རྒྱ་གཞུང་གིས་བོད་རྔ་བ་ཁུལ་གཟི་རྩ་སྡེ་དགུ་རྫོང་དུ་རྒྱ་ནག་གི་ཡུལ་སྐོར་བ་ཇེ་མང་དུ་གཏོང་ཆེད་སི་ཁྲོན་མེན་དབྱང་གྲོང་ཁྱེར་ནས་ཨོ་ལར་ཕུག་ལམ་ཟེར་བ་ཞིག་རྒྱག་བཞིན་འདུག་ལ་གཟི་རྩ་སྡེ་དགུ་རྫོང་སྲིད་གཞུང་གིས་ཁོར་ཡུག་སྲུང་སྐྱོབ་ཆེད་རྫོང་གཅིག་གི་སྲིད་ཇུས་གཅིག་ཅེས་པའི་ཁོར་ཡུག་སྲུང་སྐྱོབ་ཀྱི་སྲིད་ཇུས་ཤིག་གཏན་འབེབ་བྱས་འདུག
རྒྱ་ནག་གཞུང་གིས་བོད་ཀྱི་མཛེས་ལྗོངས་གྲགས་ཅན་གཟི་རྩ་སྡེ་དགུར་ཡུལ་སྐོར་བ་སྔར་ལས་ཇེ་མང་དུ་གཏོང་ཆེད། སི་ཁྲོན་མེན་དབྱང་གྲོང་ཁྱེར་ནས་གཟི་རྩ་སྡེ་དགུ་བར་ཨོ་ལར་ཕུག་ལམ་ཟེར་བ་ཞིག་གསར་རྒྱག་བྱེད་བཞིན་ཡོད་པ་དང་། ལོ་རྗེས་མར་ཕུག་ལམ་འཛུགས་སྐྲུན་གྱི་ལས་གཞི་དེ་འགྲུབ་རྩིས་ཡོད་འདུག སྤྱིར་བཏང་སི་ཁྲོན་ཁྲིན་ཏུའུ་གྲོང་ཁྱེར་ནས་གཟི་རྩ་སྡེ་དགུ་བར་སྤྱི་ལེ་ ༣༧༠ ལྷག་དང་རླངས་འཁོར་གྱིས་ཆུ་ཚོད་ ༧ ལྷག་འགྲོ་དགོས་ཀྱི་ཡོད་ཀྱང་། ཨོ་ལར་ཕུག་ལམ་ཟེར་བ་དེ་འགྲུབ་ན་ཆུ་ཚོད་ ༤ ཙམ་ལས་འགོར་གྱི་མེད་སྐོར་དང་། ཕུག་ལམ་དེ་ནི་རྒྱ་ནག་ཅིའུ་མེན་མྱུར་བགྲོད་གཞུང་ལམ་གྱི་ལས་གཞི་ཆེན་པོ་ཞིག་ཡིན་སྐོར་བསྒྲགས་འདུག
ཅིའུ་མེན་མྱུར་བགྲོད་གཞུང་ལམ་ཟེར་བ་དེའི་རིང་ཚད་ལ་སྤྱི་ལེ་ ༢༤༤ ཡོད་ཅིང་། ལས་གཞི་དེའི་ནང་དུ་ཟམ་པ་ ༡༢༧ དང་ཕུག་ལམ་ ༤༥ ཡོད་པ་མ་ཟད། ད་ལྟའི་ཆར་ཟམ་པ་ ༡༢༦ དང་ཕུག་ལམ་ ༤༢ འཛུགས་སྐྲུན་གྲུབ་ཟིན་ཡོད་འདུག་ལ། ཕྱི་ལོ་ ༢༠༢༥ ནས་ཤར་གཏོང་བྱས་ཏེ། ནུབ་ནས་ཀན་སུའུ་དང་། མཚོ་སྔོན། ཤིན་ཅང་བཅས་ཀྱི་མྱུར་བགྲོད་གཞུང་ལམ་ལ་མཐུད་ནས་རྒྱུད་གཅིག་ལམ་གཅིག་གི་འཛུགས་སྐྲུཡན་ལས་གཞིའི་ཁྲོད་གལ་ཆེན་ཞིག་ཡིན་ལུགས་དང་། ཨོ་ལར་ཕུག་ལམ་གྱིས་གཟི་རྩ་སྡེ་དགུའི་འགྲིམ་འགྲུལ་དང་ཡུལ་སྐོར་མཉམ་འདྲེས་འཕེལ་རྒྱས་ལ་སྐུལ་འདེད་ཆེན་པོ་གཏོང་རྒྱུ་ཡིན་སྐོར་བརྗོད་འདུག
ཕྱི་ལོ་ ༢༠༢༣ ཟླ་ ༤ ཚེས་ ༡༠ ཉིན་གཟི་རྩ་སྡེ་དགུ་རྫོང་སྲིད་གཞུང་གིས་ཁུལ་དེའི་རླུང་ཁམས་ཆེན་མོའི་འབག་བཙོག་སྔོན་འགོག་གི་རྫོང་གཅིག་སྲིད་ཇུས་གཅིག་གི་ལས་དོན་ལག་བསྟར་བྱེད་ཕྱོགས་ཞེས་པའི་དོན་ཚན་ ༧ ཅན་གྱི་ཁོར་ཡུག་སྲུང་སྐྱོབ་ཀྱི་སྲིད་ཇུས་ཤིག་གཏན་འབེབ་བྱས་པའི་ནང་། དེའི་ནང་གཟི་རྩ་སྡེ་དགུའི་ཁོར་ཡུག་སྲུང་སྐྱོབ་བྱས་ཏེ་ལྗང་མདོག་གི་ཚད་མཐོ་རུ་གཏོང་དགོས་པ་དང་། འཛུགས་སྐྲུན་ས་ཚིགས་དང་བཟོ་གྲྭ་ཁག་གི་ཐལ་རྡུལ་ཉུང་དུ་གཏོང་དགོས་པ། དངོས་ཟོག་སྐྱེལ་འདྲེན་བྱེད་པའི་གྲངས་འབོར་ཉུང་དུ་དགོས་པ། རླངས་འཁོར་ཉམས་བཟོའི་ལས་རིགས་ཀྱི་བཅོས་སྒྲིག་ལ་ཤུགས་སྣོན་རྒྱག་པ། གད་སྙིགས་མེར་སྲེག་བཟོ་གྲྭའི་ཁོར་ཡུག་དོ་དམ་ལ་ཤུགས་སྣོན་རྒྱག་པ། གྲོང་ཁྱེར་གྱི་གཞུང་ལམ་གཙང་སྦྲ་བྱེད་པའི་ནུས་པ་ཆེ་རུ་གཏོང་དགོས་པ། དུས་ཆེན་སྐབས་ཤོག་སྦག་སོགས་འབར་རྫས་བཀག་འགོག་བྱེད་པ། ཧུར་ཐག་སྒོས་རྡོ་སོལ་གློག་གིས་ཚབ་བྱེད་པ་དང་མེ་ཤིང་གློག་གིས་ཚབ་བྱེད་པའི་ལས་དོན་ལ་སྐུལ་འདེད་གཏོང་བར་སྣེ་འཁྲིད་ཤུགས་སྣོན་དང་། ཁྲིམས་འཛིན་ལྟ་སྐུལ་ནན་པོ་དགོས་པ། ད་དུང་བརྒྱུད་ལམ་ནས་ཡོངས་བསྒྲགས་བྱེད་པ་སོགས་ཀྱི་བྱེད་ཐབས་ལ་ཤུགས་སྣོན་དགོས་སྐོར་བཀོད་འདུག
ཕྱི་ལོ་ ༢༠༡༧ ཟླ་ ༠༨ ཚེས་ ༠༨ དགོང་མོ་ནས་ཕྱི་ཚེས་ ༡༠ ཉིན་གྱི་ཉིན་གུང་བར་དུ་གཟི་རྩ་སྡེ་དགུ་རུ་ཚད་རིམ་མི་འདྲ་བའི་ས་ཡོམ་ཐེངས་ ༡༠༠༠ ལྷག་བརྒྱབ་ཡོད་པ་དང་། ཕྱི་ཚེས་ ༩ ཉིན་གཟི་རྩ་སྡེ་དགུའི་ཉེ་འཁོར་གྱི་རི་བོ་རྣམས་ནས་རྦབ་རྡོ་འགྲུལ་བ་དང་ས་རུད་བྱུང་སྟེ་ཡུལ་སྐོར་བ་ལྔ་ཚུད་པའི་མི་ ༡༩ རྐྱེན་འདས་དང་། མི་ ༢༤༧ ལ་རྨས་སྐྱོན་ཕོག དེ་བཞིན་གཟི་ཚ་སྡེ་དགུའི་རྫོང་ཁོངས་སུ་ཡོད་པའི་གཡུང་དྲུང་བོན་གྱི་དགོན་པ་ཆེ་ཤོས་ཁོད་སྤུངས་གཡུང་དྲུང་དར་རྒྱས་གླིང་དང་། རབ་དབེན་དགོན་བཀྲ་ཤིས་ཕུན་ཚོགས་གླིང་གི་གཡུང་དྲུང་ལྷ་རྩེ་མཆོད་རྟེན། མཛེས་ལྗོངས་ཀྱི་འབབ་ཆུ་གྲགས་ཅན་དང་ཀླུ་གཉན་གསེར་མཚོ་སོགས་ལའང་ཞིག་རལ་འབག་བཙོག་ཆེན་པོ་ཐེབས་ཡོད་པ་རེད།
གཟི་རྩ་སྡེ་དགུའི་མཛེས་ལྗོངས་དང་འབབ་ཆུ་སོགས་སྙན་གྲགས་ཆེ་བ་མ་ཟད། ཆོས་དང་རིག་གཞུང་གི་ལྟེ་བ་ཞིག་ཀྱང་ཆགས་ཡོད་པ་རེད། རྫོང་ཁོངས་དེར་གཟི་རྩ་རབ་དབེན་དགོན་བཀྲ་ཤིས་ཕུན་ཚོགས་གླིང་དང་། ས་ཡུལ་དགོན་བཀྲ་ཤིས་ཕུན་ཚོགས་གླིང་། བཀྲ་ཤིས་མེ་ཏོག་གླིང་། རྩུབ་མ་སྟག་སྐྱང་གཡུང་དྲུང་དར་རྒྱས་གླིང་སོགས་བོན་གྱི་དགོན་སྡེ་ཁག་ཅིག་ཡོད་པ་མ་ཟད། གནས་ཆེན་རྫ་ཕྱུག་བྲག་དཀར་དང་མཛེས་ལྗོངས་ཀླུ་གཉན་གསེར་མཚོ། གཟི་ཚ་སྡེ་དགའི་མཛེས་ལྗོངས་སོགས་ཆ་སྙོམས་ཀྱིས་ཉིན་རེར་ཡུལ་སྐོར་བ་༢༣༠༠༠ ལྷག་རེ་ཡོང་གི་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
