ཨ་རིའི་གློག་བརྙན་འཁྲབ་སྟོན་པ་ཞིག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས། 

ཨ་རིའི་ཧོ་ལི་ཝོ་ཌིའི་གློག་བརྙན་འཁྲབ་སྟོན་པ་སྐུ་ཞབས་ཧྥོ་རེ་སི་ཊུ་ལགས་དང་ཁོང་གི་བུ་མོ་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་རྒྱུ་བྱུང་བར་དགའ་སྤྲོ་ཚད་མེད་སྐྱེས་ཡོད་སྐོར་བརྗོད་སོང་།

དེ་རིང་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་ཧྥོ་རེ་སི་ཊུ་ (Forest Whitaker) ལགས་ཀྱིས་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་ཅིང་། སྐབས་དེར་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཡུན་རིང་བརྟན་པའི་སྨོན་ལམ་བཏབ་ཡོད་སྐོར་སོགས་བརྗོད་སོང་ལ།  དེ་རིང་ཁོང་དང་ཁོང་གི་བུ་མོས་བོད་ཀྱི་འགྲེམས་སྟོན་ཁང་དུ་ལྟ་སྐོར་གནང་འདུག

མཇལ་ཁ་གྲུབ་རྗེས་ཁོང་གིས་འདི་གའི་གསར་འགོད་པར། དེ་རིང་སླར་ཡང་༧གོང་ས་རྒྱལ་བ་རིན་པོ་ཆེ་མཆོག་མཇལ་རྒྱུའི་གོ་སྐབས་བཟང་པོ་ཞིག་བྱུང་། ང་ལ་དེ་སྔོན་ཁོང་མཇལ་རྒྱུའི་གོ་སྐབས་བྱུང་ཡང་། དེ་རིང་དངོས་སུ་མཇལ་རྒྱུ་བྱུང་བར་དགའ་སྤྲོ་ཚད་མེད་སྐྱེས་བྱུང་། ངས་ཁོང་གི་སྐུ་གཟུགས་གསལ་ཐང་དང་སྐུ་ཚེ་ཡུན་རིང་བརྟན་པའི་སྨོན་ལམ་བཏབ་ཡོད་ལ། ངས་ཁོང་ནི་ཞི་བདེའི་མཚོན་རྟགས་ཤིག་ཏུ་ངོས་འཛིན་བྱེད་ཀྱི་ཡོད། ཅེས་དང་།  དེ་རིང་ངའི་བུ་མོ་ཡང་འདིར་ཡོང་ཡོད། ཁོང་མོར་ཡང་༧གོང་ས་རྒྱལ་བ་རིན་པོ་ཆེ་མཆོག་མཇལ་རྒྱུ་བྱུང་བར་དགའ་སྤྲོ་ཚད་མེད་སྐྱེས་འདུག ཅེས་བརྗོད་སོང་།

སྐུ་ཞབས་ཧྥོ་རེ་སི་ཊུ་ལགས་ཀྱིས་ཕྱི་ལོ་ ༢༠༡༧ ཟླ་ ༧ ཚེས ༢༣ ཉིན་ཨ་རིའི་གྲོང་ཁྱེར་མི་ཨེ་ལ་ལི་སི་ (Minneapolis) རུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ནས། ཉིན་དེར་༧མགོན་པོ་གང་ཉིད་དང་ལྷན་བྱམས་བརྩེའི་སྐོར་གྱི་བགྲོ་གླེང་གི་ཚོགས་འདུར་ཞུགས་ཏེ་དྲི་བ་དྲི་ལན་སོགས་གནང་། ཁོང་ནི་ཨ་རིའི་གློག་བརྙན་འཁྲབ་ཁྲིད་པ་དང་། བཟོ་སྐྲུན་པ། འཁྲབ་སྟོན་པ་གྲགས་ཅན་ཞིག་ཡིན་པ་མ་ཟད། ཨོ་སི་ཁར་གློག་བརྙན་གཟེངས་རྟགས་ཚུད་པའི་རྒྱལ་སྤྱི་རིམ་པའི་གཟེངས་རྟགས་མང་དག་ཅིག་ཐོབ་ཡོད་འདུག དེ་བཞིན་ཁ་སང་ཕྱི་ཚེས་ ༣ ཉིན་ཁོང་གིས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཐུག་འཕྲད་གནང་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།