢༠༠༧ ལོར་༧གོང་ས་རྒྱལ་བ་རིན་པོ་ཆེ་མཆོག་པོར་ཅུ་གྷལ་དུ་ཆིབས་བསྒྱུར་སྐབས། སློབ་དཔོན་པོ་ལོ་མོ་ར་ཡི་སི་ལགས་ནི་གོ་སྒྲིག་གནང་མཁན་གཙོ་བོའི་གྲས་ཤིག་ཡིན་འདུག
ཉིན་དེར་སྲིད་སྐྱོང་སྤེན་པ་ཚེ་རིང་མཆོག་གིས་པོར་ཅུ་གྷལ་གྲོས་ཚོགས་ཀྱི་གཞུང་འཛིན་སྲིད་དོན་ཚོགས་པའི་གྲོས་ཚོགས་འཐུས་མི་ལྕམ་རེ་གྷི་ནཱ་ (Regina Bastos) ལགས་དང་། སྐུ་ཞབས་བྷུ་རུ་ནོ་ (Bruno Ventura) ལགས། དེ་བཞིན་ཕྱོགས་འགལ་སྲིད་དོན་ཚོགས་པ་སོགས་ཆབ་སྲིད་ཚོགས་པའི་གྲོས་ཚོགས་འཐུས་མི་ ༦ དང་མཇལ་མོལ་གནང་སྟེ། བོད་ཀྱི་ས་ཁམས་ཆབ་སྲིད་ཀྱི་གནད་དོན་དང་། ད་ལྟའི་བོད་ནང་གི་ཛ་དྲག་གི་གནས་སྟངས་སྐོར་འགྲེལ་བརྗོད་ཀྱིས་པོར་ཅུ་གྷལ་གྲོས་ཚོགས་ཀྱི་ངོས་ནས་བོད་ཀྱི་ཛ་དྲག་གི་གནས་སྟངས་སེལ་ཐབས་ལ་འབད་བརྩོན་གནང་རྒྱུའི་རེ་སྐུལ་ཞུས་པ་མ་ཟད། ཨ་རིའི་གྲོས་ཚོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་གནད་དོན་ཐད་བཞེངས་ཕྱོགས་གསལ་པོ་བཟོ་ཡོད་པ་ལྟར། པོར་ཅུ་གྷལ་གྲོས་ཚོགས་ཀྱིས་ཀྱང་༧སྐུའི་ཡང་སྲིད་ཀྱི་གནད་དོན་ཐོག་བཞེངས་ཕྱོགས་གསལ་པོ་བཟོ་དགོས་པའི་འབོད་སྐུལ་ཞུས་ཡོད་འདུག སྐབས་དེར་སྲིད་སྐྱོང་མཆོག་དང་ལྷན་དུ་སྦེལ་འཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། བོད་དོན་རྒྱབ་སྐྱོར་ཚོགས་པའི་ (Grupo de Apoio ao Tibete-Portugal) ཚོགས་མི་ཨེ་ལེག་སན་ཌི་ར་ (Alexandra Correia) ལགས་ལྷན་བཅར་ཞུས་ཡོད་པ་རེད།
ཉིན་དེར་སྲིད་སྐྱོང་སྤེན་པ་ཚེ་རིང་མཆོག་པོར་ཅུ་གྷལ་གྱི་རྒྱལ་ས་ལི་སི་བྷོན་དུ་རྟེན་གཞི་བྱས་པའི་ཨ་རིའི་གཞུང་ཚབ་པ་གཞོན་པ་སྐུ་ཞབས་ཌོ་ཧྥི་ (Dough Koneff) ལགས་དང་། ལི་སི་བྷོན་གྱི་ཆོས་དད་རང་དབང་ཚོགས་ཆུང་གི་ཚོགས་གཙོ་ཝེ་ར་ (Dr. Vera Jardim) ལགས་དང་ཐུག་འཕྲད་ཀྱིས་བོད་དོན་གླེང་སློང་གནང་ཡོད་འདུག
གསར་འགོད་པ། བསྟན་འཛིན་ཕུར་བུ།
